محاورات المصريين
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

في بيتنا رِوِشْ

صفحة 1 من اصل 2 1, 2  الصفحة التالية

اذهب الى الأسفل

في بيتنا رِوِشْ Empty في بيتنا رِوِشْ

مُساهمة  Scorpion الخميس سبتمبر 25, 2014 9:22 pm

تاريخ المشاركة 17 June 2009 - 10:17 PM
- آلو
- إزيك يا سكوب
- أهلآ يا عيون سكوب .. عاملة ايه
- كويسة الحمد لله
- انا فاكر ما تخافيش ... مش هما برضه 17 سنة الحد اللي جاي
- بالظبط
- و ناويين تحتفلوا ازاي
- نسيبك يا سيدي طلع في دماغه اننا نعمل شهر عسل تاني و نسافرلنا اسبوعين بلد كده اسمها موريشيوس
- ده شيء رائع .. برافو عليكم
- المشكلة يا سكوب في الواد .. هو بيقول اننا رحلة زي دي مش معقول ناخده معانا
- طبعآ عنده حق .. و بعدين فين المشكلة .. ما ييجي عندي ... هو مش بيت خاله يبقي زي بيته
- انا كنت متأكدة انك حتقولها يا حبيبي .. ربنا يخليك ليا دايمآ ..
- آجي أخده امتي ...
- لأ ما تجيش .. و احنا رايحين المطار حنعدي عليك الأول نسيبه و بعدين نكمل أحنا
- ماشي يا ستي
- باي باي
- باي



كنت أعلم ان للحياة مراحل صعبة .. و لكني لم أكن أعلم اني سأمر بأصعبها .. بمرحلة المراهقة .. و لكنها ليست مراهقتي أنا.. و لكنها مراهقة ابن أختي الذي أتي ليقضي في بيتي اسبوعين ... و الذي قضاء ساعتين فقط معه .. يجعلك تنتهي بارتداء بربطوز و التوجه الي تنظيم المرور بميدان الموسكي ....
Scorpion
Scorpion

المساهمات : 1712
تاريخ التسجيل : 30/09/2012
العمر : 33

الرجوع الى أعلى الصفحة اذهب الى الأسفل

في بيتنا رِوِشْ Empty رد: في بيتنا رِوِشْ

مُساهمة  Scorpion الخميس سبتمبر 25, 2014 9:23 pm

doudy
تاريخ المشاركة 17 June 2009 - 10:55 PM
ربنا يعينك يا سكوب

بس ابقى احكيلنا ع اللى يحصل

اصل حكاية الروشنة دى مشكلة :roseop:
Scorpion
Scorpion

المساهمات : 1712
تاريخ التسجيل : 30/09/2012
العمر : 33

الرجوع الى أعلى الصفحة اذهب الى الأسفل

في بيتنا رِوِشْ Empty رد: في بيتنا رِوِشْ

مُساهمة  Scorpion الخميس سبتمبر 25, 2014 9:23 pm


تاريخ المشاركة 17 June 2009 - 11:13 PM
doudy, on Jun 17 2009, 09:55 PM, said:
ربنا يعينك يا سكوب

بس ابقى احكيلنا ع اللى يحصل

اصل حكاية الروشنة دى مشكلة :roseop:

لأ يا مدام دودي ... دي قصة من وحي الخيال ... بس مصادرها انا شفتهم في الحقيقة و في بيئتهم الطبيعية ... حيث ان المراهقين يعيشون في قطعان باماكن محددة بوسط افريقيا حيث تكثر مراعي الكلأ أو في شمال أوربا حيث تكثر فضلات النورس
Scorpion
Scorpion

المساهمات : 1712
تاريخ التسجيل : 30/09/2012
العمر : 33

الرجوع الى أعلى الصفحة اذهب الى الأسفل

في بيتنا رِوِشْ Empty رد: في بيتنا رِوِشْ

مُساهمة  Scorpion الخميس سبتمبر 25, 2014 9:24 pm

doudy
تاريخ المشاركة 18 June 2009 - 11:38 AM
Scorpion, on Jun 17 2009, 11:13 PM, said:
doudy, on Jun 17 2009, 09:55 PM, said:
ربنا يعينك يا سكوب

بس ابقى احكيلنا ع اللى يحصل

اصل حكاية الروشنة دى مشكلة :roseop:

لأ يا مدام دودي ... دي قصة من وحي الخيال ... بس مصادرها انا شفتهم في الحقيقة و في بيئتهم الطبيعية ... حيث ان المراهقين يعيشون في قطعان باماكن محددة بوسط افريقيا حيث تكثر مراعي الكلأ أو في شمال أوربا حيث تكثر فضلات النورس ...

كدة برضه يا سكوب تعملها فيا
دنا قلت بقى ابن اختك و انت هتعملوا فيلم
كله مقالب و حركات زى home alone
يلا معلش تتعوض فى مقلب تانى :blush2:
Scorpion
Scorpion

المساهمات : 1712
تاريخ التسجيل : 30/09/2012
العمر : 33

الرجوع الى أعلى الصفحة اذهب الى الأسفل

في بيتنا رِوِشْ Empty رد: في بيتنا رِوِشْ

مُساهمة  Scorpion الخميس سبتمبر 25, 2014 9:24 pm

تاريخ المشاركة 19 June 2009 - 11:30 PM
بالرغم من اني اتزاور بصفة مستمرة مع أختي .. و لكنني لا أتذكر آخر مرة رايت ابنها موحة .. فهو شأن كل المراهقين قليل الكلام مع أهله ... و لا يشترك في الزيارات العائلية ...منطوي علي نفسه و يقضي معظم وقته اما في غرفته او في صحبة بقية القطيع ....
و لكن فجأة أصبحنا مجبرين أن نتعايش معآ لفترة ليست قصيرة ..

سافرت أختي و ظهر في حياتي هذا الكائن ..... أول ما لفت نظري بشدة اليه ان ملامح وجهه أختفت وراء حبوب و ثقوب كثيرة ... كثيرة ... كثيرة جدآ .... لا أدري لمذا قفز الي ذهني بشدة خليط من مشاهد مرتبطة بهذا الوجه ... فيلم Nightmare ... و فيلم وثائقي عن كوكب المريخ أثناء عاصفة نيزكية ... و سندوتش جبنة سويسري ...

ما علينا ...

لم أنتهي من التمعن في وجهه حتي لفت نظري مباشرة شيئآ آخر .. التي شيرت الذي يرتديه ... الذي كان يكون هارمونية متكاملة مع وجهه .. الوانه الزاعقة أذت عيني لدرجة التفكير في ارتداء نظارة لحامي الأوكسجين كي استطيع أن اتحملها ...و لم استطع أن أمنع نفسي من أن أسأله :

- علي الأقل التي شيرت ما نقدرش نلاقيله حل ؟؟
لحظة سكوت من موحة يحاول ان يفهم ما أقصده ثم لمعت عينه و قال :
- أنا جربت الكلور مرة يا خالو .. بس الفانلات بتبيَّض خالص
أيقنت تمامآ بعد هذا الرد انه من العبث المحاولة .. فلقد استولت الثقوب التي في وجهه علي عقله أيضآ ....

و لكن بما أني خاله .. فلقد ابتسمت و حاولت ان اتغاضي عن هذا ال تي شيرت .. و لكن ما ان فعلت حتي وقعت عيني بدون شعور علي حذائه ... حذائه !!! انه لا ينتمي الي عالم الأحذية علي الأطلاق ... هل لاحظتم أحذية المراهقين ؟؟ ... انها في غاية الضخامة .. جدآ ... بيادة الجيش التي كنا نرتديها تعتبر شبشب زنوبة بالقياس لما يرتدوه الآن ... لا أعتقد انهم يشتروها حسب المقاس .. 42 .. 44 .. 46 ... اطلاقآ ... بالقطع تلك أحذية يتم قياسها بالمتر المربع ... و لا تستطيع ان تتركها في ركن ما بالمنزل او تحت السرير .. و لكن يجب أن تتركها بالجراج ليلآ ... أعتقد اني آخر مرة رأيت شيئآ مشابهآ كان في فيلم لارنولد شوارزنيجر اسمه terminator ...

ما علينا ...

ما هذا الشيء الذي يغطي نصف وجهه ..
لا أستطيع وصف تلك النظارة الشمسية التي كان يرتديها ... نظارة شمسية صفراء بيضلوية بذراع أخضر مفرغ .. و كأني أشاهد ذبابة مصابة بالرمد ..

- ايه النضارة اللي انت لابسها دي ؟؟
- مالها يا خالو .. دي نضارة Lloyd Burchel
- مين ؟؟؟
- بورشيل
- بيبيع ايه ده ؟؟
- ده مغني روك يا خالو
- يعني النضارة دي بتاعت لللالو برسيم
- ايوه
- رجعهاله .. رجعهاله و انا اشتريلك جوز نضارات محترمين و ماركة كمان لو عايز ... و بالمرة لما ترجعهاله ابقي اديله التي شيرت اللي عليك ...
- ده تي شيرت Alice Cooper
- بتاع روك ده راخر ...
( بنفاذ صبر ) : ايوه يا خالو
- مافيش حاجة عليك بتاعتك انت ؟؟؟
- المحفظة اللي معايا بتاعتي .. بس فاضية .. معكش 20 جنيه سلف ؟؟

يا ابن الأيه يا حريف .. الواد زنقني ... لكن علي مين .. احسن حاجة اطنش و ما خشش معاه في نقاشات و لا أسأله اي سؤال بعد كده .. و الا علي نهاية الأسبوعين لازم اطلب قرض من البنك ...

و لكن عينيا وقعت علي البنطلون اللي هو لابسه .. و ما اقدرتش اسكت ....
- شوف يا موحة .. حديك خمسين جنيه و روح اشتريلك بنطلون جديد ....

أصل ده مش ممكن يكون أبدآ بنطلون ... الحاجة الوحيدة اللي ليه علاقة ببنطلون في اللي هو لابسه انه فيه جيوب و سوستة ... الباقي !!!!
مساحة مترامية الأطراف عبارة عن قطع عند الركبة تخللي التفكير بس في ان البنطلون ده بيحمي من البرد زي التفكير في تعيين فرد أمن مركزي مكان البرادعي في هيئة الطاقة النووية ... و ده اصغر قطع فيك يا بنطلون ... اشبهه بايه ... مش عارف والله ..
ده التقاطيع اللي بتفضل علي وشي بعد ما بحلق دقني الصبح أقل بمراحل من التقاطيع اللي موجودة في البنطلون ده ...
ما مسكتش نفسي و ندهت لمراتي :
- من فضلك يا أم جونيور يا ريت لما تخلصي تبقي تخيطي اللي متقطع في بنطلون موحة ...
و كأني نطقت كفرآ ...
- أنت بتقول ايه يا خالو .... ده انا دافع في البنطلون ده الدوبل علشان متقطع بالشكل ده ....
- دافع فيه الدوبل .. أنت أهبل يالاه ....
- يا خالو ده بنطلون جينز ماركة عالمية ... signé
- سينييه دي مش يعني ممضي
- أيوه
- ممضي من واحد ما بيعرفش يكتب ... و استخدم الختم بتاعه و لدعك علي قفاك بيه ... يا ابني دي الخروم فيه اكتر من القماش ...
- يا خالو كل ما الخروم بتزيد في البنطلون كل ما تمنه بيغلي أكتر .. دي الموضة ..

و استمر حوار الأجيال هذا لفترة أبتدأت أفقد أعصابي فيها بسرعة رهيبة ... الي أن توقف موحة عن الجدال و سألني :

- و الخمسين جنيه اللي انت وعدتني بيهم ؟؟؟

في تلك اللحظة لم أتمالك نفسي ... و أمسكت ورقة ب عشرة جنيهات .. و أعملت فيها تقطيعآ بصورة عشوائية ثم أعطيتها له باسمآ ...

- ايه ده يا خالو .. دي ورقة بعشرة جنيه و كمان مقطعة ...
- بجد ؟؟ لكن كل الخروم اللي فيها دي حتخليها تساوي مش أقل من خمسين جنيه ... ياللا .... هييييص ...

و تركته متوجهآ الي غرفتي و علي وجههي ابتسامة الأنتصار ....
Scorpion
Scorpion

المساهمات : 1712
تاريخ التسجيل : 30/09/2012
العمر : 33

الرجوع الى أعلى الصفحة اذهب الى الأسفل

في بيتنا رِوِشْ Empty رد: في بيتنا رِوِشْ

مُساهمة  Scorpion الخميس سبتمبر 25, 2014 9:25 pm

Alshiekh
Scorpion, on Jun 19 2009, 03:30 PM, said:
في تلك اللحظة لم أتمالك نفسي ... و أمسكت ورقة ب عشرة جنيهات .. و أعملت فيها تقطيعآ بصورة عشوائية ثم أعطيتها له باسمآ ...

- ايه ده يا خالو .. دي ورقة بعشرة جنيه و كمان مقطعة ...
- بجد ؟؟ لكن كل الخروم اللي فيها دي حتخليها تساوي مش أقل من خمسين جنيه ... ياللا .... هييييص ...

و تركته متوجهآ الي غرفتي و علي وجههي ابتسامة الأنتصار ....

ملعوبة ياريس ، طيب خمسة جنيه كانت كفاية :roseop: :roseop:
Scorpion
Scorpion

المساهمات : 1712
تاريخ التسجيل : 30/09/2012
العمر : 33

الرجوع الى أعلى الصفحة اذهب الى الأسفل

في بيتنا رِوِشْ Empty رد: في بيتنا رِوِشْ

مُساهمة  Scorpion الخميس سبتمبر 25, 2014 9:26 pm

تاريخ المشاركة 23 June 2009 - 08:17 PM
Quote
لأ يا محمد باشا .. أصلها كانت عشرة جنيه متبهدلة أساسآ .. و الرقم المسلسل طاير نصه و كان بقالي شهر حاططها في جيبي احاول اصرفها و مافيش جنس بني آدم كان بيقبلها مني ...

نرجع لسي موحة ...



اول شيء قدرت افهمه من شخصيته انه مغرم بالتكنولوجيا و الأدوات الأليكترونية ... لأن أول استفسارات عملها كانت حوالين النقطة دي بالتحديد ...

- خالو ... عندك اشتراك في الآر تي
- :ninja: هه ؟
- اشتراك في الآر تي
- لأ .. عندي اشتراك في نادي اسكو
- لأ يا خالو .. آر تي .. التليفزيون .. البرامج المشفرة ... و كده يعني
- لأ يا حبيبي .. ما كانش يتعز
- طيب عندك دي اس ال ... اشتراك في تي داتا ....
- و بعدين بقي في اليوم الأغبر ده ... لأ يا سيدي ما عنديش
- ( بقرف شديد ) عندكم كومبيوتر يا خالو
- آه .. في اوضة ابن خالك فيه كومبيوتر .. بس حتشوف حلمة ودنك قبل ما حيخليك تلمسه ...
- طب عندكم ....
و قبل أن يكمل الجملة قلت له ...
- شوف يا موحة .. انا ما عنديش حاجة من كل اللي بتقوله ده .. بس أوضتك بتبص علي بلكونة بنت الجيران اللي في سنك كده ..
- ممم ... يبقي نقعد ...

ابتسمت ... لأني أفتكرت المثل اللي بيقول التكنولوجيا هي التكنولوجيا .. لكن لما تيجي الست تغور التكنولوجيا ... ( هو المثل مش كده برضه ؟؟!! :closedeyes: )

لكن ده ما ممنعش اني بعد يومين بالظبط البيت عندي اتحول لمركز تحكم هيئة الناسا الفضائية ... هي كانت ديتها مشوار لحد بيتهم و رجع بكومبيوتورين حطهم في أوضته .... تليفزيون بشاشة مهولة في اوضة الصالون .... طبق ساتيلايت في البلكونة مكان قصرية الزرع اللي فيها شجرة الياسمين ...
- يا القصرية يا الطبق ... الياسمين بيشوشر علي استقبال قناة الأهلي ...
( و كمان أهلاوي !!!! انا عملت ايه بس يا رب )
جوي ستيك اتركب علي اي حاجة فيها شاشة في البيت .. حتي علي فرن المايكرويف ... خرم حيطان علشان يعدي اسلاك تليفون و توصيلات الكترونية مش فاهم منها حاجة ... شال صورة فرح ابوه و امه و حط مكانها بوستر لواحد اسمه بوب مارلي !!

ما علينا ... الحق مش عليه .. لأني كنت لازم أعرف ان ده اللي حيحصل من ساعة ما أمه حذرتني قبل ما تسافر .. دي و هي بتوصيني قالتلي بالحرف :
- خد بالك يا سكوب ... موحة وقته بيضيعه كله عالتليفون او قدام التليفزيون او قدام الكومبيوتر .. و عادة التلات حاجات مع بعض في نفس الوقت ..
- كفاية اني ما حطلوش التلات حاجات جنب بعض ...
- علي كيفك .. بس ما تخليهوش يقعد طول النهار قدام الكومبيوتر .. احسن بعد فترة حتلاقي نفسك عايز تربط ايديه .. مش من تكتكة الكيبورد لأ ... ده من فاتورة التليفون اللي حتوصلك و بعدين تزعل مني أنا .... و ما أوصكش ما تخليهوش يقعد كتير قدام التليفزيون لا يتلحس مخه ....

عارفين .. بعد ما تعايشت معاه فترة .. جاتلي رغبة شديدة اني احطله تليفزيون في كل اوضة و أجبره انه يتفرج عليهم 24 ساعة في اليوم ... لأن مخه مش ممكن يتلحس أكتر من كده .. و احتمال يرجع بني آدم طبيعي ...

من كام يوم دخلت أوضته فجأة .. لقيته بيتفرج علي ماتش بين البرازيل و قبرص ... فحاولت ان ابدأ حوار معاه ... حاجة كده تشبه حوارات زمان مابين الخال و ابن اخته ... حاولت آخد و آدي معاه ... و سألته :
- تعرف البرازيل دي فين يا موحة ؟؟
- وحياتك اسكت يا خالو مش عارف أَرَكِز
قالهالي بعصبية و عنف لدرجة اني فكرت بجدية اني افتح الدولاب و امسك اول شماعة الاقيها اعلمه بيها الأدب.. و بعدين فكرت في اختي .. و انها كلها كام يوم و حيرجع بيت ابوه و ديه مشكلتهم .. و ان مش بالعنف و العقاب البدني ممكن تتطلع بنتيجة مع مراهقين اليومين دول ... قمت طنشت و قعدت جنبه اتفرج عالماتش ...

الغريب بقي ان البرازيل بكل اللعيبة المشهورين دول اللي بيلعبوا كانت خسرانة 4 صفر من فريق قبرص اللي ماعرفش اي لاعب منهم ... عالعموم علشان اوفر علي نفسي ردود زبالة منه .. قعدت اتفرج و انا ساكت من غير ما اسأل او استعجب ... ما فيش خمس دقايق .. و قام الباشا قايم و راح الحمام .. و فجأة اللعيبة كلهم وقفوا و قعدوا يباصوا الكور لبعض ... تيك ... تاك.... تيك... تاك ... و هما بيبتسموا و فرحانين ...
شوف يا خويا اللعيبة .. خسرانين 4 صفر و عمالين يتدلعوا كأنهم فريق كفر ابو مبروك مش البرااااازيل ....
أول ما رجع قلتله : ما فاتكش حاجة ...
لكن أول ما قعد ابتدوا يلعبوا جد زي الأول !!! Laughing
مافيش 5 دقايق و قام تاني علشان يشرب .. و الباصات الهبلة بتاعت التيك تاك رجعت من أول و جديد ... ده ماتش ايه ده يا جدعان .. في حياتي ما شفتش حاجة كده .. ده باليه بحيرة البجع فيه حياة اكتر من كده ....
لكن أول ما رجع رجعوا هما كمان يلعبوا زي المجانين ... بصراحة انا ساعتها جسمي قشعر من الرعب ...
و بعدين ابتديت افكر .. لو حد لاحظ اللي بيحصل ده ... لو حد لاحظ ان كل مرة بيقوم فيها الماتش بيقف .. حتخلص ان الملايين حيتصلوا بيا و يقولولي : " قول لهباب الطين ده يتهد و الا الماتش حيخلص بعد اسبوعين " ...
بعد 3 ساعات من اللعب من غير ما الحكم يفكر حتي انه يصفر .. و النتيجة 27 ل 15 .. و بتوع قبرص لسه بيجروا زي العفاريت ... ما مسكتش نفسي و قلتله :
- حريفة قوي بتوع قبرص دول ... لكن لو عملوهلم تحليل بول بعد الماتش أكيد حيتلغي لأن أثار المنشطات واضحة قوي عليهم ...

مرة تانية الماتش وقف ... و موحة قعد يبصلي بعمق كأنه قدام الهنيدي و هو بيمثل دور هاملت ...
- أنت بتهزر يا خالو .... انته فاكره ماتش بحق و حقيقي ... ده بلاي ستيشين .. و هز صندوق اسود صغير في ايده
- بلاي ستيشين .. اللعيبة بيجروا بالشكل ده بالبلايستشين دي
- ايوه يا خالو .. مالك
- يا سلام .. طب ما يدوها لحسن شحاتة و احنا كاس العالم مش بس حنوصلله .. ده احنا مليون في الميه حناخده كمان ..

و قمت و انا بضرب كف بكف .. و رحت نمت ... و مباشرة ابتدت الكوابيس تهاجمني ...

شفت مني الشاذلي بتسألني : رايح فين يا سكوب ؟؟
- المطبخ
- طب استني لحظة واحدة ... اعزائي المشاهدين .. حنستني سكوب يخلَّص سندوتش الجبنة الرومي اللي بيعمله و بعدين نكمل البرنامج ..
و في وسط نشرة الأخبار فجأة يظهر اعلان في وسط الشاشة : نعتذر عن مواصلة النشرة و سنواصل تقديمها فور عودة سكوب من الحمام عافاكم الله ...
و لما ارجع .. الاقي المذيعة متزربنة و تقعد تشخط فيا : " يا أستاذ سكوب ما ينفعش كده .. شوفلك حل في موضوع الإسهال اللي ماسكك ده ..."
و في مطار القاهرة حسن شحاتة قال في الحديث الصحفي ان خروج مصر من كاس القارات كان سببه الوحيد هو قيام سكوب من قدام التليفزيون كل مرة اللعيبة بيصولوا للجون مما سببلهم ارتباك مستمر "

و فجأة صحيت و انا غرقان في عرقي علي أم جونيور و هي بتهزني و بتقوللي :
- سكوب ... الأستاذ لطفي عايز يكلمك
- لطفي مين ؟؟
- ابو البنت حنان بتاعت البلكونة اللي قصادنا ...
:closedeyes:
Scorpion
Scorpion

المساهمات : 1712
تاريخ التسجيل : 30/09/2012
العمر : 33

الرجوع الى أعلى الصفحة اذهب الى الأسفل

في بيتنا رِوِشْ Empty رد: في بيتنا رِوِشْ

مُساهمة  Scorpion الخميس سبتمبر 25, 2014 9:29 pm

Salwa
تاريخ المشاركة 23 June 2009 - 09:06 PM
بجد يعنى ...
عاوزة اقول كلام كتير قوى .. ...كله جميل .
لكن؟؟
مؤقتا يعنى نقول ..
الله ينور عليك ..
Scorpion
Scorpion

المساهمات : 1712
تاريخ التسجيل : 30/09/2012
العمر : 33

الرجوع الى أعلى الصفحة اذهب الى الأسفل

في بيتنا رِوِشْ Empty رد: في بيتنا رِوِشْ

مُساهمة  Scorpion الخميس سبتمبر 25, 2014 9:30 pm


تاريخ المشاركة 23 June 2009 - 10:20 PM
ربنا يجبر بخاطرك يا مدام سلوي ياللي رافعة دايمآ روحي المعدنية ....

:closedeyes: :closedeyes:
Scorpion
Scorpion

المساهمات : 1712
تاريخ التسجيل : 30/09/2012
العمر : 33

الرجوع الى أعلى الصفحة اذهب الى الأسفل

في بيتنا رِوِشْ Empty رد: في بيتنا رِوِشْ

مُساهمة  Scorpion الخميس سبتمبر 25, 2014 9:30 pm

زهرة الجبل
تاريخ المشاركة 24 June 2009 - 06:58 AM
الأخ الكريم سكربيون

أضحك الله سنك ..

أسلوب حضرتك جميل جداً و فكاهي جداً و ممتع للغايه

تسجيل متابعه

دمت بخير

أم كريم
Scorpion
Scorpion

المساهمات : 1712
تاريخ التسجيل : 30/09/2012
العمر : 33

الرجوع الى أعلى الصفحة اذهب الى الأسفل

في بيتنا رِوِشْ Empty رد: في بيتنا رِوِشْ

مُساهمة  Scorpion الخميس سبتمبر 25, 2014 9:31 pm

عنبو
تاريخ المشاركة 24 June 2009 - 03:02 PM
بجد الله ينور عليك اسلوبك اكثر من رائع ياريت تكمل علشان نشوف نهاية الروشين

وبالنسبه لموضوع البلاستيشن ده حصل مع واحد قريبى بس مكنتش انا اللى بلعب كان اخويا حاجه كده نص روش



تحايتى لك الكيمائى الروش سابقاً
Scorpion
Scorpion

المساهمات : 1712
تاريخ التسجيل : 30/09/2012
العمر : 33

الرجوع الى أعلى الصفحة اذهب الى الأسفل

في بيتنا رِوِشْ Empty رد: في بيتنا رِوِشْ

مُساهمة  Scorpion الخميس سبتمبر 25, 2014 9:31 pm

زهرة الجبل
تاريخ المشاركة 29 June 2009 - 11:04 AM


أخشى كل ما أخشاه أن يكون المثل القائل : (( يعملوها الصغار و يقعوا فيها الكبار )) قد إنطبق هنا !!!

Quote
و فجأة صحيت و انا غرقان في عرقي علي أم جونيور و هي بتهزني و بتقوللي :
- سكوب ... الأستاذ لطفي عايز يكلمك
- لطفي مين ؟؟
- ابو البنت حنان بتاعت البلكونة اللي قصادنا ...

الأخ الفاضل سكربيون

كانت هذه الفقره هي آخر ما وصلنا من مغامرتك الشيقه

منذ ستة أيام و نحن ننتظر البقيه و لا جديد تحت الشمس .. عنك أو عن المشاغب الصغير

و بسؤال المدعو أ / لطفي .. قال : ((كانوا كلمتين بصفه وديه و لم أره من بعدهم ))

يا رب يكون المانع من ظهور حضرتك من وقتها للآن خيراً

(( مش عارفه ليه قلقانه من الأستاذ لطفي .. و ربنا يستر ))
Scorpion
Scorpion

المساهمات : 1712
تاريخ التسجيل : 30/09/2012
العمر : 33

الرجوع الى أعلى الصفحة اذهب الى الأسفل

في بيتنا رِوِشْ Empty رد: في بيتنا رِوِشْ

مُساهمة  Scorpion الخميس سبتمبر 25, 2014 9:32 pm

mffaswan
تاريخ المشاركة 30 June 2009 - 11:04 AM
هههههههههههههههههههههههههههههه

أيه ده يا سكوب .. ماشاء الله .. Laughing Laughing Laughing

كأنك بتحكي حكايتي مع إبن خالي .. مش أبن أختي .. و إن كان إبن أختي ماشي على طريق الروشنة ..ليتحول إلى روش .. اللهم لا تنولهم مرادهم يارب !!


مشكلتي الكبري هي قطيع الروشين اللي كانوا بيقعدوا على شارع الكورنيش في أسوان .. تلاقيهم عايشين حياتهم بكل خفة و مزاج .. أكل و شرب و تدخين .. و أحياناً هزار بوابين .. يعني تلاقي فردين من القطيع بيجروا ورا بعض كأنهم حمير وحشية .. بتفر من أسد !! و فجأة يروح مديله مقص !! يقع التاني على بوزه .. و العجيب .. إستمرار الضحك من الأتنين !! :ninja:

أو تلاقي مثلاً أحد افراد هذا القطيع .. ماسك واحد تاني و لاوي دراعه على الأخر .. و الملوي دراعه ده ياولداه عمال يضحك ووشه أحمر من كتر ما هو متألم .. و مع ذلك بيضحك !! wst::

و أسواء شيء .. البقايا اللي بتفضل وراهم .. علب سجاير .. بقايا أكل .. علب بيبسي و عصير .. و مناديل و لب و قشر سوداني .. :sad:

فعلاً .. كان الله في عون أهالي هؤلاء !!

و الحمد لله إننا كنا مش روشين !!


