و روت شهرزاد هروب العباد

القصة الأولي
قهوة أفرنجي


Posted Image

قالت شهرزاد ..بلغني ايها الملك السعيد ...بأن في بلدة بالصعيد ... كان هناك شابآ يحلم بالعيد ... و لكنه لم يجد أبدآ إلا الوعيد .. حتي أتي اليوم الذي قرر فيه أن يكون طريد ...

- صباح الخير يا رضوان
- يسعد صباحك يا سيد
- اخيرآ فرجت .. بكره الفجر تعدي عليا .. لازم نكون في الموقف من النجمة عشان نوصل قنا ..طالبين اتنين في رفاعي
- لا يا سيد .. انا خلاص نويت ... انا سايب البلد باللي فيها
- سايب البلد ... رايح فين يا ابن عمي ؟؟
- اطاليا ... ابويا باع ال 4 قراريط و اداني تمنهم .. و بكره لازم اكون في مرسي مطروح.

و أدرك شهرزاد الصباح فسكتت عن الكلام المباح

قطر الصعيد .... شنطة قماش بها قليلآ من الأغراض .. و مبلغ من المال ملفوف حول الوسط .... يوم بليلة ... كوباية شاي يا بلدياتنا .. يشربه مع قضمات من فطيرة جافة احضرها معه .. احلام تتراقص في عينيه ...

اقعد هناك سنة و الا اتنين و ارجع ابني بيت من الطوب الأحمر ... و افتح قهوة افرنجي و احط فيها تليفزيزن ملون ... و اتجوز سعدية بنت حسين ....

هدهدة القطار تجعله يشعر بالنعاس .. فيتمدد بطوله علي رف الشنط حيث وجد لنفسه مكانآ هناك و يخلد في نوم عميق ... يستيقظ علي صوت جلبة و تحركات .. يفتح عينيه ليجد نفسه في محطة مصر ... ينزل من القطار ليبحث بكل سرعة علي القطار المتجه الي الأسكندرية ... ثلاث ساعات أخري من السفر... و هناك يخرج باحثآ عن الأتوبيس المتجه الي مرسي مطروح .. يلقي بجثته علي أول مقعد خالي ليخلد في نوم عميق مرة اخري .. يتوقف الأتوبيس علي كافيتيريا لينزل الجميع ... يخرج هو ايضآ ... يدخل باحثآ عن دورة مياه و لكن لإزدحامها .. يخرج و يقضي حاجته في العراء ... يدخل و يطلب "ساندويتش جبنة و كوباية شاي".. يدخن سيجارة .. ثم يرجع الي مكانه مرة اخري ... عصرآ يصل الي مشارف مرسي مطروح ... و عندما يصل الي محطته النهائية يغادرها و ينظر يمينآ و يسارآ باحثآ عن الميكروباس الأزرق و سائقه ذو العقال ... و يجده فورآ فلقد كان الوحيد المتواجد خارج الموقف .. يتجه اليه و قد غادره كل التعب و قلبه يكاد يقفز منه من فرط الإثارة ...

- السلامو عليكو يا حاج
- و عليكو السلام يا بلدينا
- مش ده برضه المكروباس اللي رايح ليبيا ...
- قالولك علي حق السفرية
يفك الربطة و يخرج ما بها و يناوله اياها ....
- ايه دول ... لسه فاضل ميتين و خمسين جنيه
- و الختمة الشريفة يا حاج ده كل اللي في حيلتي ... و النبي ما تردني ده انا بقالي يومين مسافر ...
يتردد قليلآ ثم بامتعاض يومأ برأسه قائلآ : إطلع ... ربنا يتوب علينا من الشغلانة دي ...

يتوافد آخرين ... و يدور نفس الحوار بصورة أو بأخري ... و في النهاية يبدأ السائق في التحرك .. و عند نقطة ما يترك الطريق المطروق ليدخل الي الصحراء و تبدأ رحلة بين وديان و كثبان ... و ينزل ظلام دامس ينيره كشافات السيارة و نجوم تلمع كفصوص الماس ...

و أدرك شهرزاد الصباح فسكتت عن الكلام المباح


أغنية الحلقة :
ما تغربيناش

لولا
تاريخ المشاركة 23 October 2008 - 09:03 PM
وعندما تحكى شهرزاد .. يكون الإنصات فى حضرة حكاياتها واجب .

متابعة بشغف حكاياتك يا عزيزى سكوربيون .أسلوب حقا رائع ومشوق.

ملاحظة : الصورة كان لها تأثير قوى جدا عندى فى تخيل الصورة بالعمق الذى اردت ان توصله لنا
والأغنية ... حقا رائعة جدا .


لولا

القصة الثانية
"كان و أخوتها"



Posted Image


قالت شهرزاد .. بلغني ايها الملك السعيد .. انه بعد مشوار فريد ... لم يقابلوا فيه عسكر و لا عسس جديد .. غادر الركب بلد و ووصل الي بلد بعيد ...

و علي شاطيء رائع ... تتكسر أمواجه الحالمة علي رمال ذهبية ... و تحت مظلة مصنوعة من سعف نخيل ... اشار السائق الي المجموعة بالجلوس حتي يصل المركب الذي سيحملهم الي أرض الميعاد ... تمدد الجميع علي الرمال منهكين ... في عيونهم خليطآ من الخوف ... من الأمل و الترقب ... من الحزن العميق ... و ابتدأت الأصوات الخافتة تتعالي في احاديث التعارف .... و ضاعت ملامح رضوان بين الملامح الأخري ... لتتشكل عجينة واحدة ظاهرها فراغ تام وداخلها يأس يدفعهم الي عدم العودة ...

تعالي نشيج من أحدهم ... ليقترب منه شيخآ يأخذ بخاطره...

