فتكات .. دكتورة امراض نسا و ولادة

إرسال موضوع جديد   إرسال مساهمة في موضوع

استعرض الموضوع السابق استعرض الموضوع التالي اذهب الى الأسفل

فتكات .. دكتورة امراض نسا و ولادة

مُساهمة  Scorpion في الجمعة أكتوبر 24, 2014 8:40 pm

تاريخ المشاركة 09 December 2013 - 08:21 PM
علي مدخل عيادة الدكتورة فتكات ... في بورد الأعلانات و التعليمات لزوار العيادة .. علقت الدكتورة التعليمات دي  :

1- اللى لسة متجوزة جديد ... مش لازم على فكرة أول ما جوزك يعدى جنبك تبقى حامل !!!...
عادى جدا انك تتنيلى وتقعدى كام شهر على ما تبقى حامل !!!.....
لذلك حاولى تفرحى وتنبسطى بالكام شهر دول قبل ما تتقندلى ويبقى عندك عيال هتطلع عين اللى خلفوكى !!!....
مستعجلة على أيه ؟!! ربنا يولع فيكى بمولوتوف ...

2- اللى عايزة تركب "لولو" ..... على فكرة هو اسمه لولب عشان انا باتخنق لانى على لحم دماغى من الصبح !!...
وعلى فكرة اللولب ما بيتربطش جامد بمفتاح مشرشر زى انبوبة الغاز مثلا ولا بربط عليه جامد علشان انا مش ميكانيكي سعادتك....
وعلى فكرة كمان : اللولب ده مش شقى قوى زى ما سعادتك بتسمعى ( لان سمعك تقيل).....
يعنى ولا بيسرح على القلب !! ولا حيطلع من بقك ...
يعنى خالتك وأمك ومرات اخوكى مابيفهموش .... أيوة صدقى ولمى عفاريتك بعيد عننا ....

3- الست الحامل اللى بتأخذ اى علاج بناء على مشورة أو وصفة صاحبتها او امها او عمتها او خالتها او جارتها خليهم ينفعوكى !!...
وما تجيش تسألينى ينفع مع الحمل ولا لأ ؟!! ....
عشان أنا ما بردش على الاشكال الضالة اللى زيك !!!...
وكمان عشان انا باقاوم شيطاني بالعافية اني أقول لك : طب ما ينفعش وريني يا فالحة حتعملي إيه بقي...
أبقى اسأليني "قبل" ما تاخدي اي دوا مش بعد...

4- بالنسبة للأخ الزميل الصيدلي بتاع الزغزخانة .....
رأيك في العلاج اللي باكتبه ده آخر اهتماماتي علي فكرة...
يعني عارف ان الابيلات دوا ضغط و السيدوفاچ دوا سكر و الپرجنيل بيدوه للرجالة ..... الخ من ملاحظاتك اللي مش عارف كنت هاعيش من غيرها ازاي......
اصرف الدوا و انت ساكت....
يا حنين زى الأب ... يا أطيب أب ... يا سفن -أب....

5- رقم تليفوني اللي معاكم ده للضرورة....
الضرورة... لاتعنى مع احترامى الشديد لسيادتكم انك تتصلى وتسألينى الساعة 3 الفجر : ينفع ألبس بيجاما بأستك مع الحمل ولا لأ ؟؟؟...
أو ينفع تصبغي شعرك و الحاجات دي فأنا أسف أصدمك و أقول لك الحقيقة المرة انها لا تندرج تحت بند الضرورة.... تصوري؟!!!....
الدكتور بني ادم برضه علي فكرة... محتاج ينام زينا و يعمل پيپي زينا ....و احيانا بيتهف في مخه و ياخد دش...
مش لازم يطلع من الحمام يلاقي 53 ميسد كول من حضرتك ....
حاولي تتخيلي و لو لحظة انه يمكن مثلا كان مزنوق؟... وبيعمل زى الناس !!..

6- بالنسبة لشعر العيل اللي بيعمل حموضة!!!!! رأس البيبي بتبقي تحت علي فكرة....
يعنى مالهاش أى علاقة بالمعدة...
و حاقعد ربع ساعة كاملة اشرحلك تأثير الحمل علي صمام المرئ و الارتجاع...
لو المرة الجاية جبتي سيرة كلام ماما عن شعر العيل تاني حاحدفك بالطفاية اللى قدامى ...
مش يحفروها الفيران ..ويقع فيها التيران !!!...

