انا وجونيور

تاريخ المشاركة 16 March 2006 - 05:10 PM
مش عارف لو كنت حكيتلكم انه من حوالي عشر سنين .. كنت بتخانق دايمآ مع ام جونيور علشان كان عندنا تليفزيزن من غير ريموت كونترول... و ماكانش فيه حد منا عنده استعداد انه يقوم كل شوية علشان يغير المحطة او يعلي الصوت او يوطيه ...
فعلشان كده و بعد التصويت و الموافقة بالأجماع قررنا اننا نخلف عيل... فكرنا اننا ممكن نستحمل الوضع ده كمان سنتين تلاتة .. و بعدين بشوية تمارين الواد حيتعلم يغير المحطات و يعلي الصوت او يوطيه و بكده اخيرآ ممكن نقعد مستريحين علي الكنبة و نوفر حق ريموت كونترول جديد ...
و بكده شرف المدعو جونيور الدنيا .. و لكن لغاية ما وصل لسن تغيير محطات التليفزيزن ابتدت تجيلي افكار ما كانتش في البروجرام الأصلي ...
يعني لاحظت مثلآ ان اول ما الواحد منا يجيله عيل .. تلاقيه امتلا فخر و رضا .... تلاقينا من غير ما نحس و هو لسه في اللفة عمالين نكلمه كشخص كبير .. تبص في عينيه و بمنتهي الثقة تلاقيك بتقوله : بكره انا متأكد انك حتبقي جراح كبير ... و لا أقولك محامي من اللي هما .. و لا شكلك كده حتطلع مهندس زي اللي بيعملوا مشاريع المدن و الكباري العملاقة .. انا متأكد ...
تفضل تقوله كده .. و تقنعه و تقنع نفسك بانه مش طفل عادي .. و انه حيوصل للي انت ما قدرتش توصل له ... حيكون ردك علي الدنيا الوحشة اللي غمرت مواهبك و فطستك تحت تقلها ...
تعدي كام سنة و تبتدي تلاحظ تصرفاته و تفكيره وتنزل شوية من بساط الريح اللي طرت عليه و تقول : ماشي .. احتمال مش حيطلع اينشتاين زمانه .. بس مية في المية البكالريوس و جيد جدآ كمان محدش حيمنعه من اخده...
كمان كام سنة ... و تلاحظ ان الواد مش من اوائل الفصل يعني .. و كام كحكة حمرا بيرجع بيها من المدرسة ... ما تيأسش و تقول ما هما ما عندهمش ضمير في التدريس .. كام درس خصوصي و الواد حيبقي فوريرة ...
بعد ميت درس خصوصي .. و دفع دم قلبك تلاقي الكحك زي ما هو و كمان عليه بسكويت و بيتيفور .. و تبتدي تنزل علي ارض الواقع .. احتمال مش حيطلع جراح و لا دكتور بيطري .. بس ميه الميه تمرجي و رئيس عنبر ... حيقدر يعملها ...
بعد كل ده يكون كبر و بانت لبته ... و مالوش في المذاكرة من اساسه .. تحط صوابعك في الشق .. و تقول اتنيل اطلع زي ما انت عايز .. المهم ما تجيبليش مصايب في البيت ...
بالجملة دي تكون سلمت ابنك مفتاح حياته .... و فهمته انه من هنا ورايح لازم يعتمد علي نفسه .... و لكن ده ما ينفيش انه في نفس الوقت الأب كل السنين دي بجانب الأهتمام بدراسة ابنه ما قعدش يطرقع بصوابعه جنبه ... كل السنين اللي عدوا قبل اللحظة دي الأب حاول يعلم ابنه احسن الطرق و النصايح علشان يواجه الحياة .. و الأهتمام ده كان مضاعف في السنين الأولي لما الواد لسه كان في الأبتدائي .. لما كان بيجيبله هدايا و لعب من خلالها كان عايز ينمي مواهبه و يرمي جواه بذرة اللي حيعمله في المستقبل ... لما ابتدي يجيبله "اللعب التعليمية" .. زي لعبة الدكتور الصغير او الكيميائي الصغير .. او المهندس الصغير ...
بالطريقة دي الأهل بيحاولوا يكتشفوا اهتمام اطفالهم و ميولهم ناحية مهنة او اخري .. و بكده يبتدوا يشجعوه و يتابعوا الأهتمام ده... و لكن عادة كل الأهتمام ده بيجيب نتيجة عكسية .. بمعني ان العيل من دول بعد فترة بيزهق من كل اللعب دي و الحكايات حولها و لما يوصل لمرحلة المراهقة .. لما فعلآ لازم يبتدي يتحرك لوحده .. تلاقيه رمي اهتمامه علي الحاجات التانية اللي عمر ما اهله كلموه عنها ...
اهتمام المراهق دلوقتي اللي كان طفل سابق من كام شهر حتكون لما يبتدي يبص حواليه و يقول : لما نشوف بقي ايه بقي المخدرات دي اللي عمر ما حد كلمني عنها "
و يبتدي يقرب من الجزء المجهول ده من غير اي تحضير او معرفة بما ان مافيش ابدآ حد كلمه عنها و بكده يقع و ماحدش سمي عليه.. و غالبآ ما حيشيل اثار التجربة دي طول عمره ...
علشان كده .. انا مع جونيور قررت اني اعمل التجربة بالعكس .. يعني دلوقتي بنتكلم عن المخدرات .. و بكده لما يكبر يكون زهق منها و يمكن يبتدي يهتم بحاجات اكثر صحية ...

احمد هادي
تاريخ المشاركة 16 March 2006 - 05:26 PM
والله وجهة نظر تحترم برضه

لأ وتجربه رائده

واقترح انك تجيب سيجارتين بانجو...تلفوهم... وتشربوهم مع بعض في البيت ( اهو ابننا وقدام عينينا,)

احسن ما حد يضحك عليه بره ويشربهاله والولد البرئ ياخد صدمة تسبب له عكوسات في المستقبل

فعلا هي دي التربيه الي تعد الإنسان لمواجه المستقبل

والتعرف علي حقائق الحياه

والله ما جصرت

و ربنا يوفقك

اريخ المشاركة 16 March 2006 - 05:41 PM
عزيزي احمد هادي ..

اعتقد انه لم يحالفني التوفيق في شرح الفكرة في هذا الموضوع .. و لذلك وصلت لحضرتك بهذا المعني ....
عندما اتكلم مع جونيور عن المخدرات .. فهو شرح لها ... و تأثيرها .. و بدلآ من تجربتها معه فأننا نقوم معآ بزيارة معاهد معالجتها ليري بنفسه تأثيرها مباشرة و نهاية متعاطيها ...

و احنا بندحرج التماسي ....

احمد هادي
تاريخ المشاركة 16 March 2006 - 05:53 PM
عزيزي سكوربيون

وصلت الفكره

لكن ......ارجع الي العنوان

ملحوظة :فتحت باب البيت وببص علي الجبل لانها لو اتدحرجت من فوقه علي البيت ممكن تسبب قلق


الحمد لله أهي التماسي وصلت بسلام

لخبطه
تاريخ المشاركة 16 March 2006 - 09:37 PM
فعلا أستاذ Scorpion
التربية دلوقتى اصبحت مختلفه جدا فلازم نواكب روح العصر
الشاب أصبح فاهم وعارف كل حاجه ولازم هيشوف ويسأل عن كل حاجه
فروح المؤخاه دي حلوه وتزرع في الولد الثقه بالنفس و المناعه في نفس الوقت

اريخ المشاركة 17 March 2006 - 01:25 PM
اعزائي ..
هدفي من هذا الموضوع مناقشة شقان يقعأ علي عاتق الأباء و الأمهات ..
الأول ليس بالضرورة ان يصبح الأبن رد الأب علي فشله في تحقيق احلامه .. و تحوله الي اداة فقط لتحقيق هذا الهدف ...
و الثاني هو التوعية التي يجب ان نقوم بها .. و باسلوب عملي ... فمثلآ نصيحة "ما تخدش حاجة من واحد ما تعرفوش " ... و بس ... بدون ان نشرح له بصورة عملية نتائج الأقتراب من أغراب لن يفيد بشيء ... و قس علي هذا كل ما يجب ان نشرحه له من مساويء الحياة الموجودة للأسف ...

الأمر المباشر فقط ... ليس هو الحل ... شرح لماذا مع رؤية امثلته قد يساعد اكثر


الفاضل احمد هادي كتب :

Quote
وصلت الفكره

لكن ......ارجع الي العنوان


عندك حق عنوان مثل "لما اكبر عايز ابقي مدمن " لا يعبر بالفعل عن المضمون .. و لذلك سيتم تغييره ..
شاكر لتوجيه النظر ....

مصرية الهوى
تاريخ المشاركة 17 March 2006 - 05:31 PM
فعلاً معاك حق يا اونكل سكوب ..
الأب والأم .. بيبقوا عايزين أولادهم يبقوا أحسن ناس وأذكى ناس وأفضل ناس ..
وأنت لازم تدخل طب والا هندسة والا مش عارفه ايه .. انت مش أقل من الطبيب فلان والا المهندسة فلانه .. بدون ان يفكر الاباء والامهات ان بكده بيدمروا مستقبل اولادهم بأيديهم وبيشككوا الاولاد بمهاراتهم ومواهبهم .. يعني يا اما تدخل طب او خلاص مالكش مستقبل !! .. دي نقطة ..

النقطة التانية .. نقطة الإدمان أو تعاطي المخدرات ..
صحيح ان التوعية مطلوبة .. وان الولد يشوف الناس المدمنة .. وازاي ضيعت نفسها ومستقبلها وصحتها وكل حياتها بتعاطيها للمخدرات ..
بس مش عارفه ليه .. حاسه ان تعاطي المخدرات مش حاجه بالساهل .. يعني لو الولد تربى في أسرة متماسكة .. تمنحه الحب والحنان والثقة .. الولد تعلم وصاحب ناس أسوياء .. موضوع المخدرات ده بعيد اوي .. يمكن نقول التدخين .. ممكن وكثير يحصل .. بس المخدرات .. حاسه انها بعيدة شويا .. وخصوصا مع التحصين والتثقيف للولد ..

بس لو الولد فضل يشتغل الشغلانة دي .. معلي وموطي صوت التليفزيون :closedeyes: ..
ربنا يستر على اللي هيحصل له !!
بس اقولك طريقة جميلة .. جيب عصايه طويلة .. تقوم مقام الريموت كنترول ..
وعيشوا بقى :closedeyes:

اريخ المشاركة 24 March 2006 - 09:59 PM
لأ ما خلاص يا جيجي .. ربنا تاب علينا و اشترينا واحد بالريموت و الوان كمان ...

المهم ... نرجع للعلاقة بين الأب و أبنه .. و المرة دي حنتكلم عن الهدايا ....

عادة موجودة هنا في اوربا .. ان عيد الميلاد المجيد يتحول من عيد ديني لعيد مادي بحت محوره الهدايا ...و الوجبات ... يعني صحيح الناس بتبقي اطيب .. و أهدا ... و الأنوار في كل حتة .. و الشوبينج شغال علي ودنه ... و الضحك اكتر من الزعل .. بس ما عرفش ايه علاقة ده بعيد الميلاد بخلاف قداس العيد .. علي العموم نبقي نتكلم عن الجانب ده مرة تانية ... و في موضوع تاني ...
نرجع لموضوعنا ... من كام سنة .. جونيور كان عنده 6 سنين .. و قبل العيد جالي بأبتسامته الطفولية .. و سألني ازاي يطلب هدية من بابا نويل ... انا .. كأب عادي .. قولتله انه لازم يكتب جواب لبابا نويل .. يقوله ازاي انه كان شاطر .. و مطيع .. و يطلب هديته و انا بعد كده حبعتها علي عنوان بابا نويل علي القطب الشمالي ...
جونيور ما كدبش خبر و كتب الجواب :
عزيزي بابا نويل
انا جونيور .. و بما اني السنة دي كنت دايمآ طيب .. و شاطر في المدرسة و بسمع دايمآ كلام ماما و بابا .. و كنت كويس مع اصحابي ..فأنا عايز بيج جيم....

و اداني الجواب اللي عملت نفسي مهتم بكتابة العنوان .. و حطيت كمان طابع البوستة ... و انا نازل قلتله حبعته لبابا نويل ... و لكن زي ما كلكم عارفين بابا نويل اي طفل هنا هو ابوه ...
عملت لفة علي محلات اللعب ... و اكتشفت ان اولآ سي بيج جيم ده اللي كان عايزه كان تمنه اياميها 145000 ليرة ... حوالي 80 يورو .... لكن اللي ضايقني اكتر انه كلن واد حليوة .. اشقر ... جسم رياضي .. هدومه كلها سينييه ... و عنده فراري .. و بيروح يقضي اجازته في موناكو و خطيبته الست باربي علي سن و رمح ....

دلوقتي ... حطوا علي جنب مؤقتآ ال145000 ليرة ..لكن اني ادخل بيتي شخصية زي دي.. ما كانش حيكون في صالحي ابدآ ... يعني افرض مثلآ ان جونيور يبتدي يعمل مقارنات .... شكلي حيبقي وحش خالص .. و علشان كده و بعد تفكير ...

الاسكندرنى 06 - 12:51 AM
الله ينور عليك يا سكوب الموضوع ده مهم جدا
يعنى انا بتعلم من خبرتك مع جونيور علشان اعرف انا حعمل ايه مع سوسو ساره بنتى يعنى عمرها دلوقتى خمس شهور بس بجد حاسس انى فى بحر كبير جدا ومش شايف ليه شط
و بعدين كمل بعد التفكير ايه اللى حصل
اخوك اول سابقه ليه و محتاس على الاخر
بجد انا مش عارف ازى حندمج و اتفاهم مع بنتى ايه الاسلوب الجديد مع العصر ده علشان ماتشفش اللى انا شفته
اعمل ايه علشان اشفها فعلا حلمى اللى انا عاوزها عليها فى عصر اسود زى اللى احنا فيه -_-

اريخ المشاركة 25 March 2006 - 07:58 PM
أخي العزيز اسكندرني ...

مرحبآ بيك في نادي الأباء الحياري .. و لغاية ما حيخلفوا عيالهم حنفضل يابا حياري ... مالهاش حل ... المهم اننا نلوش بذكاء .. و ساعات تانية مافيش مانع اننا نفكر بمخهم هما ... و لو انها صعبة لكن انا ساعات كتيرة بحاول افتكر طفولتي و انا بتكلم معاه ..

نرجع بقي للفكرة اللي نورت في دماغي زي البتاع ابو لمبة اللي مع عبقرينو ... بعد اللفة علي المحلات .. رجعت البيت و انا ناوي علي خطة رسمتها في فكري من المحل لبيتنا ... الجزء الأول منها اني مسكت ورقة وقلم و كتبت رد علي جواب جونيور و تقريبآ كتبت كده :

عزيزي جونيور ...
بما انه مش صحيح انك كنت شاطر في المدرسة ..و بما انه مش صحيح انك كنت طيب مع سلفاتور صاحبك .. و بما انه مش صحيح انك كنت مطيع مع بابا و ماما ... علشان كده السنة دي مافيش هدايا ..

بابا نويل

و حطيته جوا ظرف و كتبت اسم جونيور عليه .. و اتسحبت لأوضته و هو نايم و حطيته تحت المخدة ...

تاني يوم الصبح و انا بحضر القهوة .. دخل عليا جونيور المطبخ من غير الشبشب .. و هو ماسك الجواب في ايده .. و اللي كان واضح عليه انه متغاظ مش حزين ...

"بابا ... شفت بابا نويل كتبلي ايه ... طيب دلوقت انا عارف انه يمكن اني ماكنتش شاطر قوي في المدرسة .. او شنكلت سلفاتور ميت مرة و احنا بنلعب كورة .. او ساعات ما سمعتش كلام ماما .. لكن بابا نويل عرف الكلام ده منين .. هه ؟؟؟؟ "

" احتمال يكون فيه حد خبص عليك " و بصيت بمنتهي البراءة ناحية امه .. اللي حست بحركة الندالة الل بعملها ... و علي طول قالت " انا مالياش دعوه بالموضوع ده ... حتي انا ماعرفش عنوان بابا نويل ايه من اصله ... مش كده يا ابو جونيور؟؟ " الجملة الأخيرة كانت بتركيز و ببطء شديد و جز علي الأسنان ...
و لتدارك الأمر .. نقلت بسرعة علي الجزء التاني من الخطة و قمت قايل لجونيور :
" بص يا جونيور ... سيبك من بابا نويل ده ... السنة دي الهدية بابا بنفسه اللي حيشتريهالك .. و لكن انا ماعنديش امكانيات بابا نويل اللي ممكن يمد ايده جوا اي فاترينة و يجيبلك سي بيج جيم ده من غير ما يدفع مليم .. انا اللي اقدر عليه اجبلك لعبة اقل منها شوية "

جونيور كضقرم قديم فهم انه ماعندوش خيار و لا أتة ... و ان الحل ده احسن من مافيش خالص .. فوافق بعد تفكير و هرشتين في دماغه ...

اخدت الأوكيه منه و قمت نازل علي طول قبل ما يغير رأيه .. و عند واحد صاحبي عنده مخزن بيشيلوا فيه الستوكات القديمة للمحلات الي ضربت تفليسة ...و تتباع باسعار تقرب لأسعار الأسواق الشعبية ... و بعد ان قضيت حوال نص ساعة اقلب يمين و شمال ... لقيت اللعبة اللي أنا بدور عليها بالظبط ..

و بما ان الأسم حيكون غريب شوية ... فعلشان كده انا حسمي اللعبة "نينو الجحش ".. و علشان اوصفه تخيلوا معايا

واحد عنده حوالي 45 سنة
شبه اقرع
بكرش
صوابعه صفرا من النيكوتين و هدومه في الضياع

و ب 5000 ليرة ( اياميها ) اتلف لفة معتبرة و اخدته البيت ... ( علي فكرة اللعبة كان شكلها كده فعلآ بس ما كانتش معمولة للعيال و لكن كشكل كوميدي )

و طبعآ اول ما جونيور شافه .. بلم .. و بعدين ابتدي يعلن اعتراضه ( و تقريبآ الحوار كان كده )

- بيج جيم احلي منه بكتير..
- عندك حق يا حبيبي .. بس لو بصيت حواليك حتلاقي مش كل الناس حلوين كده .. يعني عندك مثلآ خالك
- سيب خاله في حاله يا ابو جونيور ( دي المدام )
- حاضر ... عندك مثلا عمو فابيو جارنا .. مش يشبهه شوية..
- لأ مش شبهه خالص .. هو يشبه شوية جدو
- اهه ما قلتش حاجة من عندي .. من شابه اباه فما ظلم .... ناظرا جهتها ..
- ايوه بس بيج جيم عنده البيسين بتاع بيج جيم
- و نينو الجحش عنده القهوة اللي كل يوم بيروح يشرب الشاي فيها
- لكن بيج جيم عنده الفراري بتاعت بيج جيم
- نينو الجحش عنده الفيات 127 بتاعت نينو الجحش
- عمري ما شفتها في رفوف اللعب بتاعت الأيبر ماركت
- علشان عمل بيها حادثة و لسه عند الميكانيكي بتتصلح
- لكن بيج جيم عنده خطيبته باربي اللي عند ميمما بنت عمو فابيو
( ابتديت اشك ان الواد كان عايز بيج جيم علشان يلاقي حجة يلعب بيها مع بنت الجيران )
- ايوه يا حبيبي .. بس نينو الجحش متجوز روزآلبا و عنده منها ولد ...
- عمري ما شفتها علي رفوف اللعب و لا عند ميمما ..
- علشان هي بتتكسف .. و كمان نينو الجحش ما بيحبش ان مراته تخرج لوحديها ..
- لكن بيج جيم فيه زرار في ضهره .. لو دوست عليه يلعب كاراتيه ...
و هنا للأسف فقدت صبري ...
- و نينو الجحش عنده زرار في ضهره لو دوست عليه "يتجشأ" .. اسمع يا جونيور يا حبيبي .. بابا ابتدي بتضايق ...نينو الجحش ده بيقضي طول النهار علي القهوة .. و ما بيشتغلش ...و بيشتم ... و آخر الليل يرجع البيت و يضرب روزآلبا ... و ساعات بيضرب ابنه.... مش زيك محظوظ .. و عندك بابا زيي .. طيب و كويس دايمآ معاك و مع ماما ... و لا كنت تفضل واحد زي نينو الجحش ده ؟؟...
- لأ لأ يا بابا .. واحد زيك انت
- يبقي خد اللعبة دي و روح العب في اوضتك ...

و اختفي جونيور في التو و من يومها لم يكتب اي رسالة لبابا نويل و ابتدا يكتب لستة هدايا كاملة ليا أنا ...

علي فكرة للغرابة الشديدة لغاية دلوقتي ( بعد 4 سنين ) نينو الجحش هي اللعبة الوحيدة اللي فضلت سليمة معاه ... حد يقدر يفهم ليه ...

الاسكندرنى
تاريخ المشاركة 25 March 2006 - 08:19 PM
تعرف يا سكوب انا اعتقد احسن طريقه ان تعامل ابنك على انه راجل كبير علشان الاطفال دلوقتى مش اطفال دول ناس فاهمه كل حاجه
يعنى بص ابنك بيعمل المستحيل علشان يوصل لبنت الجيران يعنى دماغه شغاله (محاوراتى زى ابوه ) وبص اصراره يترك اللعبه اكتر من اربع سنين لعدم اقتناعه بها يعنى اصرار
تعرف لو صاحبته واطمنلك يصحبك هو كمان و عرف ان انت دماغك من دماغه يفضلك عن مليون صاحب بره البيت
ايه انا صح ولا غلط حد يفوقنى ياجدعان
والله انا ما عارف حعمل ايه فى سارة
اللى عاملته فى حياتى صوصو ساره حتعمله فيه كتاكيت كتاكيت <_<

تاريخ المشاركة 25 March 2006 - 08:41 PM
الكلام ده من اربع سنين يا اخي العزيز .. دلوقتي مش ناقص غير انه يخش عليا البيت بجرنان المعارضة تحت باطه .. و يعلن العصيان المدني في البيت كله ...
الجيل بتاعه داخل مزاجي بطريقة رهيبة ... انا كل يوم اربع بقف مذهول قدام فصل جونيور من طريقة تفكيرهم و تعبيراتهم و فهمهم لكل صغيرة و كبيرة ... و بيخليني اتحسر علي شباب بلدي مش اطفالها واخدلي بالك ...

اقسم لك ان السنة اللي فاتت رد عليا اعلانآ علي أعتراضه علي اجباري له بغسل سنانه 3 مرات يوميآ قاللي بالحرف :

مافيش مادة في الدستور تجبر المواطن علي غسل سنانه مرة واحدة مش كمان تلات مرات في اليوم ...

الواد ما كانش عنده 8 سنين و فاهم ان فيه حاجة اسمها دستور بتنظم علاقات بين الناس .. مش عندنا الدستور بينظم العلاقات مع الأسياد و حابس حابس...

عطر
تاريخ المشاركة 09 April 2006 - 02:12 PM
معك حق في كل كلمة قلتها يا سكوربيو

اولاد اليومين دول ما ينفعش معاهم طرق زمان البسيطة الساذجة

لأنهم ببساطة صاروا في زمن كل شيء فيه واضح ومتاح

يعني ما ينفعش نعتبرهم اطفال ونعاملهم على هذا الأساس

عن نفسي اتعامل مع بناتي بشفافية جدا يعني احب اعطيهم كل المعلومات قبل ما يجبوها من برة

لكن مش بطريقة دلق المعلومة لكن احاول اجيبها في سياق قصة او عبرة المهم توصل لهم المعلومة

انا واثقة انهم في وقت من الأوقات انا حكون متخيلاهم لسة صغيرين ومش فاهمين حاجة وكلهم براءة

وحلائيهم عارفين حاجات وحاجات اما من المدرسة او النت او التلفزيون

يبقى يعرفوا مني احسن مليون مرة علشان المعلومة توصل صح غير مغلوطة

على فكرة الله يخلي لك جونيو ويبارك لك فيه

yasovinas
تاريخ المشاركة 09 April 2006 - 04:16 PM
سكوب يا صديقي ويا زميلي في الجونيورات
الكابتن عندي الله ينور اكبر شويتين وبرضه دمااااغ :blink:
بس فعلا احسن طريقه للتعامل مع هذا الجيل هو محاولة النزول اليهم في التفكير والاسلوب (بس اوعى تلبس بنطلون وسطه ساقط :huh: )
الكابتن محمد وصل لمرحلة المراهقه وتفاصيل الشكل والملابس والشعر والموبايل والام بي 3 طبعا علشان البنات لذلك فانا اتعامل معه من هذا المنطلق
ودائما ما يكون اول الحديث عن اخر مغامراته واخر اخبارة واخر مقلب عمله في اصحابه واخر مباراة لعبها في الدوري وبهذه الطريقه اكسر حاجز الاب والابن ؛؛خصوصا اني في الغالب مش بفهم نص اللي بيحكيه وباتحول الى تلميذ يتعلم من استاذه وبعدها ننطلق سويا الى اي موضوع واي نصيحة واي معلومه اريد ان انقلها له
اهم شيء ان تصاحب ابنك

تحياتي لجونيور

تاريخ المشاركة 15 October 2008 - 10:03 PM
مرت السنين و الواد عمال يكبر ... و ووصل ال 12 سنة و نص ...

بوسترات ميكي و بندق و شخصيات الكارتون اختفت من اوضته و خدت مكانها بوسترات مغنيين روك .. و في النص صورة شيجيفارا .. و ده اللي قالقني منه ...

الواد كلامه بقي كبير ... و تجاربنا مع بعض علشان اخليه يطالب دايمآ بحقه ابتدت تيجي علي راسي شخصيآ .. و ان كنت لا اخفي سعادتي ...
ابتدا يطلب ان يخرج لوحده ... و بالرغم من قلقي البالغ عليه وافقت طبعآ ... و لا أنكر ان كل مرة خرج فيها كنت هناك معه من بعيد ... ليس لعدم ثقتي فيه و لكن لعدم ارتياحي لفكرة انه ممكن ان يتواجد في مكان يضم مريض نفسي ... فهو مهما كانت الظروف مازال صغير كي يعتني بنفسه .... و الحمد لله لم أكن مضطرآ و لا مرة واحدة ان اعلن تواجدي ... بل لا أنكر انني كنت استمتع بمشاهدته يكتشف الحياة الخارجية مع أقرانه ... و عودته كل مرة الي أمه كانت تتيه فخرآ بأنه اصبح كبير و يحكي عن مغامراته المبالغ فيها ...

و لكن الآن عندي مشكلة صغيرة ...

البداية مع قانون التعليم الجديد ... و رفض معظم المدرسين و الطلبة نفسهم له ... لحد كده مافيش مشكلة ...

المشكلة انهم ( المدرسين ) نظموا بكره اضراب .. و طبعآ الطلبة هيشاركوهم و حيعملوا مظاهرة في نص البلد ...
الباشا ( تالتة اعدادي ) جالي يستأذن انه حيروح معاهم بكره في لمظاهرة دي

الأيقونة دي بجد كانت وشي لما قالهالي :ninja:

مظاهرة ايه ؟؟؟
عارف انه هنا شيء عادي .. و بيعملوها دايمآ .. بس ما كنتش متوقع انها تيجي بدري كده عندي في البيت ...
الواد لسه صغير خالص .. و بالرغم من ده يصب في كل اللي بحاول اربيه عليه .. لكن و لو ...
فكرت اوافق ... لكن بكره بالذات مناسبة خاصة جدآ أوي خالص .. و دايمآ بخرج انا و ام جونيور فيها يوم و لا يومين بره ....

