مغامرات عصابة "حساس"

Modest
تاريخ المشاركة 25 July 2007 - 11:51 AM
بلا سونكومنتال بلا ألوميتال ... أنا الفار بيلعب في عبّي و مش واثق فيك يا سين سين .. حاسس إنك هاتعمل فيا زي ما عملوا في وائل القباني md2:

لكن لو شايف الخطة مضمونة يعني و هانديها مارينا و فراخ و بط و فطير و نحبس بمارلبورو ، يبقى سوق ياسطى و ربنا يستر طريقنا

se_ Elsyed
تاريخ المشاركة 25 July 2007 - 03:16 PM
وبالفعل أجتمع الأربعة الأشرار صبيحة تنفيذ العملية – مين صبيحه دي ؟ !!! – وأرتدى موديست هدوم الشغل – كلنا عارفين البيجاما المقطعة وهي اليونيفورم اللي بيتفائل به كل عملية – وتوجهوا بالميكروباظ إلى مستشفى العباسية للصحة النفسية – السرايا الصفار سابقاً –

حمزه التمرجي : صباح الخير يا دكتور ... في 3 أنفار مكتفين واحد ونازلين فيه ضرب وهو في حاله هيجان وعمال يعض فيهم .

دكتور عُقده : يا فتاح يا عليم يا رزاق يا كريم .. يعني ما أعرفش أضرب شاندوتش الفول في أم المستشفى دي برواقه .. وأهو وأدي الساندوتش ويقوم بقذفه على المكتب ... دخلهم يا سيدي وأتأكد إنهم مكتفينه كويس أنا مش ناقص بلاوي .

س س : بونجور دكتور عُقده ... والله إحنا سمعنا عن سعادتك كتير وصيتك مسمع في كل مستشفيات المجانين من العباسية لحد الخانكة ... وعشان كده قلنا نيجي لحضرتك السرايا تشوف لنا حل في المصيبة اللي وقعت على دماغنا دي .

عُقده : خير يا إبني إن شاء الله ... أنا شعاري في الحياة وخصوصاً في كار الطب النفساني إن كل عقده ولها حلال .... ها إحكي لي .... ماله المجرم اللي معاكو ده ؟

إبن مصر : والله يا دكتور الباشمهندس موديست ده كان زينة الشباب ... طول بعرض بإرتفاع يعني تقدر تقول إنه كان شبه منحرف ... وكان عقل الدنيا كله فيه .. لحد الله يسامحهم ولاد الحرام اللي غاووه وبوظوا دماغه بالكوره .. مع إنه كان في حاله وما يعرفش الفرق بين كرة القدم ومصارعة السومو ... ولجل الحظ الإسود يقوم مشجع والعياذ بالله الزمالك ..

عُقده : يا ساتر يارب .. هو أنا ماورييش غيرهم ولا إيه ... ده أنا عندي عمبرين مليانين مشجعين من النادي المذكور واللي بيدخل ما بيطلعش تاني وغالباً بيموت جوه المستشفى .... والمرض ده بنسمية " الزملكتيشن "

موديست هامساً لـ س س : نهارك إسود ومقندل .. إنت سمعت بيقول إيه ؟

س س : ما تخافش .. إثبت انا قلت لك هما يومين بس اللي هاتقعدهم جوا .. لحد ما تظبط الخريطة وأنا كفيل إني أخرجك ومعانا الهبره المتينة .

عصام : عامة يا دكتور أهو عندكو اهو وإتصرفوا فيه زي مانتو عايزين .. أهما حاجه يرجعلنا صاغ سليم ويرجع موديست الحونين بتاع زمان .

عُقده : إطمئن يا إبني .. إحنا عاملين كورس علاج لمثل هذه الحالات ... والكورسي بيتكون من جلسات كهربا على الريق .. نتبعها بدش ساخن للمريض ثم نلحم فيه دش بارد .. وبعدين المريض بيروح العمبر ونبتدي اهم خطوة من خطوات العلاج وهو العلاج بطريقة الصدمات .

عصام : أه فهمت يعني بتخلي عربية تصدمه تقوم الذاكرة رجعاله تاني ... صح ؟

إبن مصر : الله يرضى عليك بلاش تتكلم يا عصام أحسن نرجع من غيرك .. الناس هنا ما بتهزرش ولو عبرت عن ذكاءك ممكن يحتاجوك معاهم شويه

عُقده : لأ يا بابا .. التصادم يعني بنعرضه لصدمه من الحاجه اللي هو متعقد منها ... يعني على سبيل المثال بنجبره إنه يتفرج على ماتش الـ 6/1 تلات مرات يومياً ..

