مغامرات عصابة "حساس"

إبن مصر
تاريخ المشاركة 05 September 2006 - 04:26 PM
. الى ان ينتهى عصام حبيبى من قصته أستأذنكم فى قصه..
سرقه المزرعه .....
اهداء الى أخى الحبيب سكوربيون كما وعدته يمكن مين عارف!!!!!!!!!


سرقه المزرعه
بعد ان فشلت أخر عمليه للاصدقاء كالعاده تقوقع كل منهم عده شهور دون ان يتقابلوا على القهوه كعادتهم وانقطعت اخبارهم تماما حتى يوم مر ابن مصر على القهوه ........
ابن مصر: أمشير انت يا واد يا امشير......
أمشير :عميييييييييييييييييي ( يقفز ويتعلق برقبه ابن مصر )
ابن مصر : اهمد الله يهدك وانت عامل زى القراده..........
لينكس( أبو أمشير): الله الله الله نورت يا شقيق فينك وفين أيامك ( يقترب من ابن مصر ويحضنه بعنف )
ابن مصر : الله يخليك يا راجل يا طيب ..... أهو ما انت عارف بقى ....
لينكس : عارف ايه .... انتم فين انا قلت انتم طفشتوا عشان ما تدفعوش الحساب يا رمم......
ابن مصر : الله الله ليه الغلط ده ما انت عارف الحاله عامله ايه بس قولى انت ما بتشوفش حد من الشله خالص؟؟؟؟
لينكس : لا والله سى السيد أخر مره شفته كان راكب ورا سكوب العجله وشايل قفص عيش !!!!!!
ابن مصر : قفص عيش ؟؟؟؟؟؟ لا حول ولا قوه الا بالله ... يا بختهم ...
لينكس : نعم يا خويا بقولك بيبع عيش .....
ابن مصر : ايوه يا سيدى على الاقل بيروح برغيفين فى الاخر مش احنا الى عضلات الفك عندى تبست من قله الاستعمال....
لينكس : ياااااه هى الحاله ضنك كده؟
ابن مصر : الحمد لله على كل حال .. انت ما بتشوفش أسو؟؟؟؟؟؟؟
لينكس : اااااه اخر مره شوفته كان بيلم الجرانين القديمه ......
وبينما يتكلمون يقترب سى السيد من القهوه....
سى السيد : شوماااااااااااخر أأأأأأه يا ندل ...
( يجرى على ابن مصر ويحضنه بقوه )
ابن مصر : انا الى ندل يا جبان كل ده كل ده ... ما دام ربنا فتحها عليك وبقيت تاكل كل يوم مش تفتكر أخوك يا مفترى .... ما كنش العشم يا سى السيد ..
سى السيد وقد فتح عيناه فى دهشه وهو ينظر الى ابن مصر : أكل كل يوم ؟؟؟ أعدمك لو ده حصل ... دى كانت سبوبه كده وباظت...
ابن مصر : باظت ازاى ؟؟
سى السيد: ابدا الواد سكوب عرف يجيبلنا شوغلانه توزيع عيش من الفرن للحته ......وفى أول يوم لاقيته جاى بالعجله وقالى هاسوق انا... بينى وبينك انا اتوغوشت بس قلت وماله ما هو.. هو الى سعا فى العمليه ..... ورحنا ياخويا الفرن وجبت القفص ...... وشيلته وساق بينا ....... وعند أول مطب صناعى.......بيدوس فرامل ... مفيش فرامل ....... قام لابس فى الاتوبيس....والعيش وقع ... واتكحرتنا.. سالته انت جايب العجله منين قالى بتاعه جونيور.... وعينك ما تشوف الا النور ما حاشوش منى الا الشديد القوى وطبعا اضطرينا نختفى عشان صاحب الفرن كان عايز فلوسه....
ابن مصر : سؤال ولو فيها رزاله .... العيش طعمه لسه زى زمان ؟؟؟؟
سى السيد : لا حلوه وملعوبه ... انت فينك....
ابن مصر : ابدا يا سيدى عرفت ادبر قرشين ورحت اشتريت بقايا امتثال من تاجر الخرده وربنا كرمنى فيها وجمعتها تانى بس ناقص شويه رفايع .....
سى السيد : الله الله ايوه كده وناقص ايه ان شاء الله ؟
ابن مصر : ابدا .. رفايع .... الفتيس والكوبلن اليمين و الرادياتـــــ............( يقفز سى السيد عليه ويخنقه)
سى السيد : دى رفايع !!!! انا عرفت الى نحسنا كان ايه ..
ابن مصر : ايييييييييييييييه انت هاتفترى عليا والا ايه اهمد بقى ...... بقولك ايه.... قوم نروح لسكوب نشوفه.... وبالمره نعدى على اسو....
سى السيد : والله فكره .... تعالى......
وذهبوا الى سكوب فى المنزل......
سكوب : يااااااااااااااااااااااه والله زمان ازيكم يا فقر والله وحشتونى .
ابن مصر : أه ما انت بقيت من عليه القوم وبتاكل 3 مرات فى الاسبوع يا مفترى ..
سكوب : أعدمك والله لو ده حصل ..... والله زمان يا فقر .. وانت يا سى السيد عامل ايه

سى السيد: الحمد لله .. والله الحاله مش ولابد يا سكوب يا اخويا وبايننا كده لازم نولع فى نفسنا ..
سكوب : وايه الجديد محنا طول عمرنا كده الا فين الواد اسو؟؟
ابن مصر: انا سمعت انه الله اكبر عليه بقى اقطاعى وبيتاجر فى الجرانين..
ينظر الجميع الى بعض فى دهشه ..
سى السيد: صحيح أرف.. هوا فين يا جماعه..
سكوب : انا كلمته وهو قال انه جاى .
يدق باب المنزل ثم يأتى جونيور ابن سكوب.
جونيور: بابا بتاع الزباله واقف بره وبيقول عايزك.
سى السيد: يا نهار ابيض حتى الزبال يا سكوب مداينك.
ابن مصر: يا تحفه افهم البيه بقى عنده حاجات يرميها خلاص اغتنى و..
سكوب : حيلك حيلك انت وهو انتم ما صدقتم... والله عمرى ما رميت حاجه لان اصلا مفيش حاجه تترمى... قوم يا منيل ورينى مين ده..
يدخل سكوب وهو يضحك ويدفع اسو امامه..
خش يا فاضحنى .. كتكم الهم دا طلع اسو والواد ... استغفر الله العظيم
ينظر ابن مصر الى سى السيد وينفجروا فى الضحك..
اسو: ايه يا رمم منك ليه .... اصل عندنا غسيل ومفيش غير الطقم ده عندى .... والميه مقطوعه وبعدين...
ابن مصر: خلاص حلاص ... الحال من بعضه ولا يهمك يا شقيق ايه يا عم اخبارك
سى السيد: استنى يا بنى منك ليه ايه يا عم اسو موضوع الجرانين الى بتلمها دى؟؟؟
اسو ينظر لهم ولا يرد..
سكوب : ما ترد ردت الميه فى زورك ..
اسو ينظر اليهم بمنتهى القرف..
ابن مصر: ايه يا جماعه انتم كلكم على الراجل ... تعالى يا حبيبى اقعد عند عمو ..
اسو : خلصتوا ولا لسه يا انصاف الرجال يا مشاريع مثقفين اصابها افه الجهل والتكبر الغرور بدون امتلاك اى من مقومات.....( ينظر اليهم وقد فتح كل منهم فمه فى ذهول وهم ينظرون اليه )
سى السيد: اقطع دراعى الواد ده شم توكسافين وهو جاى..
ابن مصر وهو يقف فى هدوء وقد لمعت عيناه عندما نظر الى صينيه الشاى : لا سيبوه سيبوه انا هاخليه يتكلم..
اسو فى فزع : لا خلاص خلاص والله هاتكلم وقفز ويختبىء خلف سكوب فى رعب ..
سكوب وهو ينظر الى ابن مصر وقد امسك ببراد الشاى المغلى : خلا..خلا..ص يا ابن مصر ..... خد منه البراد يا سى السيد الله يرضى عليك.
سكوب وقد امسك باسو من قفاه : ايه يا سى زفت انت عاوز الحاله ترجع له احنا ما صدقنا ربنا كرمنا..
اسو : انا اسف .. خليكم معايا بقى وبهدوء كده.. صلوا على النبى ..
الجميع: الف صلاه عليك يا نبى .....( ينظر الجميع الى سكوب )
سكوب : ايه يا معفن منك له فى حاجه .....( يمسك ببراد الشاى الساخن )
سى السيد: لا ابدا ابدا بس سيب البراد من ايدك..المهم يا اسو ايه موضوع الجرانين..؟
اسو: ابدا انتم عارفين انى ولا مؤاخذه زيكو يعنى لا شغله ولا مشغله ومش لاقى اللضى فقلت الم الجرانين واديها لمحلات البقاله بالكيلو واخد تمنهم جبنه وزتون بدل الجوع الى احنا فيه ..
سى السيد: يا بن الايه يا ذكى والله فكره..
اسو : اصبر بس .. المهم كل بقال اديله جرانين الاقيه بيكلم نفسه و يقول ايه اخرتها مفيش ولا فرخه فى البلد...
ابن مصر : فرخه؟؟؟ يعنى ايه فرخه؟؟؟
سى السيد: اصبر وهاقولك بعدين....
اسو: المهم لقيت الموضوع ده فى كل حته فى الاماكن النضيفه والى مش كده كله معندهوش ولا فرخه واحده...
سكوب :الله يعنى ايه.. هايغلوها ولا ايه العباره .. الناس خلاص خلصت حتى على الفراخ؟؟
ابن مصر: فراخ.. أأأأأأأأأأأأأاه مش دى بتاعه صدر ولا ورك يا معلم .. يا سلااام .. كانت ايام....
اسو: مش ده المهم المهم انى من كام يوم وانا برمى ودنى كده فى موقف الاتوبيس..
ابن مصر : بترمى ايه ؟؟..... لا حول ولا قوة الا بالله .. ودى باظت امتى ؟
سى السيد: هى ايه ؟
سكوب وهو ينظر الى الارض فى اسى : ودن اسو يا سى السيد .. ودن اسو الى رماها فى الموقف عشان محدش يشوفوه .. وجالك قلب ..
سى السيد وهو ينظر الى ابن مصر وسكوب : ودن ايه الى رماها يا ولاد المجانين منك له ..
ابن مصر..: مش هو الى قال الله انا جبت حاجه من عندى ...
اسو وهو ينظر بمنتهى الذهول : ودنى ( يتحسسها ) ودنى ؟؟ الله يخرب بيوتكم .. برمى ودن يعنى باتصنت على الناس.
ابن مصر : أأأأأأأأأأأأأأأأأأأأه شوف يا أخى كلام المثقفين ..
سكوب : كمل يا مثئف.
اسو وهو ينظر لهم فى ريبه : انا سمعتهم بيقولوا ان فى القرى والنجوع الخيييييييييير يااااااااااااما والفراخ ماشيه فى الشارع كده من غير صاحب..
سى السيد : يعنى ايه ؟
اسو : يعنى تروح وتلم من الشارع وانت ساكت ولا حد هايقولك ايه وبتعمل ايه ... دول حتى بيرموا الفراخ الى بتكبر فى النيل وبيدوسوا عليها كمان ..
سكوب : بجد الكلام ده دا احنا كده ممكن نروح نلم فراخ للصبح وناكل ونتشبرق ....
اسو : ناكل ايه يا اغبيا.. اذا كان الحال هنا فى مصر كده امال لو جبنا الفراخ والبط والرومى من هناك للمحلات الى هنا هانكسب قد ايه .؟
ابن مصر : تجاره يعنى ؟.... طيب احنا لو حطينا تكلفه النقل على ....
اسو : تجاره ايه يا غبى منك ليه ..
سكوب يصفع اسو على راسه بسرعه مهوله ..
اسو : اسف اسف .. بس خبطه تانى من دى وعنيا ها تبظ تانى من مكانها ....
سكوب: اذا مكناش هانتاجر امال هانعمل ايه ؟؟؟
اسو : احنا هاتسرق مزرعه طيور ..
ينظر الجميع الى بعضهم بمنتهى الذهول ........وفى نفس واحد...
سرقه تانننى
اسو : اشمعنى انا و بدل ما نجيب فراخ بلدى وحمرا نجيب بيضه كبيره... دا الكيلو وصل 10 ج..
ابن مصر : بيضه ؟؟ 10 جنيه ؟؟
سكوب : فى ذهول .. حتى البيض غلوه ؟؟؟
اسو : بيضه ايه يانتم ايه من موزمبيق.. بقول الفراخ البيضه ..
سى السيد : خليك معايا انا يا عبقرى ..هاتسرق مزرعه ازاى ....
اسو : ابدا احنا ناخد عربيه نص نقل
ينظر الجميع الى ابن مصر
ابن مصر .: اييييييييييييييييييه لا انا لسه مكملتش تصليحها امتثال لأ
سى السيد : لازم تضحى امال هاننقل ازاى .. اقولك .. اجر العربيه وسيب امتثال رهن ..
ابن مصر ينظر الى الارض: امرى الى الله..وبعدين .
اسو : وناخد العربيه وعلى مزرعه الاخلاص الى في أول طريق القليوبيه .. نخش بالليل والفراخ نايمه نعبى من خيرات الله ونورد للبقالين الى هنا .. وشوفوا بقى ها نكسب كام ..
سى السيد : على بركه الله نتقابل بكره الساعه 1 الصبح عشان نلحق نروح ونيجى قبل الليل
الجميع على بركه الله ..

وفى الساعه الواحده ظهرا يتقابل الجميع ويركبوا سويا السياره نصف النقل وقد انحشروا فيها وعندما بدأو الدخول الى الطريق الزراعى وجدو الفراخ بالمئات تجرى فى الشارع ..
ابن مصر : سبحان الله شايفين الخير يا سلاااااااااااااااام ..
اسو : مش قولتلكوا خليكوا ورايا وانا هانغنغكوا ..
سى السيد : انا مش مطمن هيا كل الفراخ دى مالهاش صاحب .
سكوب : يا اخى واحنا مالنا ...ايه ده.. ايه ده؟؟
ينظر الجميع الى امرأه تحث التراب على رأسها وامراه اخرى بجانبها تذبح الطيور وتلقى بها فى الترعه ...
ابن مصر: هو فيه ايه ..
اسو : ولا حاجه تلاقيهم بيأكلوا السمك.... خش يمين من هنا ..
كانت الشمس تميل الى المغيب عندما وقفوا اما باب المزرعه المفتوح على مصرعيه ولا يوجد شخص واحد..
ابن مصر: الله امال فين الناس.
سكوب : واحنا مالنا يالله بسرعه على ما نجرى ورا الفراخ ونلمها بسرعه..
ينظر الجميع الى سى السيد الذى تسمر فى مكانه وهو ينظر الى الاف الطيور النائمه على الارض بلا حركه ..
سى السيد: انا مش مرتاح للمنظر ده .. هى الفراخ عامله كده ليه..
اسو: نايمه يا سى السيد ماهم بيناموا من المغرب .
ابن مصر فى دهشه : هى الفراخ برضه بتنام على ضهرها ؟؟؟
سكوب : يا سيدى النوم مالاوش كبير .. عبى معايا انت وهوا بسرعه ..
اسو : البليه هاتجرى ..
ابن مصر : بس دول ما بيتحركوش خالص..انت متأكد انهم تايمين يا اسو ؟.
اسو :/ ايوه ايوه نومهم تقيل بسرعه عبى معانا ( ويحدث نفسه هو انا كنت كلتهم قبل كده لما اعرف بيناموا ازاى )..
وبعد ان وضعوا مئات الفراخ فى الصناديق قفزوا الى السياره وتحركوت باتجاه القاهره..
سى السيد: انا متوغوش يا جماعه .. الموضوع كده مش مريح.
ابن مصر : انا اول مره اعرف ان الفراخ بتنام على ضهرها ...اول مره ..
سكوب ينظر امامه ويقول : يا جماعه فى لجنه ... كله يسكت ..
وفجأه تضىء كشافات قويه فى كل اتجاه ويصدر صوت عالى من مكبر صوت.
الضابط : مفيش حد يتحرك كله يثبت مكانه أى حد هايتحرك هايتضرب بالنار..
سكوب : يضرب بالنار؟؟؟ يضرب بالنار ؟؟؟ احنا ايه سرقنا مزرعه حد كبير والا ايه ؟؟؟ فى ايه ..
ينظر ابن مصر الى عدد من الاشخاص يرتدون ملابس عازله بيضاء تشبه رواد الفضاء وهم يقتربون من السياره ..
ابن مصر : ايه ده ... ايه ده؟؟؟ مين دول .. هو في ايه؟؟
سى السيد : يا نهار اسود دول عاملين زى بتوع الحرب الكيماويه الى شوفناهم فى الجيش....
سكوب :كيماويه؟؟؟؟ جيش ؟؟؟؟؟ يا نهار اسود .. يا نهار اسود
أسو وهو ينظر فى ذهول : الفراخ طلعت متبلغ عنها والا ايه ؟؟
فجأه يسمع الجميع أزيز طائره مروحيه تحلق فوقهم وتسلط انوارها على السياره وصوت أخر من مكبر صوت بالطائره ..السياره بها طيور أكرر السياره بها طيور تم تأكيد الاخباريه..
يحدث هرج ومرج ويبعد الجميع عنهم فى فزع فى كردون مساحته 200 متر حول السياره..
الضابط : على جميع من بالسياره النزول والانبطاح على الارض ..
ابن مصر وهو يحمل دجاجه ويقترب من اللجنه :فى ايه؟؟؟ ايه يا ناس ؟؟؟؟ والله دى فراخ..... فراخ.....وكتاب الله فراخ...... ونايمه كمان..
الضابط : كله يثبت مكانه كله يبتعد عن الفراخ النافقه ..
سكوب : نافقه ؟؟؟ نافقه يعنى ايه نافقه ( ينظر الى الشله هو يكاد يبكى ..
سى السيد وهو يلطم : نافقه.. يعنى ميته.... مييييتتتتتتتتته... ميته ياخويا ( يقفز على أسو ويكيل له الصفعات.) ميتتتته يا حبيييييييبى
سكوب : ميته ... ميته ليه.... هو فى اييييييييييه( يبكى )
ابن مصر وقد ركع على ركبتيه ويحث التراب على راسه: ميييييييييييييييته .. ماكنتش ناييييييييييييمه ( وهو يولول) ماكنتشششششش نايمه ... يا لهووووووى... انا قولت الفراخ ما بتنامش على ضهرها... ( وهو يلطم ) مكنتش نايمه ماكنتش نايمه ما كنتش نايمه..
سى السيد وهو يجرى وراء أسو بكوريك السياره : قولتلك متوغوششششششششش تقولى هانغنغكو..
الجميع ينظر من الطائره والشله تجرى وراء بعضها حول السياره ويتبادلوا قذف الدجاج على بعض ..
الضابط: بلغ مصر انهم باين عليهم مجانين وخليهم يبعتوا الخانكه..
وفى الصباح كانت عناوين الصحف..
ايداع 4 مختلين عقليا الخانكه حاولوا نقل انفلونزا الطيور الى القاهره..
تمت

إبن مصر
تاريخ المشاركة 21 December 2006 - 09:20 PM
سكووووووووووب.. يا سكوووووووب..
وانت عندك زهايمر كنت كتبتلك دى...
واهو الحمد لله عشت لحد ما شوفتك قولت افكرك بيها..
واحتفالا بعودتك...
وانتقاما من انتظامك معانا....
ازف اليك نبأ القصه الجديده...

سرقه وزاره الداخليه

تاريخ المشاركة 21 December 2006 - 10:22 PM
وزارة الداخلية ؟؟؟
وزارة داخلية اييييه ... لأ يا عم انا مش معاكم فيها ...
احنا كبيرنا مكتب بوستة ... عشة فراخ
لكن وزارة الداخلية كده علي طول .. انا جتتي ما تستحملش ....

بس اكتبها برضه

علي فكرة نسيت احييك و اشد علي رجلك و قريحة افكارك اللي انبتت فكرة المزرعة اللي فاتت .... عسل ...
انا قعدت اتخيلك و انت عمال تشيل التراب علي دماغك .. و بتقول ...
ما كانتش نايمة ... ما كانتش نايمة ....

تاريخ المشاركة 28 December 2006 - 12:37 AM
بما أن فيه واحد صاحبنا يومه بسنة ... و بيبتدي ينزل اعلانات المغامرة الجديدة قبل حتي ما تكون فيه مغامرة من اساسه ... و بكده نخسر السوق و الزباين ... بالذات و الموسم علي الأبواب .. و عادل امام و هنيدي و صبحي عايزين يلبسونا العمة ... فلحد ما يفوقلنا البيه بتاع الزهايمر ... نكمل مغامرة وقفت لأختفاء المنتج في ظروف غامضة .. و لكن بما أنه رجع ... فنلحق نخلصها قبل ما تاخده الفرة ...


ملخص ما سبق ....

هو احنا لسه حنلخص ... احنا حنعيد الحلقة الأولي كلها :

نزل التيترات يا ابني


مغامرة سينمائية



الشتا رجع ... و القمصان النص كم و الصنادل اختفت ... و طلع مكانها الجاكيتات و البلوفرات ... و صباح يوم جديد ... أمشير يرش أمام القهوة ... في الداخل مجموعة صغيرة تحتسي مشروباتها في سكون بينما تتصفح جرائدها ...
من بعيد يقترب سي السيد و سكوب .. و بأبتسامة علي وجهه يصيح :
- صباح الخير يا أمشيييييير ... والله و ليك وحشة ياد ...
أمشير مصعوقآ لرؤيتهم : يا نهار أسود
سكوب : هو ايه اللي يا نهار أسود يا أمشير .. دي برضه مقابلة تقابل بيها الزباين ....
أمشير : يا نهار أسود
سي السيد : مالك يالا ... لأخلي نهارك أسود فعلآ ...
أمشير : انتوا رجعتوا تاني ليه .. مش كنتم نقلتوا قعدتكم علي قهوة المحاورات
سكوب : ما هي برضه قعدتنا يا مشمش ... بس اليومين دول مشغولة بحفلة كبيرة .. و فيه عالم كتيرة قوي فقلنا اللي فات قديمه تاه .. و رجعنالك شوية يا حلو ... ايه رأيك في المفاجأة الحلوة دي ...
أمشير : يا نهار أسود
سي السيد : تاني حيقول يا نهار اسود ... اجري يا أمشير هات واحد شاي عين الكتكوت لسكوب .. و القهوة بتاعتي ...
أمشير بنظرة تحدي : ما كانش يتعز يا بهوات .. الدفع مقدمآ ..
سي السيد : ولاه يا أمشير ... ده احنا يااااد
أمشير : ما هو علشانه انه انتم ... الدفع مقدمآ ....
سكوب : ينفع ادفع بالبانكومات ...
أمشير : الله يرحمه يا خواجا ... الحساب 95 قرش ...
سي السيد : طب ينفع امضيلك شيك ب 10 جنيه و تجيب الباقي ...
أمشير : يا جدعان ارحموني ...
و هنا يدخل عصام ذا جريت ...
عصام : أنا كنت متأكد اني حلاقيكم هنا .. هو ايه اللي حصل ؟؟ زعلتوا مع حد هناك ... ثم ناظرآ الي أمشير .. واحد شاي بحليب والنبي يا ميشو ...
أمشير : يا نهار أسود
سكوب : ما حصلش حاجة يا جدع ربنا ما يجيب زعل .. كل اللي فيها ان الجو قافش شوية هناك .. فقلنا نيجي نا شوية لغاية ما العملية تهدا .. ( ثم هامسآ ) و بعدين فيه عملية بلفها في دماغي بقالي فترة كده .. و خلاص جاهزة للتنفيذ .. و الكلام فيها ما ينفعش الا هنا .. بس هو فين ابن مصر ؟؟
عصام : مش عارف والله يا سكوب ... آخر مرة شفته كان بيكلم نفسه و عمال يقول .. المزرعة .. هي المزرعة مافيش غيرها .. و يقوم يطلع قلة من شنطته و يلب بيها اول واحد يعدي جنبه ...و بعدين أختفي .. اتصل بيه في التليفون .. الجماعة يقولولي المزرعة ... اسأل عليه في الشغل .. برضه يقولولي المزرعة ...
سكوب : مزرعة !!! ... مزرعة ايه ؟ هو حيشتغل في الحفر و العزق ....
سي السيد : هي دي آخرة الشغل مع الأمريكان ...يعملولك البحر طحينة و بعدين ... ( ثم ناظرآ الي الشارع ) .. الحق .. أهو هناك اهه ماشي و لا علي باله .. تلاقيه رايح الحفلة .. ارميله صوت يا عصام ... احمممد ... يا احمممممد ...
ينظر اليهم ابن مصر .. و يبتسم .. و يتجه اليهم
ابن مصر : سلامو عليكو
سي السيد : و عليكو يا خويا ... ايه حكاية المزرعة اللي طلعتلنا في البخت دي ؟؟؟
أحمد : دي عملية كبيرة ... كبيييييرة ... اصبروا عليا و بعدين حتعرفوا ... لسه فيه شوية تفاصيل مزمزأة في دماغي .... ( ثم ناظرآ الي أمشير ) كوباية حبر يا أمشير .. إزاي ابوك بالحق ؟ السلام أمانة اول ما تشوفه والنبي .... والله لينوكس وحشني بجد ... و كل ما اشوف رقبتك اللي كابسة في دقنك افتكره ... هييييييي دنيا ...

ينظر اليهم أمشير فاغرآ فاه ... ثم يبتعد في يأس مدمدمآ : حسبي الله و نعم الوكيل ....

عصام : و عملية المزرعة دي حتكون جاهزة أمتي ...
ابن مصر : مش عايز صربعة .. انتوا عارفين افكاري متكلفة و عايزة وقتها ....
سي السيد : موت يا حمار ... كلها ميت سنة وتخلص .. و الا نسيت عملية سرقة الكهربا ...
سكوب : فكر براحتك يا عم .. بس لغاية ما تجهز .. انا عندي واحدة اولريدي جاهزة عالتنفيذ ... بس ناقصنا حشيش ...
سي السيد : ايه ده يالاه ... يبقي أنت فعلآ بقيت زي ما كليو بتقول عليك .. مدمن ... إخص.. يا جدع حرام عليك ... ما فكرتش في بيتك و في عيالك ...
سكوب: .. ايييييه يا حسين يا صدقي ... انت مخك راح فين ... حشيش .. حشيش يا جدع صاحبنا .... كيرميت ... فهمت ؟
سي السيد : آآآآآه حشيش ... لأ تعيش أنت ..
سكوب : يا نهار اسود ... مات ؟
عصام : فال الله و الا فالك يا شيخ .. مات ايه .. الجدع اتجوز و أتستت و قاعد في بيتهم بيألف في كصص سياسية تودي ورا الشمس ..
سكوب : سياسة ... سياسة اييييه ؟؟ .. مالناش دعوة يا عم .. ربنا جعل كلامنا خفيف عليهم ... بلاها حشيش .. ده حتي عمره ما كتب حرف في الموضوع ده ...
ابن مصر : مش فاهم .. يعني ايه عمره ما كتب حرف في الموضوع ده ...
عصام : يعني عمره ما شغل دماغه في خطة ... افهم بقي ...
سي السيد : يعني العملية ما تنفعش من غيره ؟
سكوب : لأ ... ناقص واحد ...
عصام : و مين اللي ممكن انه يكون واحد متأكدين منه ؟
سكوب ناظرآ لهم : ايه رأيكم في زهيري ؟
لحظة سكوت ...
سي السيد : تصدق بالله عندك حق يا سكوب ... حتخليني ابتدي اغير فكري فيك ... قعدة قهوة المحاورات نضفت مخك شوية .. و الجدع اللي اسمه زهيري فعلآ شكله واحد زينا ..
ابن مصر : فعلآ .. شكله امه داعية عليه في ليلة مفترجة ...
عصام : بس لازم يتعمله أختبار في الأول .. مش ناخده كده عمياني ...
ابن مصر : صح ... اروح اجيبه الأول من عالمرسح مطرح ما عمال يغني من صباحية ربنا في القهوة هناك ....

سكوب : و بالمرة هات معاك كام بيضة علي كام طماطماية من اللي بيترموا عليه يا احمد .. خلينا نعمل طبق عجة الواحد علي لحم بطنه من الصبح ....

تاريخ المشاركة 28 December 2006 - 01:27 AM
قارب اليوم علي الأنتهاء و مازال لا يوجد أي أثر لأبن مصر و لا لزهيري ...

سي السيد : أديله ميسدكول يا عصام .. الواحد رجليه نملت .. و عايز أروح الحمام
ماكاد عصام يتناول موبايله للأتصال .. حتي رأينا أبن مصر و شخص بلا ملامح علي باب القهوة...
سكوب : مين ده اللي مع أبن مصر ؟

و أخذ الجميع يتمعنون في هذا الوجه المختفي تحت أربطة من الشاش تكفي لتحنيط مومياء فرعونية ... و الألوان المختلفة بلا تجانس ما بين الأحمر و الأسود و الأزرق .. و بعض اورام متناثرة تظهر في بعض الأجزاء التي لم تصل اليها الأربطة ...

زهيري منفعلآ : إيييييييييه ... عمركم ما شفتم واحد متعور ؟
سي السيد : بس دي مش تعاوير عادية يا مايسترو .... ده واحد عدي علي وشه قطيع خراتيت ...
زهيري : آه ... آه ... هما فعلآ كانوا خراتيت .. عالم ما تقدرش الفن الأصيل ....
عصام : أنت كنت في فرح مين ؟
زهيري: لأ ده كان طهور ...
سكوب : و كنت بتغنيلهم ايه ؟
نظرة نارية من الشلة لسكوب و لكن سبق السيف العزل ... و من حيث لا يدروا ظهر عود في يد زهيري و أنطلق صائحآ بأعلي صوته :

يا معلي راية الحرية .. تارلللام
يا مقوي الوحدة الوطنية .... تراباتاتي
غالي علينا ... تارالالالي .... و جوه عينينا ... تارارالالو
يحميك ربي لمصر و لينا ... تاراباتاتا ..
عشت يا غالي .... تاراباتاتو
جبينك عالي ... تاراباتاتي ...
بأرادة حرة مصرية ..... بأرادة حرة مصرية ....

لم تفلح أي محاولة لأسكاته ... بينما انطلق ابن مصر جهة ست ابوها يبحث عن اي قلة فضلت في الشنطة او تحت الكراسي ... و لكن فجأة انقطع الغناء عندما ارتفع نشيج أمشير باكيآ علي خراب بيته بعد أن طارت نصف كراسي القهوة في اتجاه زهيري ... فتوقف متساءلآ :
- هو حصل حاجة ؟ ... الأزاز ده كله جه منين ؟
عصام : ابوس ايدك يا زهيري ما تغنيهاش تاني .. و الا أقولك ... نصيحة من القلب .. من اخ ليك ... سيبك من كار الغنا ده خالص .. مش بتاعك يا خويا ..
زهيري : أومال أصرف عالجماعة منين ؟
سكوب : بس ... أهو ده المفيد ... احنا محتاجين واحد ممثل في عملية كده .. و الدور كان مقسوم لحشيش .. بس ربنا رحمه ,, ففكرنا فيك أنت ... ايه رأيك ؟
زهيري : ايه ده ... حشتغل في السيما ؟ .... بجد يا سكوب ..
سي السيد : يعني ... هي مش سيما قوي ...
زهيري : اومال مسرح ؟
سكوب : و لا مسرح و لا تليفزيون و لا صندوق الدنيا يا زهيري .... حنروح نعمل فيلم في مكتب بريد محدوف شوية ... و حنطلع من العملية دي بسبوبة حلوة ...
زهيري : مش فاهم .. بقولكم ايه .. اتكلموا معايا علي بلاطة .. انا ما بحبش اللوع و اللف و الدوران ...

تنظر الشلة الي بعضها .. ثم يقترب أبن مصر من زهيري ناظرآ في نني عينيه و يقول بصوت عميق و منخفض :
- شوف يا زهيري ... فيه عملية سطو خططلها سكوب .. بس ناقصنا واحد .. و أحنا أخترناك عشان جبينك العالي ... عشت يا غالي ... فهمت ؟؟
زهيري : ايه ده ؟؟؟؟؟؟ حرامية ... طلعتوا حرامية ... اومال مشرفين زرق و عفاريت خضر ..و....
سي السيد يقفز عليه كاتمآ فمه بيده : شششششششششش ... الله يخرب بيتك ... انت حتسيحلنا ... شفت شورتك يا سي زفت ( ناظرآ جهة سكوب )
ابن مصر : من غير لت و لا عجن ... عايز تنضملنا و الا لأ ؟
زهيري : هو ده سؤال ؟ ... ده يبقي يوم المني ... هو أنا حلاقي أحسن منكم اناسبهم ...
عصام : تناسب مين ؟ .. هما شربوك حاجة في الفرح يا زهيري .... انت فاهم احنا بنتكلم عن ايه يا بابا ؟
ابن مصر : يا جماعة حبة حبة عليه .. انا جايبه من الأسعاف علي هنا طوالي ....ما تاخدوش علي كلامه ....
سي السيد : و بعدين بقي في اليوم اللي مش فايت ده ... يعني معانا و الا لأ ... اخلص بقي عايز اروح الحمام .....
زهيري : طبعآ معاكم ... بس أنا دوري ايه بالظبط ؟
سي السيد : مش لما نبقي نعرف دورنا احنا ايه الأول ... الخطة ايه يا اينشتاين ؟؟؟
سكوب : شوفوا ....

MZohairy
تاريخ المشاركة 28 December 2006 - 08:00 AM
:angry2: :angry2: :angry2: :blush:
روح ياشيخ
إلهي يقبض عليك البوليس الإيطالي

Modest
تاريخ المشاركة 28 December 2006 - 08:30 AM
إلهي ما يبوظ لكم خطة يا شيخ خدوني معاكم :angry2: .. أنا وقعت و عايزكم تستلقفوني صورة

مزنوق في قرشين أربي بيهم العيال و مستعد لكافة شيء ... أشيل لكم الشنط ، أقف ناضورجي ، اشتغل بدل سي السيد لغاية ما يرجع من الحمام ، استناكم في العربية لغاية ما تخلصوا، أبلّغ عنكم .. و كده يعني :angry2:

MZohairy
تاريخ المشاركة 28 December 2006 - 08:45 AM
Modest, on Dec 28 2006, 08:30 AM, said:
إلهي ما يبوظ لكم خطة يا شيخ خدوني معاكم :sad: .. أنا وقعت و عايزكم تستلقفوني صورة

مزنوق في قرشين أربي بيهم العيال و مستعد لكافة شيء ... أشيل لكم الشنط ، أقف ناضورجي ، اشتغل بدل سي السيد لغاية ما يرجع من الحمام ، استناكم في العربية لغاية ما تخلصوا، أبلّغ عنكم .. و كده يعني :unsure:


والله أنا شايف ان طالما هدفك نبيل و شريف وحليم.....
يبقى معتقدش عصابه محترمه زي دي تمانع ابدا -_-
و الغابه تبرر الفصيله -_-

مجهودك هو اللي حيرشحك
الناس دي مبتهزرش و لا تعرف وسايط ولا يحزنون
اجتهد وانا حكلمهم -_-

se_ Elsyed
تاريخ المشاركة 28 December 2006 - 10:59 AM
قشطه يا مان

دي الاحداث سخنت قوي والماتش حلو خصوصاً بعد استعارة خدمات السنتر فروود مزاهيري ووجود الرفيق موديست على دكة الاحتياط


سكوب

يا سكوب

اوعى تكون فلست وهاتعيد عملية سرقة البوسطة بس برؤية 2006 ؟

عصام
تاريخ المشاركة 28 December 2006 - 12:09 PM
Scorpion, on Dec 27 2006, 11:37 PM, said:
سكوب : و بالمرة هات معاك كام بيضة علي كام طماطماية من اللي بيترموا عليه يا احمد .. خلينا نعمل طبق عجة الواحد علي لحم بطنه من الصبح ....




سكوب رجع يا رجالة

إبن مصر
تاريخ المشاركة 28 December 2006 - 04:12 PM
الله يخرب شيطانك يا بعيد..
فرجت عليا الناس..
ايه يابا الى انت عامله ده,,,, بس ايه حاجه عسسسسسسل خالص..
فتحت نفسى..
ماشى ماشى ..
الحلقه فى الطريق..

Scorpion (عنوان الآي بي: خاص )
Super Member

مشرف عام
PipPipPipPipPipPip
6712 مشاركة
0 نقطة إنذار
1027
Excellent
النوع:ذكر
المكان:أيطاليا شبرا رايح جاي
تاريخ المشاركة 29 December 2006 - 12:20 AM
حبايبي الحلوين ... هناء وشيرين .. قصدي زهيري و موديست و عصام .. احمد وسي السيد ... شرفتوا القهوة ...
خلصوا كيس الفشار ده لما نكمل بقية المغامرة ...
:blink:

سكوب : احنا نعمل نفسنا بنصور فيلم ... و الفيلم ده بقي قصته ايه ...بتدور حوالين عملية سطو علي مكتب بوستة ... حنسرقه و العالم فاكرة انه تمثيل في تمثيل .. و ساعة الجد نفلسع ...
ابن مصر : اوعي يكون مكتب البوستة بتاع كفر طهمس
سكوب : طبعآ لأ .. هو احنا نقدر نهوب جنبه تاني ... المكتب اللي في دماغي موجود في آخر شارع الهرم ناحية فيصل و انت داخل عالميرغني ..
عصام : الميرغني !!! ميرغني ايه يا سكوب
سكوب : الميرغني يا عصام .. آخر مترو عبعزيز فهمي جنب الكلية الحربية ...
عصام : آآآآه ... طب كمل يا خويا ...
سكوب : حلاوة مكتب البوستة ده ايه .. ان قدامه مساحة كبيرة نقدر نركن فيها من غير مشاكل .. و نعمل منها مكان تصوير مناسب ... و الأهم بقي انه جنب اول الطريق الصحراوي ... علشان لما نِكُت ما نتزنقش في الزحمة ...
سي السيد ينظر متعجبآ الي سكوب : ايه ده يا ابني ... دي ايه الحلاوة دي ... والله انا مش مصدق نفسي ان الكلام ده يطلع منك انت ... بس اوعي يا سكوب تطلع زي عملية البوستة اللي فاتت اللي عبقري زمانه ابن مصر باشا خلانا نعملها يوم 9 منه قبل ما المعاشات توصل ...
سكوب : طبعآ لأ يا ابو السيد .. مافيش حد بيتعلم ببلاش .. و انا من ساعتها و انا بلفها في دماغي .. و دلوقتي استوت و مش فاضل غير اننا
سي السيد مقاطعآ : طيب طيب .. اخلص يا شيف ... خش بقي عالمفيد و اشرح حنعمل ايه ... انا خلاااااص علي أخري ..
سكوب : طب اشربلك بق ميه الأول .. شكلك ريقك ناشف
سي السيد : برضه حيقوللي بق ميه .. ماحدش يجيب سيرة الميه دلوقتي ... انا مش ناقص ... اخلص بقي .. افففف
سكوب :هو أحنا بنسلق بيض يا سي السيد ... بالرواقة .. آه بالمناسبة ... هي فين ؟
و أخذ يتلفت حوله باحثآ .. مما جعل افراد العصابة يتلفتون هم ايضآ دون ان يدروا عما يبحث ...
زهيري : أنت بتدور علي ايه يا سكوب ؟
سكوب : لأ خلاص لقيتها ... و ظهرت في يده لفافة ورقية أخرج منها سندوتش عجة بالسبانخ .. قضم منه قضمة و استمر في الشرح :
- شوفوا الأدوار حتبقي بالشكل ده : عصام حيعمل مخرج الفيلم ... سي السيد و زهيري بشكلهم النضيف ده حيعملوا الممثلين .. بس عايزكم تحطوا كمية فازلين علي شعركم و تلبسوا نضارات سودا ... و أنا و ابن مصر واحد حيعمل المصوراتي و التاني خبير الأضاءة و الكهربا .. كهربائي يعني ..
زهيري : ممكن استفسار ... طب فيه حد حيعمل فني صوت ... ندابة يعني ...
ابن مصر : هو ايه اللي فني صوت .. هو احنا جنعمل فيلم بجد ... العملية مش عايزينها تبهوق يا زهر ..
زهيري متلفتآ حوله : مين زهر ده ؟
ابن مصر : ده اسمك الحركي من هنا ورايح .. و اتهد بقي خلينا نفهم ...
سكوب : استني بس يا ابن مصر ... احنا عصابة ديموقراطية .. و كل الأفكار ممكن تساعدنا في الخطة .. ايه حكاية الندابة ده يا زهر ؟
زهيري : اصله يعني .. انا ليا واحد حبيبي .. انما ايه لهلوبة .. اسمه موديست .. خبير كومبيوتر و حاجات كده .. و اشتغل فترة خبير اصوات في البرلمان
الجميع في صوت واحد : البرلمان !!
زهيري : انا قلت برلمان .. لأ .. انا قصدي اشتغل خبير و فني صوت في استوديوهات والت ديزني ... بس مرة قفشوه و هو بياكل حتة من تورتة التفاح بتاعت الجدة بطة اكمنه طفس .. قاموا رفدوه .. و من ساعتها الدنيا عمالة تقلب فيه يمين و شمال .. لدرجة انه بيشتغل دلوقتي في فريق اناشيد مدرسية ..بس العملية ضنك معاه قوي ..
سي السيد : اللهم يطولك يا روح ... هو انا قاعد عالقهوة و لا في وزارة الشئون الأجتماعية ... أبوس ايديكم اخلصوا بقي ...
سكوب : طيب طيب ... شوف يا زهر ... حاليآ مافيش في الخطة دي دور لصاحبك ده ... لكن طبعآ ممكن ينفعنا في عملية تانية .. او حتي دلوقتي لو حصل و اتمسكت ممكن يشيل مكانك ... معاك رقم موبايله ؟
زهيري : أتمسكت !!؟؟ موبايله ؟ موبايل مين .. انا لا أعرفه و لا شفته ... دي حكاية كده قريتها في بريد الأهرام ... بصوا .. اعتبروني ما قلتش حاجة ..
سكوب : طيب طيب ... خلوني اشرح ايه اللي حنعمله خلينا نسيب سي السيد يروح يخلص نفسه ... شوفوا . احنا .. كذا و كذا و كذا ...

و أستمر في الشرح بينما أفراد العصابة يتابعون كل حرف بأهتمام و أنتباه شديد ...


التحضير


يومان قبل ساعة الصفر أصطحب سي السيد موديست بعد ان اقنعهم زهيري بأعطاؤه دور ثانوي في العملية لأنه يجيد الأنجليزية المطلوبة في جزء من الخطة .. و ذهبا الي مكتب البريد مقدمين أنفسهما لمدير المكتب بصفتهما مندوبي شركة انتاج سينمائية عالمية .. و شرحا له فكرة الفيلم ( موديست بالأنجليزية و سي السيد يترجم ) ... و مدي الشهرة التي سيحصل عليها عندما يظهر اسمه في فيلم عالمي .. مع وعده بأعطاءه دور المدير في الفيلم...
بالطبع الموافقة علي أستخدام مكتب البريد تمت في التو و اللحظة .. مع كل الحفاوة و الأنحناء الذي قام به المدير عندما اصطحبهما مودعآ ...

الجزء الثاني من الخطة كان في تجميع الأدوات التي ستعطينا مصداقية فريق تصوير سينمائي ... و تم تجميعها بطريقة أو بأخري ...
فكرسي المخرج ... أحضره عصام و هو في الأصل كرسي بلاج من الستينيات قام بتصليح ثلاث أرجل منه ...
الميكروفون اليدوي : نجح في الحصول عليه سي السيد بعد أن تسلل الي أحدي مظاهرات كفاية .. و نجح في اكتاسب اعجاب المتظاهرين بهتافاته الحماسية الرنانة فأعطوه الميكروفون .. و لكن ناله في نفس الوقت بعضآ من هراوات الأمن المركزي ... ( ماحدش بياكلها بالساهل )
زهيري قام بأستلاف كاميرا تصوير شبه تخصصية (خارجيآ لأنها كانت لا تعمل لتلفها منذ سنوات) من صديقه الذي يعمل في ستوديو تصوير افراح ..
كشافات الأضاءة ... قام عصام بنزعهم من سيارة حماه المركونة منذ اكثر من سنة .. و تم تثبيتهم فوق ايدي مقشات بلاستيكية و التي تم تثبيتها بدورها في القوالب الأسمنتية التي يستخدمها في ممارسة رياضته المفضلة .. صيد السمك ...
بينما قضينا يومآ كاملآ أنا و أبن مصر ندهن ست ابوها دوكو أزرق في أبيض ... ثم رسمنا علي جوانبها رمز الشركة السينمائية الوهمية ... رأس معزة تمأمأ خارجة رأسها من دائرة ... و تحتها كتبنا ...THE SAAS Golden Films .... و عندما أتي اليوم المحدد وضعنا جميع تلك الأدوات في العربية ... و اتجهنا جميعآ الي تقاطع شارع الهرم مع عبعزيز فهمي حيث يوجد مكتب البريد ...

يتبع

تاريخ المشاركة 29 December 2006 - 12:20 AM

حبايبي الحلوين ... هناء وشيرين .. قصدي زهيري و موديست و عصام .. احمد وسي السيد ... شرفتوا القهوة ...
خلصوا كيس الفشار ده لما نكمل بقية المغامرة ...
:blink:

سكوب : احنا نعمل نفسنا بنصور فيلم ... و الفيلم ده بقي قصته ايه ...بتدور حوالين عملية سطو علي مكتب بوستة ... حنسرقه و العالم فاكرة انه تمثيل في تمثيل .. و ساعة الجد نفلسع ...
ابن مصر : اوعي يكون مكتب البوستة بتاع كفر طهمس
سكوب : طبعآ لأ .. هو احنا نقدر نهوب جنبه تاني ... المكتب اللي في دماغي موجود في آخر شارع الهرم ناحية فيصل و انت داخل عالميرغني ..
عصام : الميرغني !!! ميرغني ايه يا سكوب
سكوب : الميرغني يا عصام .. آخر مترو عبعزيز فهمي جنب الكلية الحربية ...
عصام : آآآآه ... طب كمل يا خويا ...
سكوب : حلاوة مكتب البوستة ده ايه .. ان قدامه مساحة كبيرة نقدر نركن فيها من غير مشاكل .. و نعمل منها مكان تصوير مناسب ... و الأهم بقي انه جنب اول الطريق الصحراوي ... علشان لما نِكُت ما نتزنقش في الزحمة ...
سي السيد ينظر متعجبآ الي سكوب : ايه ده يا ابني ... دي ايه الحلاوة دي ... والله انا مش مصدق نفسي ان الكلام ده يطلع منك انت ... بس اوعي يا سكوب تطلع زي عملية البوستة اللي فاتت اللي عبقري زمانه ابن مصر باشا خلانا نعملها يوم 9 منه قبل ما المعاشات توصل ...
سكوب : طبعآ لأ يا ابو السيد .. مافيش حد بيتعلم ببلاش .. و انا من ساعتها و انا بلفها في دماغي .. و دلوقتي استوت و مش فاضل غير اننا
سي السيد مقاطعآ : طيب طيب .. اخلص يا شيف ... خش بقي عالمفيد و اشرح حنعمل ايه ... انا خلاااااص علي أخري ..
سكوب : طب اشربلك بق ميه الأول .. شكلك ريقك ناشف
سي السيد : برضه حيقوللي بق ميه .. ماحدش يجيب سيرة الميه دلوقتي ... انا مش ناقص ... اخلص بقي .. افففف
سكوب :هو أحنا بنسلق بيض يا سي السيد ... بالرواقة .. آه بالمناسبة ... هي فين ؟
و أخذ يتلفت حوله باحثآ .. مما جعل افراد العصابة يتلفتون هم ايضآ دون ان يدروا عما يبحث ...
زهيري : أنت بتدور علي ايه يا سكوب ؟
سكوب : لأ خلاص لقيتها ... و ظهرت في يده لفافة ورقية أخرج منها سندوتش عجة بالسبانخ .. قضم منه قضمة و استمر في الشرح :
- شوفوا الأدوار حتبقي بالشكل ده : عصام حيعمل مخرج الفيلم ... سي السيد و زهيري بشكلهم النضيف ده حيعملوا الممثلين .. بس عايزكم تحطوا كمية فازلين علي شعركم و تلبسوا نضارات سودا ... و أنا و ابن مصر واحد حيعمل المصوراتي و التاني خبير الأضاءة و الكهربا .. كهربائي يعني ..
زهيري : ممكن استفسار ... طب فيه حد حيعمل فني صوت ... ندابة يعني ...
ابن مصر : هو ايه اللي فني صوت .. هو احنا جنعمل فيلم بجد ... العملية مش عايزينها تبهوق يا زهر ..
زهيري متلفتآ حوله : مين زهر ده ؟
ابن مصر : ده اسمك الحركي من هنا ورايح .. و اتهد بقي خلينا نفهم ...
سكوب : استني بس يا ابن مصر ... احنا عصابة ديموقراطية .. و كل الأفكار ممكن تساعدنا في الخطة .. ايه حكاية الندابة ده يا زهر ؟
زهيري : اصله يعني .. انا ليا واحد حبيبي .. انما ايه لهلوبة .. اسمه موديست .. خبير كومبيوتر و حاجات كده .. و اشتغل فترة خبير اصوات في البرلمان
الجميع في صوت واحد : البرلمان !!
زهيري : انا قلت برلمان .. لأ .. انا قصدي اشتغل خبير و فني صوت في استوديوهات والت ديزني ... بس مرة قفشوه و هو بياكل حتة من تورتة التفاح بتاعت الجدة بطة اكمنه طفس .. قاموا رفدوه .. و من ساعتها الدنيا عمالة تقلب فيه يمين و شمال .. لدرجة انه بيشتغل دلوقتي في فريق اناشيد مدرسية ..بس العملية ضنك معاه قوي ..
سي السيد : اللهم يطولك يا روح ... هو انا قاعد عالقهوة و لا في وزارة الشئون الأجتماعية ... أبوس ايديكم اخلصوا بقي ...
سكوب : طيب طيب ... شوف يا زهر ... حاليآ مافيش في الخطة دي دور لصاحبك ده ... لكن طبعآ ممكن ينفعنا في عملية تانية .. او حتي دلوقتي لو حصل و اتمسكت ممكن يشيل مكانك ... معاك رقم موبايله ؟
زهيري : أتمسكت !!؟؟ موبايله ؟ موبايل مين .. انا لا أعرفه و لا شفته ... دي حكاية كده قريتها في بريد الأهرام ... بصوا .. اعتبروني ما قلتش حاجة ..
سكوب : طيب طيب ... خلوني اشرح ايه اللي حنعمله خلينا نسيب سي السيد يروح يخلص نفسه ... شوفوا . احنا .. كذا و كذا و كذا ...

و أستمر في الشرح بينما أفراد العصابة يتابعون كل حرف بأهتمام و أنتباه شديد ...


التحضير


يومان قبل ساعة الصفر أصطحب سي السيد موديست بعد ان اقنعهم زهيري بأعطاؤه دور ثانوي في العملية لأنه يجيد الأنجليزية المطلوبة في جزء من الخطة .. و ذهبا الي مكتب البريد مقدمين أنفسهما لمدير المكتب بصفتهما مندوبي شركة انتاج سينمائية عالمية .. و شرحا له فكرة الفيلم ( موديست بالأنجليزية و سي السيد يترجم ) ... و مدي الشهرة التي سيحصل عليها عندما يظهر اسمه في فيلم عالمي .. مع وعده بأعطاءه دور المدير في الفيلم...
بالطبع الموافقة علي أستخدام مكتب البريد تمت في التو و اللحظة .. مع كل الحفاوة و الأنحناء الذي قام به المدير عندما اصطحبهما مودعآ ...

الجزء الثاني من الخطة كان في تجميع الأدوات التي ستعطينا مصداقية فريق تصوير سينمائي ... و تم تجميعها بطريقة أو بأخري ...
فكرسي المخرج ... أحضره عصام و هو في الأصل كرسي بلاج من الستينيات قام بتصليح ثلاث أرجل منه ...
الميكروفون اليدوي : نجح في الحصول عليه سي السيد بعد أن تسلل الي أحدي مظاهرات كفاية .. و نجح في اكتاسب اعجاب المتظاهرين بهتافاته الحماسية الرنانة فأعطوه الميكروفون .. و لكن ناله في نفس الوقت بعضآ من هراوات الأمن المركزي ... ( ماحدش بياكلها بالساهل )
زهيري قام بأستلاف كاميرا تصوير شبه تخصصية (خارجيآ لأنها كانت لا تعمل لتلفها منذ سنوات) من صديقه الذي يعمل في ستوديو تصوير افراح ..
كشافات الأضاءة ... قام عصام بنزعهم من سيارة حماه المركونة منذ اكثر من سنة .. و تم تثبيتهم فوق ايدي مقشات بلاستيكية و التي تم تثبيتها بدورها في القوالب الأسمنتية التي يستخدمها في ممارسة رياضته المفضلة .. صيد السمك ...
بينما قضينا يومآ كاملآ أنا و أبن مصر ندهن ست ابوها دوكو أزرق في أبيض ... ثم رسمنا علي جوانبها رمز الشركة السينمائية الوهمية ... رأس معزة تمأمأ خارجة رأسها من دائرة ... و تحتها كتبنا ...THE SAAS Golden Films .... و عندما أتي اليوم المحدد وضعنا جميع تلك الأدوات في العربية ... و اتجهنا جميعآ الي تقاطع شارع الهرم مع عبعزيز فهمي حيث يوجد مكتب البريد ...

يتبع

Folana
تاريخ المشاركة 29 December 2006 - 11:23 PM
السلام عليكم ورحمة الله ...

اوستاز سكوب..يا اوستاز سكوب...انا قريت اعلان عن طلب ندابة...نونكن اقدم اوراقى..وتقبلونى..وحياة احمد ابنك يارب تحج ..هه نونكن؟ :wub:

Modest
تاريخ المشاركة 30 December 2006 - 01:16 AM
folana, on Dec 29 2006, 11:23 PM, said:
السلام عليكم ورحمة الله ...

اوستاز سكوب..يا اوستاز سكوب...انا قريت اعلان عن طلب ندابة...نونكن اقدم اوراقى..وتقبلونى..وحياة احمد ابنك يارب تحج ..هه نونكن؟ :wub:
أيوة يا اوستاز .. إضافة عنصر نسائي هايكون مهم في المرحلة القادمة لإني قرأت في كتاب هندي اسمه "استعن بفولانة و قضيتك خسرانة" إن البنت زي الولد ماهيش كمالة عدد .. و أهي تشيل القضية كلها لما نتقِفِش صورة


و بعدين أنا الدور بتاعي مش عاجبني .. أنا عايز الدور الأول و يكون فيه بلكونة بتبص على مدرسة البنات

واحد تاني
تاريخ المشاركة 30 December 2006 - 01:50 AM
Modest, on Dec 30 2006, 01:16 AM, said:
أنا عايز الدور الأول و يكون فيه بلكونة بتبص على مدرسة البنات صورة

وانا ممكن اوافق على استوديو ... بس يكون دور عالي ... حاجة شايفة البحر يعني
اكيد هتحتاجوا حد تخبوا الفلوس في حسابه اللى في بنوك سويسرا في انجلترا :wub:
أعجبني هذا
يا عابر الدهر سيب بينا أثر قدمك

مصرية يعني مصرية
تاريخ المشاركة 30 December 2006 - 05:20 AM
و أنا .....و أنا..........

أي دور أنا فعرضكم....

إنتم عارفين الولاد و الصاريف...و خروف العيد...

الباشا سكوب

شوف لي أي شغلانة

ناكل منها لحمة

ربنا يخليك

الشغالة أي حاجة :rolleyes:

تاريخ المشاركة 30 December 2006 - 07:36 PM
ما شاء الله .... ما شاءالله علي الأستعداد الأجرامي الداخلي اللي اتفتح مرة واحدة ...
انا كان عندي شعور من زمان والله .. بالذات مع مصرية يعني مصرية و القطة اللي عمالة تخربش بيها يمين و شمال دي ... و طبعآ واحد تاني مش محتاج توصية .. كل حاجة يعملها يقول مش انا ده واحد تاني ... لكن تطلع من الست فولانة هانم الخربوطللي .. سليلة اوغلو باشا بل الندي طرطوره مرة واحدة .. اهي دي الصدمة الفزيعة .. الفزيعة خالس ...
ايه يا أخواننا انتوا فاكرينها وزارة القوي العاملة ... دي حتة عصابة ما نجحلهاش ولا خطة لغاية دلوقتي ....
شفت يا عم زهيري ... اهم كل حبابيبك شبطوا علي مكان واحد فاضي ...

عالعموم فيه شوية ادوار كومبارس فاضية في الفيلم .. كل واحد يروح يدهن وشه و يلبس اللي عالحبل ... و افضلوا خشوا و اخرجوا من مكتب البوستة و كل واحد في ايده دفتر التوفير بتاعه .. و يا ريت تعاملاتكم تكون ايداع بس .... :rolleyes:
و كله حيطلع في الفيلم ان شاء الله ...

يا الله ... عالبركة ...

تاريخ المشاركة 30 December 2006 - 08:50 PM
كانت حوالي التاسعة صباحآ عندما أقتربنا من مكتب البوستة ...
سي السيد : الساعة كام في ايدك يا عصام
عصام : تسعة الا خمسة
سي السيد : و أنت يا أبن مصر
ابن مصر : تمانية و ربع
سي السيد : و انت يا سكوب
سكوب : هو انت حتسألنا كلنا ... الله ... ماهم قالولك .. الساعة ستة و نص يا خويا .. و اشترولكم بقي ساعة ...
سي السيد كاظمآ غضبه : ساعتك كام يا زهيري
زهيري : معلش يا سي السيد .. الساعة دي مش بتاعتي ..فأعفيني من السؤال ده من فضلك ..
سي السيد ناظرآ لموديست و الذي رد عليه مباشرة : مالكش دعوة ... انا من هنا و رايح مش حرد الا قدام المحامي بتاعي ...
سي السيد : قشطة ... بدايتها مسك ... عمركم شفتم عصابة مش مظبطين ساعتهم ...
سكوب : سيبك من الساعة دلوقتي يا سي السيد و خليها علي الله ... نبتدي ننفذ العملية بقي ... علي فكرة جبت العربية و الا لأ يا عصام ؟
عصام : جبتها يا خويا جبتها ... عربية شيفورليه اكسلانس سابع يد لسه بدريكسيونها الأصلي ..
ابن مصر : شيفورليه ؟؟؟ انت معاك فلوس ياض ؟
عصام : ما انا رهنت الأربع قراريط اللي في البلد .. و اول ما نخلص العملية .. حفك رهنيتهم طوالي..

و ابتدا يحيي مدير المكتب الذي كان في انتظارهم مرتديآ بدلة فوشيا مخططة ببنفسجي بالطول .. بينما المنديل الأخضر يتدلي من جيب الجاكيتة العلوي ... و الكرافتة البني المخططة بأحمر تكاد تخفي القميص الأزرق ...
و بينما كانت بقية العصابة تقوم بتسوير المنطقة حول البوستة بالشريط الملون الذي يظهر في الأفلام الأمريكية حول مكان الجريمة .. نصبنا انا و ابن مصر الكاميرا و الكشافات ( اضاف ابن مصر لمسته الفنية الواقعية بترتيب شمسية بيضاء .. و الجوانب المعدنية التي فصلها من صفيحة الزبالة امام بيتهم " علشان انعكاس الأضواء " قالها بكل ثقة و تمكن ) .. وضعنا تلك الأشياء حول كرسي البلاج الذي جلس عليه عصام مرتديآ قبعة قش.. و ما أن جلس عليه حتي تقمص دور المخرج بالفعل .. فأبتدأ بالصياح يمينآ و يسارآ معطيآ أوامره بالميكروفون اليدوي حتي أعتقدنا لوهلة اننا نصور فيلم فعلآ ...
و لكن صياحه هذا اثار فضول المارة الذين ابتدأوا في الأقتراب .. و رويدآ رويدآ تكونت مجموعة هائلة من هؤلاء المارة كونوا دائرة حول المكان ..
و بصعوبة استطاعت مجموعة صغيرة ان تتسلل من خلال المارة و قام موديست بأصطحابهم الي داخل مكتب البريد :
ابن مصر : بينيل ايه ده ... مين دول اللي معاه
من بعيد استطعنا ان نميز صوت نسائي معروف ... ""افففف .. نونكن تعديني يا بجم ... قصدي يا اوستاز بجم "
سكوب : نونكن ؟؟ اوستاز؟؟؟ الله .. دي فولانة... و اللي وراها دول مصرية غصب عن عينيكم و و احد تاني
عصام : مين هو ؟
سكوب : واحد تاني
عصام : يعني مين يعني ؟
سكوب : مالك يا عصام بقولك واحد تاني ...
سي السيد : حتشلوني انتوا الجوز ... ايه اللي جاب دول هنا يا موديست
موديست : دول الكومبارس .. ما تشيلوش هم .. انا اتفقت مع المدير علي انه يحطهم بدال الموظفين ... علشان ما تحصلش مفاجأة كده و الا كده .. قالها غامزآ بعينيه عدة مرات ...
سي السيد : و مين اللي حيدفعلهم اجرتهم ان شاءالله ؟
موديست : ما قولتلك ما تشيلوش هم ...المدير نفسه حيطلعلهم بدل سفر و اجرة يوم كامل كأستشاريين خارجيين ...
سكوب : علي كده بقي .. يبقي تشغلولي نانو معاهم ... هو انا قليل و الا ايه ؟ ... بقالي شهرين بشتري منها السندوتشات عالنوتة .. و بكده نطلع خالصين ...
ابن مصر : مافيش حد تاني من اهاليكم عايزين تشغلوه ؟ ... آل و مش عايزينها تبهوق ... حنشتغل بقي في يومكم الأزرق ده و الا لأ ؟

صرخ عصام في الميكروفون ... سكوووووووووووت حنسرق ... حنصور .. حنصور
سكوب : بسسست عصام .. هما بيقولوا ايه لما بيخبطوا علي البتاعة دي قبل التصوير
عصام : يا عم قول اي حاجة ... هو فيه حد بيفهم في البطيخ ...

تقدم سكوب بسبورة ابنه الصغيرة و التي لصق فوقها مسطرة خشبية قائلآ : البوسطجي و المعزة ... المشهد الأول نمرة واحد.. و خبط بالمسطرة و رجع بكل سرعة وراء الكاميرا بينما صاح عصام : آآآآآكشششن

و لكن لم يحدث أي آكشششن بل لم يظهر اي اثر لسي السيد و لا لزهيري ... و كان طبيعي ان لا نجدهما فلقد انهمكا في توقيع الأوتوجرافات للمشاهدين و المارة الذين احاطوا بهما ... و بين صراخ المعجبات و كليكات خاصية التصوير بالموبايلات .. ضاعت ساعة كاملة .. بل لقد اكتشفنا ان زهيري قد احضر معه كروت مطبوعة عليها صورته ... " مين يعرف .. يمكن لو العملية فشلت ممكن اطلع ممثل او مغني بجد " ... ينتهي سي السيد و زهيري من التوقيع علي الأوتوجرافات .. و يختفي سكوب مصطحبآ نانو الي المسمط القريب بعد ان اقنعها بان تعزمه علي وجبة مقابل اعطاءها دور البطولة في فيلمه القادم ... يرجع سكوب و يختفي ابن مصر الذي دخل البوستة كي يصرف معاش حماته " هي دي فرصة تتعوض لما الاقي مكتب بوستة بحاله فاضي و تحت أمري من غير طوابير و لا دوشة "...
بين أختفاء هذا و ظهور هذا ... وصلنا للساعة ثلاثة ... و أبتدأ زهيري في الأحتجاج و التذمر .. لأنه كعقد نقابة الممثلين بعد ستة ساعات من العمل هناك نصف ساعة راحة للغدا ... و يوافق عصام علي شرط أن يحضر الغدا للشلة كلها ...

أخيرآ الساعة ثلاثة و نصف .. ابتدأوا في تصوير المشهد الأول ...

يتبع

واحد تاني
تاريخ المشاركة 30 December 2006 - 10:47 PM
تسجيل متابعة واعجاب طاغي ...

Quote
عقل "واحد تاني" الباطن

شوف ياخويا اللي قلت له دور عالي يكون شايف البحر ... شكله هيطلع صامت بيعدي من قدام الكاميرا بقفاه ... آه لو يعرف اني كنت رئيس فريق التمثيل في "فاكتوريا كوليش" ... والا لو يسمع سوابقي في دنيا الاجرام ... طب اعملي كده يا سكوب تست كاميرا وانا اوريك مواهب فشر زكي ابيض وجورج طليمات ... ... هات يابني الورنيش خلينا ندهن وشنا

نانو
تاريخ المشاركة 30 December 2006 - 11:10 PM
عموما ما فيش مشكله ....الغدا عليا من المسمط بتاعي
شندوشتات كده ومخ مضروب و فشه وعكاوي وبلاوي

مصرية يعني مصرية
تاريخ المشاركة 30 December 2006 - 11:34 PM

هبان في السيييييييما ..............هيييييي


صورةصورةصورة

إوعي كده يا نانو

أشوف الدور بتاعي

الله....

إيه ده؟؟؟؟

بس....؟؟؟؟؟؟؟؟؟؟؟؟؟؟؟

كل دوري ..... اللي وراها دول مصرية غصب عن عينيكمصورة





بدون تعليق

Folana
تاريخ المشاركة 31 December 2006 - 01:58 PM
Scorpion, on Dec 30 2006, 07:50 PM, said:
و ابتدا يحيي مدير المكتب الذي كان في انتظارهم مرتديآ بدلة فوشيا مخططة ببنفسجي بالطول .. بينما المنديل الأخضر يتدلي من جيب الجاكيتة العلوي ... و الكرافتة البني المخططة بأحمر تكاد تخفي القميص الأزرق ...



السلام عليكم ورحمة الله ....


يالا يا بنات معايا نغنى للاوستاز المخرج...

اقلام ..اقلام يابدلته...اقلام ..اقلام ...اخر تمام فى هيئته..اخر تمام....قلم احمر وقلم كمونى...ائلام ائلام ...قلم اخضر وقلم لونه طوبى الوان الوان...:"

الهوبا...أمبولالالالالالالالالالأ.....


هه...ايه رأيك فىّ يا اوستاز سكوب ..من حيث الندب يعنى...!!! طب نونكن قرشين كده تحت الحساب..علشان بس ادفع اجرة الاودة المتأخرة علىّ...

عصـام : مين الست دى طلعوها بررررررررررررره....يالا حنصور

آآآآآآآآآآآآآآآآآآآآآآآآآ...تشـــــــــــــوووووووووووووو


آآآ قصدى...أأأأأأأأأأأأأأأأأأأأأكشنننننننننننننننننننننننننننن


يرحمكم الله يا اوستاز...

Scorpion
تاريخ المشاركة 31 December 2006 - 09:08 PM
يا جماعة سامحوني ... المغامرات كانت دايمآ قاصرة علي شلة حساس بس .. و من فترة للتانية شخصية او اتنين بيتضافوا لمغامرة معينة ... الفكرة اساسآ ما كانش فيها شخصيات كتيرة .. عالعموم ما حدش يزعل لو دوره طلع صغير ... و حقكم عليا ... <_<

تاريخ المشاركة 31 December 2006 - 09:32 PM
سكوب أمام الكاميرا بلوح الأردواز بتاع جونيور : البوسطجي و المعزة ... المشهد الأول تاني مرة...
و يخبط بالمسطرة فوق السبورة الصغيرة مرة أخري .. و لكن هذه المرة لا يعود وراء الكاميرا بل يبتعد بكل سرعة و ملامح ألم فظيع فوق وجه بينما يمص اصبعه الذي كان يمسك به طرف السبورة العلوي ...
عصام : آآآآكشششن

ينطلق سي السيد من علي ناصية الشارع بالعربية الشيفورليه بأقصي سرعة ( تكاد تكون جنونية) ..و بينما صرير العجلات يتزايد كان الرعب يتزايد علي وجه زهيري الذي كان بجواره ... ثم ابتدأ في التمتمة بالشهادة ... كل هذا و سي السيد كسائق محترف في فيافي السعودية لا أثر علي أي قلق علي وجهه .. بل الأمر كان يبدو كنزهة عادية بالنسبة له .. و عندما أقتربت السيارة من مدخل مكتب البريد .. فرمل سي السيد بكل قوة رافعآ في نفس الوقت فرامل اليد ثم أدار عجلة القيادة في اتجاه معاكس اسفر عن حركة مقص أمريكاني و دوران السيارة دورة كاملة حول نفسها رافعة سحابة من الدخان و الغبار و مرتفعة في نفس الوقت عن الرصيف ما أدي الي ارتطامها ببرميل فارغ ملقي علي قارعة الطريق مما أسفر عن انفجار الأطار الخلفي بصورة مروعة ...

كل هذا لم يأخذ أكثر من دقيقة .. هبط خلالها الطير علي جموع المشاهدين .. و الشلة نفسها .. صمت مصحوب بذهول شديد لهذا المنظر ... فقط عصام هو الذي وقف يشير بيده جهة العربية و يشوح بعصبية شديدة ... كان عاجزآ عن الكلام في باديء الأمر ثم بدأ في صياح نفرت فيه عروق وجهه و رقبته حتي أوشكت علي الأنفجار :

- الله يخرب بيتك .... الله يخرب بيتك ... العربية ... العربية يا غجر ...القراريط لسه مرهونة يا جبابرة ...

ينزل سي السيد بكل هدوء .. و براءة الأطفال علي وجهه يقول :
- أهدي يا عصام ... صلي عالنبي يا جدع ... دي فردة كاوتش لا راحت و لا جت ... عملتلك قدامها مشهد عمرك ما تحلم بيه ..
عصام : مشهد ايه يا ابو مشهد ... انت فاكر نفسك في الربع الخالي .. ده احنا في فيصل يا سي السيد ...
سي السيد : طب ما هو الربع الخالي و فيصل هما الأتنين من السعودية .. روق دمك بس ... و سيبني اغيرلك انا العجلة ...
عصام يمر كف يده علي وجهه في محاولة لتمالك اعصابه : طب وريني همتك يا حلو و وورينا حتغيرها ازاي ؟
سي السيد : هي مشكلة يعني .. افتح يا زهر شنطة العربية خلينا تطلع الأستبن ...
يخرج زهيري بصعوبة من العربية و مازالت ملامح الرعب لا تفارق وجهه ...
- ده انا حفتح دماغك انت ... الله يخرب بيتك يا مفتري ... ركبي لازقة في بعضيها و مش عارف اتحرك ...
عصام : وفر علي نفسك فتح الشنطة يا خويا .. العربية ما فيهاش أستبن ...
سي السيد : ايه ده ؟ ماشي من غير استبن ...قشطة ... مش انت بتاع قواعد المرور و الحركات دي .. صحيح عالم
عصام : مالها ؟
سي السيد : لأ و لاحاجة ... استنوا بقي لما اروح لواحد بتاع كاوتش يصلحها ...

ثم قام بفكها ... و ابتعد مدحرجآ اياها .. و تكاد تري لمعة ابتسامة طفولية شقية علي وجهه .. و من وراء يصيح ابن مصر :
- مش عايز حتة عصاية تدحرج بيها أحسن ؟
و كان رد سي السيد تشويحة متهكمة بأكتافه قبل ان يختفي حول ناصية الشارع ...

نصف ساعة مرت قضتها الشلة في سكوت تام .. بينما انضمت مصرية غصب عن عين التخين الي نانو و فولانة و أبتدأوا في ثرثرة لا تنتهي ... بينما واحد تاني اخذ يراقبهم بكل أشمئناط ...
مصرية : شوف يا اختي الراجل بيبص علينا بقرف ازاي ... ما يحكمش
نانو : جري ياد تاني ... ما تبص علي قدك ...
واحد تاني : افففف
فولانة : يا لهوووووي ... البيه بيقول افففف .... حران و الا حران يا خويا ؟ ... افففف علي مين ياالي ما تتسمي ( قالتها بنبرة ملحنة و طويلة ) ... و شوووووووبيش يا اللي متأنتك و مش معانا ...
واحد تاني : شوووبش ؟ .... هي حصلت شوووبش .... شووووبش ليا أنا خريج فيكتوريا كوليج ... شوووبش ليا أنا مدير مسرح العرايس ...
و قام بكل غضب ملقيآ جرائد المعارضة التي يحملها و ابتعد بكل قرف .. موجهآ كلامه لموديست :
- فاتورتي حتوصللك ... ابقي حول الدفع مباشرة علي رقم حسابي في بنك اديداس بتاع لوكسمبورج .. عالم هواة صحيح .... أفففف
سكوب : هو احنا ناقصين .. الهي يهدك يا سي السيد ... الواحد كان زمانه ي بيته دلوقتي ... ندر عليا شمعة يا سانت تريز لو هو بس اللي اتمسك في العملية دي ...
يظهر سي السيد في تلك اللحظة من وراء سكوب مباشرة قائلآ : أنت بتندر عليا يا سكوب ؟
يقفز سكوب من الخضة .. و لكنه يتمالك نفسه بكل سرعة : أندر عليك انت يا سي السيد ؟ .. طب انشالله اعدم حماتي و اختها في يوم واحد لو كنت عملتها ... ده انا كنت بدعي انك ترجع بالسلامة ...
سي السيد : ماشي يا سكوب ... ماشي ... مردودالك برضه ... و بكره حروحلك مخصوص السيدة ... و ... ادعيلك ...
سكوب : ربنا يخليك ليا يا خويا ...
و هنا يتأثر زهيري بكل شدة و يتناول عوده و يبدأ يغني :

يا معلي راية الحرية .. تارلللام
يا مقوي الوحدة الوطنية .... تراباتاتي
غالي علينا ... تارالالالي .... و جوه عينينا ... تارارالالو

و تندمج الجماهير معه و تبدأ في التصفيق و الرقص

عصام : ربنا يهدكم ... اخلص بقي منك له ..... اتفضل يا خويا ركب العجلة ...
ابن مصر : كلفك كام تصليح الفردة دي ؟
سي السيد : بتاع الكاوتش كان عايز عشرين جنيه ...
ابن مصر : هو أنت معاك عشرين جنيه ؟
س السيد : منين يا حبيبي .. ما أنت عارف البير و غطاه ...انا سبتله بطاقتي و قلتله كمان ساعة حرجع و ادفعله ...
ابن مصر : و كمان ساعة حتجيب الفلوس منين يا خفيف ؟
سي السيد : نكون خلصنا العملية يا فالح ... و أهه بتاع الكاوتش عالناصية هنا ... قبل ما نفلسع نعدي عليه أديله فلوسه و آخد بطاقتي ...
زهيري : منطق سليم فعلآ ...
ابن مصر : منطق سليم ايه يا بو منطق ....الهي تقعوا انتو الجوز ما تحطوش منطق ...اركبوا العربية خلينا نصور بقي و نخلص ...

و يبدأ الجميع مرة أخري في أخذ أماكنهم ...
و يقترب سكوب من أمام الكاميرا مرة أخري و بصباع ملفوف بالشاش يخبط بحذر علي السبورة الصغيرة قائلآ :
- البوسطجي و المعزة .... المشهد الأول تالت مرة
و يصيح عصام : آآآآآكششششن

يتبع