قهوة المحاورات

Salwa
تاريخ المشاركة 19 March 2005 - 02:34 PM
اضاف الرجل ....قال لى البحارة هذا واضافوا..كأنك تتحدث عن بحر الظلمات .
- وماذا اجبت انت ؟؟
- البحر دائما مظلم ومخيف ...
كيف كنت سأتحدث اليهم واحكى عن جزيرة لااعرفها انا ؟؟ولكنى اثق فى وجودها ..
- وماذا ستفعل الآن ؟؟
- لا اعرف ..
- لنعيش هنا ...انا انظف المراكب التى ترسى على رصيف الميناء وانت تبحث عن عمل ..هذا ان كنت بلا عمل ..
- كان لدى ..ولدى ...وسيكون لدى ان اردت ..ولكنى اريد البحث عن الجزيرة المجهولة ..واريد ان اعرف ماذا سأفعل عندما اجدها
اريد ان اعرف من اكون انا عندما اكون عليها ...
- اذا لم تصل لهذا من نفسك فحتى ان وصلت لها لن تصل الى هذا ...فيلسوف الملك عندما كان يجد وقت فراغ كان يجلس بجانبى ليرتاح حتى وانا ارتق جوارب مهرجين الملك ...وكان يحلو له ان يتفلسف ..كان دائما يقول ...كل انسان هو جزيرة ...
وانا بما انى لاافهم فى الفلسفة وكنت اقول لنفسى انا امرأة ...لم اكن اعطى لهذا الكلام اهمية كنت اعتقد انه يقصد الرجال ...لكنى الآن اعتقد انك تريد ان تخرج من الجزيرة حتى ترىالجزيرة اى اننا لن نرى انفسنا الا اذا خرجنا من انفسنا ...
- هل تعتقدى ذلك ؟؟ فلندع الفلسفة للفيلسوف والملك الذى يدفع له حق فلسفته وهيا نأكل ..
- اولا ..يجب ان ترى مركبك ...انت تعرفها فقط من الخارج ...يجب ان تراها ايضا من الداخل ...توجد فى المخازن بعض المياه بين المخزونات واعتقد انها لاتضر المركب بل على العكس تفيد فى بعض الأحيان .
- من اين تعلمتى هذه الاشياء ؟؟
- تعلمت من تنظيفى للمراكب ...مثلك عندما قلت للقبطان سوف اتعلم فى البحر ..
- للآن نحن مازلنا فى المياه ولكننا لسنا فى البحر وانا اعتقد ان سر نجاح اى رحلة بحرية شيئان فقط اكثر اهمية من اى شئ آخر هما ...البحر والمركب ..
- والسماء ؟؟ هل نسيت السماء ؟؟؟ الرياح والأنواء ؟؟
-نعم نعم ......
فى اقل من ربع ساعة كان الرجل قد رأى المركب من الداخل وعاين كل شئ ...
- ان لم اجد على الأقل بحاران اقوياء سوف اذهب للملك واقول له انى مستغنى عن المركب .
- تيأس من اول مشكلة ؟؟
- وماذا سأفعل ؟؟
- نبحر انا وانت ..
- انتى مجنونة ....مركب مثل هذه محتاجة لأكثر من رجل قوى ومحتاجة لمن يقودها ..
ولنفرض انى يجب ان اكون مسئول عن القيادة ...وانتى ؟؟ لا داعى لشرح اى شئ ...هيا نتناول الطعام ..
-