س س : يا نهار مش فايت .. ده كده يفرفر منكو يا دكتور .

عُقده : وده اللي إحنا عايزينه .

س س : على خيرة الله .. إحنا هانسيبهولكو دلوقت وهانرجع نطمئن عليه بعد يومين يمكن ربنا يكتب على إيدك الشفا .

ومر اليومين ... وذهب ثلاثتهم إلى المستشفى حاملين زيارة محترمة للعميل موديست .

إبن مصر : صباح الخير يا دكتور عُقده .. طمننا الله لا يسيئك إزي إبننا موديست دلوقت ؟

عُقده : موديست مين .. أنا ماعنديش حالة بالإسم ده !!!!!!

س س : لأ إفتكر يا دكتور الله يكرمك ... موديست اللي جبناه من يومين وكان عنده زملكاتيزم

عُقده : يا إبني إسمعها زملكتيشن .

س س : يا عم مش هانختلف ... هو فين بقى ؟

عُقده : أولاً ده ما طلعش إسمه موديست .. ثانياً حالة المريض محتاجه على الأقل 3 شهور علاج

س س : يا نهار مدوحس .. أومال طلع إسمه إيه ؟ كوثر ؟

عُقده : لأ يا سيدي إسمه الحقيق بلحه .. فبعد الضغط والتعذيب إعترف بإسمه الحقيقي

إبن مصر : والله العظيم كان قلبي حاسس .. وفعلاً إسم موديست ماكانش لايق عليه خالص

س س : سواء بلحه أو حتى كنتالوب عايزين نشوفه الله يرضى عليك .

عُقده : يا حمزه يا ولد يا حمزه ... روح هات بلحه من عمبر جيم .

ويدخل حمزه ممسكاً موديست من رقبته وقد نقص وزنه وتقطعت ملابسه وأغرورقت عيناه بالدموع ولم ينطق بأي كلمة .

إبن مصر : لا حوال ولا قوة إلا بالله ... الواد ضاع ... ربنا ياخدك يا سين سين يا صاحب الفكرة السودا دي

س س : إنت هاتفضحنا قدام الناس ؟ مانتو كنتو معايا في الموضوع .

إبن مصر : هو ما بيتكلمش ليه يا دكتور ؟

عُقده : يتكلم مين ؟ إحنا كنا فين وبقينا فين ؟ هو عامة بيستجيب للعلاج وقدامه حوالي 3 شهور عقبال ما يقول بابا وماما وبعض الكلمات الأوليه .

عصام : بابا وماما ؟ هي حصلت ؟ ناقص تقولنا ده لسه هايسنن

س س : طب على العموم ولو سمحت يا دكتور عُقده .. بلحه يلزمنا .. وإحنا متكفلين بعلاجه في بلاد بره حتى لو بعنا هدومنا عليه .

إبن مصر وهو يغمز س س : ما تفتحش صدرك قوي كده .. إنت مش لاقي تمن السجاير الفرط أساساً .

س س : أسكت إنت أنا عارف بأعمل إيه .

عُقده : عالعموم إنتو في الحاله دي هاتوقعوا لي على تعهد إن بلحه تحت مسئوليتكم الشخصية وإنكم مسئولين عن تصرفاته .

س س : نوقع ما نوقعش ليه ...

وبالفعل أصطحب الأشرار الثلاثة بلحه .. قصدي موديست الذي لم يكن ينطق ولا بكلمة من تأثير التيار الكهربائي الذي تعرض له كجزء من العلاج .. ومن تاثير مشاهدة مباريات الاهلي لمدة يومين متتاليين ...

إبن مصر : وبعدين ؟!!!! هانفضل ماشيين كده كتير في الشوارع ومعانا المصيبة دي واللي رايح واللي جاي عمال يبص علينا يا خفيف ؟

س س : بأقولك إيه يابو إنجي ... نقطنا سكاتك وسيبني أدور على مخرج .

عصام : الشارع اللي إحنا ماشيين فيه ده فيه مخرج على إيدك اليمين بعد بتاع العصير اللي عالنصية .

إبن مصر : أيوه أيوه ما هي نقصاك إنت كمان عصير إيه وكوكتيل إيه يابو الذكاوة ؟ تعرف تسكت ولا نروح نحطك في المستشفى بدل موديست ؟

س س : بسسسسسسسسسسس لقيتها .... قشطه يا رجاله ....

إبن مصر : قول يا عم الحاج ماحنا أكلنا من الكلام ده كتير وفي الأخر بيطلع على مافيش ..

