مغامرات عصابة "حساس"

نانو
تاريخ المشاركة 02 April 2007 - 02:16 PM
موديست ...بجد جامده جدنون :wub:

بس انت عارف بقي ان الاعمار بيد الله wst:: .....و اديني بادعي ربنا اني اعيش لغايه ما اشوف الخطه... ....هه.....خلص يا موديست قبل ما تخلص علينا من الانتظار

Folana
تاريخ المشاركة 03 April 2007 - 06:57 AM
السلام عليكم ورحمة الله .....


موديست باشا ... :roseop: :wub: .....لو مش واخد بالك احب اقولك ان امتحانات الاى جى حتبدأ بعد 10 ايام...يعنى الحق بسرعة نفذ الخطة احسن الفلوس زمانها حتتورد....

وتبقى اول خطة فشلت من قبل ماتتكتب حتى ...الله !!!


نانو انا قايمة انام وابقى سجلى لى المسلسل اتفرج عليه بعد الامتحانات


اااوووففف :wub:

Modest
تاريخ المشاركة 03 April 2007 - 08:27 AM
نانو, on Apr 2 2007, 02:16 PM, said:
انت عارف بقي ان الاعمار بيد الله :old: .....و اديني بادعي ربنا اني اعيش لغايه ما اشوف الخطه... :wub:....هه.....خلص يا موديست قبل ما تخلص علينا من الانتظار

se_ Elsyed, on Apr 2 2007, 04:19 PM, said:
موديست

إنت ليك حد بيشتغل في تأليف مسلسلات رمضان ؟

folana, on Apr 3 2007, 06:57 AM, said:
السلام عليكم ورحمة الله .....


موديست باشا ... :roseop: .....لو مش واخد بالك احب اقولك ان امتحانات الاى جى حتبدأ بعد 10 ايام...يعنى الحق بسرعة نفذ الخطة احسن الفلوس زمانها حتتورد....

وتبقى اول خطة فشلت من قبل ماتتكتب حتى ...الله !!!


نانو انا قايمة انام وابقى سجلى لى المسلسل اتفرج عليه بعد الامتحانات


اااوووففف :wub:

إنتوا كده بتخلوني أرتبك .. هاتنفعوني لما العملية تفشل يعني؟ ..بدل ما كل واحد يدخل يستعجلني كدهو ، لموا من بعض قرشين و ساعدوا أخوكم ... أوففففففففف md2:



و لعلمكم بقى .... أنا بافكّر ابدأ من الأول تاني smk:

تاريخ المشاركة 03 April 2007 - 01:45 PM
آه و النبي يا موديست من الأول ... بس احياااااات ابوك يا شيخ خليها تبتدي في مسمط فيه هبر .. و بعد المسمط نروح عالقهوة عشان نحبس و من هناك تبتدي الخطة ...
تيك اووووول يور تايم يا عسل و لا يهمك منهم ... و ركزلي قوي علي مساجلات الفراخ اللي عالعشا دي ... ده موضوع يهمني جدآ ...

إبن مصر
تاريخ المشاركة 03 April 2007 - 04:58 PM
Quote
مساجلات الفراخ اللي عالعشا دي
أفهم من كده ان الحمد لله بدأ يبقى ليك ميول شعريه...... بالرز؟؟؟؟ :roseop:

Modest
تاريخ المشاركة 04 April 2007 - 10:38 AM
إنت اللي فاهمني يا سكوب .. أوعدك أول ما نخلّص العملية هانقلب العصابة الفقر دي و نفتح انا و انت عصابة محندقة على قدّنا كلها فراخ و حمام و بط و وز .. متخصصة في سرقة المطاعم يعني :FN:
دلوقتي هاكمل الخطة و بعدين التنفيذ علشان سي السيد بدأ يلسّن عليا في الرحلة المنحوسة بتاعته

-----------------------------------------------------
الخطــة

ينظر موديست إلى أفراد العصابة فيجدهم كالتالي:

سي السيد راح في سابع نومه
سكوب قام يدخل الحمام
ابن مصر و عصام انشغلوا في حديث جانبي و هم ينظرون إلى موديست بقرف بين الحين و الحين.

موديست: مش هاينفع كده يا جماعة .. أنا عايز ناس مصحصحة معايا
ابن مصر: قوم يله من هنا .. زهقتنا في عيشتنا و انت لا ليك في الخطط و لا في أي حاجة من أصله.. أنا الحق عليا عرّفتك أسرارنا بعد ما اتغشيت فيك لما عرفت إنك بتتعشى كل يوم.... بتتعشى كل يوم قال يا عديم الشرابات انت.
موديست (متأثراً و عيناه مغرورقة بالدموع): طيب المرة دي مش هأقول بصوّا و لا شوفوا و لا أي كلام تاني .. هادخل في الموضوع على طول.. بس ادوني فرصة
في هذه الأثناء عاد سكوب من الحمام و أفاق سي السيد من التعسيلة
سي السيد (موجهاً كلامه إلى موديست و هو يتثاءب): انت لسه هنا يله؟
موديست: آه .. بس خلاص يا سي السيد هادخل في الموضوع . هادخل في الموضوع .. وعد رجالة يعني بس محدش يقاطعني
زي ما قلت لكم أنا هاعمل إني رايح ادفع المصاريف و سكوب زي ما وعدته هايكون مدير التربية و التعليم رايح يفتّش على المدرسة
ابن مصر و سي السيد و عصام هايكونوا مفتشين ... ابن مصر مفتش تربية موسيقية و سي السيد مفتش ألعاب و عصام مفتش أناشيد
أقول لكم؟ .. خليها ابن مصر مفتش لغة عربية و سي السيد مفتش انجليزي و عصام مفتش حساب
لألأ .. خليها سي السيد مفتش تربية قومية و ابن مصر مفتش تاريخ و جغرافيا و عصام مفتش علوم
أو متهيألي الأحسن يكون عصام مفتـ.....
سي السيد (و هو يجز على سنانه لكبح جماح غضبه): يا بني يا ضنايا مش مهم مين يفتش على إيه.. ركّز في ليلتك .. أنا جالي حَوَل رباعي في إيديا الاتنين
موديست: بعد الشر عليك يا سي السيد .. خلاص خلاص .. مش مهم النقطة دي مع إنها نقطة مركزيه لكن نبقى نرجع لها بعدين
هانتجمع كلنا عند ابن مصر و نلبس البدل اللي هايجيبها سكوب .. أنا عايز بدلة خضرا يا سكوب علشان تليق على الكرافتة البنفسجي اللي حيلتي و سي السيد هايلبس بدلة برتقاني على قميص أحمر مشجّر عليه ورد كبير علشان هو بيحب الشياكة و عصام هاياخد البدلة الــ ..
في هذه اللحظة يلمح موديست سي السيد و هو يهم برفع الكرسي ليهوى به على راسه فيتراجع عن تكملة توزيع البدَل
موديست : المهم يعني .. كل واحد يلبس البدلة اللي على مزاجه و بعدين نركب العربية
ابن مصر هايسوق العربية لإن هو الوحيد اللي بيعرف يسوق البتاعة دي اللي مسميها عربية
سي السيد هايقعد قدام جنبه و عصام و سكوب و أنا هانقعد على الكنبة ورا ..
أو اقول لكم .. هاقعد أنا جنب ابن مصر و يبقى سكوب و سي السيد و عصام يركبوا على الكنبة ورا
لألأ استنوا .. سكوب يقعد جنب إبن مصر و على الكنبة ورا نبقى نقعد أنا و سي السـ...
سكوب (مقاطعاً في حدة و الشرر يتطاير من عينيه): أنا قايم مروّح
موديست: صبرك بس يابو جونيور .. خلاص هادخل في الموضوع .. إحيات جونيور لتقعد.. إركبوا زي ما يعجبكم بس انت لازم تقعد على الكنية ورا علشان الخطة عايزة كده.
يجلس سكوب مرة أخرى على مضض
موديست: وصلنا المدرسة
هاتركن العربية بعيد يا ابن مصر و ننزل أنا و سي السيد و عصام نكمّل على رجلينا .. و انت أول ما توصل المدرسة تنزل تفتح الباب لسكوب و تؤدي التحية مع انحناءة شديدة .. الحركة دي المقصود بيها إن الأمن يعرف إن سكوب سخسية مهمة .. و إلا أول ما هايشوفوكوا بمناظركم دي هايجروا وراكم بالعصيان.. مفهوم؟
بدا على الجميع الدهشة و الاعجاب الشديد بنباهة موديست و قال الجميع في صوت واحد: مفهوم
موديست: عند البوابة يا سكوب تشخط في بتاع الأمن الي واقف و تقول له فين يابني مكتب الناظرة .. أنا السيد المحترم المدير التربية و التعليم.
و انت يا ابن مصر تستنى في العربية و تسيبها شغالة علشان لما نخلّص ننط فيها كلنا و تجري بينا على طول.
سي السيد انت هاتدخل على الإدارة و تقول لهم أنا مفتش اللغة الانجليزية عايز جدول حصص تالتة تالت... هاو أر يو .. جود مورنينج.. أي هاف تو أيز
سي السيد: هه؟
موديست: اسمع بس اللي بأقولهولك و احفظه صم.. مش ضروري تفهم دلوقتي.. أنا سمعت الواد أحمد بيقولهم و هو بيذاكر المدعوقة الأي جي.. يعني كلام مضمون بريفكس.
عصام هايدخل على الحوش على طول و أي حد يسألك على فين يا حضرة؟ .. قول له أنا السيد مفتش الألعاب.. و تقوم ناطط في الهوا و مديله واحدة شمال مستقيمة خليه يتكوّم و تكمل طريقك لحوش المدرسة.
سكوب: و لما يافالح كل واحد فينا يدخل مكان غير التاني .. هاتوبقى ايه العوبارة ؟ هادخل عند الناظرة أهبب إيه أنا؟
سي السيد: و بعد ما أقول البؤين اللي أصلاً مش فاكرهم من دلوقتي .. اقول لهم فين الحمّام و لا إيه؟
عصام: افرض اللي هاضربُه طِلِع واد جِرِم و رزعني علقة.. يوبقى ايه الوضع؟
موديست: يا جماعة افهموني.. الغرض من دخولنا أماكن متفرقة هو عدم لفت الأنظار.. لكن بعد دخولنا بربع ساعة كلكم هاتحصلوني على مكتب المحاسبة.
هاتدخلوا انتوا التلاتة و تقفلوا الباب وراكوا .. سكوب هاترفع مسدس المية بتاع جونيور في وش المحاسبة.. و هيّ لسه في هول المفاجأة عصام يلف ورا الكرسي و يكتم بؤها علشان ماتصرخش.. أنا و سي السيد ناخد مفتاح الخزنة من شنطة إيدها و نفتح الخزنة.
نلم كل اللي في الخزنة و نطلع بالترتيب .. أنا هاطلع الأول و إيدي فاضية و بعدي سي السيد و سكوب و معاهم شنطة الفلوس.. و انت يا عصام تشيل إيدك و تطلع جري قبل ما الست تنطق و نجري كلنا على ابن مصر في العربية اللي هايكون سايبها شغّالةو نهرب..
و دلوقتي ميعاد التنفيذ هايكون أول ما سكوب يبعت جونيور عند حماته علشان ما يخدش باله إن ابوه سرق مسدس الميه و الفلوس من الحصالة بتاعتُه علشان يأجر البِدَل ..
مش بأقول لكم عملية نضيفة مية المية؟؟!!.

يبدو على الجميع الدهشة من دقة التخطيط و يبدؤوا في تهنئة موديست على هذه الدقة الرهيبة.

عصام: مع إني مش بالع إنك تطلع الأول و إيدك فاضية دي، و حاسس كمان إني هالبس مصيبة و انا كاتم بوء الولية لكن كله يهون علشان القرشينات.
سي السيد: تعرف ياض يا موديست.. أنا دلوقتي بس عرفت قيمتك.. سيبك انت برضه التخطيط له ناسُه
سكوب: براوه عليك يله يا موديست.. لأ صحيح براوه عليك.. برضه يا جماعة تخطيط واحد بيتعشى كل يوم غير تخطيطنا خالص يعني
ابن مصر (و قد ظهر عليه التأثر الشديد):
أوعدك يا صديقى.. و العيش و الملح لنعملها
من أجل عينيك .. هانقوم ونسرقها
ولا نرى دمعه بعينك .. يا واد يا واكلها

ينفجر موديست في البكاء من شدّة التأثر .. بينما يطبق الصمت على المكان حيث بدأ كل واحد يفكر في كيفية إنفاقه لنصيبه من المبلغ المسروق.


يتبع (التنفيذ).... :ninja:

واحد تاني
تاريخ المشاركة 04 April 2007 - 10:54 AM
تسجيل متابعة وتصفيق حاد وأنا (مسخسخ) من الضحك :FN:
دا انت طلعت جن مصور

DARWEEN
تاريخ المشاركة 10 April 2007 - 12:34 PM

ايه يا عم انت ... حنقعد سنه منتظرينكم تنزلوا من العربيه ؟؟

كان زماني سرقت البنك الدولي ورجعت

Modest
تاريخ المشاركة 10 April 2007 - 01:29 PM
DARWEEN, on Apr 10 2007, 12:34 PM, said:

ايه يا عم انت ... حنقعد سنه منتظرينكم تنزلوا من العربيه ؟؟

كان زماني سرقت البنك الدولي ورجعت
من فضلك يا استاذ داروين ماتتدخلش في شغلنا .. لإن الاستعجال ده هو اللي مضيعنا :roseop:

انت ناسي إن امبارح كان عيد؟ يعني المدرسة قافلة .. و يعني كمان سكوب مستني جونيور يلم العيديات .. يقوم لما يسرق حصالة إبنه حبيبه يكون فيها مبلغ عليه القيمة chf::

Folana
تاريخ المشاركة 16 April 2007 - 01:22 AM
السلام عليكم ورحمة الله .....



اللهم انى لا أسألك رد القضاء..ولكن اسألك اللطف فيه ....


:urgent:
يا برنس... :pasha: ...يابرنس st): ...يا استاذ برنس :mf_t:



صحى النوم.....لسه مافيش اخبار عن التنفيذ؟؟؟؟

طب اسمع...النهاردة كان فيه امتحان وشفتهم بيحولوا الفلوس فى عربات مصفحة متجهة الى المعهد البريطانى ومنها طيران على لندن...يا تلحق يا متلحقش....


اللهم بلغت ...اللهم فاشهد...