Salwa
تاريخ المشاركة 19 March 2005 - 02:45 PM
ما اجمل مركبنا هذا ....قالت المرأة ...ثم استطردت ..اقصد مركبنا فى الوقت الحالى لأنى سوف اظل به فترة بحثك عن الجزيرة ...طبعا هذه مركبك فقد اعطاها لك الملك ..هل تعلم ان جدى كان يقول من يبحر يجد دائما طريقه على الأرض ..وهذا وجدى لم يكن بحار ..
- اهم شئ ان نبدأ فى شراء مئونة لهذه الرحلة الطويلة ونحضر معنا كل شئ حتى لانحتاج لشئ فى خلال الرحلة ..
- ايضا نحتاج ان ياتى الناس ليودعونا ويتمنوا لنا رحلة سعيدة موفقة ..
- ماذا ؟؟ وما الداعى لهذا ؟؟
- هل تضحك من حديثى ؟؟ ولماذا انا لا اضحك من حديثك وخصوصا انت السبب انى خرجت من باب التصميم على اتخاذ القرارات ...وابدا ابدا لن اعاود المرور منه ..
- فليحدث ما يحدث وما سيحدث ..
فى هذه اللحظة اضاء القمر وجه المرأة .. جميلة ..جميلة جدا ..( قال الرجل هذا وبالطبع لم يكن يقصد المركب كما ظنت المرأة )..

achnaton
تاريخ المشاركة 20 March 2005 - 12:43 PM
أحيانا .. مايصيب المرء بالغثيان .. بمجرد أن يرى فى الطريق إنسان .. إنسان ما .. مش شرط يكون جبان أو من فاقدى الإحساس ..!

واحيانا .. ما يجهد المرء نفسه .. فى الحصول على مجلة بالعربى أو جرنال .. وفى أول صفحه .. تصفعه الأحوال.. فيلاقى فى اول سطر يقراه .. واحد جاهل متعلم ملطخ الصفحه بيسراه .. وهو أصلا .. كفييف ! .. رغم عيونه المنفجلة.. ولكنه مبدأ التلاقيح السخيف ..

واحيانا تخش سيادتك المحاورات أو غيرها من المنتديات تلاقى الرجل الذبابة !.. أو نموذج للست الكدابه .!بيخبطوا فى الحلل .. دون حياء ولا وجل ..

ومن شوية دخلت أقرأ واتعلم .. واسعد بمداخلات المرء المتعلم ذو الحس المرهف .. والفكر الممتع ..وفوجئت فى موضوع من موضوعاتى .. بكف الجهالة تصفعنى .. ويجرى " فأر الكمبيوتر" يسبقنى .. الى باب الإبتسامة على غير العادة .. وتحتوينى الضحكة الرائقة .. ورحيق الحب والجمال .. وفتنة الزهر الباسم .. وأغاريد العصفور الهائم .. واستعدت عنوان الباب من جديد .. وإذا به فعلا باب الأبتسامه.. وفيه وجدت الحمام واليمام .. يعزفون أحلى الألحان .. لم أجد ذبابة واحدة .. ممن تخصصوا فى نقل رائحة الزبالة ..

وهنأت نفسى بعثورى على مقهى مباح .. الواحد منا يقعد فيه ويرتاح .. تحياتى لكم جميعا يارواد هذا المقهى الجميل . وربنا يبعد عنا الرجل الذبابة .. ويخلص المنتدى من أمثاله ..
مع حبى وتحياتىللجميع
rs: :huh:

عادل أبوزيد
تاريخ المشاركة 20 March 2005 - 02:31 PM
الفاضل إخناتون

الأفاضل رواد المقهى

أعتذر لكم إذا كنت سأسرق بعض إبتساماتكم بمداخلتى هذه

يا سادة "الرجل الذبابة " فى كل مكان هل نترك له كل مكان ؟

"الرجل الذبابة " يقتحم أحلامنا هل نترك له أحلامنا

أضعف الإيمان أن نتجاهله و نستمر فى كل مكان و نستمر فى نسج أحلامنا

Salwa
تاريخ المشاركة 20 March 2005 - 05:41 PM
صباح الخير ياجماعة الخير ...