س س : عيب ده أنا أبو الأسيان بتاع التسعتلاف ... بص إحنا ناخد موديست زي ماهو كده .. ونحطه قدام باب بيتهم ونرن الجرس ونطلع نجري .. وبكده نبقى وصلنا لأهله معزز مكرم وهما يتصرفوا بقى والموضوع يبقى قضاء وقدر .

إبن مصر : إخص عليك وعلى ندالتك .. بقى هي دي أخرتها ... ترمي صاحبك الرميه السودا دي واللي إنت وصلتو لها إيه ؟ الشفقة والرحمه إتنزعت من قلبك إنتزاعاً ؟ .. وواجع دماغنا .. موديست صاحبي .. موديست حبيبي .. إخص مره تانيه .

س س : من غير بستفه .. عندك حل تاني يا بتاع المثاليات ؟

إبن مصر : أنا بأقول ناخده ونرميه قدام باب البيت ونطلع نجري من غير ما نرن الجرس أحسن حد يشوفنا ونروح في داهيه .



تمت وإلى اللقاء في عملية سرقة صالون الحلاقة .. اللي متأكد عن أحمد محمود هاينشف قلبنا سنة او إتنين لحد ما يكتبها .

ABO HAMADA
تاريخ المشاركة 21 September 2007 - 11:10 PM
نداء الى جميع افراد العصابة


الرجاء استكمال باقى المغامرات

Modest
تاريخ المشاركة 01 November 2007 - 11:45 AM
تصدق بالله يا سي السيد .. من يوم العملية المنيلة دي و انا مش عارف أرد أقول ايه :happy:

إلهي يارب الزمالك يكسب الأهلي 7/1 و أعمل عملية عكسية .. بس المرة دي مش هاوديك مستشفى المجانين :unsure:

أنا هاحبسك في نادي الزمالك علشان تتعذب بصحيح :closedeyes:

حشيش
تاريخ المشاركة 27 November 2007 - 06:41 PM
ياترى ممكن أنضم للعصابة ؟ ... أنا محتاج فلوس بأى شكل wst:: ... فيه فى راسى طبخة لو شديتوا حيلكم معايا حناكل بقلاوة

Salwa
تاريخ المشاركة 27 November 2007 - 07:27 PM
حشيش....سى السيد....ابن مصر.....سكوربيون...

مش هم دول النبتة الاولى لعصابة حساس ؟؟ اللى عملها الغائب الحاضر (( سكوربيون )) ؟؟

اول حرف من اسم كل واحد فيهم ؟؟
وبعد كدة انضم الكثيرون لافراد العصابة ؟؟

اذن....
كيف تستأذن ياسيد حشيش فى الانضمام لهذه العصابة الجميلة ؟؟ وانت واحد منهم ؟؟ بل اصل الاسم يبدأ بأول حرف من اسمك ؟؟

نأمل فعلا فى عودة سكوربيون ....
ونأمل فعلا فى رؤية كل اصحاب هذه الاقلام مرة اخرى تنير هذا المكان ...اقصد هذا الموضوع الباسم ..

حشيش
تاريخ المشاركة 28 November 2007 - 01:39 AM
فى قهوة (زكى بلغم) بالدويقة يلتقى أفراد العصابة كما إعتادوا عندما تشتد بهم الضائقة المالية حيث أنها الأرخص من بين المقاهى التى يترددون عليها

إبن مصر منادياً على صبى القهوة خميس: هات لى يابنى شاى على ميه بيضه وطبق كشرى من عند عونى :sad:

خميس: على عينى حاضر

سى السيد منادياً على خميس بغضب: مش قبل ما تمشى تجيب الطلب تسأل الطرابيش اللى قاعدين معاه عالترابيزة إن كان لازمهم حاجة ولا لأ md2:

خميس: لا مؤاخذة يابو السيد ... إفتكرتك حتطلب معلقة زيادة وشفاطة زى كل مرة

سى السيد: لأ خفيف ياوله !!! ... إجرى هات لى زى إبن مصر وبلاش كتر كلام معايا !!! ... يلعن أبو شكلك md2:

خميس: عينى ... طب قبل ما أمشى حد عايز حاجة تانية ؟!

حشيش: هات لى ياخميس يابنى نص حجر معسل ونص كباية حلبة حصى

خميس: إن كنت فاكر حتدفع نص التمن أحب أقول لك إن المعلم بلغم بطل النظام ده من أول إمبارح ... يعنى نص حجر تمنه زى حجر كامل والحلبة نفس الشئ

حشيش: داهية فيك وفى معلمك ... طب روح هات لى كباية حلبة وسك على المعسل

خميس: وإنته ياأستاذ سكوب مش لازمك حاجة ؟!