منتظر أعرف ذ لطفي جاي يتكلم كلمتين بهدوء زي ما أختنا زهرة الجبل متوقعة .. ولا جاي و جايب معاه اتنين معاهم شوم .. :rolleyes:

ربنا يستر !!
Scorpion
Scorpion

المساهمات : 1712
تاريخ التسجيل : 30/09/2012
العمر : 33

الرجوع الى أعلى الصفحة اذهب الى الأسفل

في بيتنا رِوِشْ Empty رد: في بيتنا رِوِشْ

مُساهمة  Scorpion الخميس سبتمبر 25, 2014 9:33 pm

زهرة الجبل
تاريخ المشاركة 14 July 2009 - 01:38 AM
أنا شايفه الأخ الفاضل سكربيون موجود في الموقع الحمد لله

حمداً لله على سلامتك أخي الكريم

و بصراحه أنا أكتب هذه المشاركه لأتساءل في هدوء : ترى هل جئتنا ببقية المغامره ؟

أم أن الأستاذ لطفي إستصدر حكماً بمنع نشر التفاصيل لحين البت في القضيه ؟

سننتظر التتمه

دمت بخير

أم كريم
Scorpion
Scorpion

المساهمات : 1712
تاريخ التسجيل : 30/09/2012
العمر : 33

الرجوع الى أعلى الصفحة اذهب الى الأسفل

في بيتنا رِوِشْ Empty رد: في بيتنا رِوِشْ

مُساهمة  Scorpion الخميس سبتمبر 25, 2014 9:33 pm

toota
تاريخ المشاركة 14 July 2009 - 05:12 PM
كانك بتوصف الي عندي بالظبط....قول يا سكوب واشجيني...دانا بتحايل عليه يروح يزور اهلي في بيروت ويهيص هناك رافض رفضا باتا...تقولش حوديه جوانتانامو.... :rolleyes:



.وقاعد يعمل كل الي بتقول عليه ده بالحرف.....مطلع عيني بالالوان :roseop:
Scorpion
Scorpion

المساهمات : 1712
تاريخ التسجيل : 30/09/2012
العمر : 33

الرجوع الى أعلى الصفحة اذهب الى الأسفل

في بيتنا رِوِشْ Empty رد: في بيتنا رِوِشْ

مُساهمة  Scorpion الخميس سبتمبر 25, 2014 9:34 pm


تاريخ المشاركة 15 July 2009 - 01:09 AM
الأعزاء

مدام زهرة الجبل
الأستاذ محمد العنبي
مدام فولانة
الأستاذ mffaswan
الأستاذ زعلان
مدام Toota

لا أجد بالفعل الكلمات لأشكركم علي تشجعيكم هذا .... فلقد جعلتوني أصدق انني نجحت في ايجاد فكرة كوميدية معبرة بحق و حقيقي ... و أعتذر عن تأخيري في التكملة .. و لكن تعلمون جيدآ انه كي يستطيع واحدآ منا ان يرسم ابتسامة علي وجه الآخرين يجب ان تكون تلك الأبتسامة موجودة بداخله أولآ .... و هي مؤخرآ ضلت طريقها الي حتي قرأت ما كتبتوه فعادت مرة أخري ....

أشكركم بصدق ....

و الآن نعود الي صديقنا الروش ....


-_- Razz
Scorpion
Scorpion

المساهمات : 1712
تاريخ التسجيل : 30/09/2012
العمر : 33

الرجوع الى أعلى الصفحة اذهب الى الأسفل

في بيتنا رِوِشْ Empty رد: في بيتنا رِوِشْ

مُساهمة  Scorpion الخميس سبتمبر 25, 2014 9:36 pm

تاريخ المشاركة 15 July 2009 - 01:15 AM
ضربت رجلي في الشبشب و خرجت ...

- اهلا يا يا لطفي .. خش يا راجل ... اعمليلنا شاي من فضلك يا أم جونيور
- لأ أعفيني يا سكوب .. هما كلمتين و حمشي علي طول
- يا راجل ... ده احنا ما بقيناش نشوف بعض الا في المناسبات ...
- الدنيا تلاهي يا صاحبي ...

يخرج موحة في تلك اللحظة من غرفته .. فتتحول نظرة الصداقة في عين لطفي الي نظرة عدوانية .. نظرة لم يخفي علي معناها و فسرت لي تلك الزيارة المفاجئة حتي قبل أن يفتح لطفي فمه ...

- شوف يا سكوب يا أخويا .. انا حخش في الموضوع علي طول .... احنا نعرف بعض من ايام ما كنا لسه عرسان جداد .. و ما فيش بيننا غير كل الود .. فحيصعب عليا بجد بعد العشرة دي نخسر بعض ...
- يا ساتر .. للدرجة دي قلقتني يا لطفي فيه ايه يا جدع ؟؟
- البني آدم اللي انت زرعته قصادنا ده .... مش ناوي يجيبها البر ابدآ
تأكد الشك داخلي و لكني قررت الأستعباط كسبآ للوقت و بحثآ عن حل في نفس الوقت ...
- انا مش زارع غير نعناع قصادكم يا لطفي .. و لو مضايقك نشيله يا سيدي و نبقي نشرب الشاي بالكرفس ...
- و النبي يا شيخ بلاش هزار ... الموضوع جد
- فيه ايه بس يا لطفي
- ابن اختك يا سيدي شغال ملاغية في البت و طول النهار ودودة في البلكونة لما لحسلها مخها ....
- موحة شغال ودودة مع حنان
- آه يا سيدي .... ايه رأيك بقي ؟؟؟
- والله مش عارف اقول لك ايه يا لطفي .. طبعآ ده شيء ما يرضينيش لو كان بيقل أدبه و ان كنت ما افتكرش ابدآ .. بالنسبة ليا شخصيآ العيال في سن بعض و كأنهم زملا في المدرسة ... ما احنا برضه لما كنا في سنهم كنا شغالين ودودة مع بنات الجيران ليل نهار ...
- ما هو ده اللي قالقني يا سكوب .. احنا كنا شغالين ودودة انت عارف ليه .... و بعدين انت عارفني .. يعني انا مش حنبلي مع البت .. و طول عمري مديها الثقة .. لكن ابن اختك ده قالقني ... مش محدد معالمه ... حاجة كده هلامية ... اللي شقلب عقلي بقي ان البت ابتدت تتكلم عن حاجات غريبة من ساعة ما شرف جنابه ...
- غريبة زي ايه يعني ؟؟
- البيرسينج مثلآ
- بير ايه ؟
- سينج ... بيرسينج
- ده ممثل هندي ؟؟
- ده انت اللي هندي يا سكوب ... البيرسينج ... البنات دول اللي بيخرموا ودانهم و شفايفهم و حواجبهم ...
- طب ودانهم و معروفة و عادي يعني ... لكن بيخرموا شفايفهم و حواجبهم ازاي و ليه أصلآ ؟
- انت بتسألني أنا يا سكوب ... ما انا زيي زيك .. اسأله هو ... جيل ما يعلم بيه الا ربنا ...
- طب روق دمك ... نتصرف بهدؤ ...
و ندهت علي موحة
و دخل هذا الأخير بنفس التي شيرت الذي لم يغيره منذ 4 ايام و لكن هذه المرة لسعادتي البالغة البنطلون المقطوع ترك مكانه لبنطلون آخر سليم تمامآ .. و لكن أعتقد انه يخص والده لأنه كان واسع لدرجة انه كان يصل الي ما تحت بطنه بقليل بصورة تظهر ملابسه الداخلية بصورة أخجلتني ..
- ما ترفع البنطلون يا موحة و داري نفسك ... خش خد لك حزام او حمالات من الدولاب عندي ترفع بيهم البنطلون ده بدل ما أستك البتاع باين قدام الضيوف كده الله يكسفك ...
- مش فاهم يا خالو .. بتاع ايه ؟
- انت مش شايف اللي باين من تحت بنطلونك يا موحة .. انت بتتمسخر بخالك يا ولد ؟؟
- اتمسخر ايه بس يا خالو ... هو موديل البنطلون كده .. الموضة كده ...
لم اتمالك نفسي و لأول مرة أصرخ في وجهه :
- ابو الموضة علي اللي عملها علي اللي بيلبسها ... لم نفسك يا موحة ما تخلينيش اوريك وشي التاني ...

تردد موحة قليلآ ... فمن الواضح انه لم يتوقع هذا الأسلوب مني أولآ .. و كرامته التي جرحت قليلآ أمام الضيوف ثانيآ .. و لكنه في حركة سريعة لم أفهم كيف عملها وجدت البنطلون يعود الي وضعه الطبيعي بدون اي مشاكل و مقاسه يتوائم تمامآ مع حجمه ...

- مبسوط كده يا خالو ... اقدر أزق بقي ...
- لأ .. اقعد حندردش شوية .... انت تعرف طبعآ عمو لطفي ...
- انا مالياش دعوة بنونا .. و لا عملت حاجة .... و لا كنت عايز أكلمها من اساسه ...
- نونا مين يا موحة ؟ قالها لطفي بجزع
- أنت مش عارف بنتك يا عمو .. نونا ... حنان ...
لطفي : - و انت ايه اللي بينكم علشان تدلعها كمان ...
- أدلعها ؟؟ حد يدلع اوتوبيس راجع بضهره
صرخت فيه : ولد .. احترم نفسك ... و الا و ديني حعمل معاك اللي ما عملوهوش ابوك لحد دلوقتي ...
- يا خالو انت بتديها جاز و الا ايه .... هو انتوا فاكرني أنش ...
- جاز ايه و انش ايه ... هو الواد بيقول ايه يا لطفي ؟؟؟
- انت بتسألني أنا .. ما اهو متنيل قدامك
- انش يعني ايه يا موحة ؟
- يعني ساذج و عبيط يا خالو ... بص يا خالو ... شوف يا عمو لطفي .. ما تزعلوش مني ... لكن نونا بصراحة عندها الأبلتين لادع خالص
احنا الأتنين في صوت واحد : لادع ؟؟
- ده لادع في كل دهاليز الحياة
ثم نظر الينا لحظة .. و هز رأسه كأنه فهم ما نعاني منه في موقف ينقص فيه قاموس ...
- يعني فاضية من جوا خالص ....
أنا : لحظة نظام .. كده مش حنوصل لحاجة خالص .... لأنك يا موحة لو اتكلمت بالشكل ده .. يا حروح انده لأنيس عبيد يحطلك ترجمة ... يا حخسر أختي فيك .... نقلب الصفحة دي و نتكلم من البداية ...

- ماشي يا خالو ... Enter
Scorpion
Scorpion

المساهمات : 1712
تاريخ التسجيل : 30/09/2012
العمر : 33

الرجوع الى أعلى الصفحة اذهب الى الأسفل

في بيتنا رِوِشْ Empty رد: في بيتنا رِوِشْ

مُساهمة  Scorpion الخميس سبتمبر 25, 2014 9:37 pm

mffaswan
تاريخ المشاركة 15 July 2009 - 10:09 AM
هههههههههههههههههههههههههههههههههههه


إيه الابداع ده يا أبو جونيور؟؟ والله فطستني من الضحك و أنا في الشغل .. الناس عمالة تقول ايه اللي عمال يضحك مع نفسه ده !! Laughing

بس تصدق فعلاً .. الجيل ده كله (أبلاتينه لادع)!!


مستني التكملة .. و ما تتأخرش علينا ..

مودتي و تقديري mfb: Very Happy Laughing
Scorpion
Scorpion

المساهمات : 1712
تاريخ التسجيل : 30/09/2012
العمر : 33

الرجوع الى أعلى الصفحة اذهب الى الأسفل

في بيتنا رِوِشْ Empty رد: في بيتنا رِوِشْ

مُساهمة  Scorpion الخميس سبتمبر 25, 2014 9:38 pm

Salwa
تاريخ المشاركة 15 July 2009 - 02:27 PM
اسعد الله صباحك يامبدع كوميديا ......الشباب اللى كان على وشك الضياع فى رأينا وعلى بداية النجاح فى رأيه ..!!

طبعااا من غير تصوير لأى احساس وقت قراءة كلماتك ......تعلم بالطبع انى كنت اضحك كثيراااا.....بالتأكيد تعلم انى رجعت بالذاكرة شوية سنين صغيرين .

كان ليا موقفين مع ابنى .. فقط ..الصراحة ....
هما يعنى اللى غلبونى معاه فى الفترة دى ...!!

البيه ابنى فى يوم جه قاللى ..ليه بابا (( بيحاربنى ؟؟ )) مش عاوزنى اعمل بيرسينج فى ودانى ؟؟....هل انا قصرت فى اى شئ فى واجباتى ؟؟ طيب هو ليه مش بيدينى حقوقى اللى هى اول شئ انا حر فى جسمى ؟؟...انا حر فى نفسى ؟؟ مزاجى البس حلقين ...!!!
ولما قلت له طيب نتفاهم بالعقل ..!!...حاولت اتفاهم رغم اقتناعه انى ظالمة وواقفة فى صف...زوجى..!!!....طبعااااا وقتها مش بيقول ابويا ..
فضل ..مقموص فترة ...والشئ الغريب جدا جداااااا...انه ايامها فى امتحان معين اتعمد انه لايحل كل الاسئلة ...!!! ولما سألته ليه تركت الامتحان بدرى ؟؟ قاللى ..طيب وليه انتوا بتتركوا بعض واجباتكم ؟؟..
.طبعااااااااا....معملش لاحلق ولا غيره .....لان الكلمة الاولى والاخيرة لوالده ..هو مش بيخاف طبعااا لكنه يحترمه ...ويحترم هذا النظام.فى البيت ...الى الآن .

تانى موقف ....

فى يوم كنت انظم بعض الاوراق ووجدت اربعة ابيات من الشعر كانت كاتباهم والدتى ......وبكيت.
وسألنى ؟؟....وقرأتهم له.....فهمهم طبعااا .....وقاللى جدتى كانت امرأة رائعة وصدقينى ياماما دى اجمل كلمات واجمل احساس ...وطلب منى الورقة وصورها بالاسكانر ..
بعدها بيومين ...
فوجئت بيه بيتكلم مع اخته ...وصوتها يعنى فيه رنة مش عجبانى ...وكلما اقتربت ...اجد الصمت...وهى تنظر له شذرااا....وفقط سمعت كلمة ...انت اتجننت؟؟
والمهم...

البيه الصغير ..برضه ايامها كان عنده حوالى ستاشر او سبعتاشر سنة ...
كان عاوز يعمل ...وشم....وفين؟؟
على ظهره ...!!!!!!!!!!!..............بالأربع ابيات......اربع ابيات من الشعر على ظهره و...بالعربى ...!!!!!!!!

يعنى ده غير الوشم....عاوز يعنى اى متعصب يشوفه على البحر او فى النادى و...يدبحه..(( لاقدر الله ))..؟؟؟؟؟؟؟؟؟

طبعاااااااا...
حضرتى ....جالى انهيار ...!!
وقلت له انت كدة بتخلينى اكره نفسى ....لانى انا اللى قرأت لك الابيات دى ....يعنى كدة حاتخلينى احس ان امى اغلى الناس فى عمرى كله هى حاتكون سبب عذابى ...انت مجنون ومتخلف ...ثقافة ايه اللى انت بتتثقفها؟؟ انا كنت فاكراك غير باقى الشباب ؟؟ طيب امال لو مكناش ربيناكم صح وشفنا الغلب فى بعدنا عن بلدنا واهالينا ...و..و.و..و.و.و.و.و....
و...
لو حصل لك حاجة صدقنى بقى ...البيت ده حايتخرب ..وابوك حايعمل وحايعمل ..
عاوز تبهدل جسمك ويبقى زيك زى الشباب اللى بنشوفهم ضايعين فى الشوارع؟؟ انت ليه بتفكر كدة ؟؟ احنا قصرنا فى ايه ؟؟؟
وتعالى نكلم بالعقل...
انت يعنى عاوز تعمل بوهيمى ...؟؟....تطول شعرك وتعزف موسيقى وتعيش على سجيتك ؟؟ ...انت كدة يابنى حاتبقى بهيمى ؟؟ ولا حتى حصلتهم لو عملت كدة ؟؟
انا فاهمة اختيارك حايكون مفيش زيه فى الدنيا كلها بس مش معنى اننا نحب حد اننا نرسم كلامه على جسمنا؟؟ ...الوشم ده حاجة تدل على عدم التحضر ..رغم انه تقليد لكثير من الشعوب ..
بس دى شعوب ساكنة الغابات ..
والمهم بجد يعنى ...
كانت فترة بسيطة بس عدت على خير ..
اجمل حاجة بقى انه بيعايب على الولاد اللى بتلبس البنطلونات الساقطة وغيره ....سبحان الله.