تعرفوا انى انهاردة مش فاضية خالص بس جيت اكمل لكم الحكاية الا تقولوا هربت ..
احنا وصلنا لحد فين ؟؟......افتكرت ..
مرت ثلاثة ايام ...وفى يوم سمع الرجل والمرأة صوت صفارة تعلن ابحار احدى المراكب ..فقالت المرأة ..عندما نقرر الرحيل لن تصدر مركبنا هذا الصوت المزعج ..
فجأة وجدوا ان المركب الاخرى عند ابحارها جعلت مركبهم يهتز ..وهذا رغم انهم كانوا ومازالو قرب رصيف الميناء ...
ضحكا ..وقال لها سوف اذهب للنوم ..انتى اذهبى من هذه الناحية وانا سوف اذهب للجهة الاخرى ...
تذكرت المرأة انها وجدت شمعتان وهى تنظف المركب ..ارادت ان تضيئهما ولم يكن معها اى فسفور ( كبريت ) ..اقترب الرجل منها وقال لها انا معى ..
اضاء شمعه ....ثم اضاء الاخرى ...اضاءت وجهها ..قال لنفسه انها جميلة فعلا وقالت لنفسها ....هو يفكر فقط فى جزيرته المجهولة ...ومركبه ..
اعطته شمعة واخذت شمعة ....
- تصبح على خير ...نم جيدا .
- احلام سعيدة ......(( هذا ما قاله لها )) ..لكنه عندما استلقى على فراشه تذكر كلمات اخرى كان من الممكن ان يقولها لها ..
تذكر انه وحده معها فوق هذه المركب ....تذكر انه تمنى لها احلام سعيدة وفى الحقيقة ظل هو يحلم طيلة الليلة ويفكر ماذا سيحدث ؟؟
حلم انه رحل بمركبه ومر وسط الامواج العالية ...
راى رجال ونساء ووداع وحيوانات اليفة واشياء غريبة ..وبحث عن المرأة التى اتت معه ولم يرها ...قال لنفسه بالتأكيد هذا حلم ..
وهؤلاء بحارة وهؤلاء نسوة ينتظروهم ....وتساءل لماذا رفض كل البحارة وكأنهم متفقون ..ان يصطحبهم او يصطحبوه فى هذه الرحلة ؟؟...اعتقد ان المرأة قالت وداعا .....رأى المطر ينهمر ..
رأى اكياس كبيرة بها طمى وراى الرياح ترمى ببعض الطمى فى مركبه ..رأى انه يختار نبتة للأشجار القوية وبذور تزرع ...عند الوصول للجزيرة المجهولة ..
راى انه يأمر بحارة ..ويقول لهم ...اذا رأى احدكم جزيرة ولو على البعد فليذهب نحوها ..ويرددون هم ...لايوجد شئ ..
راى انهم كانوا يرددون ...لاتوجد جزائر مجهولة لقد صدق الملك وصدق الجغرافيون وانت فقط ...صاحب الفكرة الغريبة ..
نحن كنا نتمنى مكان افضل ولهذا اتينا ...
وجد نفسه يصرخ... .لستم بحارة ..
واجابوا ...بالطبع لا...
فجأة ..صرخ...توجد جزيرة ...هيا اليها ..
صرخوا ...سوف نقتلك ...هذه الجزيرة معروفة وهى موجودة على الخرائط ..
صرخ ...اغربوا عن وجهى ...
بدأوا يرحلون ...
رحلت النساء آخذة معها الحيوانات الاليفة ثم بدأ الرجال فى الرحيل ..
وجد نفسه يفكر .......انى احلم بالطبع احلم ...ولماذا لم اتناول اى طعام ؟؟ ذلك لأنى احلم بالطبع ..
نظر....جيدا ..جيدا جدا ...وجد نفسه ينزل قلوع المركب ..نظر حوله ..انه يقف على ارض عائمة ...هذا عشب ...كيف نما ؟؟
ماذا اسمع ؟؟؟ انه صوت عصافير ...
من اين اتت ؟؟؟.لعلها كانت فى مكان مكنون فى هذه المركب وخرجت مع اقتراب نمو الاشجار ..خرجت مع احساسها بوجود النور القوى ...
استيقظ.........وجد نفسه يحتضن المرأة ..

ذهب الرجل والمرأة يرسمان ويكتبان سويا ......اسما للمركب .

