منتدي استبن

صباح الفل علي المحاوراتية في بلاد الشتات

بما ان حياتنا بقت مليانة بأستبن في كل حاجة ..
في العربية .. في الشغل .. في الأكل ..
و بمناسبة التوقف المؤقت للمحاورات جراء عملية آب جريد و ما صاحبها من مشاكل تقنية ما فهمتش بالظبط هي ايه
( ان شاء الله الأستاذ عادل حيشرحهالنا لاحقآ )

تم بحمدالله افتتاح المنتدي الأستبن لمحاورات المصريين " إستراحة محاورات المصريين "

مش بديل بالطبع للمحاورات و لكن "استراحة"نتلم فيها مؤقتآ لحد ما الشغل يخلص في بيتنا الكبير ...
و اهه برضه يفضل بعد كده لوقت عوزة .. ربنا ما يكررها ..

و يا رب ما يطول قعادنا هنا

قعدت ادور علي وردة عليها القيمة هنا ما لقتش .. فخدوا دي مؤقتآ

مليون مبروك افتتاح المنتدى الجديد اللى (( مش استبن ابدااا )) ..
وان شاء الله مش حايبقى (( احتياطى دائم )) .....وحايبقى منتدى كبيييير قوى مسموح فيه بالكتابة بكل اللغات ..

يعنى منتدى انترناسيونال .

كتبت لك مداخلة قبل كدة لكن كانت بتحصل مشاكل ولا تظهر ...,اظن ان المشكلة الآن اصبحت( لا مشكلة )..
فكرة هايلة كامل باشا ويارب يخليك ويبارك لنا ف افكارك الرائعة بس اعمل معروف وعلشان خاطرى ابعد عن الانذارات ..!!

وبما ان مفيش ورد وكان نفسى اضع هنا بوكيه ورد جميل ...
قلت نقول الحقيةق وهى ان بابا نويل اوحى لك بالفكرة لما جت هديتك قبل ميعاد وصوله ..
وقال دى بقى للفرعون الشاب اللى مغلبنى ( ده هو اللى بيقول كدة ) ...هو مسكين بيدور عليك ف كل مكان شوية ..
اتفضل سنيور كامل ..

مدام سلوي العزيزة ...

المنتدي ده مش مولود ليصبح كيان مستقل بذاته
اتعمل لغرض واحد بس .. انه يبقي مكان نتلم فيه في حالة ظرف طاريء
بدال ما نفضل قاعدين نطرقع في صوابعنا
يعني زي الشاليه اللي الواحد بيصيف فيه اسبوع في السنة .. أو يروح يقعد فيه شوية لما يكون عنده عمرة في بيتهم .. و بتوع البوية و عمال المحارة مش مخلينه يتهني علي طبق فول حتي ..
و يا رب ما نحتاجه .. بس اهه شاليه عالبحر برضه ...

الذ حاجة بقي ان محمد العزيز ما عرفش يدخل ... آل اسم العضو محجوز ...
ما هو انت لو فاهم الفولة ..كنت باصيت لبتاع الأسامي عشرين جنيه .. و الأسم يتوافق عليه علي طول
هو فيه اعضاء من اساسه غيرنا احنا الأربعة ...

بقول لكم ايه .. انا مش بتاع كومبيوتورهات .. فما حدش يسألني اي حاجة في التقنيات .. اهه مكان نتونس فيه و خلاص
القعدة مش لازم تطول هنا

فين الوردة الزرقا ...اهه

هو فيه ايه تاني ؟
حد عنده فكرة ؟؟؟؟