بس حبيت اشارك فى ذكريات التعامل مع الشباب الصاحى ..
وفيه نقطة مهمة ياسكوربيو .....رغم اللى حصل مع ابنى لكنه كان عاشق (ولازال والحمدلله) للقراءة والكتابة ....ويمكن ده كان عامل كبيررر جدا جدااا فى ابتعاده عن اشياء كثيرة .
يعنى بصراحة ..
بتوفيق من ربنا ....مش ...جدعنة منى .

صباح سعيد ..
Scorpion
Scorpion

المساهمات : 1712
تاريخ التسجيل : 30/09/2012
العمر : 33

الرجوع الى أعلى الصفحة اذهب الى الأسفل

في بيتنا رِوِشْ Empty رد: في بيتنا رِوِشْ

مُساهمة  Scorpion الخميس سبتمبر 25, 2014 9:38 pm

شهد
تاريخ المشاركة 16 July 2009 - 11:19 AM
رووووووووووعه يا عمو كامل موتني من الضحك الله يسعد ايامك

احترماااااااااااااااتي
Scorpion
Scorpion

المساهمات : 1712
تاريخ التسجيل : 30/09/2012
العمر : 33

الرجوع الى أعلى الصفحة اذهب الى الأسفل

في بيتنا رِوِشْ Empty رد: في بيتنا رِوِشْ

مُساهمة  Scorpion الخميس سبتمبر 25, 2014 9:39 pm

زعلان
تاريخ المشاركة 16 July 2009 - 01:10 PM
Smile كمل يا عمو سكوربيون
Scorpion
Scorpion

المساهمات : 1712
تاريخ التسجيل : 30/09/2012
العمر : 33

الرجوع الى أعلى الصفحة اذهب الى الأسفل

في بيتنا رِوِشْ Empty رد: في بيتنا رِوِشْ

مُساهمة  Scorpion الخميس سبتمبر 25, 2014 9:40 pm

Scorpion
تاريخ المشاركة 16 July 2009 - 10:48 PM
زعلان, on Jul 16 2009, 12:10 PM, said:
:ninja: كمل يا عمو سكوربيون

خالو .... بيدلعوني و بيقولولي خالو يا زعلان باشا .... عمو ده يبقي الأستاذ لطفي جارنا .. يا ريت نذاكر شوية
:roseop:

العزيز mffaswan .. اشكرك علي تشجعيك :roseop:
شهد العزيزة ... مجرد ما قريت اسمك دخلتيني في موووود سعادة و تفاؤل ساعدني في اللي بكتبه .... :ninja: اشكرك


مدام سلوي .... مش لاقي رد علي طوفان المشاعر اللي قريتها في سطورك .... يمكن بكتبها باسلوب كوميدي ... لكن ده اللي بنعانيه فعلآ بصورة أو بأخري في مشوارنا كآباء و أمهات .... لكن في نفس الوقت لا أستطيع توجيه اصبع الأتهام لهذا الجيل ... فبصورة مختلفة كنا نحن أيضآ "روشين" نوعآ ما في مراهقتنا .... و ها قد حان وقت دفع الثمن ... Smile

تحياتي و احتراماتي ....


نعود للأفندي اللي بيقول لي Enter
Scorpion
Scorpion

المساهمات : 1712
تاريخ التسجيل : 30/09/2012
العمر : 33

الرجوع الى أعلى الصفحة اذهب الى الأسفل

في بيتنا رِوِشْ Empty رد: في بيتنا رِوِشْ

مُساهمة  Scorpion الخميس سبتمبر 25, 2014 9:42 pm

تاريخ المشاركة 16 July 2009 - 10:50 PM
آه دي انا فهمتها من غير قاموس الروشنة ... و علشان اوريله اني برضه بستخدم مصطلحاتهم .. قلت ساخرآ للطفي
- الواد بيقول لي Enter يا لطفي .. علي اساس اني كومبيوتر يعني ... مالاقيش معاك فلوبي ديسك
لطفي : ده ليه علاقة بالإنزلاق الغضروفي

ابتسم موحة ساخرآ ... و لكن قبل ان يبدأ في المألسة من جديد عاجلته بسؤال :