اووووففففففففففففففف :guns: :roseop:

Modest (عنوان الآي بي: 87.101.240.9)
Super Member

Members
PipPipPipPipPipPip
2135 مشاركة
0 نقطة إنذار
4
Neutral
النوع:ذكر
تاريخ المشاركة 16 April 2007 - 10:47 AM
بعد أن نجح سكوب في إرسال جونيور عند حماته ، قام بسرقة مسدس الميه و كل ما وجده في حصالة ابنُه حبيبُه ثم قام بتأجير البدل المطلوبة و تجمع أفراد العصابة عند منزل إبن مصر ليقوموا بارتداء الملابس ثم الذهاب إلى المدرسة.

سكوب: كل واحد ياخد الكيس اللي مكتوب عليه اسمه هابلاقي طقم فُلَّلي على مقاسه بالضبط.
موديست: بسرعة يا جماعة ، الساعة بقت 8 الصبح و عايزين نلحق نخلّص قبل جرس الفسحة.

تناوب الجميع دخول الحمام لارتداء البدل و ما أن خرجوا حتى ثار سي السيد على سكوب

سي السيد: إنت حد كان قال لك إن إحنا رايحين حفلة تنكرية؟ إيه البدل المنيلة اللي انت جايبها دي
سكوب: انت اشفهمك في الشياكة .. البدل اللي مش عاجباك دي احدث موضه .. دي من عند الواد سلومة أحسن مكوجي رجل فيكي يا مصر.
سي السيد: و ايه الهباب أبو استك اللي انت جايبهولي ده .. بيتلبس إزاي ده؟ و لا ده نبلة نصطاد بيها عصافير؟!!.
موديست: هدّوا أعصابكم يا جماعة .. ده اسمه ممباخ (بابيون) يا سي السيد.. انت نسيت انك مفتش انجليزي ؟!! .. لازم البتاع ده طبعاً و إلا هاتتهرش .. الود ودّي أجيب لك برنيطة كاوبوي كمان بس انت عارف العين قصيرة و الدقن طويلة .. قصدي الإيد بصيرة و الودن مستطيلة .. أقصد يعني الـ...
عصام (مقاطعاً و هو يرخي ربطة الكرافتة ليستطيع الكلام): قصدك العين بصيرة و الإيد قصيرة
موديست (و هو ينظر إلى عصام بغيظ): خلاص يا سيدي .. عرفنا إن انت اللي واخد كاس افريقيا في الأمثال الشِعبية..
أه .. هي اللي قال عليها عصام دي ... و ياللا بينا يا شباب مش عايزين عطلة.
يتجه الجميع إلى عربية ابن مصر.
سكوب (موجهاً كلامه بعنطزة لإبن مصر): إجري يابني افتح لي الباب زي الخطة ما بتقول
ابن مصر: لأ يا بُرَم .. الكلام ده عند المدرسة مش هنا .. إركبوا في يومكم اللي مش فايت .. و اللي هايركب آخر واحد يقفل الباب بالراحة أحسن يطلع في إيده.

ينطلق الجميع إلى المدرسة و هم يراجعون الخطة أثناء الطريق و قد بدا عليهم التفاؤل لدقة الخطة و سهولة العملية.

ينزل سي السيد و عصام و موديست من العربية قبل المدرسة و يكملوا الطريق كعّابي ، و يصل الثلاثة إلى المدرسة قبل وصول ابن مصر و سكوب لإن "امتثال" صحّتها على قدها.
يدخل موديست بسهولة لأن وجهه مألوف لكثرة استدعائه لاستلام جوابات رفد إبنه لعدم دفع المصاريف ..
يقترب موديست من الأمن و يقول لهم: وسّعوا للي جايين ورايا .. أنا سمعتهم بيقولوا إنهم مفتشين من الوزارة و جايين يفتشوا على المدرسة .. افتحوا لهم الباب ماتودوش نفسكم في داهية.
الأمن: أهلاً يا باشوات .. أهلاً يا باشوات .. أشرقت الأنوار يا باشوات .. المدرسة اليوم في عيد يا باشوات
ينظر سي السيد و عصام لبعض و ينظرون خلفهم للفرجة على الباشوات .. إلى أن يغمز لهم موديست من بعيد على أنهم هم الباشوات المقصودين.
سي السيد: أيوة أيوة... إحنا الباشوات.. اتفضل ادخل يا عصام باشا.. و نتقابل زي ما اتفقنا.
يدخل سي السيد في طريقه إلى الإدارة و عصام إلى حوش المدرسة حسب الاتفاق

بعد قليل وصل ابن مصر و سكوب و دخل سكوب إلى المدرسة بعد أن قام بتعريف نفسه إلى أمن البوابة و وصل إلى الإدارة في حراسة الأمن حيث وجد سكرتيرة المديرة.
سكوب: أنا السيد مدير التربية و التعليم
السكرتيرة (تنظر إليه بدهشة لإنه مش منظر مدير تربية و لا تعليم): أهلاً و سهلاً يافندم .. ماعندناش خبر إن سيادتك هاتزورنا النهاردة
سكوب (و هو يسبّل لها عينيه و يتنحنح بصوت منخفض): آه .. كنت عاملها لك مفاجأة
السكرتيرة: حضرتك تقصد زيارة مفاجئة للمدرسة .. ثواني أبلغ المديرة
تقوم السكرتيرة بإبلاغ المديرة بالتليفون الداخلي و بعد ثواني تأتي المديرة لاصطحاب سكوب إلى مكتبها.

ما أن يدخل (المديرة و سكوب) إلى المكتب حتى يسمع الجميع أصوات عالية تأتي من الخارج.

صوت أجش: سيادتكم آه مفتشين على عيني و راسي لكن لازم تمرّوا على المديرة الأول .. الأوامر كده يا باشوات.
سي السيد: بس الخطة غير كده
الصوت الأجش: خطة إيه يا أستاذ؟!!
عصام: الأستاذ سي السيد يقصد خطة الوزارة .. خطة الوزارة
سي السيد: آه .. هي دي .. انا اقصد الي قالُه ده بالضبط

يخرج سكوب مرة أخرى بصحبة المديرة إلى خارج مكتبها حيث يجد عصام و سي السيد بصحبة فلق من بتوع الأمن 9X6X3 متر مكعب.

الصوت الأجش (موجهاً كلامه للسكرتيرة): الباشا بيقول إنه مفتش ألعاب يا ميس سعاد .. بيعمل ايه بقى في الكانتين؟
عصام (و هو يستدعي حصيلته من الأمثال الشعبية) : يا جاهل .. العقل السليم في الجسم السليم.. لازم أدوق الأكل اللي في الكانتين كله علشان أطمئن على صحة الطلبة.
الصوت الأجش (موجهاً كلامه للمديرة): طيب و الباشا بيقول إنه مفتش الانجليزي .. ماشفناش يا هانم مفتش قبل كده بيجري ورا العيال يخطف منهم الساندويتشات.. أنا جايبُه من الحوش بنفسي بعد ما كان قال إنه داخل الإدارة.
سي السيد (موجهاً كلامه للمديرة): جود مورنينج .. هاو أر يو .. أي هاف تو آيز.
المديرة: أفندم؟
سي السيد:يعني سيادتِك تصدقي واحد زي ده و تكذبي مفتشين من الوزارة؟
عصام (و هو يكاد يختنق من ربطة الكرافتة): هزُلَت يا باشا ..
سي السيد: أنا عايز واحد لامون و ساندوشت علشان أهدي أعصابي
المديرة : يبدو إن فيه سوء تفاهم .. إتفضلوا عندي في المكتب و أنا بأعتذر لكم عن تصرف الأمن.. اتفضلوا.
يدخل الثلاثة إلى مكتب المديرة


في هذه الأثناء كان موديست موجود في مكتب المحاسبة
المحاسبة: حضرتك هاتدفع على طول و لا هاتفاصل زي كل مرة و في الآخر ماتدفعش؟ .. آخر واحدة دفعت كانت مدام فولانة و لسه ماشية من عشر دقايق و سيادتك مش عاملين حسابنا إنك هاتدفع أصلاً.
موديست: لألأ إزاي بقى .. طبعاً هادفع هادفع .. كل اللي تؤمري بيه هادفعه .. لكن منتظر أصدقاء أعزاء جايين حالاً و معاهم الفلوس
المحاسبة: طيب اتفضل استناهم بره علشان عندي جرد.
موديست: ماينفعش أستناهم بره لإني عايز ادفع أول ما يوصلوا علشان نلحق نخلع.
المحاسبة: تخلعوا؟
موديست: قصدي يعني نفلسع .. لأ أقصد نجري .. لألأ قصدي نمشي يعني علشان ورانا ميعاد ... القصد يعني علشان هما اللي معاهم الفلوس.
المحاسبة: طيب اتفضل استريح على الكرسي اللي في آخر الأوضة .. يا إبراهيم .. هات الأمن علشان يكونوا متواجدين و أنا باجرد الخزنة
إبراهيم: حاضر يا فندم
جلس موديست كما اشارت له المحاسبة و هو يتمنى أن يتأخر أصدقائه حتى تنتهي المحاسبة من جرد الخزنة و خروج الأمن .. إيه الورطة دي.


في خارج المدرسة ضرب ابن مصر صحوبية مع حراس الأمن بعد أن أغراه رؤيته لهم و هم يتناولون الإفطار فدعاهم إلى نقل الأكل ليأكلوا جميعاً فوق شنطة العربية

ابن مصر: ماتيجوا يا رجالة ناكل هنا فوق شنطة العربية.. و أهي لقمة هنية تكفّي مية.
أتى حراس الأمن على الفور ظنّاً منهم أنه لديه ما يشاركهم به و لكنه كان يدعوهم ليأكل من أكلهم ... و أثناء تناول الفطار دار الحديث التالي:
حارس أمن 1: مبسوط من شغلك مع المدير يا أخ؟
ابن مصر: أهي ماشية لغاية ما ربك يعدّلها .. أوعوا تفتكروا إني سواق عادي يعني .. أنا راجل شاعر قد الدونيا .. آه .. مستني بس أيوتها مطرب يستكشفني و بعدها اسيب أم الشغلانة دي و اقب على وش الدونيا .. يا سلام لو الريس شعبولا يقرأ بؤين من اللي باقولهم هايتنطر نطرة مش أي كلام يعني .. آه.. و هاتنطر معاه برضك يعني.
حارس أمن 2: طاب ما تضرب لنا حتى عاتفي يا عم الشاعر و احنا بنحش في الطعمية و الطرشي.
ابن مصر (و هو يضرب قرص طعمية على بوء واحد كأنه قرص أسبرين): بس كده؟ من عينيه الجوز .. إنت جيت في جمل يعني؟ ده أنا تخصص عاتفي أصلا
خدوا الحتة دي من عصيدة " يا بتاع انت " ما تطلعش غير للغاليين:

يا بتاع انت
انت ما تستاهلنيش
و انا اللي باعملهولك .. زيه مفيش
غلبت أرضيك .. حتى لو اعمل درويش
و انت برضك بتعند .. و مابتفهمنيش
لبستك الدهب و الألماظ .. و أنا لبست الطرابيش

نظر حراس الأمن لابن مصر بإعجاب شديد بعد إلقائه لهذا الجزء من الأصيدة العصماء حتى إن كل واحد فيهم جاب اللي في بطنه تأثراً بالعاطفة الجياشة و سابوا ابن مصر يكمل القصيدة لوحده و عادوا إلى باب المدرسة.


في مكتب المديرة جلس سكوب و سي السيد و عصام ينظرون لبعضهم و يستعجلون بعض للانتهاء من شرب الشاي الذي أمرت به المديرة و التي انشغلت في قراءة بعض الأوراق أمامها ثم بدأت الحديث معهم.
المديرة: أهلاً وسهلاً .. جميع الملفات تحت أمركم و تقدروا تطّلعوا عليها .. في الواقع أن المدرسة تقوم بـ ....– و لم تكمل حديثها بسبب جرس التليفون الذي رن على مكتبها
المديرة: ألو .. أيوة .. أيوة .. أه .. أيوة .. أيوة .. بقى كده؟
(ثم بصوت منخفض لم يسمعه سكوب و سي السيد و عصام) أمال مين اللي قدامي دول ؟؟ طيب أوكي .. بس جهزي الأمن على باب مكتبي... و اسمعي لما اقول لك .. مش عايزة شوشرة خالص .. دي سمعة المدرسة ... و انا هاتصرف.
المديرة (موجهة كلامها إلى سكوب): حضرتك قلت لي إنك السيد مدير التربية و التعليم .. صح؟
سكوب (و هو يضع رِجل على رِجل) : أيوة تمام كده
و سيادتك مفتش اللغة الانجليزية؟
سي السيد: أي هاف تو أيز
و الأستاذ مفتش التربية الرياضية.. صح؟
عصام: لأ .. أنا مش مفتش التربية الرياضية .. أنا مفتش الألعاب.
المديرة (و قد تغيرت نبرة صوتها إلى الحدّة): طيب أنا مضطرة أستأذن بعد دقائق علشان أكون في استقبال السيد مدير التربية و التعليم و معه لفيف من المفتشين و مديري الإدارات المختلفة بالوزارة.
سي السيد: مدير إيه و مفتشين إيه؟ أمّال إحنا نبقى مين؟!! .. لالالالا انتي مش مصدقاااانا و لا إيه يا أبلتي؟
المديرة: يا أبلتي؟!!! .. طيب من غير شوشرة كده الأمن هايدخل ياخدكم من مكتبي لغاية ما ييجي البوليس.. (و بصوت عالي تقول للسكرتيرة): اطلبي لي البوليس يا ميس سعاد.
ينهار سكوب و سي السيد و عصام فور سماع كلمة "بوليس" و يبدؤون في البكاء
سكوب: لألأ .. بلاش بوليس.. أنا هأقول على كل حاجة
عصام: قلت لكم قلبي مش مطمّن من خطة اللي ما يتسمى و ماسمعتوش كلامي ..
سي السيد: هو الوله موديست السبب.. هو السبب .. يامين يلايمني على رقبته و أنا أخنقه .. أنا قلت لكم الواد ده اخره حرامي غسيل ماسمعتوش كلامي.. طاب و ديني لــ.....
المديرة (مقاطعة في حدة): إنتوا قلتوا موديست؟ مش ده ولي أمر طالب عندنا هنا؟ و هو فين دلوقتي؟
سكوب (منهاراً): سي زفت مستنينا في مكتب المحاسبة.
المديرة: رغم إن السيد موديست تاريخه اسود مع المدرسة لكن مضطرة أواجهكم به علشان اعرف الحقيقة... و إذا اتضح اشتراكه معكم يبقى البوليس ياخدُه معاكم هو كمان.
تأمر المديرة حراس الأمن بأخذ سي السيد و سكوب و عصام إلى مكتب المحاسبة لمواجهتهم بموديست لمعرفة الحقيقة.
سي السيد (باكياً و مولولاً): هانعمل أي حاجة تطلبيها .. بس بلاش بوليس.. بلاش بوليس.. بلاش بوليس
المديرة: مفيش غير الحل ده و إلااااا ...
عصام: خلاص من غير "و إلاااا" .. هانروح .. هانروح .. و مادام فيها بوليس يبقى أخنق موديست بإيدي و البوليس ياخدني بعد ما أخلّص عليه.
يذهب الثلاثة مُعلَّقين من قفاهم بواسطة 6 من أفراد الأمن إلى مكتب المحاسبة حيث رأوا موديست جالساً في آخر الغرفة و ما أن رأوه حتى حاولوا الانقضاض عليه للفتك به و لكن استطاع رجال الأمن تخليصه من أيديهم قبل أن يختنق.
موديست (مذهولاً و بصوت منخفض): إيه اللي جرى لكم .. ده اللي متفقين عليه؟
سكوب: متفقين؟ متفقين تودينا في داهية يا وش المصايب انت؟
دخلت المديرة في هذه الأثناء و وجّهت كلامها إلى موديست.
المديرة: حضرتك تعرف التلاتة دول يا استاذ موديست
موديست: و لا عمري شفتهم حضرتك
ما أن يسمع سي السيد ما قاله موديست حتى انتابته حالة هياج شديدة
سي السيد: لأأأأأأأأأأأأأأ .. مش هانلبس المصيبة لوحدنا يله .. يعرفنا .. يعرفنا .. يعرفناااااااااااا.. قول لها إنك تعرفناااااااا
موديست (موجهاً كلامه للمديرة) : سيادتك أنا ماعرفش الأشكال دي.. إيمبوسيبول يعني.
المديرة: و حضرتك جاي هنا ليه النهاردة؟
موديست: جاي أدفع المصاريف سيادتك
المديرة: طيب ادفع .. مستني ايه؟
موديست: هه؟
سكوب: آه .. إدفع يا فالح .. إدفع يا وش البلاوي.
موديست: هه؟ أصللل .. العُبارة يعني.. الحئيئة اصل..
المحاسبة (موجهة كلامها للمديرة): الأستاذ موديست قال من شوية إنه منتظر أصدقاء له معاهم الفلوس اللي هايدفع منها المصاريف... واضح إنهم يعرفوا بعض يا ميس.
المديرة و قد اكتشفت كذب موديست و أنه يعرف الثلاثة: اتفضل إدفع حالاً و إلا البوليس هاياخدك معاهم.. مفهوم؟..
أيقن موديست أن الموضوع انكشف و ليس أمامه وسيلة إلا الدفع أو الحبس..
إلتفت إلى سكوب و عصام و سي السيد يستعطفهم أن يعطوه أي مبلغ يدفعه للمحاسبة
موديست: معاك كام في جيبك يا سي السيد
سي السيد (باكياً): في جيبي؟ .. آه ياني .. أأأه ياني .. ياريتني ماعرفتك يا وش المصايب.
طيب معاكم كام يا عصام انت و سكوب؟
عصام : إنت مش قلت ماتعرفناش ياض؟ و أشاح بوجهه الناحية الأخرى.
سكوب: هما تلاتين قرش اللي فاضلين مفيش غيرهم و كنت ناوي أرجعهم حصالة الوله جونيور .. و ينفجر في البكاء.
موديست: طب هاتهم .. كده معايا 67 قرش يا ست المديرة .. إقبليهم الله يسترك و سيبينا نمشي من هنا... بس بلاش بوليس .. بلاش بوليس .. أنا عندي عيال عايز أربيهم.. و ينفجر باكياً.
المديرة (بلهجة حادة و على يمينها و يسارها يقف فردين من أفراد الأمن المدججين بهراوات ماركة الأمن المركزي): 67 قرش؟!! .. خليهم لك .. و بكرة هايوصلك جواب رفد ابنك.
ميس سعاد (و هي تدخل إلى الغرفة): البوليس هايكون هنا بعد دقيقة يا مدام.
المديرة (بانفعال و صوت عالي): شوفوا.. علشان سمعة المدرسة أمام الطلبة و الطالبات .. هاتغوروا من هنا من غير مطرود قبل ما ييجي البوليس.. و دلوقتي برررررررّه .. 5 ثواني و هايكون البوليس وصل.. إنتوا سامعيييييييين؟
يطلق الأربعة سيقانهم للريح إلى خارج المدرسة حيث وجدوا ابن مصر في انتظارهم
صاحوا جميعاً فيه أن ينطلق بأقصى سرعة قبل أن تمر الـ 5 ثواني التي حددتها المديرة
ابن مصر: العربية مش عايزة تمشي
موديست (صائحاً): إجري بسرعة مش وقت الكلام ده .. هانضيع كلنا بأقول لك
ابن مصر (منفعلاً بعد أن رأى حالتهم و أيقن أن العملية فشلت) : إنت مش قلت لي سيب العربية شغالة لغاية ما ترجعوا؟
موديست (صائحاً): أيوةةةةةةةةة
ابن مصر : أهو البنزين اللي دفعت فيه تلاتين قرش بحالهم خلص و العربية وقفت قبل ما ترجعوا.

ينطلق الجميع جرياً بأقصى سرعة في اتجاهات مختلفة و هم يصبّوا كل ما يعرفوه من قاموس الشتائم على موديست.


تمت :roseop:

se_ Elsyed
تاريخ المشاركة 16 April 2007 - 01:04 PM
Quote
عقلي الباطن بيقولي : تلك هي الغيرة الادبية ... الأخ الكاتب الناشيء موديست لما لقاني قفلت الحتة الادبية اللي كانت في إيدي .. غار ( من الغيرة يعني مش غار التانية :roseop: ) وأُستفزت ملكاته الأدبية .. وبقى قاعد لا على حامي ولا على بارد ... وأنا متأكد إنه راح قهوة الادباء اللي في بني مالك ( منطقة شعبية بجده ) وأستعان بالاخوة الادباء اللي قاعدين يشربوا بانجو طول اليوم هناك ويخزنوا قات .. لعل وعسى حد يسعفه ويساعده في تقفيل مغامرته الي كانت مفتوحه من كل ناحيه ومش عارفين يلمها ... لكنها غيرة محمودة ... وأستعانه ممدوحه ... ومحاوله ممجوجة ... وبداية ممشوقة ... وأنامل مبتورة .. قصدي ممسوكة ... إلى الأمام يا عزيز موديست .. وسأسرد تعليقاتي الأدبية على القصة بعد أن أستكمل قراءتها .. علك تستفيد من النقض الصادر من أديب كبير زي سين سين وعسى أن يكون ذلك دافعا لك للأمام - شلوت يعني - وتُبدع قصصاً ومغامرات أخرى تجعل منك إسم تخين في عالم الادب ...

وأخيراً أود أن أوقلك لك - سجلها عندك للتاريخ - مرحباً بك يا موديست في بيت الأدب .

أخوك الاديب : أبو جُمعه

Folana
تاريخ المشاركة 16 April 2007 - 01:39 PM
السلام عليكم ورحمة الله ...


ياصلات النبى ..يا صلات النبى.... :urgent: :pasha:

يا عصاباتك يا محاورات ...... :roseop:

وانا اللى رحت ادفع المصاريف على اساس ان فلوسى حترجع الطاق طاقيين بعد اتمام عملية السطو؟؟؟...هو ده وعدك يا برنس؟؟؟؟


عليه العوض بقى...عليه العوض..... :guns:


لكن علشان باقى الزملا..ومن اجل الحفاظ على مستقبل عصابة المحاورات يمكن ربنا يستجيب الدعا وتنجحوا مرة من نفسنا ..انا حاتبرع لكم بسيارة بدل طنط امتثال اللى خيبت امالكم فيها .

إبن مصر
تاريخ المشاركة 18 April 2007 - 10:42 AM
كونها أول مره ليك بصراحه.... بصراحه يا موديست جميله جدا والكوميديا مالياها سواء بالمواقف او الافيهات..
حلوه قوى.. ومفاجأتن ليك انت وباقى الزملاء..
وعلشان انت بقيت أمور وكويس ومخليتش حد يضربنى فى الكصه بتاعتك..
انت من الاحرار يا موديست ومكانك اتحفظ فى عصابه حساس ...

وترقبوا القصه القادمه...
سرقه مركز التجميل ..

Modest
تاريخ المشاركة 19 April 2007 - 06:12 AM
se_ Elsyed, on Apr 16 2007, 01:04 PM, said:
وأخيراً أود أن أقول لك - سجلها عندك للتاريخ - مرحباً بك يا موديست في بيت الأدب .

أخوك الاديب : أبو جُمعه
أديبنا الكبير "في السن" أبو جمعة :roseop:

حئيئي أنا مش مصدأ نفسي .. أنا من المعجبين خالص برواياتك التي تكتبها في بيت الأدب و تأثرت جداً بترحيبك بي :roseop:
و نحن جميعاً في إنتظارك خروجك بالسلامة :roseop:

Modest
تاريخ المشاركة 19 April 2007 - 06:16 AM
folana, on Apr 16 2007, 01:39 PM, said:
ياصلات النبى ..يا صلات النبى.... :roseop: :roseop:

يا عصاباتك يا محاورات ...... :roseop:

وانا اللى رحت ادفع المصاريف على اساس ان فلوسى حترجع الطاق طاقيين بعد اتمام عملية السطو؟؟؟...هو ده وعدك يا برنس؟؟؟؟


عليه العوض بقى...عليه العوض..... ksh::

mil:

نينة الغالية :roseop:
تحية طيبة و بعد

آسف إني خيبت أملك فيا يا نينة .. كنت حاسس بشعورك بالفخر إني حرامي قد الدونيا :roseop:
لكن أوعدك أول ما الولاد يخلصوا المدعوقة الأي جي دي و يدخلوا الجامعة هاجيب لك خزنة الجامعة لغاية البيت هدية مني ليكي .. و ساعتها أقدر أوريكي وشي تاني

ابنك موديست
من أمام مكتب بريد الأقصر
محافظة الشرقية
الاسكندرية

إبن مصر
تاريخ المشاركة 21 April 2007 - 09:05 AM
بعد حديث طويل مع الاديب والمفكر موديست جاد الحق موديست الذى طالبنى فيه بنقض مودوعى للكصه .. وعاب على انحضار مصتوى نقضى لكصته . احلهلها بمودوعيه.
القكه فى مكملها تحمل تابع الاصقاط الصياصى فى مضلولاتها بحيثيات مبتقره اصتغل الكاطب فيها براعنه فى توزيف الافكار بحيث رحل بنا ككراء فى تفاسيل الكصه بلا تتويل او ملل.
فنجد انه فى بدايتها استقظ فينا ملكه التفقير بكثير من الالغاز والسسبنس وتركنا حتى نهايه الكصه ونحن فى تشويك لمعرفه القاتل .
وفى قمه اللحظات الميلودراميه زرع البسمه فى عيون الاطفال و الامل فى قلوب العجائز وحب الحياه فى وحيدات الخليه ذات الاهداب المتطوره فى جو من الدخان الناتج عن الانحباس الحرارى معطيا لنا صوره واكعيه عن الوضع السياسى فى مدغشقر.
وفى الجزء الاخر من الروايه وبتتابع سريع للاحداث بث ففينا روح المغامره ونحن نجرى وراءه فى مضمار روايته قاطعين المسافه فى زمن قياسى بدون مجهود او مواصلات رغم زحام المضمار بالعربات المعطله نتيجه خلط البنزين بعصير الكصب.
وفى النهايه وبعد ان تزوج البطل من مطلقته انهالت دموع الفرح منا ونحن نشاهد لحظات اللقاء الاول بينهم فى قسم السيده وهم يسلمون قايمه ىالعفش فى ود ومحبه ووءام.
ونحن مو موكعنا هذا نرحب به فى باب الادب كاتبا و مهندسا ومحاسب.
وشوكران.
أحمد محمود
دكتوراه النقد الفنى المقارن بجامعه شوارسكوف بصفط اللبن

Modest
تاريخ المشاركة 21 April 2007 - 09:24 AM
صح :roseop: .. كلام بريفكس يا سيادة البروفيسور ابن مصر .. مادام قلت الأديب و المفكر موديست يبقى بتتكلم صح يا باشا

و من موكعي هذا اشكركم على هذا النقض الفني البارع و هذه الشهادة التي سأقوم بتعليقها الأن في بيت الأدب :blink: .. و أعدكم في العمل القادم بزيادة مساحة الضرب اللي سيادتك هاتاكله :wub:

se_ Elsyed
تاريخ المشاركة 21 April 2007 - 12:01 PM
إنذار للأخ ياسو .. وسيتم وقف عضويته لو ما بعتش الموبيل الخاص به في رسالة خاصة للاخ المجاهد سي السيد وذلك خلال 5 دقائق من الأن ...

حوووووووووول

وإقرأ القصة بتاعت الرحلة وما تكروتنيش نيش نيش وقولي رأيك
--------------------------

بمناسبة عصابة حساس .. ولمن لا يعرف ..

فصاحب هذا الأسم التجاري هو العضو الرفيق " سكوب " وكان قد أشتقها في القرن التاسع عشر من الاحرف الأولى للاعضاء :

1- حشيش : ح

2- سي السيد : س

3- أحمد محمود : أ

4- سكوربيون : س

ولدي إقتراح أرجو دراسته .. حيث أن الأخ الرفيق حشيش لم يشترك معنا في أي مغامرة لأي سبب يخصه ... وحيث أن الأخ موديست حالته كانت تصعب على شارون وسمحنا له بالإنضمام للعصابة لتلقيط رزقه .. فأقترح تغيير إسم العصابة إلى " مساس " على أساس ميم موديست يعني زي عين عبعال كده .. ما رأي البورد الأعلى بتاع العصابة ؟

بالمناسبة كنت ابتديت أكتب حتة جديدة إسمها " سرقة مستشفى المجانين " ما حدش يضحك دلوقت وأستنوا لما أشطبها فبعد إذن الكاتب الطاعن في السن احمد محمود .. هاتنزل إنت بحتة سرقة محل الكوافير .. وبعدين نخش عالمستشفى .. ولا انزل انا بالمستشفى وبعدين ندخل الصالون ؟

العجوز
تاريخ المشاركة 14 July 2007 - 09:44 PM
:rolleyes: فعلاً يا ولاد حاجة مش طبيعية
أنا بقالي 3ايام بقرا في المغامرات بتاعتكم وطبعتها واخدتها البيت اقراها مع نَفَس المعسل البحريني باللوز والسماق
على فكرة دخلتي المنتدى ده جت بالغلط . أصلي دخلت على جوجل وبالبحث حطيت العبارة دي "فيديو شتيمة عادل امام لمحمد سعد فى برنامج القاهرة اليوم" وطلعلي الموقع بتاعكو من ضمن المواقع.
قعت اقرا النكت والمواضيع اللي فوق واضحك واضحك وسبت شغلي وبس قاعد قدام الشاشة بس لمن دخلت على قصتكم الأكثر من رائعة ما صدقتش جمالها
حتى إني قمت طابعها وموزعها على زمايلي في الشغل اللي هما مصريين عشان يخففوا من غربتهم شوية
...
بكل مودة وحب أشكركم جدا وياريت تقبلوا شخص لبناني في موقعكم المصري ...

سؤال جريء " ايه اللي حصل حتى وقفتوا الكتابة ؟؟؟

Folana
تاريخ المشاركة 14 July 2007 - 11:09 PM
السلام عليكم ورحمة الله...

بنرحب بك اخى الفاضل العجوز اخا عزيزا ..ونتمنى لك قضاء وقت سعيد ومفيد معنا....

العصابة واخدة اجازة ...بيصيفوا فى المزرعة....ادعى لهم يرجعوا لنا بالسلامة .....


انا كمان باوجه نداء لافراد العصابة ...ايه النزام ..انتم فين؟؟ورانا شغل كتير............. :rolleyes:

إبن مصر
تاريخ المشاركة 14 July 2007 - 11:19 PM
أرحب معك بالعضو الفاضل العجوز...
وكم هى سعادتى ان اضافت حروف اخوتى وحروفى البسمه اليه ..
ونرجع بقى للنزاام..
أنا كنت مستنى عصام .. بس باين عليه واخد ادازه.....
يبقى معلش بجى... مدتر أنزل بالحته الديديه....
بتاعه .

مركز التجميل ..
فانتظرونا فى ..


سرقه مركز التجميل

Modest
تاريخ المشاركة 18 July 2007 - 01:07 PM
أحمد محمود, on Jul 14 2007, 11:19 PM, said:
انتظرونا فى ..


سرقه مركز التجميل
اللهم طوّلك ياروح

ما تنزل يا عم انت بالخطة خلينا نشتغل .. عايزين نطلع بقرشين حلوين علشان العيال نفسهم يصيّفوا و الحال زي مانت عارف :wub:

se_ Elsyed
تاريخ المشاركة 23 July 2007 - 09:18 AM
أحمد محمود, on Jul 14 2007, 11:19 PM, said:

سرقه مركز التجميل


إنت كده داخل في نفق مُظلم يا احمد وممكن نخسر بعض .. لإنك عارف إن مراكز التجميل يعني الحلاقين بالعربي كده ده تخصصي ...

وبعدين هاتسرق إيه من هناك يا حسره ؟

مقصات وملاقيط وامواس حلاقة ؟

على العموم سأتحلى بالحكمة ولن أحكم على التجربة إلا حين إكتمالها وقد يكون فيها خير وعلى رأي إبننا موديست نجيب فلوس المصيف

إدخل بقى عليه بالدقن .. وتدرج شويه شويه لحد ما توصل للقفا

se_ Elsyed
تاريخ المشاركة 24 July 2007 - 04:14 PM
عملية مستشفى المجانين

( وسع وسع للعقلاء ... لاء لاء )

سوكه للإنتاج الفني تُقدم .. القصة التي بهرت العالم وانتظرها الجمهور ... يعني لا تقولي هاري بوتر 7 اللي باع 8 مليون نسخة في أول يوم .. إحنا بالصلاتو عالنبي بنعدي الرقم ده وزيادة وملحه في عين اللي ما يصلي عالنبي ......

إدخل يابني برجلك اليمين وصلي عالحبيب ...

------------------------------------

مشهد داخلي ... نهار صحو ... الشمس مشرقة وبتلفح في قفا الخلايق ..... والدنيا صيف بقى وكل سنة وإنتو طيبين والناس مفرهده وخايفة تُخرج من بيوتها بسبب الأشعة فوق البنفسجية والحركات دي ... واللي ربنا فتحها عليه بقرشين راح قبض الجمعية ويا فكيك عالمصيف ...

اما أعضاء عصابة حساس فالعملية كانت نايمه معاهم .. والسلك ضاربهم ومش لاقيين ثمن الدخان ... وفي أحدى سهراتهم الحمرا على قهوة الهجامين دار هذا الحوار :

إبن مصر : ما تسجر يا سونسون

س س : منين يا حبيبي ؟ والنبي ما كنت أحوشها عنك ... أخر عُقب حبست به بعد ساندوتش الفول بتاع الصبح .

إبن مصر : الله يلعن ابو الفقر ... يعني لحد إمتى هانفضل في الغُلب ده ؟ العصابات التانية كلت وشنا من كتر فشلنا

عصام : لحد ما نقع لنا وقعه سوقع نقب بها على وش الدنيا

س س : أهو من ساعة معرفتكو الهباب دي وأنا بأسمع نفس البؤين الحمضانين دول ... وبنقع على سنانا كل مرة ... إلا فين موديست بالحق ؟

إبن مصر : موديست يا سيدي من ساعة ماتش الكاس الأخراني والحالة رجعت له تاني بعد ما كان خف شويه والدكاترة قالوا فيه أمل ..راح إنتكس تاني بعيد عنك وبقت حالتو كرب .

س س : يعني مالو ... قصدي بيعيش حياته إزاي ؟

عصام : انا أتصلت بأحمد إبنه من يومين وقالي إن بابا رجع لبس البيجاما المقطعه تاني وطول اليوم واقف في البلكون يحدف الناس بالطوب لحد ما طوب الأرض أشتكى منه ومش عارفين بيجيب الطوب ده كله منين ؟

س س : بسسسسسسسسسسسسسسسس وجدتها ...... فُرجت يا عيال وهانصيف ونشرب سجاير مارلبورو كمان وهاينتكب لنا ندوق الكفته والكباب ولحمة الراس كمان .

إبن مصر : إيه .. هه إيه .... هي إيه اللي وجدتها يا أرشميدس ؟

س س : مش هاقولك دلوقت .... قوم بس يا عصام إخطف رجلك لحد ربيع بتاع كشك السجاير وإدي من عنده ميسد لموديست وخليه يغير أم البيجاما الفقر بتاعته وييجي قوام

عصام : يا سلام ..... يعني أول ما يشوف الميسد هايفهم هو كل حاجه وييجي على طول ؟

س س : يابني ما تتعبش قلبي .... قوم كلمه وقوله سين سين بيقولك النادي الأهلي ولع وعايزينك تيجي لنا عالقهوة عشان نروح نتفرج عالحريقة ...