- صلي عالنبي اومال يا استاذ .. فيه حد كبير يعيط .. معلش بكره تفرج ان شاء الله
- بكاء
- مالك بس يا ابني.. انت اسمك ايه الأول
- بصوت متهدج : ملاك
-عاشت الأسامي يا أستاذ ملاك ... مالك ايه اللي تاعبك ... احكيلي انا قد ابوك .. و يمكن اقدر اساعدك
- تساعدني ( قالها بسخرية ) ... فيه حد فينا هنا يقدر يساعد التاني ( قالها بغضب )... لما المركب حتيجي دلوقتي و تاخدنا كلنا يا في قاع البحر .. يا في بلد حنفضل فيها دايمآ هربانين ... فيه حد حيقدر يساعد التاني ..
- يا باي ... مالك قافش كده يا اخينا .. طب لما انت عارف كده .. ايه اللي مخليك قاعد مستني في وسطينا رحلة الغبرة دي ..
- اللي مخليني ادفع فلوس علشان انتحر .. هو اللي مخليكم كلكم بتعملوا نفس الحاجة ... كان و اخواتها .. انا عندي "كان" و كل واحد فيكم اكيد عنده واحدة من اخوتها ...
- ينظر الشيخ الي الآخرين قلقآ ثم يلتفت له مرة أخري : انت مبلبع حاجة يا أستاذ ... كان ايه و اخواتها مين ؟
- اسمعني يا حاج .. و حقك عليا الأول لو كنت رديت وحش علي حضرتك في الأول ... انا طفشان من كان و اخوتها .. لأن في بلدنا كله بيدور حوالين "كان" ... كله بيتكلم عن ذكرياته ... عن امبارح ... عن ذكريات عمرها ما حترجع ... الناس تصحي و تنام في الوهم ... الناس بقت تقدس الوهم ... ما بقاش فيه حد بيبص لقدام أبدآ .. ما بقاش فيه حد بيتكلم عن بكره ... ما بقاش فيه حد بيخطط لبكره .. بالكتير ازاي حيقضي النهار .. ازاي حيشتري العيش .. ازاي حيدخل ولاده المدرسة .. ازاي حينام مع مراته ...ازاي حيرجع بيته وسط المجاري .. الناس بقت تبص دايمآ في الأرض علشان ما تقعش .. ما حدش بقي يبص لفوق و يشوف الطيور و هي بترسم بجناحاتها خطوط سعادة عمرنا ما حنشوفها هنا .... ما بقاش فيه حد بيحلم ... الحلم بقي نكتة .. و انا مش مستعد اخلي التانيين ينكتوا علي حلمي .. علشان كده ... لازم اسيبها ....

و هنا أدرك شهرزاد الصباح فسكتت عن الكلام المباح



أغنية الحلقة
مش كان هيك تكون

شهد
تاريخ المشاركة 25 October 2008 - 10:31 AM
قصة ممتعه ومشوقة ومثيرة للشجون... عمو كامل شكرا لرقي ابداعك الذي اعتدنا عليه دائماً

HDarwish
تاريخ المشاركة 25 October 2008 - 10:49 AM
تسجيل متابعة وإعجاب

لولا
تاريخ المشاركة 26 October 2008 - 10:36 AM
Scorpion, on Oct 24 2008, 09:58 PM, said:
.. الناس بقت تبص دايمآ في الأرض علشان ما تقعش .. ما حدش بقي يبص لفوق و يشوف الطيور و هي بترسم بجناحاتها خطوط سعادة عمرنا ما حنشوفها هنا .... ما بقاش فيه حد بيحلم ... الحلم بقي نكتة .. و انا مش مستعد اخلي التانيين ينكتوا علي حلمي .. علشان كده ... لازم اسيبها ....

و هنا أدرك شهرزاد الصباح فسكتت عن الكلام المباح

سؤال ألح على أمام هذا التعبير البسيط الرائع .. انحن من غرقنا داخل الحلم فمتنا ،أم أن الحلم من غرق داخلنا فتركنا دونه؟؟!!
بعض الأسئلة لا نطرحها لنتنظر الإجابة ..
حكاية كثيرون عاشوا لحظاتها وثوانيها المليئة باليأس.. وأن كان لصوت فيروز الملاكى هذه المرة مذاق الأمل حتى لو كانت الكلمات
تتذكر أشياء أصبحت ماضى .

لولا

الباشمهندس ياسر
تاريخ المشاركة 26 October 2008 - 01:33 PM
لست ادرى لماذا وصلنى احساس بأن فى الرواية شيئا من الحقيقة يخرج من لسان ملاك

عموما انا متابع معاك لغاية الاخر

و مش هزعل علشان صورة الصعايدة اللى انت حاططها مع ان الصعايده مبيروحوش ايطاليا

لسه ميعرفوش الطريق


تحياتى استاذ كامل
أعجبني هذا

Salwa
تاريخ المشاركة 26 October 2008 - 02:09 PM
المواطن المصرى الكامل ....كامل .

القهوة الافرنجى انتشرت فى السبعينات ...وكان واخواتها (( هلت علينا )) من اول الثمانينات ..
حتى الاحلام ...اتغيرت .
يعنى بس فى عشر سنين ...(( اتهيأ للناس اللى عاوزة تهرب ان مكان الهروب لابد يتغير )) ..
وتتوالى ...العشر سنوات ...اكثر من خمس مرات ..ويتوالى الهروب ...وسيستمر ..
يعلم الله ..اين ؟؟ سيكون الاختيار فى العشر القادمة ...!!
تعبيراتك فى كل حكاياتك ...تعبيرات مؤلمة ...تعبيرات موجعة بمعنى ادق ..
بيكون عندى احساس غريب انك عشت كل المواقف كمتفرج ..عاشرت الناس دى وعرفت احساسهم الحقيقى ..
الكل بيهرب ..الكل بلا استثناء ..واللى مش بيقدر يهرب ..بيهرب داخل نفسه ..
بينكمش ...جوةذكرياته ...سواء كانت اليمة او بها جزء من السعادة ...محدش بيلاقى ذكريات مليانة سعادة ..
كأنهم (( اتوا )) بكل الغلالات السوداء ...وطرحوها على الناس ...وقالوا لهم ...اتغطوا شوية واحنا حانصلح لكم كل (( الامكنة )) ...ولما الناس بدأت تفوق ...وتشيل (( الغلالات الرقيقة التى كانت تحجب عنهم الرؤية ))
فوجئوا ان مفيش ...غير ...(( ازمنة )) ..ازمنة ولت واندثرت ...وضاع معها كل ماهو جميل ..
وضاعت الفرص..
ضاعت ...عندما ارتضوا ...ورضوا ...بوضع الاقنعة ...
الناس بتفوق ...لكن ..شوية شوية ...
صعب انك تفتح عينيك بعد وقت طويل قضيته فى (( ظلام )) ...ارتضيته برغبتك ...منعا للمتاعب وخوفا على النفس ..
فى التسعينات ...تجرأ الناس ....ومع حلول الالفين ...لوح (( الاقوى )) بسوط ...(( حقوق الانسان ))
واستغل الضعيف لمعان السوط ...وبدأ فى التطلع للحماية من القوى عن طريق ...الاقوى ..
و..
اكمل ...
اكمل ياكامل ..
ودعنا نتأمل ...وننتظر ...ولعلنا نتحرك ...وتكون الخطوة الاولى هى اول خطوات الطريق الصحيح ..
معذرة للاطالة ...ولكنها مجرد ..شجون ...اتت على البال من حكاياتك ..
كل تحياتى ..

عزيزتي شهد .. عندما يأتي الإطراء ممن يمتلك مفاتيح الكلمة و رقة التعابير و ذكاء الطرح .. يكون اطراء مضاعف ... اشكرك علي مرورك و اهتمامك بالتعليق ...

الفاضل HDarwish ... شاكر اهتمامك بالتعقيب و أتمني ان تحظي بقية الشخصيات بنفس الإهتمام ....

عزيزي باشمهندس ياسر .... ملاك زي رضوان زي سمير زي فتحي ... كلهم مليانين حكايات .. كلهم بيدوروا علي حاجة فاكرين انها مش معاهم ... لكن معظمهم صدقني لو بص تحت رجليه حيلاقيها من غير بهدلة .... و بعدين مين اللي قاللك ان الصعايدة ما بيروحوش ايطاليا ... اومال الخمسين في المية اللي جوايا راحوا فين ....

عزيزتي مدام لولا .... الماضي يكون ابآ رائعآ و مدرس ذو ضمير عندما يكون نبراسنا ... عندما نجعله جذر لنا تخرج منه غصونآ وارفة .... و لكنه يصبح أغلالآ عندما نجعل منه كل حياتنا و نكتفي بما حدث فيه ... دروس الماضي هي غذاء احلامنا التي تنطلق و تتحول الي واقع عندما نريد ... عندما نصر .... و غلالة اليأس مهما كانت تخفي وراءها دائمآ قبس من الأمل ... و الا ما كان السفر من اساسه ...

عزيزتي مدام سلوي ... ستظل دائمآ خواطرك و شجونك تشق طريقها مباشرة الي حواسي ... فما بالك و هي تدور حول ما أفكر فيه ... نعم يا سيدتي عشت تلك المواقف و ما زلت أعيش فيها .. علي الأقل يومآ في الأسبوع ... ليست كلها بتلك القسوة فمعظمها يكون حلها ان ينظر تحت قدميه مثلما قلت لللباشمهندس ياسر ... و لكن هناك ايضآ من تقتلني كلماتها .. و يقتلني شعوري بالعجز امامها ... فانا لا أملك الا اذن لأستمع ... و قلم لأكتب .... و أحيانا نصيحة أحتاجها أنا قبل منهم

تاريخ المشاركة 26 October 2008 - 07:25 PM
القصة الثالثة
ستوديو مصر

y08.jpg

قالت شهرزاد ... بلغني يا ملك الزمان .. بعد أن فكرت الأذهان ... في قول ملاك الحيران .. تكلم أخيرآ من كان يبدو انه سرحان...

- عارف يا أستاذ ملاك .. انت عندك حق ... اخوات "كان" في مصر كتير قوي
- حتي انت حتتفلسف يا عم سمير ... و لا ناويين تقلبوها لحصة نحوي
- و لا حصة و لا درس يا حاج ... هو هربان من "كان" ... و انا هربان من الأستوديو
- ستوديو ؟؟ ستوديو ايه ؟؟؟
- بلدنا .... فاكر يوسف وهبي لما كان بيقول "و ما الدنيا الا مسرح كبير"
- آه .. فاكر ... ساعة ما نجيب الريحاني ما عوج الطربوش جنب ليلي مراد
- اسم الله عليك ... اهو لو الدنيا مسرح كبير .. بلدنا تبقي ستوديو كبير ... "ستوديو مصر"
- اشمعني
- هي قافية ... بقولك البلد بقت ستوديو كبير ... و تلاترباعها ممثلين ... و يا ريت ممثلين عليهم القيمة ... دول مجرد كومبارس ... ناس لا تعرف و لا تقرا يمثلوا انهم أهالي مهتمة بعيالها و تاخدهم للمدارس... جواها مدرسين بيمثلوا انهم مربيين و بروفيسيرات زمانهم ... و العيال .. ضهرهم انقطم من الشنط التقيلة .. و ساعات الحصص اللي ما بتخلصش ...و المسافات اللي بيمشوها لحد ما يوصلوا لمدارسهم .. و هما برضه يمثلوا انهم فاهمين و شاطرين .. و التليفزيون يذيع النتيجة و يمثل دور اللي بيطمن االبلد علي مستوي عيالها .. علي جمال شوارعها ... علي حكمة قوانينها .. علي مستقبلها الفللي ... موظفين يمثلوا الأمانة و التفاني في الشغل ... رجالة دين يمثلوا القداسة ... كنايس براها اسوار و شوارع مفروشة مصلين و كلهم بيمثلوا الإيمان... مسئولين يمثلوا الشرف و الشفافية ... عساكر يمثلوا الإهتمام بأمن البني آدمين ... رجال أعمال يمثلوا النزاهة ... شعب مريض و الدكاترة يمثلوا دور المعالجين ... و اللي مفروض انهم قرايب يمثلوا دور اللي دايمآ بيروح يزور العيان ... و العيان يموت و يرجعوه لبيته علي عربية يمثل سواقها انها عربية اسعاف ...و تخرج العيلة تصرخ و تولول و تندب و تمثل دور المنكوب ....و ناس تكره البلد و تمثل انها بتحبها ... و ناس برضه بتحبها لكن بتمثل انها بتكرهها ..

تمثيل في تمثيل في تمثيل ... و انا محتاج اعيش و لو يوم واحد بعيد عن الأستوديو الكبير ده ... يوم من غير تمثيل ... عشان كده انا غاير في ستين داهية ...


و هنا أدرك شهرزاد الصباح فسكتت عن الكلام المباح


أغنية الحلقة : هنا القاهرة

لولا
تاريخ المشاركة 30 October 2008 - 10:51 AM
كانت أيامى حقا صعبة ..تجولت على كل مسارح العروض.. وارهقنى حقا التجول!
المهم كان من الضرورة ان أمر لأرى آخر تقديمات ستديو مصر الراقى جدا فى كل ما يقدم
فوجدت الإضاءة مطفئة والمخرج فى إجازة والجمهور فى انتظار .

فاكر يوسف وهبي لما كان بيقول "و ما الدنيا الا مسرح كبير"
سكوب .. تعرف حقا كيف تمسك بذيل العبارة التى تختصر الفكره.


لولا

bentmasria
تاريخ المشاركة 30 October 2008 - 12:23 PM
صمت دهرا ونطق بكل ما تحتوي الحروف من حكمة سكوب عندما تعرض حروفك الساخرة العميقة لحكايات احلام ربما لن تتحقق فى قلوب يائسة لجأت للهروب من واقع يجسد المعاناة بكل حروفها المؤلمة انتظر التفاصيل بشغف لقلم رائع يجيد رسم الصور وتجسيدها وطرحها فى قلوبنا بعفوية مطلقة
هذا مرور سريع ولى عودة لتسجيل المتابعة
امتعتنى يا صديقى العزيز
كن بكل خير
مانا ومادا

أختي العزيزة لولا ...
تظل كلماتك المشجعة دفعة رقيقة لكثيرآ من زملاء القلم هنا .. و يشرفني ان أكون منهم انا ايضآ ....
:happy: :unsure:

أختي الغالية أم مادا ...
انتظرت رأيك بشغف .. انتظرته حكاية بعد حكاية ... و أخيرآ جاء وقته فأسعدتيني أيما سعادة ...
اشكرك
:roseop: :roseop:

القصة الرابعة

" جمهورية اللومان العربية "

Posted Image

قالت شهرزاد ... بلغني ايها الملك المنير ... انه عند انتصاف النهار و اشتداد السعير ... فما بين صغير و كبير ... تقدم شاب من الرمضاء مستجير ...

- طب انتم و عندكم عالأقل سقف تتاوا تحتيه ... عندكم حد يسأل عليكم و تقلقوا عليه ...
- انت يتيم يا ابني ؟؟
- يا ريتني كنت يتيم بحق و حقيقي .. بدل ما أنا يتيم من ناس مستعرة مني ... متبرين مني ...
- فيه حد يتبري من لحمه يا جدع
- لو كان لحمه لومانجي و ارباب سوابق آه .. يتبري منه و يعمل نفسه ما يعرفوش .. زي ما الدنيا كلها عاملة نفسها انها ما تعرفهوش ... زي ما انت نفسك دلوقتي لما عرفت وشك اتغير ....
- و لا أتغير و لاحاجة يا أبني ... الواحد بس جاله احراج من الموقف ... اتفضل سيجارة .. هو اسم الكريم ايه ؟
- فوزي ... ما تزعلش مني يا حاج ...انا طهقت من عيشتي .. و لولا شوية خوف من ربنا فاضلين كان زماني فضيتها سيرة من الدنيا كلها و رميت نسي من اعلي برج فيكي يا بلد ...
- استهدا بس بالله .. حتُفرج ان شاء الله .. ده كفاية بس انك دلوقتي بره السجن
- بره السجن ايه بس يا رجل يا طيب .... ماهو اللي ما يعرفش يقول عدس ... اللي اتسجن بس ممكن يعرف .. ممكن يحس ... تصدق بالله يا حج
- لا اله الا الله
- انا كل ذنبي اني قلت لأ ... و دي معاهم مالهاش غير حل واحد ... يطلعوك انت الحرامي و المرتشي ... و يدخلوك انت السجن بدالهم عشان هالة القداسة تنور اكتر حوالين راسهم ...بس ما علينا .. مش السبب اللي عايز اشرحه .. ما بقالوش لازمة خلاص ... عارف .. لما كنت في السجن .. كنت برضه بفكر في حكاية "بره" و "جوه" دي ... فكرة ان فيه "بره" حييجيلي يوم و اشوفه هي اللي كانت مهونة عليا ليالي الزنزانة .. و الحيطان السودا ... و الوشوش العكره .. و القضبان اللي كانت محاوطاني ليل و نهار ... لكن بعد ما خرجت و كلي شوق ل "بره" دي... ما لقيتهاش .. ما لقيتش ال "بره" اللي كانت عاملالي التوازن النفسي جوا الزنزانة بدل ما كنت حتجنن ...
خرجت وسط بشر احاول اعيش بينهم من جديد ... بشر في جيب كل واحد منهم شهادة حسن سير و سلوك وهمية ... صحيفة سوابقهم بيضاااااا ... بشر احرار لكنهم عايشين بنفس عقلية المسجونين اللي كانوا معايا ....
الكل عايش في سجن كبيييييير .. جمهورية اللومان العربية ... كلهم عايشين بعقلية "جوه" ... ما بقتش اشوف غير زنزانة كبيرة .. كل اللي فيها مساجين بؤساء .. حتي و لو لابسين جلاليب العيد .... او بِدَل الإجتماعات ... بشوفهم بلبس السجن .. و انا في وسطيهم ملفوظ .. كلب جربان يبعدوا عنه و يبصوله بقرف ... مثال علي انهم كويسين ... مثال علي ان فيه حد انيل منهم ... و لما تصرخ في وشهم كل اللي يقدروا عليه يقولولك انت لسه فاكر .. انسي ...

تعبت ... و ما بقاليش عيشة في جهنم دي .. اي مصيبة تانية حتكون احسن و ناسها حيكونوا ارحم ميت مرة ....

و هنا أدرك شهرزاد الصباح ... فسكتت عن الكلام المباح ....

أغنية الحلقة

أنسي ؟؟ كيف ؟؟

عصام أبوالفتح
تاريخ المشاركة 07 November 2008 - 02:35 AM
سعدية بنت حسين .. أملك يا مسكين

والمكتوب على الجبين .. لازم تشوفه العين

الاخ الكريم سكوربيون : ابداع وخبرة كهول ... وليس 18 عام ابدا ... ماشاء الله

bentmasria
تاريخ المشاركة 08 November 2008 - 11:54 PM
انا كل ذنبي اني قلت لأ ... و دي معاهم مالهاش غير حل واحد ... يطلعوك انت الحرامي و المرتشي ... و يدخلوك انت السجن بدالهم عشان هالة القداسة تنور اكتر حوالين راسهم ...بس ما علينا .. مش السبب اللي عايز اشرحه .. ما بقالوش لازمة خلاص ... عارف .. لما كنت في السجن .. كنت برضه بفكر في حكاية "بره" و "جوه" دي ... فكرة ان فيه "بره" حييجيلي يوم و اشوفه هي اللي كانت مهونة عليا ليالي الزنزانة .. و الحيطان السودا ... و الوشوش العكره .. و القضبان اللي كانت محاوطاني ليل و نهار ... لكن بعد ما خرجت و كلي شوق ل "بره" دي... ما لقيتهاش .. ما لقيتش ال "بره" اللي كانت عاملالي التوازن النفسي جوا الزنزانة بدل ما كنت حتجنن ...

ماشى يا سكوب طبعا انت عارف كويس قوى انت بتعمل ايه الحكاية موش مجرد سجن واتهام او رفض لواقع او حتى عدم تاقلم انت ببساطة بتلخص مشكلة قومية وبمنتهى الذكاء زى ما الاجانب بيقولوا (أصبحنا لا ننتمى لاصحاب الهالات النورانية ولا ننتمى ايضا للاكس كون يعنى we don't merge any where ) ولانها مالهاش حل ولا حتى الهروب (اسأل مجرب انا مستنية الحل الجهنمى لو موجود ولانى عارفة تقريبا وموش حسبق الاحداث فأنا قاعدة مبحلقة عنيا وبحاول اوطى الضغط والسكر ويا صديقى العزيز عصرت على نفسى كل الليمون اللى ف البلد حتى عملت ازمة ليمون جامدة جدا عشان اعمل اى merge فى كتيبة الاحياء المجهدين بنت عم المتعبين بتاعة مهيب الله يرده بالسلامة المهم
انت شاطر ولغتك قوية واسلوبك جذاب جدا وطرحك بيناقش اوجاعنا اليومية يحنكة جميلة وانا منتظرة فعلا كل حكاية جمهورية اللومان العربية ما تتاخرش علينا من فضلك فعلا جميل
ام مادا افندى يا سى الاستاذ كامل

الباشمهندس ياسر
تاريخ المشاركة 26 November 2008 - 01:49 PM
و أدرك شهرزاد الصباح

فسكتت عن الكلام المباح


و تقريبا جاتلها غيبوبة ولا ايه بالظبط


سكوب مازلت فى انتظار المزيد

تاريخ المشاركة 28 November 2008 - 11:22 PM
الأستاذ الفاضل عصام أبوالفتح
اشكرك علي تشجيعك الرقيق ... و ان كنت اوافقك بتحفظ علي مبالغتك في نقطة اإبداع و خبرة الكهول ... لهذا سأقبل منك سعيدآ نصف الجملة الثاني فقط و الخاص بالكهول ... فهذ يرجع فقط الي السنين ال 18 التي مرت علي زواجي .. مما جعلني بالفعل علي ابواب تلك الكهولة الجميلة ....

الأخت العزيزة أم مادا ....
يكفيني سعادة ان تنال تلك السطور اعجاب من يقرأها ... فما بالك بمن يصل بالفعل الي اعماقها ... اشكرك أختي العزيزة و أوافقك ان الهروب سيظل دائمآ حل وقتي ... و لكن الهزيمة الفعلية هي عندما نفقد قدرتنا علي المقاومة ... عندما نجعل من قلبنا عرشآ لزنزانة ... عندما تصبح القضبان داخلنا .... و أنا لا أعتقد انك من قبيلة المستسلمين .... فيكفيكي هذا الوحه الباسم ... البريء .. الجميل .. يكفيكي وجه مادا (ما شاء الله ) يزود عنك و تحمليه في داخلك سيفآ و درعآ ...

عزيزي الباشمهندس ياسر
شهرزاد لا جاتلها غيبوبة و لا حاجة .... كان "مزمزأة " في الحكاية اللي جاية علشان عارفة انها تضايق شهريار ... لكن في الآخر فكرت شوية و قالت ياللا .. ياما دقت عالراس طبول .... و جات تحكيها للحبايب ...

لكم جميعآ كل مودتي و شكري ....

القصة الخامسة
"حرام"

957623608963.jpg

بلغني ايها الملك المُكرم .. انه بين ثائر و مُستسلم .. تقدم من له هيئة المُعلم ... رافضآ كل من منع و من حرم

- كلآ يغني علي ليلاه ... إحنا بلد بتتفنن في خلق المشاكل بأيديها ... و بعدين ما تلاقيلهاش حل ..تقوم علشان تخرج من الورطة اللي خلقتها تستسهل و تربط كل الحلول بالدين أو بوجهة نظر فيه ..
- هو فيه شك يا أخ ان كل حاجة مرتبطة بالدين... هو انت مش مؤمن و موحد بالله برضه
- مش فاهم ايه العلاقة ... مؤمن و الا مش مؤمن ...
- ما هو لكل مقال مقام .. علشان بس الواحد يعرف هو بياخد و يدي مع مين
- (بنفاذ صبر) ... مؤمن يا سيدي استريحت
- يعني مؤمن زينا
- هو فيه مؤمن زينا و زيهم يا عم انت ... ما احنا كلنا هنا مؤمنين
- طب خلاص فهمنا .. ربنا يسهل لك يا اخينا ...
- يا حاج حرام تقوله يا اخينا ... ادعيله بالهداية و خلاص
- اهو علشان اللي بيفكر بالشكل ده فايتهالكم ... خلاص قسمتوها ... و عرفتوا مين اللي اهتدي و مين لأ .. كله حرام في حرام في حرام
- ما خلاص بقي يا استاذ هو جر شكل و خلاص ... روح يا عم ربنا يسهل لك
- حروح ... حروح .. ما اهه كلنا رايحين مع بعض و في نفس الحتة و برضه كلآ يغني علي ليلاه ...
عندك و لا عنده بقي كله حرام .. ما بقاش فيه حد عايش في حاله .. تروح عند فتحي يقوللك حرام ... تروح عند تادرس يقوللك حرام ... الفكر حرام .. السياسة حرام .. السلام علي ده حرام .. تهنئة ده حرام ... الحب حرام ..كل العلاقات الإنسانية مع التانيين بقت حرام ... ده حتي الغنا بقي حرام ... اشمعني هما .. اشمعني العصافير يعني ما يحرموا صوصوتهم هما راخرين ..

سكون تام .. وضيق سيطر علي الجميع ... و لكن صاحبنا مازال يثرثر ...

- تقولش فيه سبق تحريم ... سبق ايه ده ماراثون تحريم ... كله بقي فالح في التحريم و المنع ... بقينا لازم نلغي حواسنا و عقلنا ... لا تبص و لا تسمع ... لا تشم و لا تلمس و لا تدوق ... و لما يجيلك شلل تام .. تلاقيهم اتلفوا عليك و ابتدوا يحددولك بقي ايه اللي ممكن تسمعه .. ايه اللي مكن تشوفه .. و ايه اللي تفكر فيه ... غير كده حرام ... كله بيحرم و اللي لسه ما حرمش تلاقيه بيدورلك علي رواية من عشروميت سنة يحرم بيها حاجة لسه ما فيش حد سبقه ليها ...
- اتقي الله يا افندي بقي .. و كفاية بقي ... انت كمان حتتمألس علي تاريخنا
- انا متقي الله و عارف ديني كويس يا سيدي .. و مش مستني اللي يجي و يعلمني .. و بالذات في الموقف اللي احنا كلنا فيه دلوقتي ...
مصيبتنا اننا عايشين شيخوخة مزمنة ... و مش شيخوخة اي كلام .. دي الشيخوخة اللي دخلت في مرحلة التخريف و الزهماير ... بقينا نخاف من التطور اللي ما نعرفوش و لا فاهمينه ... نخاف من العصر اللي العالم كلها عايشاه بطرقه و اساليبه .. فنعمل ايه ؟؟ نتبط و نتكفي علي الماضي .. و نربطه بالدين و بس ... و يبقي الماضي ده هو الحاجة اللي عايشين عليها .. سلمناه نفسنا ... سلمناه كل مظاهر و طقوس حياتنا زي ما قال الأستاذ بتاع كان و أخوتها ... عاملين بالظبط زي راجل العجوز مش قادر يعيش في العالم اللي بيتغير جنبه .. مش قادر يتأقلم معاه .. يقوم يعيش حلم يقظة .. حلم ايام شبابه لما كان سبع ... و لما ييجي حد يقول له فوق يا عمنا .. تلاقيه يقولك طبعآ ما العالم خايفة مني .. العالم بتتآمر عليا ... حتخاف من ايه و تتآمر علي مين يا حسرة ... هي فاضيالك من اساسه ...

عشان كده فايتها و رايح في حتة مافيش غير ضميري و قلبي بس هما اللي يقولولي ايه هو الحرام و ايه هو الحلال ...


و أدرك شهرزاد الصباح فسكتت عن الكلام المباح


أغنية الحلقة
نويت أغني

newcomer
تاريخ المشاركة 29 November 2008 - 01:13 AM
هايل يا استاذ/ سكوربيون.........( و لو انى مش حاسه ان الاسم ده ماشى مع احساس حضرتك المرهف...... اللهم اذا كنت من برج العقرب :blush2: )

ده كتابات حضرتك دى اكتشاف........ اعذرنى انى ما اكتشفتهاش قبل كده...... زى ما المثل بيقول........الغريب اعمى و لو كان بصير......( انا جديدة مش غريبة)

على فكرة الكلام ده مش مجاملة......... انا باصنف نفسى wub.gif قارئة بدرجة الاحتراف ( لو يجوز التصنيف laugh.gif )

كمان مرسى اوى على اغانى الحجار و اختيار مناسب جدا للحلقات

عبقرينو
تاريخ المشاركة 29 November 2008 - 08:17 AM
عزيزي الاستاذ / سكوب

تسجيل متابعة واستمتاع بكتاباتك الرائعة

دمت لنا ودامت ابداعاتك

تحياتي

عبقرينو

لولا
تاريخ المشاركة 29 November 2008 - 11:26 PM
صدقاً هذه المره لم اعرف كيف أُعلق على ما كتبت ياسكوب .. ربما لأنى عندما قرأته للمرة الأولى شعرت بصدمه !!
أتعرف لما كانت الصدمه ؟؟!! لقد كنت افكر فى ذات الشيئ .. ذات الأفكار ... نفس الكلمات ... نفس الأسئله
كنت مشغوله الفكر فى الأيام الماضيه بالتفكير فى كل ذلك ووجدتك تُلخصه كله بشكل بديع - كعادتك - فى قصتك
المليئة بالحياة !
نعم الحياة سكوب .. الحياة التى يتدخل البعض بمنطق غريب متنطع لقتلها داخل البشر ، الحياة التى اختنقت
من أكوام التراب التى تتم إهالتها على أجساد حية .. لم تتحول بعد لجثث ..!! وربما حولها التراب لجثث متحركه !!

أحييك على جرأة الطرح ... احييك بشده لا تتخيلها ... ليس المهم ان يتفق معك احد او يختلف ... فقط عبر عما تريد
ان تقول .... إرمى الحجر على بحيرة الحياة فحركها قبل ان تتعفن .. وقل لبطل حكايتك هذه المرة ان ضميره وقلبه
سينيران الطريق ... القلوب والضمائر الحيه تعرف كيف تعيش كل شيئ بحب ..دينها ودُنياها .. القلب والروح والعقل والدين
لا أعتقد أن المطلوب ان نقتل احدهم لنعيش .. خلقنا بهم جميعا .. لأن الله اراد لنا ان نستعملهم ونعيش بهم.. وندرك حتما كبطل
حكايتك كيف نستعملهم دون ان نرمى القلب فى قارعة الطريق ونضع العقل على الرف ونخنق الروح فى صندوق ضيق او نتنكر للدين
ولكن الحياة تحتاج التناغم .. التوازن فى كل شيئ.

يقولون ان الفن أحلى ما فيه انه يعبر عن الحياة .. يعكسها على مرآه صافيه بشكل بديع .. والكتابه هى نوع من الفنون
انها قدره على صياغه الفكره بتميز كنجمه .. تضيئ .. فيصل ضوءها للآخرين.


تحياتى لك

لولا

تاريخ المشاركة 17 December 2008 - 11:13 PM
الفاضلة newcomer

أولآ اسمحيلي أن أرحب بحضرتك ( حتي لو جاء الترحيب متأخرآ ) عضوة جديدة بين اسرة المحاورات ...
ثانيآ اشكرك علي اطرائك الذي اسعدني بحق و بالأخص من خلال تقييمك لنفسك كقارئة محترفة .. و لكن هكذا سوف أصدق بالفعل .. بينما هنا في المحاورات .. و بالأخص في هذا الباب ستجدي "فطاحل" في الكتابة بالفعل لا أجرؤ حتي علي مقارنة ما أكتبه معهم ...

علي ايه حال اشكرك بصدق
ملحوظة ( سكوربيون لأني من برج العقرب .. و تلك هي العلاقة الوحيدة لي به )


عزيزي عبقرينو
ربنا يخليك يا رب ... كتر خيرك علي رفعك لروحي المعنوية بكلامك الرقيق ده ...

علي فكرة .. في طفولتي عبقرينو كان شخصيتي المفضلة علي الأطلاق ...
تحياتي و أتمني ان تحظي باقي القصص باعجابك أيضآ


أختي العزيزة مدام لولا ...
صدقيني .. شعرت بقشعريرة عندما قرأت سطورك ...
Quote
لقلوب والضمائر الحيه تعرف كيف تعيش كل شيئ بحب ..دينها ودُنياها .. القلب والروح والعقل والدين
لا أعتقد أن المطلوب ان نقتل احدهم لنعيش .. خلقنا بهم جميعا .. لأن الله اراد لنا ان نستعملهم ونعيش بهم.. وندرك حتما كبطل
حكايتك كيف نستعملهم دون ان نرمى القلب فى قارعة الطريق ونضع العقل على الرف ونخنق الروح فى صندوق ضيق او نتنكر للدين
ولكن الحياة تحتاج التناغم .. التوازن فى كل شيئ.
ما أروعها من كلمات ... بارك الله في شخص حضرتك و هنيئآ بأسرتك الكريمة بمن يحمل هذا الفكر ...

تحياتي دائمآ ...

للجميع كل شكري العميق .... md2:

القصة السادسة

كَ . تَ . بَ .

كَتَبَ


scrivere.jpg


بلغني ايها الملك الهمام ... ان من بين ابناء الأحلام ... قام ذو الوجه البسام ... و ذهب لمن كان يكسر أقلام

- أنا أعرف حضرتك
اشاح الرجل بوجهه مرتبكآ مهمهمآ– ما افتكرش .. يمكن يكون واحد بيشبهني..
- لأ .. مش ممكن ... حضرتك الأستاذ عبد الله رشدي اللي كنت بتكتب في مجلة أدباء مصر ... انت مش عارفني يا استاذ انا البير بتاع المطبعة .. ايه ده هو حضرتك راخر حتسافر معانا في المركب ..( لحظة سكوت و ترقب بين الأثنان ) آآآآه ه ه ... أقطع دراعي انك عايز تتنكر في وسط العالم دي علشان تعيش القصة و تكتب عليها مقال يكسر الدنيا
- أكتب ايه بس يا البير .. و النبي وطي صوتك و سيبني في حالي
- يعني عرفتني .. يعني حضرتك الأستاذ عبد الله ... بس بجد حاجة تمخول .. حد يسيب الكتابة و يترمي رميتنا دي
- كتابة ايه بس يا ابني ؟؟ اكتب ليه ... و اكتب لمين ؟؟؟
- هو ايه اللي تكتب لمين يا استاذ ؟؟ للناس ... للقراء بتوعك
- والله انتي طيب يا البير .. للقراااااااء بتوعي ... مين هما القراء دول اللي اكتبلهم
اكتب للعمال و الفلاحين اللي تلاتربعهم ما بيعرفش يفك الخط من اساسه
والا التلامذة و الطلاب اليائسين لدرجة الأنهيار
و لا العواطلية الا معاهمش حق الرغيف تقوم تستني انه يروح يشتري كتاب و الا حتي جرنان
و لا الموظفين اسري ثالوث الذل ... الشغل و السوق و شباك الصرف لآلي
و الا اصحاب الشغل اللي نزل عليهم من السما إلهام مادي من غير ما نيزل عليهم إلهام معرفة
و الا اللي ما بيقروش غير تطبيل و تزمير
و الا اكتب لنفسي

و بعدين أكتب ليه ؟؟
أكتب عشان اغير نظام البلد
و الا أكتب عن الحرية و العدالة
ايه قيمة الحرية في مجتمع بيحكمه الخوف
ايه قيمةاللعدالة في مجتمع ابتكر الرشوة علشان يحصل علي ادني حقوقه

و بعدين حتي لوكتبت .. كتبي حتروح فين
علي رفوف متغطية تراب في مكتبات الشعوذة و السحر الأبيض و الأسود
و الا جوا دواليب المدارس تحت علب الطباشير و الكراريس المقطعة
و الا في مكتبة مدعي الثقافة بين كتب مرصوصة حسب أحجامها و الوانها
و الا في الأكشاك جنب مرجوعات الجرانين و المجلات
و الا علي الرصيف جنب بوسترات الفنانين و المجلات الجنسية الرخيصة
و الا قراطيس علي غربيات الترمس و محلات الطعمية

مالهاش فايدة الكتابة هنا ... علشان كده انا خلاص قررت و حددت وجهتي ... حسافر معاكم يمكن الاقي في الشط التاني مكان اتنفس فيه هوا القيم النبيلة ... هوا الثقافات المتعددة من غير شروط .. يمكن اقدر اصالح نفسي ... يمكن علشان صوتي يوصل اعلا و اوضح لولاد بلدي لازم اودعهم كلهم .. ده وقت الفراق
- ووقت اللقا يا استاذ
- لازم حييجي يا لبير .. لازم حييجي



و هنا أدرك شهرزاد الصباح ... فسكتت عن الكلام المباح ....



أغنية الحلقة

الوداع

newcomer
تاريخ المشاركة 17 December 2008 - 11:32 PM
Scorpion, on Dec 18 2008, 12:13 AM, said:
الفاضلة newcomer

أولآ اسمحيلي أن أرحب بحضرتك ( حتي لو جاء الترحيب متأخرآ ) عضوة جديدة بين اسرة المحاورات ...
ثانيآ اشكرك علي اطرائك الذي اسعدني بحق و بالأخص من خلال تقييمك لنفسك كقارئة محترفة .. و لكن هكذا سوف أصدق بالفعل .. بينما هنا في المحاورات .. و بالأخص في هذا الباب ستجدي "فطاحل" في الكتابة بالفعل لا أجرؤ حتي علي مقارنة ما أكتبه معهم ...

علي ايه حال اشكرك بصدق
ملحوظة ( سكوربيون لأني من برج العقرب .. و تلك هي العلاقة الوحيدة لي به )


.... md2:

و الله انا قدرت برضه ان حضرتك من برج العقرب sbx:

احسن ناس ....

ادب ..... ذوق...... اخلاق.....الخ....الخ

اقول ايه بس و لا ايه

من غير فخر يعنى و لا غرور و لا حاجة

هما عموما العقارب بتلم على بعض .......

زميلتكم / سكوربوناية...... نيوكمر .....سابقا


بس بجد انا فى حكاية التذوق الادبى ده ..... ماعنديش ده جريبى يا بوى

و ده عقرب بلدياتنا ..... وكده يعتى !!

انا بقصد اللى قلته.

يالا بقى ... ياريت نقرى حاجة النهاردة ..... بس مع الاغنية بتعاتها

ربنا يبارك فيك !