- ايه بقي حكاية بيرسلم ( قلتها بثقة و تمكن من المصطلحات بتاعتهم )
- بير سلم ايه يا خالو ؟؟
لطفي هامسآ في أذني : بيرسينج يا سكوب
انا : حد جاب سيرة بير سلم .. ايه شغل الخدامين ده .. بقول لك بيرسينج ...
موحة : ماله البيرسينج ..
انا : يعني ايه اساسآ بيرسينج
موحة : يعني تخريم بالأنجليزي
أنا : تخريم .. تخريم يعني ايه ... حتخرموا بالعربية في شوارع جانبية ..
موحة : تخريم يا خالو .. تخريم .. موجودة والله الكلمة دي .. ثم لحظة تفكير قصيرة ثم قال : صناعة الثقوب .. قاشط كده ؟؟
أنا : آآآآآه ... ثقوب ... و بيخرموا ايه بالظبط ؟؟
موحة : اي حتة عايزين يحطوا فيها حلق او اشكال معدنية ...
أنا : اي حتة ازاي يعني ؟؟ الحلق مالهوش غير الودن يتحط فيها ...
موحة : ازاي يا خالو .. انت عمرك ما شفت صور او افلام عن افريقيا ؟؟
أنا : قصدك بتوع الزولو دول اللي بيحطوا حلقان في مناخيرهم .. و عضم فيران في خدودهم .. نظام فيلم طرزان يجد أبنآ و كده؟؟
موحة : حاجة زي كده
أنا : و طرزان بقي موضة عندكم دلوقتي
موحة : مش بالظبط يا خالو .. استني حوريك اشكال البرسينج في اوربا ازاي
و ذهب الي حجرته و أتي باللاب توب و قعد يتكتك بالزراير شوية .. و بعدين قلب الشاشة ناحيتنا ... للحظة لم أفهم ما أراه ... و هل الذي امامي رجل أم كوبري صغير بكل تلك المسامير المعدنية التي تخرج من جسمه ...
نظرت الي لطفي منزعجآ و قرفان بالفعل... و كان هو بدوره يقاسمني نفس المشاعر:
لطفي : فهمت البرسينج يا سكوب .. الأول يخرموا نفسهم بسرنجات المخدرات و بعدين يسدوا الخروم بمسامير قلاووظ و و يثبتوها من الناحية التانية بصامولة ..
أنا : و جناب سعادتك عايز تعمل بيرسينج بالشكل ده ؟؟
موحة : مش بالدرجة دي يا خالو .. بس هي طاقة في دماغي اني اعمل خرم لحلق صغير في ودني .. ممكن يا خالو ؟؟ وحياتي عندك .. عايز اعملها مفاجأة لماما لما ترجع ...
أنا : الخرم ده مش محتاجه في ودنك ... لأن فيه خرم كبييييييير قوي في دماغك واخد مكان مخك ... حلق ايه يا موحة اللي انت عايز تلبسه ... يا نهار اسود ... يا نهار اسود ... انت راجل ياااد ؟؟
موحة : انت حتسوده ليه بس يا خالو .. و ايه دخل الرجولة من اساسه .. مش موافق بلاش .. أومال لو قلتلك نونا كانت عايزة تعمل البيرسينج فين كنت عملت ايه
لطفي ملتاعآ و صائحآ : كانت عايزة تعمله فين !!!!! يا ليلة كوبيا .. شفت يا سكوب .. شفت .. ثم قفز علي موحة وشده من ياقة التي شيرت ( تمنيت ساعتها ان يمزق هذا التي شيرت لأخلص من شكله للأبد ) ... البت كانت عايزة تحط الحلق فين يا موحة .. و انتو بتتكلموا ازااي من اساسه في المواضيع دي و بمناسبة ايه .. و...
تدخلت بينهما لأخلص موحة من يديه ... و لكن في نفس الوقت كنت اقاسمه الغضب ... بينما موحة كان "مخضوضآ" بالفعل :
- ايييييييه ... هو فيه ايه ؟؟ ... انا حأتشبح في بيت خالي و الا ايه ... مالك يا عمو لطفي ... نونا كانت عايزة تعمل بيرسينج في حاجبها الشمال .. و انا كل اللي عملته اني قلتلها ان الموضة هي الحاجب اليمين .. و بس .... الله
لطفي : حاجبها .. حاجبها ؟؟ و انت مالك .... انت شغال بلانة ؟؟ بقول لك ايه ... من هنا ورايح انت مالكش دعوة بيها خااالص .... اسمع يا سكوب ... انا مالياش كلام مع العيال .. انا بكلمك اهه و عامل حساب العشرة .. سي زفت ده مالوش دعوة ببنتي من هنا و رايح .. و لا حتي صباح الخير .. و لو شفته بيهزلها راسه بس ... مش بيكلمها .. بيهز راسه .. حقطعهاله و احطهالك في السبت ... و من هنا لحد ما يغور .. انا مالياش كلام معاك انت كمان ... سلام .. و الا اقول لك .. من غير سلام
- أنا : اهدي يا لطفي .. اهدي يا راجل .. و حقك علي راسي ... من النهارده حخليه يغير الأوضة و مش حتشوفه لحد ما ترجع أختي من السفر ان شاء الله .
- يكون أحسن .... و خرج رازعآ الباب خلفه
لحظة سكوت و تفكير كي أهدأ قليلآ .... ثم قلت له
- مبسوط يا موحة .. مبسوط يا ابني ... الراجل اعرفه من اكتر من عشرين سنة عمرنا ما اختلفنا .. تخليه يزعل مني بعد العمر ده ؟
- يا خالو ما تزعلش مني .. بس بجد اللي انتوا عملتوه ده اوفر قوي .. هو انا كنت عملت ايه علشان كل ده
- يا ابني فيه حاجة اسمها اصول ... اسمها حرمة بيوت و جيران ... اسمها عادات و تقاليد ... الحاجات دي مش موجودة في قاموسكم من اساسه ..
- يا خالو انا لو عملت بالكلام ده مش حلاقي حد يصاحبني او يخرج معايا ... زماننا بقي كده دلوقتي
- و ايش دخل الزمن في الأصول يا موحة ؟؟
- عالعموم يا خالو انا خأختفي شوية لحد ما الحياة تعدي .... و ما تزعلش مني
- تختفي يعني ايه ... حتطلع الجبل مثلآ ...
- تنهيدة عميقة و ببطء شديد ... لأ يا خالو حختفي شوية يعني حهدي اللعب مع نونا ....
- و لا تهدي و لا تسرع و لا ليك دعوة بيها من اساسه ...... انت ماكفاكش اللي جري ؟؟
- حاضر يا خالو ... بس كده الحياة بقت امبلايز ...
- بقت ايه يا حيلة ... امبلايز ... يعني ايه ؟؟
- يعني بقت في القاشوش ...
- آه ... آه ... هي الحياة بقت البتاعة دي ... و مش حنولك مرادك و أسألك معناها .... زق عجلك بقي
- طب متأبجني علشان أروح املا التانك
- يا ابني كلمني بالعربي
- هات حاجة اروح آكل بيها مع الشلة
- فلوس يعني
- ايوه ...
- ما تقول فلوس بدال اللفة دي كلها .. حتخس لو قلت فلوس ... و حتروحوا تاكلوا فين ؟؟
- ماكدونالد
- طب انا حديك الفلوس بس لو قلتلي حاجة ...
- اللي هي ؟
- الواد سامي ابن المستشار رأفت جارنا ... هو كمان من شلتكم ؟؟
- اشمعني
- أصله عامل بيرسينج في كل سنانه
- ده مش بيرسينج يا خالو .. ده جهاز تقويم اسنان
Scorpion
Scorpion

المساهمات : 1712
تاريخ التسجيل : 30/09/2012
العمر : 33

الرجوع الى أعلى الصفحة اذهب الى الأسفل

في بيتنا رِوِشْ Empty رد: في بيتنا رِوِشْ

مُساهمة  Scorpion الخميس سبتمبر 25, 2014 9:43 pm

النجم الثاقب
تاريخ المشاركة 16 July 2009 - 11:52 PM
rofl

ده اختصار لجملة rolling over the floor laughing .. و ده بيستخدم فى الشات



و ده نفس اللى بيحصلى لمّا بأقرأ لك يا خالو سكوب .. بس الحقيقة بيبقى على السرير مش على الأرض Smile
Scorpion
Scorpion

المساهمات : 1712
تاريخ التسجيل : 30/09/2012
العمر : 33

الرجوع الى أعلى الصفحة اذهب الى الأسفل

في بيتنا رِوِشْ Empty رد: في بيتنا رِوِشْ

مُساهمة  Scorpion الخميس سبتمبر 25, 2014 9:43 pm

Scorpion
تاريخ المشاركة 17 July 2009 - 07:25 PM
النجم الثاقب, on Jul 16 2009, 10:52 PM, said:
rofl

ده اختصار لجملة rolling over the floor laughing .. و ده بيستخدم فى الشات

Laughing

:blink:

:blink:


:blink:

Quote
هو أنا ناقص ؟؟؟ روفل ... روشنة انجليزي كمان .... و معناها ايه دي .. فين القاموس يا ابني
رولينج :بيتأدلج
أوفر : بيباصي كورة عالية لزميله
ذا فلور : الدقيق
لافينج : عطر فرنسي
:blink:
يعني ايه ؟؟؟ !!....
الصبر يا رب

اسعدتني زيارتك لهذا الموضوع يا استاذ بيرسينج ستار ...
( حتي النجوم بتتخرم هي رخرا ... و احنا اللي كان بيخرم التعريفة فينا كان بيبقي الواد اللي هو )

علي ايه حال .. اشكرك بجد
:roseop:
Scorpion
Scorpion

المساهمات : 1712
تاريخ التسجيل : 30/09/2012
العمر : 33

الرجوع الى أعلى الصفحة اذهب الى الأسفل

صفحة 1 من اصل 2 1, 2  الصفحة التالية

الرجوع الى أعلى الصفحة

- مواضيع مماثلة

 
صلاحيات هذا المنتدى:
لاتستطيع الرد على المواضيع في هذا المنتدى