7- على فكرة يا مدام الحاجات السخنة مش بتسقط الجنين ماكانش حد غلب.....
وبعدين الستات اللي بتقعد عالنت وتعملى فيها أم العريف ...
هو انا فعلا بعد 14 سنة خدمة في ثانوي مستني المعلومة اللي سيادتك جايباها من منتدي فتكات عشان اعرف أعالج حالاتي...
ارجوكي... روحي تابعي مع فتكات وزيرة الصحة والبرشام بتاعتك !!!...

8- بالنسبة للأخت اللي بتيجي مع الحالة و مالهاش أى تلاتين لازمة...
انا باجاوب علي ال500 سؤال اللي الحالة بتسألهم و باستحمل تدخلك في وسط الكلام ذوق مني مش اكتر .....
إنما مش لازم أول ما الحالة تدخل اوضة الكشف أرد كمان علي تساؤلاتك بخصوص بنت أختك اللي في الإمارات ....
ولا مرات ابنك التانية اللي متابعة مع دكتور تانى مش مريحها...
تحبي اعطيكي بباقي الكشف لبان دكر كمان؟.....

9- الباشمهندز جوز المدام الحامل... بيبقى مخنوق قوي انها في البيت بتشتكي من أعراض الحمل و بتدخل ضارب لي بوز و قرفان قوي انها تعبانة و الكلمة الشهيرة "شوفي لنا حل" ؟ .....
الحل يا حبيبى ماكنتش اتشاقيت ياخويا...
إنما خلاص أهي حامل و شايلة البطيخة علي قلبها الغلبانة...
مش عاجبك كمان انها تشتكيلك من غممان النفس ولا رجليها اللي ورمت ولا انها بقت تقيلة؟! ....
روح اشتكي لحد غيري انا حاسمعك كلام يضايقك...
بلاش مرقعة بقي دانتو لو جالكو زكام بتعلنوا الطوارئ....

10- و انا باعمل السونار... مش لازم كل زيارة تسألوني هو لسة ولد ولا هي لسة بنت!!!!!
انا اعرف واحد نام و صحي لقي نفسه لسه راجل برضو علي فكرة... بتحصل يعني احيانا!!!
على فكرة مش هيغيّر رأيي في نوع البيبي الحلم اللي حلمته طنت فلانة انها حتجيب بنت مش ولد ....
ولا طنت علانة اللي بصت عالبريمة اللي في شعر اخوه و قالت اللي جاي بنت الخ الخ من هذا الفلكلور اللطشيف....
و بالنسبة للقفشة بتاعة هو البيبي لون عينيه إيه ولا شعره طويل و لا شبه مين فينا ...... أوكي............ هأ هأ هأ.... خلاص؟
و اخيراً... و انتي جاية تولدي... ابوس رجل أمك (و حماتك).... بلاش بيض مسلوق و ملوخية..... اتعميت بقي حرام عليكو!!!!....

عادل أبوزيد, Salwa, أبو محمد و 4 آخرون معجبون بهذا
avatar
Scorpion

المساهمات : 1712
تاريخ التسجيل : 30/09/2012
العمر : 27

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: فتكات .. دكتورة امراض نسا و ولادة

مُساهمة  Scorpion في الجمعة أكتوبر 24, 2014 8:41 pm

أبو محمد
تاريخ المشاركة 10 December 2013 - 01:26 AM
طب سعاتك يا دكتورة
ممكن جوز الست الوالدة يدخل عليها وهو حالق دقنه ؟
عادى كده ؟ .. مش حتتنفس يعنى ؟

وإيه حكاية الحاجة الألماظ اللى الست الوالدة لازم تلبسها دى
بعد الولادة مباشرة ؟
بصراحة .. هو اللى بيلبسها جوز الست .. مش الست

avatar
Scorpion

المساهمات : 1712
تاريخ التسجيل : 30/09/2012
العمر : 27

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: فتكات .. دكتورة امراض نسا و ولادة

مُساهمة  Scorpion في الجمعة أكتوبر 24, 2014 8:42 pm

suma .
تاريخ المشاركة 10 December 2013 - 03:57 AM
بجد بجد انا ضحكت بطريقة هستيريه وانا اتصفح المكتوب -وهذا على غير عادتي- يا نهار ابيض بقى الطبيبات شايله كل ده وساكته!!!


اسمحلي يا سيدي سا كاتب المقال أن اعمل له كوبي وأعطي منه نسخة لإبنتي لأنها طبيبة نساء وعيادتها فى في حي شعبي وساعات وقت الصفا بتشكي لي منحاجات زي دي. وشكرا على اجباري على الضحك يبدو أنني كنت في حاجة له.


سومه
avatar
Scorpion

المساهمات : 1712
تاريخ التسجيل : 30/09/2012
العمر : 27

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
تستطيع الرد على المواضيع في هذا المنتدى