مغامرات عصابة "حساس"

إرسال موضوع جديد   إرسال مساهمة في موضوع

صفحة 2 من اصل 7 الصفحة السابقة  1, 2, 3, 4, 5, 6, 7  الصفحة التالية

استعرض الموضوع السابق استعرض الموضوع التالي اذهب الى الأسفل

رد: مغامرات عصابة "حساس"

مُساهمة  Scorpion في الخميس سبتمبر 25, 2014 10:43 am

سقراط المصري
تاريخ المشاركة 30 June 2004 - 04:43 AM
[quote]
اخي الفاضل سكوب
ماعنديش تعليق غير انك بالفعل موهوب ، فهل هذا يكفي!

ظريفه وفكرتها حلوه واضحكتني وامتعتني وخلتني عرفت كيف يفكر اعضاء المحاورات. stnd::

وواقعيه جداً ، وكأني رأيت سي السيد فعلاً في الحقيقه.

احييك وارفع لك القبعه او العمه !

تحاتي لك ولجنيور ، وسلام خاص لأمشير ولقهوة مصر 90.

سقراط :rolleyes:
avatar
Scorpion

المساهمات : 1712
تاريخ التسجيل : 30/09/2012
العمر : 27

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: مغامرات عصابة "حساس"

مُساهمة  Scorpion في الخميس سبتمبر 25, 2014 10:44 am

se_ Elsyed
تاريخ المشاركة 30 June 2004 - 11:25 AM
الله ينور يا سكوب ... شديدة بصراحة ..

بس اللي صعبان عليه في القصة دي كلها الواد جنيور إبنك .. فمع إنك عارف إنه ألدغ إلا إنك إمعاناً في تعذيبه مختار له ناس أساميهم كلها مشاكل :

أونكل ثين ثين

عمو حثيث

جدو إبن مثر

بابي ثكوب ..



كما وعدتكم فقد إنتهيت من تأليف وتلحيم قصة " العصابة المفترية والمافيا الإيطالية" وسأقوم بكويها ونشرها بمجرد ما أفضى وأخلص فومين الغسيل اللي في إيدي .
avatar
Scorpion

المساهمات : 1712
تاريخ التسجيل : 30/09/2012
العمر : 27

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: مغامرات عصابة "حساس"

مُساهمة  Scorpion في الخميس سبتمبر 25, 2014 10:44 am

فــيــروز
تاريخ المشاركة 30 June 2004 - 11:28 AM

هذه الكصه و إن دلت على شئ فإنما تدل على موهبه دفينه mc: لا تحتاج سوى كشاف ماهر hg):: ينكب عنها او ياخد بيدها من الحفره اللى وقعت فيها ha)
avatar
Scorpion

المساهمات : 1712
تاريخ التسجيل : 30/09/2012
العمر : 27

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: مغامرات عصابة "حساس"

مُساهمة  Scorpion في الخميس سبتمبر 25, 2014 10:45 am

Farida
تاريخ المشاركة 30 June 2004 - 12:42 PM
مش ممكن يا سكوب انت فعلا دمك خفيف و حكاياتك فيها ذكاء و قدرة على الأضحاك ما فكرتش تكتب سيناريوهات ....اللى حواليا افتكرونى اتجننت لما لاقونى باضحك بصوت عالى و خصوصا على جمصه و سى السيد و هو رايح الكورس ...
باقولك صحيح مش خايف حد ياخد افكارك و ينشرها فى كتاب و لا حاجه
avatar
Scorpion

المساهمات : 1712
تاريخ التسجيل : 30/09/2012
العمر : 27

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

العصابة المفترية والمافيا الإيطالية

مُساهمة  Scorpion في الخميس سبتمبر 25, 2014 10:47 am

se_ Elsyed
تاريخ المشاركة 30 June 2004 - 08:23 PM
الظاهر إن إبداع سكوربيون فتح نفسي على الكتابة .. لكن أعترف بإنني لا أستطيع ان أقف أمام موهبته ولكنها محاولات أرجو ان تنال إعجابكم ..


العصابة المفترية والمافيا الإيطالية

إستكمالاً للقصة الشيقة التي بدأها سكوب عن السرقة الإلكترونية .. وبعد ان أُلقي القبض على أفراد العصابة حدث الآتي :


أقٌتيد الجميع إلى قسم شرطة الساحل وما إن وقفوا جميعاً أمام ضابط الشرطة حتى صاح سكوربيون أنا " عايز القنصل بتاعي " أنا عايز أكلم السفير الإيطالي " إنتوا فاكريني إيه وراح مطلع لهم البازابورت الطلياني ، فأصيب ضابط الشركة بالهلع وتفادياً للمشاكل الدبلوماسية تم الإفراج عنه في الحال .
اما حشيش فقد أظهر للضابط كرت العمل الذي يُثبت بإنه موظف بنك محترم في البحرين وسمعته زي البرلنت بس هو إسمه اللي جايب له المشاكل وطول عمره في السليم .. فلم توجه إليه أي تهمة وتم الإفراج عنه .
وما إن رأى إبن مصر بإن الجميع بيطلعوا منها واحد ورا التاني زي الشعره من العجينة حتى أخذ في الصراخ بشكل هستيري " خرجوني من هنا ... خرجوني من هنا .. أنا عندي بنات على وش جواز ... سُمعتي يا ناس ... بناتي هايعنسوا .. أنا بريء .. الواد س س هو اللي وزني يا بيه وراح إشترى كمبيوتر وفاكس عشان ينفذ مخططه الإجرامي وإحنا ماكناش نعرف.
وهنا قال الجميع سكوب وإبن مصر وحشيش في صوت واحد : أيوه يا باشا هو س س وش المصايب اللي ورا كل حاجة وهو اللي خطط وهو اللي نفذ حتى بالأمارة إسألوا مركز الدقهلية للكمبيوتر واللي موجود في السنبلاوين وهاتعرفوا إنه كان بياخد دورة عشان يقدر يقتحم الكمبيوتر بتاع البنك ويسرقه .. وإحنا التلاتة لا نعرف في الكبيموتر ولا نعرف الفرق بين الكيبورد وعمود الكردان .
وأفلح ثلاثتهم في تلبيس س س التهمة والتى ضاعت صرخاته أدراج الرياح وتم تحويله إلى سرايا النيابة ومن ثم إلى محكمة مستعجلة وتم الحكم عليه بثلاثة شهور سجن بتهم إزدراء الحكم وإزعاج السلطات ...
وأثناء قضاءه للعقوبة قام أفراد العصابة الرجالة بزيارتة وأقنعوه بإنهم فعلوا ذلك لأن واحد أخف من أربعة وإنهم هايعوضوه بمبلغ محترم عن تلك الفترة .. فأستغل س س الفرصة وطلب 47 ج تعويضاً عن بهدلته وشيله لليلة بحالها .
وقضى س س فترة عقوبته وخرج من سجن ليمان طره ووجد سكوب وإبن مصر وحشيش بإنتظارة ومعاهم عدة حناطير مزينة بالورود وفرقة موسيقى حسب الله وسار الجميع في زفة من السجن إلى مقر قهوة مصر 90 والكائنة بروض الفرج ... وطوال الطريق كان س س شارد الذهن وفي ملكوت تاني ومن وقت للأخر يتحسس قفاه بطريقة لا إرادية .
وما إن جلسوا جميعاً على القهوة حتى تحدث سكوب قائلاً :

سكوب : بقى صلوا عالنبي يا جماعة ... بقى اللي فات كله كوم والفكرة اللي هاقولكوا عليها دلوقت كوم تاني ..
س س ( صارخاً وممسكاً بتلابيب سكوب ) : حرام عليكم يا ناس إنتوا جبابرة وماعندكمش قلب ؟ كفاية أفكار بقى إنتوا عايزين المرة دي تعدموني ... يعني بقيت سوابق ومشبوه ولو حد إتنشل في أسوان هايجرجروني على القسم .. تقوم تقولي أفكار وجمالات .... كفاية بقى كفاية .
حشيش : إهدى بس يابو الأسيان وخد بقيت السيجارة دي وعفر وطلع من نخاشيشك .
إبن مصر : ماكنوش 3 شهور دول اللي عاملينا فيلم عليهم وشكلك كأنك خارج من تأبيدة .
س س : طب ماوريتناش شطارتك ليه يا فالح ياللي عملتيلي فيها في القسم زكي رستم في فيلم أنا وبناتي وبيت العز يا بيتنا .
سكوب : إحنا موقفنا حساس يا س س وإنت بصراحة شكلك كده لومانجي..
س س : إحترم نفسك يا سكوب بدل ما أقلب الترابيزة على دماغكوا كلكم وأروح القسم دلوقت أعترف على نفسي وعليكم تاني .. وأنا مش فارقه معايا لما أخدلي كمان 3 شهور بس أشوف فيكم يوم يا ظلمه .
سكوب : إهدى بس وإشتري مني وماتبعش .
س س : بيع يا عم البؤ .. اديني متنيل وسامع أهو .


يُتبع
avatar
Scorpion

المساهمات : 1712
تاريخ التسجيل : 30/09/2012
العمر : 27

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: مغامرات عصابة "حساس"

مُساهمة  Scorpion في الخميس سبتمبر 25, 2014 10:48 am

se_ Elsyed
تاريخ المشاركة 01 July 2004 - 09:18 AM
الجزء الثاني :


سكوب : بقى أحنا يا رجالة شكلنا كده معمول لنا عمل في البلد دي ومالناش فيها أكل عيش
إبن مصر :عندك حق . ده احنا ولا اللي ماسكين ديل قطة سودا في ليلة شتوية غير مقمرة وملبدة بالغيوم .
حشيش : مش وقت أشعار دلوقت يابو نواس .. سيب الرجال يكمل ويخلص .. بالمرة عشان س س يروح يستحمى ويغير هدومه اللي بالتأكيد مليانة براغيت من بتاعت اللمان .
سكوب : أنا خلال الـ 3 شهور اللي كان فيهم س س في الأوبرج مابطلتش تكتكة وتخطيط وتفكير في مستقبلنا المظلم .. وهداني تفكيري الجهنمي إن إنتم تسافروا إيطاليا معايا نجرب حظنا هناك .
حشيش : الله .. وبالمرة كمان أدور لي على عروسه هناك حاكم الطلاينة دول صواريخ .
إبن مصر : بطل طفاسة يا حشيش ياللي فاضحنا مع كل الجنسيات وإسمع وإنت ساكت .
سكوب : وزي ما إنتوا عارفين إن كان عندي محل بيتزا زمان والضرايب حجزت عليه .. وكان في عيال من المافيا بييجوا ياكلوا عندي ساعات يدفعوا وساعات يبلطجوا ..
س س : قصر وهات من الأخر .
سكوب : حاضر .. فأتصلت بالعيال دي اليومين اللي فاتوا عشان يدبرولنا شغل في إيطاليا ونجرب حظنا معاهم ... وبعد شد وجذب وسؤالات وإختبارات هيئة .. وافقوا أخيراً ولقوا لنا شغل إحنا الأربعة .
حشيش : ياريت يا سيكو بيكو تكون شغلانات محترمة ونكسب ونقب على وش الدنيا بقى انا قشفت من الفقر يا جدعان .
إبن مصر : إفهم يا حيشش وركز اومال .. سكوب بيقولك مافيا .. يعني الإحترام هاييجي منين فمتوقع إنهم هايخلوك تبيع سبح ؟
سكوب : خلوني اكمل ... فالمهم بعد عناء دبروا لي شغلانه مناسبة حيث إني بأتقن اللغة الإيطالية وبعض الفرنسية على طراطيش أسباني .. فهاشتغل معاهم في قسم النصب على السياح الاجانب اللي بييجوا يصيفوا في إيطاليا وهايخدوا مني نص الغلة ، اما حشيش فإسمه سابق جسمه وماكنش في صعوبة إنهم يلاقوله شغلانه بسيطة وهو إنه هايقعد بترابيزة على أي ناصية في جزيرة صقلية ويبيع الصنف للزباين ، وقولت لهم إن إبن مصر فنان ومرهف الإحساس ده زائد إن خطه حلو فعينوه في قسم التزوير وضرب المستندات والجوازات وخلافه .. اما صديقي اللدود س س فنظراً لنزعته الإجرامية فقرروا إنهم يشغلوه بودي جارد .
س س : يا سلام ياخويا يعني إشمعنى انا اللي شغلانتي فيها بهدله وبودي ضرب وحاجات من دي ؟
سكوب : والله مؤهلاتك كده .. يعني سيادتك مثلاً مامعاكش بكالوريوس طب ولا دبلون صنايع حتى كنا نشغلك في مخرطة .

إبن مصر : إيه التخطيط العالي ده يابو جنيور ، بس إنت نسيت نقطة .. بالنسبة للباسبورتات والفيزا وكده يعني .
سكوب : تعجبني دماغك الصاحية يابو إنجي يا كُمل ، قدرت بدهائي ومكري ودحلبتي إني أسلك حتتين السيغة اللي عند حماتي وأبيعهم عشان نقدر نطلع بيهم الباسبورتات ونقدم على الفيزا الطلياني ، لكن في مشكلة واجهتني وهي ان س س مابقاش يقدر يطلع باسبور عشان آ .. يعني .. أصل ..
س س : قولها .. قولها يا سكوب مادي أخرة الجدعنة .. عشان بقى سوابق ولسه تحت المراقبة .. ومانفعش أطلع فيش وتشبيه ... ربنا يكرم أصلك يا سيدي .
سكوب : لأ والله يا س س انا مش قصدي أنا باتكلم بواقعية ، المهم دي محلولة برضوا إن شاء الله فما أسهل إننا نضربلك جواز مبلول .
حشيش : طب والتأشيرات يا كبير .. يعني هاندخل إيطاليا إزاي وانا بأسمع طراطيش كلام اليومين دول عن أوروبا الموحدة واليورو وكده يعني واروبا كلها بقوا مضياقين على العالم السكرتة اللي زي حالاتنا .
سكوب : يا باشا كله هنا في الطاسة ... العيال بتوع المافيا ليهم رجالة في كل حتة حتى في سفارتهم في مصر وهايخلصوا لنا المسائل زي الحلاوة .
إبن مصر : نيجي بقى لموضوع السفر ... حلها لنا يابو مخ قشطة على مربى .
سكوب : أنا طبعاً هاسبقكم على هناك بالطيارة وإنتوا بقى ونظراً لأن الفلوس مقصرة فهاتاخدوا مركب من ليبيا لحد إيطالي وانا برضوا مرتب لكم كل حاجة مع واد مراكبي إسمه سعدون إنما إيه ولا أجدعها قبطان ... معليش ياخوانا ده توفيراً في التكاليف أولاً .. وثانياً عشان التفتيش والحاجات دي وعشان ماحدش يشك في جواز سفر س س .
س س : آه يا أناني !!!! طب ماحجزتلناش طيران ليه إحنا كمان ، ولا لازم نتعذب في السفر بالبحر ونواجه مخاطر الحيتان والدرافيل .. وبعدين انا بيجيلي دوار بحر ولا بيحوق معايا زنجبيل ولا شاي على بوستة حتى .
سكوب : والله الغاوي ينقط بطقيته يا سي س س وبعدين أنا بعت اللي ورايا واللي قدامي عشانكم .
حشيش : ولو فيها سقالة يعني يا سكوب .. ما تسلك كمان حتتين سيغة من الحاجة حماتك وأهو كله بثوابة عشن نقدر نسافر طيران ونوصل بسرعة نستلم الشغل ... وأنا اول ما شتغل ليك عليه والله العظيم هاجيبلها كردان إيطالي يحلف بيه فيرساتشي نفسه .
سكوب : إيه يابني إنت فاكرني مناسب عيلة السرجاني ؟ دي الولية كل اللي كان حيليتها غويشتيين متبقيين من شبكتها اللي كانت من 50 سنة .. لدرجة إن السايغ أول ما شافهم قالي إنت جايب الحاجات دي من أنهي مقبرة فرعونية ؟ وكل اللي كانوا في المحل إستلموني تريقة .
إبن مصر : خلاص بقى يا جماعة بحر بحر اهو منها الواحد يشوف قرص الشمس الذهبي وهو يغيب في كبد السماء ساعة الغروب بين الإطلال يا حبيبي ، أذكريني .. وحيث الطبيعة الام والهواء العليل اللي يرد الروح .. وبالمناسبة دي أنا كتبت قصيدة مطلعها بيقول ... حلاوة شمسنا وخفة ضلنا .. الجو عندنا ربيع طول السنة ... الحمد لله ماعندناش لا صيف ولا رطوبة ولا شتا ولا خريف بتوقع فيه أوراق الشجر .
سكوب : الفاتحة بقى يا رجالة إن السفرية تتم على الخير .. وعشان أقوم انا أدبر حالي وأتكل عالله وأسبقكم .


يُتبع
avatar
Scorpion

المساهمات : 1712
تاريخ التسجيل : 30/09/2012
العمر : 27

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: مغامرات عصابة "حساس"

مُساهمة  Scorpion في الخميس سبتمبر 25, 2014 10:49 am

se_ Elsyed
تاريخ المشاركة 01 July 2004 - 12:05 PM
الجزء الثالث والأخير



إجتمع الأصدقاء الثلاثة ليلة السفر وتوجهوا من موقف أحمد حلمي إلى الإسكندرية ومنها إلى السلوم ومن ثم إلى طرابلس حيث إتصلوا بالقبطان سعدون الذي أصطحبهم إلى المركب المُعَدة للسفر وما إن شاهدوها حتى صاح س س :

س س : إيه يا عم سعدون دي مركب دي ولا فلوكه من اللي بنركبها قدام ماسبيرو واللفه بخمسة جنية .

حشيش : أيوه صح دي شكلها ولا نورماندي تو بتاعت القصري.

إبن مصر : يا كابتن سعدون إنت متأكد إن البعكوكة دي بتمشي في البحر ؟.

سعدون : إيه يا فندي منك له مش عايز تريقه واللي مش عجباه " تيتانك " يروح يدور على مواصلة تانية تاخدوا لإيطاليا ولا تاخدوا في داهية حتى.

س س : تيتانيك !!!!!!!!! قشطه بالهبل ويا محاسن الصدف .

إبن مصر : عجبانة ... عجبانه يا عم جاك دوسون .. ما هو المضطر يركب تيتانك .

حشيش : ثواني بس يابو إنجي انا عايز أقول ملاحظة .. الموتور بتاع البتاعة دي شكل موتور الغسالة بالظبط .. صح ولا أنا غلطان ؟ .

سعدون : غسالة إيه وتلاجة إيه يا أفندي يا ساقع إنت ؟ ... ده موتورها بعون الله يفوت في الحديد وبأفتح به في أعالي البحار والمحيطات .

س س : يا خوفي يا سعدون اعالي البحار دي تجيبنا في القاع ونبقى عشا فاخر لأسماك السلمون .
إبن مصر : إتوكل عالله يا عم سعدون خليني نوصل في الليلة الغبرا دي .

وبالفعل بدأت الفلوكة تمخر عباب البحر وما إن إبتعدوا مسافة 30 كيلو عن الشاطئ حتى بدأت المياة تتسرب إلى المركب .

س س : إلحق يا عم القبطان ... السفينة بتاعتك طلعت منفثة يابا والميه غرقت الدنيا .

سعدون : أنا هنا القبطان ومش عايز غلبه وكتر كلام .. شايفين الجرادل اللي قدامكوا دي ؟.

حشيش : شايفينها يا كاتبن كوك .

سعدون : كل واحد يمسك جردل وينزح ميه على قد ما يقدر

وظل الجميع يعملون على إخراج المياة من المركب حتى عادت الأمور لطبيعتها وأنهكهم التعب فنام الثلاثة كالقتلى .. وأستيقظوا على نسمات وأشعة شمس صباح اليوم التالي ..

إبن مصر : حشيش .. س س إصحى يا مافياوي إنت وهو ...

س س : صباح الخير يابو إنجي .. الفطار جاهز .

إبن مصر : فطار !!!!! إنت فاكر نفسك نايم في الميريديان ... مافيش فطار .... في مصيبه .

حشيش : يا ساتر يارب ... مصايب كده على الصبح .. طب إستنى اما اعمل الإصطباحة طيب

إبن مصر : صحيت الصبح أدور على الكابتن سعدون ولكنه فص ملح وداب وما فيش له أثر .

س س : أحسن .. ياكش يارب يكون في حوت غتت طلعله وبلعه وخلصنا من غلاسته .

إبن مصر : ده اللي همك يا فالح ... ومين هايسوق البعكوكة دي .

س س : إيه يعني هي كيميا طب ماحنا ياما سوقنا عربيات وعجل 28 .

حشيش : عربيات وعجل إيه يا عم مايكل شوماخر .. دي مركب يابا يعني دفة ومجاديف وموتور وبوصلة وبلاوي متلتلة .

إبن مصر : صاحبك سعدون شكله خد الفلوس ومشي بينا شوية وكانت في مركب تاني مستنياه ولا حاجة وسابنا وقال يا فاكيك ... لازم نتعاون مع بعض يا جماعة ونهبل أي حاجة لحد مانوصل وبعدين نتصرف مع سكوربيون اللي رمانا الرمية السودا دي.

س س : ماشي نوزع الادوار ... أنا طبعاً القبطان وإنت يا أبن مصر مساعد القبطان ... وحشيش ده شكله نوتي .

حشيش : يا عم مش ناقصة مريسة وحياة أبوك .. وخلينا في المصيبة دي .

وظل ثلاثتهم يصارعون الموت والموج العاتي لعدة ساعات .. حتى صاح إبن مصر

إبن مصر : أرض أرض أرض .. أنا شايف الأرض أهناك أهي .. وفي كمان مركب بتقرب ناحيتنا

حشيش : الله أكبر تحيا مصر .. عاش الرئيس مبارك .... عاش الرئيس بيرلسكوني ... أحبك يا توتي .. إيطاليا .. إيطاليا .... جايلك يا سينيوريتا .

س س : طب ماتيجي ننده على المركي الطلياني اللي هناك دي يا جدعان عشان يسحبونا لحد الشط .

إبن مصر : بتعرف تتكلم طلياني ؟

س س : لأ ....... ليه ؟

حشيش : طب أنا ممكن أتفاهم معاهم بالإنجليزي .. أنا لسه حافظ كام فيرب على جملتين تلاتة من حصة أبلة سامية بتاعت الإنجليزي وأنا في ثانية ثانوي .

إبن مصر : طب يالا ورينا شطارة أبلة سامية يا شيشو .... إنده عليهم وبدع يا مبدع .

حشيش : سنيوري .. سنيوري ... كان يو هيليب أند ترمي الهلب تو دراج المركب بتاعتنا يا سنيور.

س س : يا سلام على جمال أبلة سامية ويا حلاوة الإنجليزي المُطعم بالفيومي ... مانت عشان كده فشلت وطلعت من تانية ثانوي يا بتاع سامية .

حشيش : وحياة أبوك سيبني أركز وأفتكر لي كلمتين يا س س .

وهنا أقتربت المركب الأخرى أكثر لسماع ما يحاول أن يقوله من في مركب الثلاثة وقال أحد البحارة للأخر : أيـــــــــوه ولا يا حمو .. إلحق يا ولا دول جماعة خواجات بيرطنوا وشكلهم بيغرقوا ...

حشيش : بليز سنيور بليز ... وير أر وي في إيطاليا ناو ؟

حمو : إيطاليت مين يا جدع ... إنت بالصلاتو عالنبي في أبو قير يعني إسكندرية يعني الشقاوة والجدعنة وعفاريت البحر الأحمر المتوسط .

تمت
avatar
Scorpion

المساهمات : 1712
تاريخ التسجيل : 30/09/2012
العمر : 27

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: مغامرات عصابة "حساس"

مُساهمة  Scorpion في الخميس سبتمبر 25, 2014 10:50 am

إبن مصر
تاريخ المشاركة 01 July 2004 - 12:53 PM
لا لا لا الموضوع كده بقى صعب عليا جدا ؟؟؟؟
ايه الحلاوه دى يا سى السيد وايه الروعه دى يا سكوب....
صعبتوا الامور عليا جدا!!!!!!!!
المهم الدور عليا الان فى اكمال القصه.....
انتظروا رائعه بن مصر.......
سرقه الكازينو
سرقه الكازينو
يتبع..
avatar
Scorpion

المساهمات : 1712
تاريخ التسجيل : 30/09/2012
العمر : 27

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: مغامرات عصابة "حساس"

مُساهمة  Scorpion في الخميس سبتمبر 25, 2014 10:50 am


تاريخ المشاركة 01 July 2004 - 03:31 PM
سي السييييد ............
آخر حلاوة ... آخر حلاوة ....... من ساعة ما طلعوا من ليبيا لغاية ما وصلوا أبو قير و انا عمال أضحك... بس مش مجدعة ترجعوا كلكم مصر و تسيبني مزنوق في سيشيليا ... و العالم هنا مستنيين تيجوا تستلموا وظايفكم... و ابتدوا يتنرفزوا !!!!! واخدلي بالك... و لما بيتنرفزوا هنا مش حيبقي كويس علشاني.. رجعني أبوس ايدك ....

أبن مصر ..........
هيييييييييييييييييييييييييييييييييه ......... هيييييييييه...
الشلة حتتلم من جديد يا جدعااااااااااااااااااان... fty::
avatar
Scorpion

المساهمات : 1712
تاريخ التسجيل : 30/09/2012
العمر : 27

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

سرقة الكازينو

مُساهمة  Scorpion في الخميس سبتمبر 25, 2014 10:51 am

إبن مصر
تاريخ المشاركة 01 July 2004 - 04:55 PM
بعد ان وجد الجميع انفسهم فى ابو قير جن جنونهم على ما اصابهم من نصبه محكمه وتوعد الجميع لسكوب ولكنهم تذكروا انه فى ايطاليا فزاد جنونهم .
وبعد ان عادوا الى القاهره توجهوا وهم يجرون اذيال الخيبه الى مكانهم المعتاد وتسمروا فى مكانهم عندما وجدوا سكوب يجلس على القهوه يبكى بحرقه وقد تمزقت ملابسه وانشر اللون الازرق القاتم فى اماكن متفرقه من وجهه وجسده.
حشيش: ايووووه ربنا عالم بينا بصوا يا جماعه مش ده سكوب الى قاعد هناك؟
سى السيد: اه والله ... جيت لقضاك يا بتاع ايطاليا.
ابن مصر: هوا فين .. هوا فين ..
وامسك كل منهم بما طالته يداه من عصى وجروا اليه ولكنهم تسمروا عندما رأوه يبتسم ويقفز اليهم والدموع تجرى من عينيه ويصرخ..
سكوب : الحمد لله .. الحمد لله ... الحمد لله انكم بخير .. اشكرك يا رب اشكرك يا رب.
سى السيد: ايه يا عمنا انتى هاتخدنا فى دوكه سيب رقبتى يا ندل.
حشيش : ( وقد فتح عينيه فى دهشه بعد ان لاحظ اللون الازرق على جسد سكوب ) الله الله الله هو فيه ايه ؟؟؟ انت بقيت تكنى كلر ليه يا سكوب... اهدا اهدا ..
ابن مصر: سيبونى عليه .. سيبونى عليه انا .. انا تعمل فيا كده .. انا .. والله ل.....( ثم نظر الى دموع سكوب )
الله الله انت بتعيط بجد يا سكوب؟ فى ايه.. خلاص يا جدع .. خلاص بقى..
سكوب: والله يا جماعه انتم ما تعرفوش انا كنت قلقان عليكم قد ايه...وخصوصا عليك يا سى السيد.
سى السيد: ليه ان شاء الله... هاتوه والا انا القاصر الى فيكم ..
ابن مصر: اتكتم بقى يا سى السيد وخلينا نعرف فى ايه..( ثم نظر شزرا الى سكوب ) وبعدين نبقى نتحاسب.
حشيش: انا عايز افهم ايه اللون الازرق ده ( وبحركه لا اراديه امسك بوججه متذكرا ما حدث لهم فى الكليه)
سكوب : اصلى وانا فى المطار ... منك لله يا جنيور .....
ابن مصر: جونيور؟؟؟ وابنك ماله ومالك .. فى ايه لحسن والله اخلى كل حته فيك مستقله بذاتها..
سكوب: اصلى قبل السفر طلبت من جونيور انه يوضب الورق الى هاخده معايا وقلتله سيب الباسبور بتاعى وحط الباقى فى الشنطه ..
سى السيد: ها كمل.......
سكوب : الواد حط الباسبور بتاعى مع باسبور سى السيد .. ولما وصلت المطار طلعت الباسبور....واديتوه للظابط..
ابن مصر ( وفى صوت هادىء وكثير من التركيز ): وبعدين؟
سكوب : الظابط بصلى قوى وبص للباسبور ... وبعدين بصلى اوى وبص للباسبور ......
حشيش : وبعدين......
سكوب : وبعدين.. قعد يضضضضححححك وندا على كل زمايله..
ابن مصر: ليه انت باسبورك بيزغزغ والا بيقول بابا وماما ؟؟؟؟؟
سكوب : لا اصلى اديته الباسبور المضروب بتاع سى السيد!!!!!!!! وبص للصوره وفقس الباسبور .. وعرف انى ضارب الباسبور.....
ودى الحاجه الوحيده الى ضربتها فى الليله السوده دى ..
سى السيد: ( وقد بدأ يضحك فى هستيريه ) والله ... والله .. يا سلام اهو انا كده نارى بردت..
ابن مصر: بردت ايه وشاطت ايه يا غبى ما هم زمانهم هايدوروا عليك علشان يعرفوا هوا ضرب اسمك ليه؟؟؟؟
وما تنساش انك ولا مؤاخذه يعنى ... زبون قديم.
سى السيد: الله يخرب بيتك يا سكوب يعنى وانا معاك مش نافع وبعيد عنك برضه مش نافع لازم ...
حشيش : الحمد لله ان انا وابن مصر ما لناش فى الليله دى..
سكوب: استنوا اصلى ... اصلى...
ابن مصر : اصل اييييييييييييييييييه؟؟؟
سكوب : اصلهم سالوا عن كل شركاءى .. ف.... ف....
ابن مصر : فا ايههههههههههههه؟
سكوب: فقلت لهم عليكم....ايه انتم ما فيش فى قلبكم رحمه .... هوا يعنى كان ينفع اقولهم لأ؟؟؟؟
حشيش: سيبونى عليه هاكله.. لا ... هاضحضحه .... ليه .. ليه..
سى السيد: متجمعين دايما يا قلل....
ابن مصر: الله طب ما قلتش ليه انك ايطالى زى كل مره؟؟
سكوب وقد تحسس قفاه : ما انا قلت بس الباسبور كان فى الشنطه.......قلتلهم كلموا البيت.
ابن مصر: اه حماتك طليانيه والواد كمان يعنى اثبات ايه اكتر من كده؟
سكوب : ما هى دى المصيبه؟
سى السيد: ليه يا خويا.......
سكوب : اصلى قبل ما اروح المطار خفت عليهم من المصيبه الى هانعملها فقلتلهم اى حد يتصل يسال عليا قولوا.....
ابن مصر: قولوا ايه؟؟؟؟؟
سكوب : قولوا .... ما نعرفش حد بالاسم ده.....
( وانفجر سكوب فى بكاء عنيف وافنجر الاخرون فى موجه ضحك هستيريه )
حشيش : طول عمى باقول عليك اذكى اخواتك....يالله حصل خير ...المهم مشيت ازاى؟؟؟
سكوب :ما هم بعد ما زهقوا منى وانا مصمم على انى ايطالى كلموا السفاره فبعتت واحد ومعاه صوره الباسبور بتاعى ...قاموا اعتذروا لى وسابونى ......
ابن مصر: اعتذرولك؟؟؟؟؟ ما هو باين على كل ملامحك.. انا من الاول قلت ان احنا نحس.....مافيا يا سى السيد....
حشيش : نفسى فى كبايه شاى وبقصماته..
سى السيد: قولوا انتم لأمشير اصلوا واخد منى موقف....
ابن مصر : بس لازم نتصرف ... انا طول الطريق يا جماعه وانا بفكر بجد......
سكوب: لا يا عم انا صلاحيتى انتهت ..... خلاص فنيتو...غير صالح للاستهلاك الادمى..ربنا يسامحهم هما ايه .... ما عندهمش اخوات ولاد!!!!!!
ابن مصر : لا المره دى حاجه جديده خالص .....وما فيهاش تعب...
حشيش : تانى انتم ... واحد يقولى نسرق بالكمبيوتر وانت ايه بقى هانسرق التليفزيون؟؟؟ هانفتحه وهما نايمين وبيوش ونقلب المذيع وهوا نايم؟؟؟
سى السيد: اصبر يا شيشو خلينا نسمع...
ابن مصر وقد نظر اليهم جميع : هانسرق كازينو القمار الى فى الفندق الى فى اخر الشارع ..( ونظر الجميع اليه وقد فتحوا افواههم من الدهشه )
يتبع...
avatar
Scorpion

المساهمات : 1712
تاريخ التسجيل : 30/09/2012
العمر : 27

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: مغامرات عصابة "حساس"

مُساهمة  Scorpion في الخميس سبتمبر 25, 2014 10:52 am

sos
تاريخ المشاركة 01 July 2004 - 05:59 PM
سكوب...
س س....
ابن مصر...
فعلا انتم لكم مستقبل فى التأليف ...الراجل الجالس امامى ظن انى اجننت من الضحك...
.بصراحة ...فضلت اقول...كلمة تشجيع ولا اكتفى بالقراءة
avatar
Scorpion

المساهمات : 1712
تاريخ التسجيل : 30/09/2012
العمر : 27

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: مغامرات عصابة "حساس"

مُساهمة  Scorpion في الخميس سبتمبر 25, 2014 10:52 am

تاريخ المشاركة 02 July 2004 - 01:28 AM
ده ايه الهنا ده ....
مالحقتش امسح عينيا من دموعي اللي كانت بترغرغ من الضحك علي موضوع المافيا... الا و مسكتني الزغطة برضه من كتر الضحك علي معالجة ابن مصر لبداية القصة الجديدة... و بالذات علي حتة تبادل البازابورتات ... ملعوبة بحرفنة... خشوا عالكازينو .. مع اني عارف اني انا اللي حلبسها في الآخر .. و شامم ريحة غدر ..
avatar
Scorpion

المساهمات : 1712
تاريخ التسجيل : 30/09/2012
العمر : 27

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: مغامرات عصابة "حساس"

مُساهمة  Scorpion في الخميس سبتمبر 25, 2014 10:55 am

إبن مصر
تاريخ المشاركة 03 July 2004 - 01:29 PM
نظر الجميع الى ابن مصر ما أن قال كازينو القمار وفتحم افواههم فى دهشه.
ابن مصر : ايه يا مبلم منك له في ايه؟؟؟؟
سكوب : قمار يا ابن مصر ..... قمار .... هى حصلت.... مش كفايه الى احنا فيه كمان هاتزودها خطيه تانيه.....
سى السيد : ايه يا عم الكوتكوت منك له... اجل جسر التنهدات ده يا سكوب دلوقتى لحد ما نفهم..
سكوب : اوكييييه سيررر.
ابن مصر : وانت يا حشيش ما لكش نفس تقول حاجه؟؟؟
حشيش : فى الواقع لم الم المام كامل بابعاد الفكره فامتنعت عن ابداء اى راى قد يؤخذ على دون التاكد والوقوف على ارض صلبه من .......
( نظر حشيش اليهم فوجدهم وقد اتسعت عيونهم وفتحم افواههم فى دهشه وهم ينظرون اليه )
حشيش : اممم .. احمم... اصل .. معلش افتكرت مداخله هاكتبها بكره.... ما انتم عارفين بقى... امم .. اديب ومفكر....
ابن مصر : ما علينا المهم قربم كده وخلونى اقولكم ... شوفوم بقى....
سكوب : ستوووووووووب..
سى السيد : فيه ايه يخرب بيتك سرعتنى...
سكوب : عايز سندوتش كبده من عند سيد كوليرا !!!! الكلام ده كبير وعايز تركيز..
ابن مصر : طول عمرك طفس.... اصبر وبكره هاناكل كلنا سيمون فيميه....
حشيش : ايه يا ابن مصر ما احنا ما كلناش حاجه من مده .......وبعدين عشان نركز يا اخى.. الله انت لا ترحم ولا تخلى رحمه ربنا تنزل ده ايه ده .. انت غريب يا اخى .. أ...
سى السيد: ايييه انت بالع راديو يا حشيش ما كانش ساندوتش كبده هايفرق بينا يا جدع.
ابن مصر : خلاص عملتم حكايه ... يا أمشيييييييييييييير
امشير: نعم يا عمو ....
ابن مصر: روح يا ابنى هات لنا 4 ار غفه كبده من عند عمك سيد كوليرا وحطهم على االنوته.
امشير: حاضر يا عمو بس والنبى ما تقولش لابويا.
ابن مصر: ماشى .. نرجع بقى للمهم... انتم عارفين طبعا الفندق الكبير الى فى اخر الشارع.
سكوب : ايوه ايوه ...اتصورت قدامه مره فى رحله مش فاكر امتى .
سى السيد: بس ده هانخشه ازى؟؟؟؟ الفندق واخدلى بالك... الفندددددق .. مش الكازينو..
حشيش : ايه يا اخى هو احنا ما نشبهش... انا ها حط معاكم من ازازه البرفان اياها الى حاططها فى التلاجه وسكوب يأيف لنا كام هدمه وسى السيد ياخد دقننا ويعملنا موزمبلي..... ولو عيالكم شافونا مش هايعرفونا..
سكوب : قصدك ايه يا حشيش احنا لو استحمينا معالمنا هاتتغير .. مش للدرجه دى يا جدع..
ابن مصر : والله فكره وسامحه يا سكوب لازم تستحمى..
سى السيد: يا جماعه هانسرق الكازينو ازاى ....
ابن مصر:انتم عارفين ان الكازينو ممنوع دخوله للمصريين...
( فنظروا جميعا ببطء الى سكوب وابتسموا)
سكوب : ايه... انتم بتبصولى كده ليه.. لأ .. لأ... والنبى يا ابن مصر.. اخوكم لسه ما خفش من علقه امبارح....
لا.. لأأأأأأأ....
( وأصيب سكوب بحاله هستيريه وتشنج جسده فقفزوا عليه جميعا يجلسونه على كرسيه ويحاولون تهداته )
سى السيد: كبر فى ودنه يا حشيش ...اهدا يا سكوب يا ابنى.. ما كلنا بنضحى......
حشيش( يكبر فى اذن سكوب بمنتهى القوه ) الله اكبر ... انصرف انصرف..
سكوب : ودنى.. ودنييييييييي.. سورتنى يا حشيش ....
ابن مصر: خلاص بقى ما انت الوحيد الى فينا الى معاه حمايه..
سكوب: حمايه!!!!
حشيش: انا معايا مطوه انا كمان....
سى السيد: يا غبى حمايه يعنى جنسيه اجنبيه.... صح يا يوص...
ابن مصر: ايوه يا نبيه... ممكن تخلونى اكمل...المهم سكوب هايدخل بالباسبور بتاعه... وسى السيد ....
سى السيد: ماله سى السيد... ايه يا ابن مصر انتم ما مواركوش غيرى والا ايه..
ابن مصر: ما انت لسه بتقول هانضحى.....انت يا بنى نش قعدت مده فى الرياض... يعنى تتعرف تتكلم خليجى وتعمل سايح..
سى السيد: ما عندك حشيش كان فى البحرين والا ما فيش غيرى......
ابن مصر: طب انا راضى زمتكم بصوا لحشيش كده... ده شكل واحد يعرف يلعب قمار....والا ده شكل واحد معاه فلوس يلعب بيها ملك وكتابه حتى.....
حشيش: لا انا اعترض انا احرف واحد فيكم فى ال 31 وكمان سيبونى على المكن الى بيطلع فى الافلام ده فى لاس فيجاس وانا اقفله...... مش برضه المكن ده عليه الجلبهار والمحبوسه؟؟؟؟
ابن مصر: وهو ده السبب الى مخلينى اخليك معايا فى االعربيه واحنا بنستناهم .
سكوب: يا دى ام العربيه الى كل مصيبه تقولى وسيله انتقال ومصدر الهروب......
سى السيد: المهم وبعد ما نخش الكازينو هانعمل ايه؟؟؟؟؟
ابن مصر: سكوب ها يلعب على الروليت وانت تتسلل الى مكتب المراقبه جانبيه خزنه الفيش.......
حشيش: فيش ايه احنا هانسرق محل كهربا؟؟؟؟؟؟
سكوب : الفيش ...... الفيش يا حشيش .. يعنى .... يعنى ... القواشيط......
حشيش: اأأأأأأأأأه قولتلى ...
سى السيد: وبعدين
ابن مصر : ولا قابلين تاخد لك شويه اسود واحمر ... وتخرج... يكون سكوب خالص وتروحوا على الخزنه...
تغيروا الفيش بفلوس وتنزلوا بسرعه ولا من شاف ولا من درى..عمليه نضيفه نضيفه..
سكوب: انا قلبى متوغوش يا ابن مصر.....انا خايف....
ابن مصر: جمد قلبك امال .... دى عمليه سهله ...
( وفى الصباح استحموا جميعا وارتدى سى السيد ملابس خليجيه وسكوب بدله وبرنيطه وامسك ببايب وذهبوا جميعا الى الفندق وانتظر ابن مصر مع حشيش فى السياره وعندما وصلوا الى الفندق فوجئوا بزحمه غير عاديه )
سكوب: الجو ملبش كده ليه؟؟؟؟؟؟ما بلاش النهارده...!!!
ابن مصر : جمد قلبك امال يالله يا وحوش..
سى السيد: مش عاراف ليه مش مطمن لك يا ابو انجى....
( وذهب سكوب و سى السيد الى مدخل الفندق وهناك وجدوا عددا كبيرا من رجال الامن ..)
سكوب: ايه دى يا سى السيد كل دى رتب انا اخرى اعرف احدد نقيب بتالات نجوم ......ده اقل واحد فيهم عنده كيلو نحاس على كتافه.......
سى السيد: الجو عوق .... بس امسك نفسك مش هانعرف ننرجع.....الله الظابط ده بيبصلنا قوى ليه.....
الظابط: لو سمحتم يا جماعه انتم نزلاء فى الفندق؟
سكوب: سى سنيور احنا .... احنا ..
الظابط : معلش ممكن اثبات الشخصيه علشان االفندق بيستضيف مؤتمر وزراء الداخليه العالمى ..
سى السيد: ايه...ايه... ايه...ايه..( واصيب بحاله تشنج عصبيه )
الضابط وهو ينظر الى سكوب:انا .. شفت حضرتك قبل كده ... ممكن تقلع النظاره؟
سكوب يخلع النظاره ببطء وينظر الى الضابط وقد اصفر لون سكوب
الظابط: الله الله الله .. انت مش الواد بتاع اول امبارح ... مش انت بتاع المطار .... الى اهله ما كانوش عارفينه.... يا جماعه ... يا جماعه .. تعالوا دا احنا نهارنا فل النهارده....
( ثم نظر الى سى السيد)
الظابط: وانت مين ان شاء الله ... الله ... دا انت الى كان ضاربلك البسبور ... انتم عصابه بقى....
سى السيد: انا ها اعترف بكل حاجه يا باشا.....
وفى نفس الوقت كان ابن مصر وحشيش فى السياره وقد استبد بهم القلق من كثره رجال الامن حولهم...
ابن مصر: تفتكر الواد سيد كوليرا بلغ عننا علشان ما دفعناش ثمن الكبده؟؟
حشيش: لأ الموضوع كده مش حلو ....
وفجأه ظهر سكوب وسى السيد وهم يجروا ناحيه السياره ويقد تمزقت ملابسهم وازرق لونهم ويدفعهم عدد من الظباط..
حشيش: الحق يا ابن مصر ... دور العربيه ....دور العربيه.......
ابن مصر : ليه ليه ليه...
قفز سكوب وسى السيد فى السياره
سكوب:اطلع اطلع....
وادار ابن مصر السياره وانطلقوا بسرعه بعيدا عن المكان وفى مكان ما على الكورنيش اوقفوا السياره ونزلوا جميعا منها ... واخبرهم سكوب ان نفس الظابط بتاع المطار هو من كان فى امن الفندق وتعرف عليه وعلى سى السيد الذى اعترف انهم كانوا فاكرين فيه فرح وعايزين ياكلوا فيه... فضربهم الظباط ثم طردوهم..
ابن مصر: وما اعترفتش علينا ليه يا سى السيد:
سى السيد: عيب يا جدع مادام ما فيهاش مصيبيه....يبقى الى موجود يسد... ومش برضه لو انت مكانى كنت هاتعمل كده...
ابن مصر: وانت يا سكوب..
سكوب: ومن امتى احنا بنبيع بعض يا صاحبى..
حشيش الموقف مؤثر جدا خلاانى .. خلانى احس انى ... انى ..
سكوب : انك ايه...
حشيش : انى جعان..
وهنا انفجر الجميع فى الضحك واتجهوا الى القهوه جميعا ليبداوا التفكير فى شىء اخر...


تمت والى اللقاء فى حلقه جديده من
مغامرات عصابه حساس
avatar
Scorpion

المساهمات : 1712
تاريخ التسجيل : 30/09/2012
العمر : 27

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: مغامرات عصابة "حساس"

مُساهمة  Scorpion في الخميس سبتمبر 25, 2014 10:56 am


تاريخ المشاركة 03 July 2004 - 07:22 PM
ابن مصر ....
ايه الحلاوة دي ... زي السكر....
بجد بجد ... برافو... Laughing Laughing Laughing Laughing
مراتي قررت تتعلم عربي علشان تفهم الضحك ده كله ليه .. المشكلة بجد ان العربي بتاع القصص دي مش ممكن تترجمه ... و ده اللي حازز فيا .. مافيش حد جنبي يقدر يشاركني الأحاسيس دي ...
أحسنتم بجد .. انت وسي السيد ...
عقبال بتاع الكصص لما يحن علينا هو راخر بمقطوعة...

Quote
انتم عارفين ان الكازينو ممنوع دخوله للمصريين...
( فنظروا جميعا ببطء الى سكوب وابتسموا)
سكوب : ايه... انتم بتبصولى كده ليه.. لأ .. لأ... والنبى يا ابن مصر.. اخوكم لسه ما خفش من علقه امبارح

شفت ... مش قلتلك .. من ساعة ما قريت انه كازينو قمار و انا قلبي حاسس انك حتلبسهالي... الله يخرب بيت الجنسية الطلياني اللي جايباني ورا ...
avatar
Scorpion

المساهمات : 1712
تاريخ التسجيل : 30/09/2012
العمر : 27

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: مغامرات عصابة "حساس"

مُساهمة  Scorpion في الخميس سبتمبر 25, 2014 10:56 am

se_ Elsyed
تاريخ المشاركة 03 July 2004 - 07:45 PM
شاطر يابو إنجي ... كنت هازعل قوي لو كنت مديت إيدك على فلوس القمار الحرام Laughing

أعتقد يا جماعة إن إحنا كده بدون أن نقصد حطينا حشيش في مزنق ... وهو الآن يُعيد حساباته وواقف في مفترق الطرق ... فإما يثبت لنا بإن لديه موهبة وجدري حقيقة أو إن كل المهيصة اللي كان بيعملها دي هي منقولة عن اعمال أدبية عالمية وقام هو بتحريفها ونقلها ونسبها إليه في جرم يعاقب عليه القانون بقطع ودن اللي بيعمل كده ..

أما إذا شارك مشاركة فعالة ومقنعة فسنرفع له الطاقيات ونقوله عفارم عليك يا شيشو .











Quote
أظن انا كده نكشت لكم حشيش وأستفزيت ملكاته الإبداعية
avatar
Scorpion

المساهمات : 1712
تاريخ التسجيل : 30/09/2012
العمر : 27

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: مغامرات عصابة "حساس"

مُساهمة  Scorpion في الخميس سبتمبر 25, 2014 10:57 am

se_ Elsyed
تاريخ المشاركة 05 July 2004 - 05:28 PM
تفضل مشكوراً أخي إبن مصر بالإتصال بي تليفونياً عقب مباراة مصر للكرة النسائية ومنتخب بنين للبنين إمبارح عشان يواسيني وكان شاكك إني ممكن اكون عمات حاجة في نفسي بعد الهزيمة .. شربت سفن آب مثلاً أو روحت جبت ربع كباب أحط غلي فيه .. والحمد لله لا هذا ولا ذاك حصل .

ودار بيننا حديث عن اخر المستجدات على الساحة العربية وأطمئن على العملية وإني فكيت السلك وكده .. المهم قالي أنا متوغوش على حشيش قوي لأنه ما قالش كلمه في قصة العصابة دي وشكله فلس أدبياً ومادياً فقلت له لأ حشيش أديب كبير في السن ومش ممكن معينه ينضب والورده مهما دبلت ريحتها بتفضل يها ( يادي الريحة وسنينها السودا ياعم إشتري الكولنيا وخلصنا )
فقال لي يا س س ماتوحي له بفكرة جت على بالي بعد الماتش وخليه يفردها في صفحتين .. فقلت له إيه يابن مصر هي فطيرة بيتزا هايفردها ؟ .. قال لي لأ يا أخي يعني أديله الفكرة أنت بس وهو ناصح وبيفهمها وهي طايرة .. فقلت له فكرة إيه ..

قال لي إن إحنا العصابة يعني نعمل كمين لمنتخب مصر عند جنينة المطار ونستخبر ورا الدورية اللي واقفة هناك على طول ... واول من نلاقي اتوبيس 13 بتاعهم جاي نخرج عليهم بالهوندا السيفيك وأعمل أمريكاني زي بروس ويلز في فيلم " داي هارد " وأقف بعرض الشارع قدامهم ، طبعاً الاتوبيس هايخاف ويفرمل عشان مايتخرشمش ... ننزل إحنا بالآلي والنص آلي والواطي ونخطف الاتوبيس ونطلب فدية جامد جداً من إتحاد الكوره يعني نتكلم في 37 ج أو 42 جنية كده يعني ونهدد إنهم لو مادفعوش الفدية دي قبل ماتش منتخبنا المكسح مع الكاميرون يوم 5/8 الجاي .. نعاقبهم أشد العقاب بإننا نرجع لهم منتخب النور والامل تاني سالماً غانماً عشان يفضوحنا قدام الكاميرون ويشيله قد 5 او 6 اجوان من العيال اللي بياكلوا بني آدميين بتوع الكاميرون ..

قلت له : يسلمك فومك يابو إنجي .. النبي تبوسلي إنجي من هنا ومن هنا وتقول لها خلي بالك من دماغ أبوكي اللي تستاهل تقلها دهب ..
فقال لي : إيه رأيك ؟ دي فكرة مكلفاني غالي وعملت دماغ عاليه لحد ما وصلت لها .. وقعدت أأدح زينات فكري لحد ما وصلت لها .

فقلت له : زينات فكري !!!! مين دي ؟ دي غير زينات صدقي ؟

فقال لي : إفهم بقى وطقطق وذانك .. زينات فكري يعني بنات أفكاري يابني .. فقلت له إيه ده بنات أفكارك مين ؟ .. إنت مش قلت لي إنك عندك إنجي وأشرقت بس ... يبقى البنات التانية دول جولك إمتى وفين ومن مين .. إعترف .

وفجأة الخط قطع وشكله والله اعلم قفل السكة في وشي أو الرصيد نفذ منه او ماكنش فيه سيجمال في المنطقة دي
avatar
Scorpion

المساهمات : 1712
تاريخ التسجيل : 30/09/2012
العمر : 27

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

سرقه الكهرباء

مُساهمة  Scorpion في الخميس سبتمبر 25, 2014 10:58 am

إبن مصر
تاريخ المشاركة 01 December 2004 - 06:01 PM

بعد ان نجى الجميع من موضوع الفندق اتفقوا ان يتوقفوا عن تلك الافكار لفتره حتى يتماثل سكوب وسى السيد للشفاء وخصوصا سى السيد اذ انه فى اقل من 3 اشهر يتعرض للتعاون الجسدى العنيف مع ظباط الداخليه .
وبعد مرور فتره من الركود ذهب سى السيد الى مقرهم الدائم فلم يجد احد..
سى السيد : الله هو ما فيش حد من الشله جه خالص يا أمشير والا ايه؟
أمشير : عموو سى السيد ازيك .. لا والله يا عمو ما حدش جه .. دا انا ابويا لينوكس هايفرح قوى لما يعرف انك هنا يا ابا ... يا ابااااااااااااااااااااااااااا.
سى السيد : يا واد اخرس .. اسكـــ......
لينوكس : الله هى دى اخرتها يا سى السيد كده .. انا قلت يا راجل انتم هربتم بره البلد خصوصا بعد ما حسابكم زاد قوى ... بس برضه هو ده العشم دا احنا اخوات يا راجل..
سى السيد : ايوه والله هو ده العشم برضه .. امال ما فيش حد من الشله جه هنا خالص والا ايه؟؟
لينوكس : هو كان كل فتره ابن مصر يجى لوحده يقعد يستناكم ويشرب 3 كوبايات ميه ويقوم وساعات سكوب برضه بس ولا مره شفتهم مع بعض....بس الى خوفنى ابن مصر اخر مره كان لابس بيجامه مخططه ومقطعه وقعد يكلم نفسه يجى ساعه... انا حتى خفت اقوم اكلمه وبعد كده ما شوفتوش تانى .....
سى السيد : قلقتنى عليهم والله ... طيب ما تكلمهم كده وخليهم يجوا احنا بقالنا كتير قوى ما تجمعناش..
لينوكس : عينى يمكن حد فيهم يبقى معاه اى فلوس يدفع حاجه!!!!!11
سى السيد متحدثا الى نفسه ( عشم ابليس فى الجنه )
وقبل ان يقوم لينوكس للاتصال وجدوا حشيش يقترب من القهوه.
سى السيد : شيييييشووووووووو يا ندل
حشيش : سى السيد والله زمان يا جدع ...... ( يقفز على سى السيد ويتعاق فى رقبته )
سى السيد : يا دى النيله ايييييييييييييييه اهمد ..
حشيش : واحشنى يا جدع ..
لينوكس : وانا لا ؟؟؟؟
حشيش : انت مين ؟؟؟؟ انت ازاى تقعد معانا كده كده انت نسيت نفسك ....
سى السيد حشيش ..
حشيش : لا لازم تعرف مركزك انا لولا الثوره كان لى كلام تانى معاك ...
سى السيد : حشيش !!!!!!!!!!!!!!!!!
حشيش : صحيح هزلت .. دهماء المجتمع كمان يتساوى بيناا.
( لينوكس يسحب كرسى من القهوه وامشير يملأ زجاجه بالماء المغلى ويهموا بالفتك بحشيش )حشيش : ها يا لينو ايه رأيك فى المشهد الى مثلته الان انفع يا لينو؟؟؟؟؟
لينوكس ينظر اليه فى بلاهه ويومىء براسه بعد ان أيقن ان حشيش مجنون
سى السيد : بلاش هزار يا شيشو العيال عاملين ايه... تعرف حاجه عنهم ..
حشيش : ايه ده انت ما تعرفش الى حصل والا ايه؟؟؟؟؟؟؟؟؟؟؟؟؟؟
سى السيد : فى ايه ما تقلقنيش ؟؟؟
حشيش : لا حول ولا قوه الا بالله ..
سى السيد: فى ايه ؟؟؟؟؟؟؟؟؟؟؟؟
حشيش : اسكوب!!!!!!!!!!!!
سى السيد وقد نفذ صبره : ماللللللللله
يتبع
avatar
Scorpion

المساهمات : 1712
تاريخ التسجيل : 30/09/2012
العمر : 27

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: مغامرات عصابة "حساس"

مُساهمة  Scorpion في الخميس سبتمبر 25, 2014 10:59 am

se_ Elsyed
تاريخ المشاركة 01 December 2004 - 06:34 PM
لا مؤخذه يابو إنجي .. إحنا أخوات في العصابه آه .. لكن تيجي لحد الإستكراد وأقولك لأ .. تقولي برضوا آه أقولك انا لأ ...

يعني سيادتك تقعد حلقة كاملة في مشهد واحد لا يُعطي أي تفاصيل ...

بس مجرد واحد راح يقعد على القهوة راح قعد على الشاي ؟

إحترم عقلية المتفرج يا أخي .. دي مش شكاير أسمنت بنعبيها ...

ده فن يا عالم .. فن ... هو الفن باظ من شويه إلا من الدخلاء عليه ...

فين يابا بقية الحلقة ؟

... هـــا

سكوربيون حصلوا إيه .. إتكهرب ولا شرب نسكافية ؟
avatar
Scorpion

المساهمات : 1712
تاريخ التسجيل : 30/09/2012
العمر : 27

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: مغامرات عصابة "حساس"

مُساهمة  Scorpion في الخميس سبتمبر 25, 2014 11:00 am

nashwa
تاريخ المشاركة 03 December 2004 - 08:40 PM
قرأت هذا الموضوع زماااااااااااااااااااااااااااااان ... ولما حبيت أضحك قرأته تانى من البداية



رجاء لعصابة .... حساس

ممكن تكملوا


تحياتى

htr::
avatar
Scorpion

المساهمات : 1712
تاريخ التسجيل : 30/09/2012
العمر : 27

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: مغامرات عصابة "حساس"

مُساهمة  Scorpion في الخميس سبتمبر 25, 2014 11:01 am

Cleo
تاريخ المشاركة 03 December 2004 - 08:46 PM
se_ Elsyed, on Dec 1 2004, 08:34 AM, said:
أقولك لأ .. تقولي برضوا آه أقولك انا لأ ...
ty:) rs:

كدة عيب... htr::

هاقول لعمر عليك...!! :rolleyes:
avatar
Scorpion

المساهمات : 1712
تاريخ التسجيل : 30/09/2012
العمر : 27

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: مغامرات عصابة "حساس"

مُساهمة  Scorpion في الخميس سبتمبر 25, 2014 11:02 am

Ahmed Mohsen
تاريخ المشاركة 12 December 2004 - 05:46 PM
فين باقي المغامرات ؟؟؟؟؟؟؟

وفين الأديب والمفكر حشيش ؟؟؟؟؟؟

الموضوع ده مش لازم يتقفل أبدا

4 أدباء متمكنين بيشتركوا في كتابة مغامرات ممتعة جدا جدا .....

بالنيابة عن جميع أفراد المحاورات أحيي سكوب (ربنا يرجعهولنا بالسلامة) وسي السيد وابن مصر علي الإبتسامات والضحكات اللي رسموها علي وشوشنا

وأيضا بالنيابة عن جميع أفراد المحاورات أنادي حشيش بإضافة إبداعاته ومغامراته

يا ابن مصر ..... كمل مغامرتك الأخيرة بقي
avatar
Scorpion

المساهمات : 1712
تاريخ التسجيل : 30/09/2012
العمر : 27

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: مغامرات عصابة "حساس"

مُساهمة  Scorpion في الخميس سبتمبر 25, 2014 11:03 am

se_ Elsyed
تاريخ المشاركة 12 December 2004 - 06:23 PM
Ahmed Mohsen, on Dec 12 2004, 04:46 PM, said:
يا ابن مصر ..... كمل مغامرتك الأخيرة بقي
كلام في سركم وماحدش يقول لإبن مصر إني فتنت عليه ..

ففي إحدى إتصالتنا التليفونية من يومين بالظبط تقريباً عاتبته وقولت له إنت ماكملتش القصة ليه يابني ؟

فقالي خُفت !!!

قولت له من إيه ؟

قالي فاكر أخر كام جمله من الجزء الآخراني ؟

قولت له آه مش هما دول

Quote
حشيش : ايه ده انت ما تعرفش الى حصل والا ايه؟؟؟؟؟؟؟؟؟؟؟؟؟؟
سى السيد : فى ايه ما تقلقنيش ؟؟؟
حشيش : لا حول ولا قوه الا بالله ..
سى السيد: فى ايه ؟؟؟؟؟؟؟؟؟؟؟؟
حشيش : اسكوب!!!!!!!!!!!!
سى السيد وقد نفذ صبره : ماللللللللله

قال لي بالظبط هما دول .. أصلي ... أصلي .. أصلي















قولت له مانا عارف أصلك وفصلك ... أصلك ماله ؟ إنطق .. سبيك آب ......بارليه ( فرنساوي ) شويسكوف ( روسي Very Happy ) ، هونج زو دونج هوشي مِنه شنغهاي ( إتكلم بس بالصيني .. مش كده يا ماجد ؟ )

قال لي أصل كنت هاقول إن سكوب حصلت له حادثة ..

فالموضوع قلب بغم وعرفت بعدها بأيام بسيطة إن ده حصل بالفعل مع إني ماكنتش اعرف والله العظيم ولا حد كان يعرف خالص ..

فقلت له مدد يا سيدي المصراوي ... يعني كنت جايبها للراجل من الكنترول يا جببببببببببببببببببببار .....

حسبنا الله ونعم الوكيل ...

طب لو سمحت شيلني من دماغك وإبعد عني يابا انا عندي عيال عايز أربيهم ...

وبعدين مش ملاحظين إن حشيش له أكثر من أسبوعين مختفي ؟


انا فعلاً إبتديت أقلق من الراجل الغامض اللي إسمه إبن مصر ده


في الأول إتخلص من ياسر السواق بتاعه في عملية كانت نظيفة 100% وعمل فيها زكي رستم وقال إيه كان في العُمره والناس كلها صدقته مع إنه تلاقيه كان فاكك سلك الفرامل ومفضي الزيت بتاعها والواد كان ماشي على مهله وفي أقصى اليمين على سرعة 170 كم/ساعة وفجاة بيدور على الفرامل .. مافيش فرامل .. يمسك فرامل إيد .. أساساً عربية إبن مصر معموله قبل ما يخترعوا فرامل الإيد ... يحاول يصرخ عشان الناس تبعد عامود النور عن الطريق .. ضاعت صرخاته ادراج الرياح .. حاول مرة آخرى أن يقفز من السيارة .. إبن مصر كان مسنكر الابواب ومخلي العربية ما تفتحش من جوه .... حاول الولد مرة آخرى ينزل في الدواسة .. كان إبن مصر راشش مسامير ودبابيس إبره في الأرضة شكت الولد ياسر الغلبان ففز تاني وطلع فوق الكرسي ... وذهب إلى مصيرة المحتوم ...

وهكذ يا سادة إجتمعت كل قوى الشر في هذا المتهم الماثل أمامكم في قفص الفراخ ...

لذا فإنني أطالب بقراءة قصة الاديب الراحل والغائب الحاضر حشيش وهي " المنتوف " واطالب بتوقيع أقصى عقوبات النتف على إبن مصر .. انا عايزه مخلي وعلى اللحم خالص من غير ولا ريشه ..

ولم يكتفي بذلك أيها القضاة وأيها المستشارون بل إنه ذهب إلى أعز أصدقائنا ورفيق عصابتنا ومؤسسها والأب الروحي لمجموعة حساس كومبانية ليميتد ...وأمتدت يد الغدر على الولد الغلبان سكوب حبيب الملايين ...

شوية يا حضرات المحاميين ويا حضرات السادة الحضور وراح مخلص على حشيش وخافي جثتة والولد مش باين له طربة ولا في أي دخان حوالين العملية يقود لإي خيط او غُرزة حتى ...

ومن هنا ومن قاعة محكمة زنانيري للاحوال الشخصية أنا بأمنكم امانة .. لو حصل لي أي حاجة حتى لو جالي شوية كُحه او اختفيت ولو لخمس دقايق وماشوفتونيش آون لاين في المحاورات .. على طول تروحوا تقولوا لأمي وبلغوها إن إبن مصر حفيد عائلة النجعاوي خلص علي ...

ودمي هايبقى في رقبت كل بتوع المحاورات ..

ودمي هايبقى في رقبت كل بتوع المحاورات

ودمي هايبقى في رقبت كل بتوع المحاورات

اللي يحب النبي يسقف ...


هذا وبالله التوفيق ...
avatar
Scorpion

المساهمات : 1712
تاريخ التسجيل : 30/09/2012
العمر : 27

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: مغامرات عصابة "حساس"

مُساهمة  Scorpion في الخميس سبتمبر 25, 2014 11:03 am

yasovinas
تاريخ المشاركة 12 December 2004 - 07:19 PM
لا بجد حشيش فعلا مختفي تماما في ايه حد عنده رقم تليفونة نتصل بيه ونطمن عليه
ولا الجماعه المشرفين صفوة جسديا بعد موضوع يوميات مشرف
avatar
Scorpion

المساهمات : 1712
تاريخ التسجيل : 30/09/2012
العمر : 27

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: مغامرات عصابة "حساس"

مُساهمة  Scorpion في الخميس سبتمبر 25, 2014 11:04 am

عصام
تاريخ المشاركة 13 December 2004 - 11:32 AM
Quote
اللي يحب النبي يسقف ...

mfb: ngh: mf( Smile


مش عارف أقولك إيه يا سي السيد ..


منك لله روح يا شيخ ...


الجملة دى كانت قنبلة ..

Very Happy pp:
avatar
Scorpion

المساهمات : 1712
تاريخ التسجيل : 30/09/2012
العمر : 27

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: مغامرات عصابة "حساس"

مُساهمة  Scorpion في الخميس سبتمبر 25, 2014 11:04 am


تاريخ المشاركة 11 January 2005 - 12:52 AM
انت يا جدع انت يا ابن مصر .. انتا سايبني كده واقف من ساعتها لما رجلي السليمة نمِّلت.... ايه يا ابني هي كلكعت معاك لما جيبت سيرتي ... ايه اللي حصل بعد كده ... اخلص.. فاتورة الكهربا اللي اتسرقت الكوبانية بعتته علي عنواني .. هو انت بس فالح تخبطلي عنوان كبير زي ده و بعدن تفلسع...

ياللا يا بابا .. اشرب بق مية و خلصنا ابوس ايدك ...
بقية الحلقات سواء بتاعت سي السيد و الا بتاعتي خلصت و مش عارفين ننزلها السوق قبل ما الكهربا ترجع... حط الفيوز بقي و خليك جدع ...

Quote
ومن هنا ومن قاعة محكمة زنانيري للاحوال الشخصية أنا بأمنكم امانة .. لو حصل لي أي حاجة حتى لو جالي شوية كُحه او اختفيت ولو لخمس دقايق وماشوفتونيش آون لاين في المحاورات .. على طول تروحوا تقولوا لأمي وبلغوها إن إبن مصر حفيد عائلة النجعاوي خلص علي ...

ودمي هايبقى في رقبت كل بتوع المحاورات ..

ودمي هايبقى في رقبت كل بتوع المحاورات

ودمي هايبقى في رقبت كل بتوع المحاورات

اللي يحب النبي يسقف ...


سي السيد .. انت في الكوميدي ... بجد بجد... مالكش حل
avatar
Scorpion

المساهمات : 1712
تاريخ التسجيل : 30/09/2012
العمر : 27

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

صفحة 2 من اصل 7 الصفحة السابقة  1, 2, 3, 4, 5, 6, 7  الصفحة التالية

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
تستطيع الرد على المواضيع في هذا المنتدى