سكوب: لأ أنا صايم

خميس: إيه المناسبة يعنى ولا مؤاخذة !!!

سكوب: ده صيام العدرا :blink:

خميس: بس ده خلص ييجى من شهرين !!

سكوب: وإنته مال أهلك ... أهو صايم وخلاص !!! ... وإمشى بقى ما تخلنيش أسب لك ... ولا بلاش md2:

ينصرف خميس ليحضر الطلبات

إبن مصر: وبعدين فى أم الفقر اللى ملازمنا ده :sad:

حشيش مخاطباً سى السيد: بقول يابو السيد ... دخل إيدك من غير محد ياخد باله فى لياقة القميص بتاعى من ورا وأهرش لى فى نص ضهرى :blink:

سى السيد: هنا

حشيش: لأ يمين شوية

سى السيد: هنا

حشيش: فوق شوية

سى السيد: إفففففففف ... هنا

حشيش: أيوه هنا ... أهرش جامد

سى السيد: جامد أكتر من كده !!! ... دى الفلنة بقى كلها دم !!!

حشيش: طب خلاص كفاية ... تسلم الأيادى :wub:

سكوب: ياخوانا لازم نشوف لنا صرفة ... لازمنا عملية جديدة ... بقالنا شهرين لا شغلة ولا مشغلة

إبن مصر: عارف البت صباح اللى بتبيع نعناع فى أول السوق

سكوب: مالها !!!

إبن مصر: البت دى بيطلع لها فى اليوم مش أقل من خمسة جنيه ... وغير كده لا عندها عيل ولا تيل ... يعنى عاكمة على قلبها شئ وشويات

سكوب: خمسة جنيه يوماتى من النعناع !!! ... ده كلام حد يصدقه ده !!!

إبن مصر: البت أصلها حلوة ونغشة والزباين بتشترى منها عشان الملاغية والدلع مش عشان النعناع ... صحصح معايا يا سكوب

سكوب: قصدك يعنى ننط على بيتها بالليل وننضفه ؟!

إبن مصر: سيبنى بس الأول أدرس الموضوع كويس وأشوف مداخل ومخارج المطرح وبعدين نشوف حننفذ إمتى

حشيش: نعناع إيه وهباب إيه !!! ... يعنى حيكون حيلتها كام يعنى !!!

إبن مصر: أقطع دراعى لو ما كانت تحتكم بالميت على 500 جنيه !!!

سكوب: محدش بيشيل مبالغ كبيرة زى دى فى البيت ياسطى ... أكيد شايله فلوسها فى بنك وحيطلع نأبنا على شونة

حشيش: عايزين نبطل نتانة بقى ونكبر شوية !!! ... يعنى بدال ما نسرق بت غلبانة بتبيع نعناع ما نسرق حرامى من الحرامية الكبار اللى ماليين البلد وبلعينها ... عالأقل دول سرقتهم حلال ... وبدل ما نعرض نفسنا للسجن والبهدلة عشان 500 جنيه نهجم على واحد من الكبار ده ونهبش لنا أرنب ولا أرنبين ... حتى لو إتمسكنا يبقى شكلنا كويس !!!

سى السيد: إنته حاطط عينك على حد ياشيشو ؟!

حشيش: بصراحة آآآآآآآآآآآآآآآآآآه

إلى اللقاء

se_ Elsyed
تاريخ المشاركة 28 November 2007 - 09:02 AM
أيوه كده خليك " مواطن لا متفرج "

وحياة والدك يا شيشو تصطاد لنا حد من الهوامير اللي في البلد زي عز أو كمال الشاذلي أو يوشع والي نهبر لنا منه مليار ولا حاجه ... اعتقد إن أي حد فيهم مش هايحس إن المحفظة نقص منها مليار مره واحده من كتر العكمة اللي معكمنها

Modest
تاريخ المشاركة 28 November 2007 - 10:00 AM
أوباااااااا :blink: .. مع إني أثبت فشل منقطع النظير في عملية سرقة المدرسة :wub: لكن حاسس إني هانتزحلقوا في أم العملية الجديدة دي :sad: .. عملية صينية البقلاوة md2:

شوف لي دور معاكوا يا شيشو إلهي ما يبوّظ لك خطة :sad: .. أخوك حالته ضنك و مأشفر عالآخر md2:
و إنت عارف أنا باحب أنهي دور .. أيوة هو الدور الأول و يكون ببلكونة تبص على مدرسة البنات :blink: