يعني ايه وطن ؟

إرسال موضوع جديد   إرسال مساهمة في موضوع

استعرض الموضوع السابق استعرض الموضوع التالي اذهب الى الأسفل

يعني ايه وطن ؟

مُساهمة  Scorpion في الأحد سبتمبر 28, 2014 11:17 am

تاريخ المشاركة 01 November 2013 - 11:02 PM
يعنى ايه وطن ؟

مازالوا هم شلة الأصدقاء علي مائدتهم المعهودة في ركن القهوة العتيقة .. في مناخ معبق برائحة الشيشة و خليط من القهوة و الشاي ... سحلب و ينسون ... معآ دائمآ ... أصوات قعقة قواشيط الطاولة و احجار الدومينو .. ضحكات ساخرة .. و تأوهات ألم .. و كالعادة عرج الحوار الي منحني السياسة و استمر في دربه ...

صديق 1- انت فاكر اللي قاله البابا بتاعكم .. كان راجل عظيم وعهد الله .. مصر مش وطن بنعيش فيه .. لكن وطن بيعيش فينا ..

صديق 2 - يا عم المثالية دي ليها ناسها .. المشاعر و الكلام حاجة .. و العيشة حاجة تانية ..

صديق 3: وطن .. هو يعني ايه أساسآ وطن

صديق 2 : ياااااااااااااااااااااااه .. سؤال بسيط و لكن اجابته مستحيل تكون نفسها لكل واحد فينا.. الوطن ممكن يكون لناس حتة مساحة متلونة علي خريطة جغرافيا مساحتها كذا ... و يحدها دولة كذا و دولة كذا ... و لناس ممكن هو الشوارع اللي اتربوا فيها .. لعبوا في حواريها .. و اتعورت ركبهم علي اسفلتها لما وقعوا و هما بيجروا ورا كورة او بيلعبوا الحجلة .. ممكن يكون الأهل و الأصحاب .. زملاء الشغل .. و الجيران .. و بنتهم .. و اول قبلة مخطوفة علي السلم بعين و العين التانية علي السلم قبل ما يشوفك واحد من بتوع الفضيلة في العمارة و ما اكترهم ... اول سيجاره مسروقه من علبه عمك لان أبوك ما بيدخنش .. اول خناقه علشان واحدة بنت او علشان فريق كوره ...علشان تريقة من ابن منطقة تانية علي حتتك او بنات حتتك ...اول مره تشوف وشك فى المرايه و شنب خفيف ابتدا يظهر فيه ...ممكن يكون الوطن اول كل شىء حصلك في حياتك تقريبا..

و لناس تانية الوطن هو المكان اللي فيه القدره على الحلم ... والقدره على تحقيقه.. و مستقبل كويس ليك و اللي بتحبه ...الوطن هو احتياجات المواطن ....


و استمر هذا الجدل لفترة طويله بدون العثور علي اجابة شافية .. حتي وجه احد الأصدقاء السؤال للصديق الرابع الذي لم يفتح شفاه طوال السهرة ...

و انت ايه رأيك ؟

نظر اليه الصديق ساخرآ .. ثم تكلم اخيرآ موجهها اصبعه الي بلكونة بالدور الأول في عمارة امام القهوة

- فاكرين مين اللي كان ساكن في الشقة دي ؟؟

- هاني ابراهيم ... بالحق اخباره ايه ... انا سمعت انه في كندا .. مش كده .. انت كنت أكتر واحد صاحبه فينا .. ثم ايه العلاقة بينه و بين اللي بنتكلم فيه

- طيب اسمعوا بقي الحكاية .. و بعدين ابقوا اسألوني يعني ايه وطن
avatar
Scorpion

المساهمات : 1712
تاريخ التسجيل : 30/09/2012
العمر : 27

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: يعني ايه وطن ؟

مُساهمة  Scorpion في الأحد سبتمبر 28, 2014 11:17 am

أبو محمد
تاريخ المشاركة 02 November 2013 - 05:08 PM
Scorpion, on 01 Nov 2013 - 10:02 PM, said:
- طيب اسمعوا بقي الحكاية .. و بعدين ابقوا اسألوني يعني ايه وطن


وبعدين ؟!
avatar
Scorpion

المساهمات : 1712
تاريخ التسجيل : 30/09/2012
العمر : 27

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: يعني ايه وطن ؟

مُساهمة  Scorpion في الأحد سبتمبر 28, 2014 11:18 am

تاريخ المشاركة 03 November 2013 - 02:08 PM
- أيوه جاااااااااااااااااااااااي ... يصدح صوت متولي القهوجي متنقلا بين الموائد

صديق 3 : معلش يا شباب ... بس انا ما عرفش مين هاني ابراهيم ده .. انا ما كنتش أعرفكم ايامها

- هاني ابراهيم يا سيدي ... شاب مصرى عادي ... اسمر .. شعره خشن مجعد .. جبهه عريضه عاملة زي شمس امون .. وجسم نحيف قوى .. ودم خفيف جدآ ..و ذكاء حاد .. لكن أكتر حاجة كانت بتميزه عنا .. هو قدرته علي الحلم و الوقوف قدام اي عائق علشان يحققه .. ما كانش يهمه حاجة .. في الثانوية العامة جاب 98 في المية .. لكنه قرر يدخل كليه الزراعة

صديق 1 - آه انا فاكر الموضوع ده .. ابن المجنونة بستفناه كلنا .. مجموعه كان يدخله الطب بس دماغه الف صرمة انه يخش الزراعة .. و عم ابراهيم اتجنن ساعتها منه ... الراجل كان طافح الكوتة في محل البقالة بتاعهم علشان يشوفه دكتور و الا مهندس و الا وكيل نيابه لكن البيه قرر يدخل الزراعة علشان ايه .. استني كده هو كان قال ايه ساعتها لما سخسخنا كلنا من الضحك ... آه .. البلد لازم تعتمد علي الزراعة علشان ما نشحتش من حد ..

- ابوه يا عيني جاتله ازمة قلبية لما كتب في الرغبات كلية الزراعة .. اللي التنسيق عندنا حاططها في آخر الليستة .. بس في الآخر ما تعرفش ازاي اقنع ابوه انه بكده حيخدم الوطن لما يعمل ابحاث تخلي عندنا اكتفاء ذاتي .. و بالذات في موضوع القمح ..

- و بعدين ؟

- ولا قبلين .. بحماسته و اجتهاده اتخرج بامتياز .... بس ما اتعينش معيد في الكلية زي ما كان بيتمني .. علشان هو ابن بقال ومش ابن الدكتوراللي بيدرسلهم .. و نبيل شحاتة ابن الدكتور شحاتة الفقي و اللي نجح بتقدير مقبول هو اللي اتعين معيد و بعدين بقي دكتور.. لأنه من اولاد الدكاتره فحسب القانون المصري لازم يكون دكتور هو راخر

- طب و هاني حصل له ايه ؟

- و لا حاجة .. حسب نفس القانون بتاع الوطن.. كان قدامه خيارين .. يا اما يشتغل بقال فى محل ابوه .. يا اما مندوب مبيعات من غير مرتب .. بالعمولة يعني..

- و اختار ايه منهم ؟

- و لا واحد منهم .. قرر يسافر الى بلاد البترول....ابن خالته كان هناك و جابله شغلانة .. بس انا فاكر ساعة ما كنت بودعه ازاي بكي بحرقة وهو بيحكيلي إزاي اضطر يغير بيانات بطاقته من مهندس زراعى اللى كان فعلآ فخور باللقب ده .. و يحولها الى عامل بناء علشان يقدر ياخد فيزه حرة..... ما فيش 3 اشهر من ساعة ما سافر .. اتصل بعم ابراهيم و هو بيبكي بحرقة .. زي ما بكا ساعة ما ضاع منه كتاب الرياضة في سنة اولي .. ابوه يا عيني اتجزع و هو اساسآ صاحب مرض و هو بيسأله .. مالك يا هاني .. خير يا ابني ؟؟

هاني قال له أنا اتخانقت مع الكفيل يا بابا و دلوقتي هما حاجزني في قسم الشرطة بتاعهم

الراجل اتذعر و هو بيقول له :يا نهار يا هاني .. ليه كده بس يا ابني .. انت رايح تشتغل ولا رايح تتخانق ؟؟

بكي هاني أكثر و شعور الظلم زاد عليه من موقف ابوه اللي بيعاتبه من قبل حتي ما يسأله عن السبب

هاني بحرقة : يا بابا بيناديني دايمآ بشتيمة شكل .. كانه بيتلذذ بكده .. امبارح بيقوللي خد يامصرى يابن الكلب .. ما مسكتش نفسي و صرخت فيه و قلتله اهه انت اللي كلب و ابن ميت كلب .. اتلموا عليا هو و العمال اللي كان فيهم مصريين يا بابا .. اتضربت و اتسحلت لحد القسم .. و هناك كملوا الطريحة .. سكت شوية و بعدين كمل بنهنهة بقالهم تلاتيام بيضربوا فيا .. و اللي يقول لي جاي يا بتاع الفول تاخد فلوسنا و بعدين تشتم اسيادك .. عندهم حق لو قالولك كلب ابن كلب ..حنرحلك لبلدك و اياك تحاول ترجع هنا تاني احنا مش ناقصين قرف ...

اخد عم ابراهيم نفسه و قال له :طيب الحمد انها حتخلص علي الترحيل من غير ما يبقي فيها سجن سنين زي ما بيعملوا في ناس تانية ... محدش بيعرف سكة يخلص بيها من مصايب زي دي .. أشكر ربنا يا هاني ..دى بركه صلوات امك ... معلهش يا حبيبي خيرها فى غيرها ...

رجع هاني ... و عملناله حفله رجوع هنا في القهوة .. مافيش شهرين و اختفي ... لما سألت ابوه عنه و انا بشتري منه جبنة رومي قاللي انه سافر الأردن..

ماعداش شهرين جرس التليفون رن في البقالة .. مين .. هاني بيصرخ برعب :الحقنى يابا انا فى السجن ...اتخانقت مع الرجل الأردني اللى شغال معاه ...

- تاني يا هاني .. تاني .. ليه بس يابنى .. ده انا ماصدقت لميت تمن السفريه دى بعد ما سددنا ديون الاولانية ...

هاني:مشغلني زي العبيد يا بابا و في الاخر بياكل حقي و مش عايز يديني اللي اتفقنا عليه ... رحت اشتكيته فى القسم.. الظابط عفاريت الدنيا اتنططت في وشه و قاللي عايز تعمل بلاغ في سيدك يامصرى ياكلب يابن الكلب ...وحكموا على باربع شهور وغرامه وهيرحلونى بعدها ..

فى منفذ طابا بعد 4 اشهر كان هاني من ضمن المترحلين .. دقنه بقت عاملة زي بتاعت السلفيين .. و اللي فضل من شعره طار ... وخس النص و هو اساسآ رفيع.....وقف ظابط الحدود المصرى يصرخ فيهم و يقول :انتم مصريين انتم ...انتم كلاب ولاد كلب فضحتوا البلد ...

ساعتها هاني كأنه جاله صرع .. اترمي عالآرض و قعد يصرخ و يعيد في نفس الجملة : انا مش مصرى...انا مش مصرى ...انا مش ابن كلب

وقعد يقولها لحد ما اغمي عليه.

من ساعتها ما شفتوش أبدآ .. ما بقاش ييجي ابدآ و لا يرد علي التليفونات و شباك اوضته دايمآ مقفول .. زي دلوقتي كده ( ناظرآ الي الشباك ) ... وانشغل كل واحد فينا بلقمة عيشه و تقريبآ نسيناه .. الأسبوع اللي فات درش قابلني و قاللي : هاني غرق فى البحر فى مركب من مراكب الموت هو و 28 مصري قدام سواحل ايطاليا ... كانوا بيحلموا يروحوا يعيشوا فيها و خلصت انهم اتدفنوا فى البحر .....

خيم الصمت علي جميع الموائد التي تحيط بهم

نفس عميق من الشيشة ثم تسائل في حزن .. مين فيكم يقدر يشرحلي يعني ايه كلمه وطن ؟؟؟
avatar
Scorpion

المساهمات : 1712
تاريخ التسجيل : 30/09/2012
العمر : 27

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
تستطيع الرد على المواضيع في هذا المنتدى