عصام : قشطه يا مان .... حمامه فريره

وبالفعل ما هي إلا ربع ساعة إلا وأقبل عليهم موديست وقد أرتدى الشورت الأبيض والفالنة الحمالات المشهور بها ودخل القهوة مبتسماً :

موديست : هاي يا جماعة .... إيه الأخبار ... هانروح الحريقة إمتى ؟

إبن مصر : حريقة إيه فال الله ولا فالك ... أقعد بس وس س هايفهمك عالعبارة

موديست : إيه ده ؟ يعني ضحكتو علي وطلعتوني من خلوتي يا أشرار ؟

س س : قعد بس يا عم يعني طلعناك من الجنة يا خي .... بص يا موديست إنت حالتك العامة كده مش عجباني .... وموضوعك مالوش أخر ... فيا تسيبك بقى من الزمالك يابن الحلال وتلتفت لأكل عيشك وتخلص للعصابة عشان ربنا يكرمك ... يا إما تشوفلك بلد تانيه تروح تعيش فيها وما تقرفناش كل شويه وحالة الذعر اللي إنت معيشنا فيها وبعد كل ماتش إلحق يا جدع موديست هايولع في نفسه .. حوش يا عم موديست هايقطع شرايين رقبته بالقزازة والكلام الفاضي ده .

موديست : مش قادر يا س س ... شوفلي حل أرجوك ؟

س س : طيب .. إهدى بس كده ... إيه رأيك تروح تضرب لك إسبوعين في مارينا تريح فيهم أعصابك وتضرب لك غطسين وتبلبط ؟

موديست : منين يا حسرة ؟.. ده الأسبوعين دول يكلفو عالاقل كده تلتميت قول ربعميت جنية

عصام : تلتميت روبعميت جنيه ؟!!!!! يابني ده أنت لو رايح لحد العتبة هاتصرفهم في الطريق ... إيه يا عم الحاج إنت لسه عايش في عصر الجنية الجبس ؟

س س : سيبو يا عصام .. خدو يا سيدي على قد عقله ..... مش بس كده يا موديست ... ده أنت هاتصيف وتروشن نفسك ويتبقى معاك فلسو تشتري لك بهم طاقمين بدل هدوم وكالة البلح اللي إنت متكفن فيها دي ... وإحتمال كمان يبقى لك مبلغ تشتري لك بهم قاروصة مارلبورو تعيش عليها باقي السيزون .

إبن مصر : خش في الموضوع يا سونسون أنا ريقي جري خصوصاً من ساعة ما سمعت سيرة اللحمه وأنا ضربت لخمه .

س س : من غير لف ولا دوران ... أنا قررت نسرق مستشفى المجانين .... قولتو إيه ؟

موديست : الحمد لله مش أنا بس اللي مطرقع ... الحمد لله يارب

عصام : بس ياض انت وهو أنا هارش دماغ سين سين ... إحنا هانسرق لنا كام مجنون من دول ونفتح دماغهم ونسرق أمخاخهم اللي عالزيرو ونبيعها بالشيء الفلاني .. صح يا سين سين ؟

س س : مخ إيه وكبده إيه ؟ إيه التخريف بتاعك ده

إبن مصر وهو يضحك على عصام : دايماً بتحط نفسك في مواقف زبالة .... كمل يا سين سين يا راجل يا كُمل

س س : إحنا هانستغل حالة موديست النفسية اللي في الحضيض وندخله مستشفى المهابيش ..

موديست : والله العظيم كنت عارف إنك هاتغدر بيه لإن ده طبعك اللي مش هاتغيره ..... حرام عليك يا أخي إنت ما عندكش عيال ؟ دلوقت كريم إني يروح يقول إيه لأصحابه بتوع جريد تو لما يعرفو إن أبوه إتجنن ودخل المستشفى ؟

س س : حوش حوش .... ليه وهو أنت لو كنت أتقفشت في عملية سرقة المدرسة كان هيتباهى بك ويقول أبويا دكتور مخ وأعصاب ؟

أبن مصر : صلو عالنبي يا جماعة وبلاش حوارات وخناقات إلا لما نسمع الخطة بالكامل .... عيش يا س س

س س : أعيش إيه بقى بعد ما البني أدم ده فور دمي ... لو سمحت يابو أنجي إطلب لي ساندوتشين سجق أهدي بهم أعصابي .

إبن مصر : يعني هو تهدية أعصابك ما تجيش إلا على دماغي ؟ .. إن شالله عنك ما هديت يا أخي

س س : ميرسي .... نكمل يا رجالة .... بص يا موديست إنت بالذات لإنك إنت البطل عايزك تركز معايا .... بقى العلاج الرئيسي للمجانين في المستشفيات هو حقن المورفين اللي بيدوهالهم عشان يهدوا .... فتبص تلاقي الحقنة من دول قد الصوباع لكن بتتباع بالشيء الفلاني .. فتخيل لو قلبنا لنا 4 قول خمس كراتين من دول وبعناهم في السوق يجيبوا كام ؟ .

عصام : يا نهار مش فايت ... مخدرات يا سين سين ؟ دي أخرتها ... مورفين وكوكايين وبانكو ؟

س س : بانكو ؟!!!!! اقعد يا عم الحلو إنت وما تعملش فيها ثورجي .... مين جاب سيرة المخدرات ؟

عصام : إنت مش بتقول نسرق الحُقن وبعدين نفتح غرزة صغيرة نضرب فيها حقن للمدمنين ؟

س س : يا نهارك اسود ... إنت عايز تلبسني تهمة يا بني أدم .. انا قلت كده يا مفتري ؟

إبن مصر : سيبك منه يا برنس وكمل هانصرف البضاعة دي إزاي ؟

س س : أنا ليه واحد صاحبي شغال في صيدلية وعرفت منه إن الحاجات دي مطلوبة زي الحلاوة ... فهانسلك بضاعتنا هناك ... أما الولا أبو قميص بنفسجي اللي هناك ده – مشيراً على عصام – فهاديله حقه ناشف زي روقه في فيلم العار وهو يصرفه بمعرفته .

موديست : طب أنا فين في القصة دي يا كابتن ؟.

س س : العملية يا موديست زي شكة الدبوس وحاجه سونكومينتال خالص...

موديست : خش في الموضوع على طول وبلاش شك دبابيس وضرب حقن الله يرضى عليك أحسن أنا أتخنقت منك ومن تسهيلك للامور اللي بتتكركب على دماغنا في الأخر وبتقلب بغم ... وبعدين إيه المصطحلات الغريبة اللي بتستخدمها دي سونكومينتال وسك على بناتك ؟

س س : ماشي ... إنتا هاتعمل الشويتين بتوعك اللي بتعملهم بعد كل هزيمة للزمالك ... يعني الصريخ وتقطيع الشعر وتنزيل البيجاما المقطعة من فوق الدولاب وكده يعني .... نيجي إحنا نكتفك ونجرجرك عالمستشفى ..... تقعد لك قد يومين تلاته تعرف فيهم المكان اللي بيشيلوا فيه الحقن دي ... نجيلك إحنا بزيارة محترمة ... فراخ وبط وفطير وكإننا جايين نطمئن عليك ... تكون إنت مجهز لنا خريطة تفصيلية بالمداخل والمخارج ومكان البضاعة ... نيجي إحنا بالليل نقشطها وناخدك وتننا راجعين .... هـــــــــا إيه رأيك في التكتكه دي ؟ .

يُتبع