اعمل ايه ؟؟؟ ... اديله خبطة في كبرياؤه بين اصحابه ... و تتحرق المظاهرات بجاز ... و استحمل تقطيمه فيا و اتهامه طبعآ اني بعلمه حاجات و ساعة الجد باكل كلامي .... و الا اضحي بعادة ما غيرتهاش من 18 سنة ؟؟؟

عصام
تاريخ المشاركة 16 October 2008 - 10:08 AM
رأيي؟

ربنا ما يقطع لك عادة

:rolleyes:


جونيور نكده هاينتهى فى نص ساعة أو بهدية نفسه فيها

أم جونيور قادرة تنكد عليك بقية عمرك

لولا
تاريخ المشاركة 16 October 2008 - 10:10 AM
كم كنت اتمنى ان أفيدك سكوب برأيى فى موضوع مشاركة جونيور فى المظاهرات الطلابية اليوم
أمام ما ستسببه لك من قلق كأب وتعارضها مع مناسبة عائليه يفترض ان تعيشها بسعادة
وهدوء وإطمئنان. قد أقول لك دعه يا عزيزى يخوض التجربة ، خصوصا أنها ضمن جروب طلابى مدرسي
فى بلد يحترم حرية التعبير عن الرأى .. وتلك تجربة حتما سيخوضها عاجلا ام آجلا .. غير ان الذى
جعلنى اتوقف عن ابداء هذا الرأى هو مدى قلقلك عليه كأب - لا أعرف هل يسمح لمن دون 18 سنه
بالمشاركة فى المظاهرات؟ - وتعارض هذا الحدث الجديد الذى يرغب جونيور فى خوضه مع
مايفترض ان يكون من هدؤء فى مناسبتكم العائليه.
ارجو ان تتوفق فى الحكم على الأمور فى النهايه 0


لولا

لولا
تاريخ المشاركة 16 October 2008 - 10:22 AM
عصام شوقى, on Oct 16 2008, 11:08 AM, said:
رأيي؟

ربنا ما يقطع لك عادة

:rolleyes:


جونيور نكده هاينتهى فى نص ساعة أو بهدية نفسه فيها

أم جونيور قادرة تنكد عليك بقية عمرك


والله انت ياعصام جبت من الآخر .... :blink:
طبعا لو فكرت ألف عام لن يتفتق ذهنى عن هذا التحليل والحل للمشكلة mfb:
أعذرنى يا سكوب نسيت موضوع النكد دا ... كتر خير عصام باشا كانت نظرته
للموضوع أكثر شموليه .. وأكثر منطقيه ..من وجهة نظر رجاليه بحته فى الحكم
الأمور طبعا wst::

طيب بالإذن انا بقى يا سكوب .

انا قلت من البداية المشكلة دى عايزلها راجل يفتى فيها :sad:

انما كلام حق بقى .. المظاهرة تتعوض .. لكن المناسبة بجد مره فى السنة .
تمنياتى بيوم سعيد. :roseop:

لولا

se_ Elsyed
تاريخ المشاركة 16 October 2008 - 10:32 AM
يا سبحان الله ..

بنقعد نتكلم ونهيص ونتكلم عن الحرية والديمقراطية اللي المفروض تُنتزع إنتزاعاً لكن بعقل طبعاً .. يا إما على شكل مظاهرات محترمة او معارضة او إضرابات ونشجع الثورجية وممكن نعلق صورهم في غرفنا ..

لكن لما تيجي لحد عندنا وعيل من عيالنا تظهر عنده ميول ثورية ممكن يتنفخ عشانها نعيط ونقول " يا ضنايا يابني " وكإن العيال التانية دي ولا د الغسالة اللي المفروض يتشطفوا عشان إحنا نعيش وولادنا كمان يعيشوا ..

انا لا أقصدك إنت يابو عزه ... لكن أنا باكلم نفسي والله ...

تصدق بالله ؟

أنا قلبي جامد ولو الواد عُمر مشي في طريق الثورة - مش اللي بيودي مصر الجديدة - هاسيبة وأشجعه بس أوجهه التوجيه الصح اللي اهم حاجه فيه إنه يشتغل في النور ويحصل اللي يحصل بعد كده ..

طبعاً امه ممكن تصوت وتقول لي : ضيعت لي الواد وإبقى خلي الثورة تنفعه .. حرام عليك فقدت أمله ... إلخ من كلام الأمهات اللي خايفين على ضناهم ..

لكن برضوا نرجع ونقول : اومال مين اللي لازم يضحي بنفسه يا جدعان عشان حقوقنا ترجع أو عشان كملة الحق تبقى هي العُليا ؟

mizo
تاريخ المشاركة 16 October 2008 - 11:28 AM
عزيزى سكورييون
المظاهره لا والف لا هو لسه فى فتره المراهقه وهو فاهم كده وعلشان كده اقنعه نن ممكن ان يجد طريقه اخرى للاعتراض اذا كان هو معترض ناقششه في القانون وماهو اعتراضه حاتلقيه فهم وحاول تضع فيه روح القاده يعني اى موضوع مايمشيش فيه وخلاص وغالبا الطلبه يكون
للهم وقفه احتجاجيه داخلاالمدرسه وممك تتكون الفكره دى منه
لزملائه
وكفايه ايدي تعبت من لوحه المفاتيح

تاريخ المشاركة 22 October 2008 - 02:41 AM
موششكرين يا جماعة علي نصايحكم و التعاطف الإنساني مع أباء الجيل الجديد ....

نيجي للي حصل ,,,

بعد ما قريت الكلام اللي فات ... أخذت أوفاكير و أوفاكير .. ثم أخذت أفكر و أفكر ... و في النهاية و بعد تفكير ... ضربت التفاكير كلها في الخلاط و طلعت بحل ... انما ايه .... كده ...
ايه اللي يمنع اني أكل بلح الشام و عنب اليمن كمان .... و افتكرت مدام سلوي و فكرتها الشقية .... و بعد دردشة صغيرة مع أم جونيور ... و ابتسامة متبادلة .... قلت لجونيور : مافيش مانع انك تشترك في المظاهرة ... و مش بس كده ... ده بابا و ماما حيشتركوا كمان معاك فيها .....

الواد شبط فيا و في امه في الأول و هات يا بوس ... بس ما فيش شوية ... سكت و قعد يفكر و بعدين قاللي بالحرف :
- أنا ما عنديش مانع انكم تيجوا معايا .. بس هناك و لا أنا اعرفكم و لا انتم تعرفوني .. و الا اصحابي حيتريقوا عليا و يقولوا جاي المظاهرة مع ابوه و امه زي "العيال الصغيرين"..
- طيب حلاقي سعادتك فين بعد ما تخلص علشان شوفيير أهلك يوصلك بيت تيته
- نبقي نحدد مكان و ميعاد معين استنيكم فيه
- انسي .... احنا حنبقي جنبك ... بس ما تخافش من بعيد لبعيد .... كده و الا مافيش مظاهرات و لا مارشات عسكرية
طبعآ الموافقة كانت فورية ....

و ده اللي حصل .. عيون أمه اللي زي الصقر كل الوقت عليه ... ضحكنا و هتفنا .... غنينا معاهم ... و صفرنا معاهم ... و اتدوشنا ....

و خلصت المظاهرة ... و اتساب عند جدته و كملنا احنا البرنامج بتاعنا و لو متأخر نص يوم ... بس كان يستاهل التأخير ....

جونيور حاسس انه كبير ... و اتضافت الي تجاربه الحياتية تجربة مهمة فعلآ ....
و احنا اتضاف في ذكرياتنا ان عيد جوازنا ال 18 احتفلنا بيه في مظاهرة .....

ريخ المشاركة 09 December 2010 - 05:54 PM
جه في بالي فيلم الناظر صلاح الدين و انا بدور علي الموضوع دهاشارككم فيه تجاربي و تساؤلاتي و مخاوفي ...
بجد عامل زي فلاشات علي حياة جونيور ماشية بتسلسل جميل ...

المهم .... في السنوات الأخيرة ابتدت تظهر ملامح الواد .. مزيكا و ميول سياسية يسارية ... آه تصدقوا ما تصدقوش الواد لسه ما كملش 15 سنة و يساري ...
المزيكا .. من دون كل الأدوات الموسيقية ما نقاش غير الدرامز .... يا بني مالها الكمانجة .. ماله الفلاوت ... مالها الربابة ... مافيش ...
و طبعآ استغلالآ لوعد علي بياض لو نجح ... في اوضته حاليآ عدة درامز كاملة ... و درس اسبوعي ..

و ده حدانا في البلد اسمه المازوكيزم ... يعني حب تعذيب الذات ... العبد لله بيدفع فلوس علشان دماغه تنفجر مرتين في اليوم .. مره من صوت الدرامز .. و مرة من الزعيق علشان يبطل رزع ...
لكن لما بصيت في تاريخي الأسود ... اضطريت اتغاضي عن المشكلة دي لما افتكرت طقم الحلل و الكسرولات اللي كنت بحطها علي ترابيزة المطبخ ... و نشابة الفطير بتاعت الوالدة اللي قسمتها نصين و كنت بنزل بيهم هبد علي الحلل دي ...
التاريخ يعيد نفسه ...

لكن التاريخ ما بيعدش نفسه معايا في حكاية المظاهرات ... الواد بيكبر بسرعة بجد و انا مش حابب كده ... يعني مهما صاحبته و محسسه اني صاحبه اكتر منها اب مطاع في البيت .. لكنه برضه لسه طفلي ... و المظاهرة اللي كتبت عنها من سنتين بقت دلوقتي روتين عادي ... و مع الوقت البيه دلوقتي من المجموعة المنظمة ... و متحدث رسمي ... و بقالهم اسبوعين "محتلين" المدرسة .. و اكرر محتلين المدرسة كنوع من انواع الأضرابات هنا و لما رحت اكلم مدير المدرسة ان العملية طالت .. قال لي بمنتهي البساطة انه ما يقدرش يعمل حاجة ما داموا ما بيكسروش و لا بيدشدشوا و لا بيعملوا اعمال منافية ... لكن لما بييجي دوره انه يبات في المدرسة ببقي زي الحيوان المجروح و انا رايح جاي في البيت مش عارف اعمل ايه ... يعني الثانوية هنا مدتها 5 سنين ... و لو فيه حد منهم عايد السنة يعني ممكن يكون معاه في المجموعة عيال عندهم 19 و عشرين سنة ... و لو سيجارة ملفوفة طلعت بالليل و لا هرمونات المراهقة تشتغل ... مش عارف لأي مدي ممكن يرفض الأنجرار لتجربة مماثلة ... تربيتنا له انا و امه ممكن يكون عامل مساعد و مهدأ لأفكاري السوده .... لكن ثقافة القطيع بتكسب دايمآ ... انا عارف .. كنت في يوم من الأيام جزء من القطيع انا كمان ... لكن ايامنا مخاطر المغامرات الممنوعة لا تقاس اطلاقآ بمخاطرها الحالية ....

كل اللي اقدر اعمله اني بفتش هدومه ... بدخل علي الأكاونت بتاعه في الفيس بووك اللي عملت شرلوك هولمز علشان اعرف الباسوورد بتاعته ايه من غير ما يعرف ... ببص في دراعه .. و بشم انفاسه و هو نايم ... و لغاية دلوقتي مافيش حاجة غير طبيعية ...
هو حاسس انه بقي كبير و بيتصرف علي هذا الأساس .. و انا بسيبه ... لكن من فترة للتانية لما بيخرج عن حدوده بيتشد ... و بعدين برخي تاني ... لحد ربنا ما يعدي الفترة دي علي خير ...

اللي خلاني بقي ادور عالموضوع ده و افتحه تاني علشان اطلب نصيحتكم ... انه النهارده لما رجع من المدرسة .. اتغدينا و قعدنا احنا التلاتة ندردش شوية و بعدين قال انا رايح اوضتي ... و بمنتهي البرود قال آه بالحق .. انتوا حتخرجوا ... قلتله لأ ... قال طب كويس علشان مارتا حتيجي كمان شوية ...
و انا بهدؤ اكتر ما اعرفش جالي منين قلتله : طيب

مين مارتا دي يا ام جونيور
دي زميلته في المدرسة بس في سنة تانية ثانوي ( هو لسه في اولي ثانوي ) و ساكنة قريب من هنا ..
لم نتناقش في هذا الأمر .. فلقد تملكتنا حيرة الموقف .. فهو فاجئني بالفعل .. فهو لم يتكلم ابدآ عن فتيات في معرض حديثه معي ... أكتفينا بالأبتسام و نظام الواد كبر ..

و انا الآن في غرفتي اكتب لكم ... و عيني علي نافذة غرفته الجانبية التي تطل علي بلكونة مشتركة بيننا ... في انتظار هذه ال "مارتا" ...

مش عارف .. يعني لو قفلوا الباب عليهم ... اخش باي حجة كل شوية .. و الا افهمه ازاي انه لازم يسيب الباب مفتوح من غير ما احرجه ...

اخيكم المعذب سكوربيون السرياقوسي فلتس :unsure:


الله يرحمك يا بابا ده انت كنت شايل طين من تحت راسي ....

se_ Elsyed
تاريخ المشاركة 09 December 2010 - 07:26 PM
'Scorpion', on 09 Dec 2010 - 4:54 PM, said:
... قال طب كويس علشان مارتا حتيجي كمان شوية ...
و انا بهدؤ اكتر ما اعرفش جالي منين قلتله : طيب

مين مارتا دي يا ام جونيور
دي زميلته في المدرسة بس في سنة تانية ثانوي ( هو لسه في اولي ثانوي ) و ساكنة قريب من هنا ..
لم نتناقش في هذا الأمر .. فلقد تملكتنا حيرة الموقف .. فهو فاجئني بالفعل .. فهو لم يتكلم ابدآ عن فتيات في معرض حديثه معي ... أكتفينا بالأبتسام و نظام الواد كبر ..

و انا الآن في غرفتي اكتب لكم ... و عيني علي نافذة غرفته الجانبية التي تطل علي بلكونة مشتركة بيننا ... في انتظار هذه ال "مارتا" ...

مش عارف .. يعني لو قفلوا الباب عليهم ... اخش باي حجة كل شوية .. و الا افهمه ازاي انه لازم يسيب الباب مفتوح من غير ما احرجه ...

اخيكم المعذب سكوربيون السرياقوسي فلتس :unsure:



ما تخليش فكرك يروح لبعيد يا أبو جنيور


يمكن هايذاكروا كميا مع بعض يا أخي ؟

او

تشريح

إلا بالحق ... هي مارتا ما بتتكشفش على بشر ؟

لأ قصدي ما كانش ينفع جنيور يبجبها وأنتوا في البيت ؟ ولا لازم تروحوا تلعبوا مع الاسد عشان

يخلا لهم الجو

ويذاكروا براحتهم

ههههههههههههههههههههه


أشرب يا معلم ... مش عامل لي فيها أوروبي وديمكراسي ؟


وكتاب الله أنا الولا عُمر يوم ما يقول لي : باتعه زميلتي جايه تذاكر معايا في البيت ... أقطع خبره

se_ Elsyed
تاريخ المشاركة 09 December 2010 - 07:30 PM
والله يا كيمو

أخوك ما عندوش نصيحة معينة

لكن

أصل

يعني

إنتو في أوروبا

والواد مولود هناك

يمكن إنت إطبعت بالطباع المصرية الشرقية .. وأنا فاكر لما كنا في شبرا وكنت تشوف إنت خيال بنت بس كان عرقك يبقى مرقك وتتلجلج

لكن جنيور مختلف


أنا مش لاعب يا عم


طب ما تلف إنت على مارتينا وتشوف ميتها إيه يا معلم ؟

engmido
تاريخ المشاركة 09 December 2010 - 08:31 PM
متعاطف معك جداا يا اخ كامل

بس مش عارف اقولك ايه..بس كما قال الاخ س ش ع

انتو فى بلد اوروبية وظروفها صعبة


-----------------------

على جنب

Quote
طب ما تلف إنت على مارتينا وتشوف ميتها إيه يا معلم ؟

يابن الايه يا س س


انت عايز ام جونيور تقلبها دندرة