حوالى الظهر .....ذهبت الجزيرة المجهولة وحدها للبحر ...

تبحث عن نفسها ...

عادل أبوزيد
تاريخ المشاركة 20 March 2005 - 06:20 PM
Salwa, on Mar 20 2005, 04:41 PM, said:
وجد نفسه يفكر .......انى احلم بالطبع احلم ...ولماذا لم اتناول اى طعام ؟؟ ذلك لأنى احلم بالطبع ..
نظر....جيدا ..جيدا جدا ...وجد نفسه ينزل قلوع المركب ..نظر حوله ..انه يقف على ارض عائمة ...هذا عشب ...كيف نما ؟؟
ماذا اسمع ؟؟؟ انه صوت عصافير ...
من اين اتت ؟؟؟.لعلها كانت فى مكان مكنون فى هذه المركب وخرجت مع اقتراب نمو الاشجار ..خرجت مع احساسها بوجود النور القوى ...
استيقظ.........وجد نفسه يحتضن المرأة ..

ذهب الرجل والمرأة يرسمان ويكتبان سويا ......اسما للمركب .

حوالى الظهر .....ذهبت الجزيرة المجهولة وحدها للبحر ...

تبحث عن نفسها ...
سيدتى الفاضلة

إنك تقولين شيئا .. أليس كذلك ؟

إنك تأمرينا أن نصنع الحلم أن نغزل خيوط الحلم ثم ننسج الحلم ثم نتدثر به و نقدمه لأهلنا و أولادنا

إنك تلمسين جرحا لا يريد أن يندمل !!

أترانا فى وطننا لم نتعلم بعد أن نحلم ؟

سيدتى سنحاول

Salwa
تاريخ المشاركة 20 March 2005 - 06:48 PM
وسنستطيع ......

من يرغب........يقدر.
من يريد.........يستطيع.

نورتوا المكان ...
عصير ليمون ومانجو للمجموعة كلها على حسابى ...
واضح ان بكرة بداية الربيع ..
الجو كله جميل ...كله تفاؤل ....

Salwa
تاريخ المشاركة 22 March 2005 - 02:03 PM
هو فيه ايه ؟؟؟؟؟؟؟؟

- عصام وسنايبر وسقراط وفريدة واخدين لهم جنب من الصبح وعاملين مؤتمر ولا مؤتمر باندونج .
- ومين فيهم تيتو ؟؟
- اقولك انا مين ؟؟
- اهلا استاذنا الافوكاتو انت ابن حلال ...عندى مشكلة غريبة محيرانى شوية ؟؟
- خير .....بس الأول استنى لما آخد قهوتى ...هم الجماعة دول واخدين لهم جنب بعيد ليه ؟؟
- مش سامع حضرتك ...صوت عصام واصل لهنا ؟؟
مش عاجبه تصرفات حفيد زين........
- طيب شوفى ثلثهم مش رايح ...(( غضبوا ومش رايحين معاهم الرحلة ))...اتقمصوا ؟؟
- هو شغل عيال ؟؟؟
- هاهاهاها.......الود ودى اقولك آه طبعا ...بس مش حقول ..
- بصراحة كلنا بنغلى ....هو بيزعق كدة ليه ؟؟
- بيقولك حايعملوا كماشة على القدس ..
- كماشة ؟؟

- هى فين القهوة ؟؟؟؟
- هو فين الشاى ؟؟؟
- يظهر الواحد مش عارف يزعق زى الشباب ....القهوة يابنى ..

الأفوكاتو
تاريخ المشاركة 23 March 2005 - 03:08 AM
مازلت منتظر القهوة

تاريخ المشاركة 23 March 2005 - 11:47 AM
معلهش يا جماعة .. الواد متولي صبي القهوة مراته بتولد ...سادس عيل ربنا يهده ... عالعموم لغاية لما يرجع .. آديني اهه .. لبست المريلة و حطيت الفيش في جيبي .. و يا هادي...
اللمون و المانجة للكل علي حساب الست سلوي ...

و آدي قهوتك مظبوطة يا أجدع افوكاتو عدي عليكي يا قهوة في مصر ...

و آدي القهوة سكر خفيف لمدام سلوي اللي عمالة تنفعنا .....

اللمون للأستاذ عادل ربنا يبعد عنه الضغط ...

و عندك احلي شوب مانجة .. في كوباية كريستال مغسولة بذمة لعمدتنا أخناتون .. و بخاخة فليت من بتوع زمان تقتل أجدها دبانة تستجري تخش عندنا ...

و بس .... خلوني اشم نفسي و اقعد جنب مدام سلوي اسمع بقية كلامها ...

بالحق .. انت يا جدع يا اللي اسمك ابن مصر .. انت غطست فين... بس فالح بس اشد علي ايديك و اسمحلي و مش اسمحلي .. و ما شفناش من ذمتك حاجة .... طب ادفع حق المشاريب اللي عليك .. صحيح عالم فنجرية بق .... jmb-)

الأفوكاتو
تاريخ المشاركة 23 March 2005 - 03:41 PM
صباح الخير يا معلم سكوب,

صباح الخير يا ست الكل سلوى,

أنا جيت بدرى شوية لأنى صحيت فجأة مش عارف ليه, اللهم إجعله خير...

كان نفسى أخونا إخناتون يكون صحى زيى بدرى, و ييجى يدردش معانا, و ناكل سندوتش الطعمية اللى بنشتريه دلوقت ياليورو,بدلا من العشرة قروش.

الله يجازى اللى كانوا السبب.

ححكيلكم حكاية ظريفة حصلتى من كام سنة لما رجعت للمحروسة, و ذهبت لزيارة عزبة صديق لى كانت مملوكة لوالده, الله يرحمه, و وضعها عبد الناصر تحت الحراسة, فكانت النتيجة أن جميع الأجهزة التى أدخلها أبو صديقى للنهوض بهذه العزبة التى كان إنتاجها من البطيخ و العنب مضرب الأمثال, أصبحت كهنة, و لم تتم صيانتها, و أصبحت خرابة.

و الغريب أنه تم وضع جميع أفراد الأسرة تحت الحراسة, بما فيهم صديقى, الذى كا مستشارا بمجلس الدولة, و أصبح يتناول مرتبه من الحراسة.

نسيت أن أقول لكم لماذا وضعه عبد الناصر تحت الحراسة؟

لأنه كان محاميا مشهورا, و كان حكمدارا فى العهد البائد, ثم وكيلا لوزارة الداخلية فى العهد الفاسد, و لكن هذا ليس له صلة بالموضوع, ما له صلة بالموضوع هوأن والد صديقى ,المحامى اللامع, قبل أن يترافع عن متهم من الإخوان المسلمين, لهذا حلت عليه لعنة أول فرعون مصرى حديث.

يظهر إن القعدة طولت, و المعلم سكوب قاعد يسمع الحكاية, و الزباين عمالة تنادى, و تشتم فى الأفندية اللى معطلين طلباتهم.

أقولك إيه يا سكوب, روح شوف حالك, و ريح الزباين, و نكملوا الحكاية بكره, بعد ما أخونا إخناتون يخطف رجله و يجيلنا من كفر برلين , و الست سلوى تركب البص و تجيلنا من عزبة الهامبرة, و نتلموا , و أكملكم الحكاية.

ألله , هو فين إبن مصر, دانا كنت منتظر حضوره النهارده علشان أشكره على موقف شهم, لكن مالناش بخت النهارده.

الحساب عليا يا سكوب ,و رش على بقية الزباين, ينعل أبو التحويش.

achnaton
تاريخ المشاركة 23 March 2005 - 04:23 PM
والله يا أخى العزيز .. كل ما اسمع سيرة العهد الناصرى .. العن فى سرى ..نواب الشعب .. ووزراء العدل .. الغائب والحاضر.. الغائب على اللى عملوه فينا .. والحاضر لأنه بيكذب علينا ..
صباح العدل الصافى .. نتاج العمل المتواصل فى رحمه وإيمان وعداله تطمئن الإنسان ..
زى عسل النحل الصافى .. اللى بينتجه الشغاله .. والملكه بتدوخ كل النحاله .. بيدوروا عليها فى كل مكان .. ليتعموا منها الرحمة والعدل ..
صباح هذا العسل الطيب .. الحلو المذاق .. اللى وصفه الرسول عليه الصلاة والسلام أنه أفضل ترياق .. بأهديه لكل الرواد .. سواءا اللى بيتمع بالشمس والصحبة اللطيفة - نسبة الى أختنا رائدة الجنس اللطيف - مدام سلوى أو ذلك الذى يعد الشاى فى براد ..
صباح الفل والياسمين .. لكل الرواد المحترمين .. الواقفين على النصبه .. والقاعدين .. ومنتظرين المانجة الجميلة فى صحبة أخونا الفاضل .. أفوكاتو المنتدى .. وبعدها منتظرين صنية الغدا
والحلو يا ريت عجوى .. والنبى يا أخت سلوى .. فالعجوة بتفكرنى بكم النخيل الهائل اللى بنارمماليك الكاكى أكتوى .. من اسوان حتى شاطئ الهوى .. بلا رحمة ولا عدل .. وقد يتوهم البعض أن بين الرحمة والعدل .. مشوار طويل .. أطول من نهر النيل .. رغم أننا لو تبصرنا قليلا وتعمقنا فى جوهر كل منهما لوجدنا أن العدل ما هو الا ضرب من الرحمة بالجماعه لحمايتهم من شرور حكم الفرد .. الذى لا يمكن إصلاحه أو التعرض له ..
والرحمة هى أيضا ضرب من العدل الذى يحمى الشعب من إستضعاف الجماعة .. واختلاق شماعه يعلقون عليها أسباب ظلم الفرد .. فإذا كان المجتمع ينشد الكمال .. لابد أن يفهم العدل والرحمة ويطبقهما على هذا الأساس ..
مش كده والا إيه .. يا محمود بك .. ولما نشرب المانجو القعدة حتحلو .. ويخلى لنا الجو .. ونتكلم عن العدل اللى غاب .. والرحمة اللى بلون الهباب .. وتحياتى
jmb-) arg::

الأفوكاتو
تاريخ المشاركة 24 March 2005 - 05:37 AM
المنظر الأول:

سكوب: صبح الخير يا أفوكاتو العتبة.

الأفوكاتو : بسرعة . بسرعة .. أنا مستعجل.

سكوب : المستعجل عطله الله, الناس مستنياك بقالهم ساعة, ست الكل سلوى, و عميد عائلة أبو زيد, وسى السيد, و اخناتون, و إبن مصر, و إبن عمه مصرى, و عصام , وسنيبر, ده حتى شريف عبد الوهاب هنا النهار دة هو و فريدة, و لكن سقراط راح يدى درس خصوصى لوزيرة الشئون الإجتماعية.

ألأفوكاتو: خير إنشا الله, هو الريس جاى يزور القهوة, و لا فيه حد حيتجوز؟ ولا فيه حد بلغ عن تواجد ناس بتتحاور؟ على كال , ده مش وقته, أنا قلت لك إنى مستعجل, لأنى مزنوق.

سكوب: و مالقيتش غير العبد لله علشان يفك زنقتك؟ أمال عاملين لى خواجات, و أنتم أفلس من الفلس. ياعم أنا راجل فقير, و ماقدرش أحل زنقتك.

الأفوكاتو: يا بنى آدم , أنا مش عايز منك فلوس, أنا عايزك تدلنى على المراحيض.

سكوب: المراحيض؟ هأو , أنت كنت فين كل السنين اللى فاتت دى ؟ يا عم المراحيض قفلوها من 40 سنة.

طيب ورينى التواليت بتاعكم.

سكوب : ها ها ها هأو, تواليت؟ أنت فاكر نفسك فى الهيلتون؟ مفيش عندنا شغل الأفرنج ده.

الأفوكاتو :لكن ياسكوب أنا عارف القهوة دى من زمان من قبل ما اروح بلاد بره, و كان فيها تواليت.

سكوب: تعيش أنت , صاحب القهوة اللى إشتراها من صاحبها القديم, حول " محل الأدب" ( اللى بتسموه تواليت) ل "برتيك".

الأفوكاتو: إيه البرتيك ده؟ أودة كمبيوتر؟

سكوب: جرى إيه يا أفوكاتو, حتستعبط؟ مش عارف البرتيك؟ يمكن فى بلاد بره لسة الناس ماتقدموش , أل ما يعرفش البرتيك قال,و اتعلمتلك كلمتين خواجاتى و عايز تلخبطنى؟ أنا عارف الكمبيوتر كويس, ده حتى بيجيب قناة الجزيرة.

الأفوكاتو: قلتلك أنا مزنوق, و أنت عمال تقولى برتيك و قناة الجزيرة؟

سكوب: مانته اللى جبته لنفسك, بتسألنى على " محل الأدب" , دليتك على البرتيك.

الأفوكاتو: لو مادلتنيش بسرعة على أنا عاوزه, حتبقى مشكلة, ممكن تدلنى على أقرب حتة أفك نفسى فيها؟

سكوب: ما كنت تقول كده من الأول, ورا القهوة زقاق صغير يودى على خرابة, مستورة و ماحدش حيشوفك, و فك أزمتك, و ترجع لنا بالسلامة.... ها ها ها أو.

الأفوكاتو: طيب أبل ما أروح ممكن تقولى البرتيك ده يطلع إيه؟

سكوب: ما يضرش نعلمكم يا بتوع السكافة, البرتيك ده محل يتباع فيه ملابس الستات الشيك, وكل حاجة لزوم الوجاهة.

الأفوكاتو: قصدك بوتيك؟ لكن البوتيكات عايزة مكان أوسع من التوليت, البياع يقف فين, و الزباين تقف فين؟

سكوب: يا سلام على جهل الخواجات, البياع يبيع واقف جوه المحل, و الزباين تقف فى الشارع, حتى دى معرفتش تحلها؟ أمال مسميينك أفوكاتو على إيه؟

الأفوكاتو: لأنى مش فاهم حاجة..... أسف لازم أسيبك دلوقت قبل ما أسبب مشكلة صحية.

المنظر الثانى:

حذف بمعرفة الرقابة

عصام
تاريخ المشاركة 24 March 2005 - 10:24 AM
الأفوكاتو, on Mar 24 2005, 04:37 AM, said:
المنظر الثانى:

حذف بمعرفة الرقابة
:blink: lo::

الله يفتح عليك يا أستاذ محمود .. cl:


بس مش عارف ليه حاسس ان سكوب كان مفروض فعلا يطلع قهوجى .. tot::

se_ Elsyed
تاريخ المشاركة 24 March 2005 - 12:02 PM
عصام شوقى, on Mar 24 2005, 09:24 AM, said:
بس مش عارف ليه حاسس ان سكوب كان مفروض فعلا يطلع قهوجى .. tot:: [/color][/font]
كان المفروض !!!!!

وليه ما يكونش بيشتغل قهوجي في إيطاليا بس مفهمنا إنه بيشتغل في التصدير والإستكراد ؟

ما هي الغرز والقهاوي هناك للركب ...

وبعدين الناس هناك بتدفع تيبس باليورو يابويا ....

ونرجع ونقول الراجل مش بس بكلمته .... الراجل برعايته لقهوته وإسرته ... وطالما كسيب يبقى ما يعيبوش غير جيبه ...

وبعدين يا اخ إسو لا تحاول التشكيك في حقيقة سكوب ... بالعند فيك إحنا قابلينه زي ماهو كده ( بعبله ) إن شالله يكون بيشتغل على صندوق ورنيش قدام نافورة الأماني اللي في روما المحطة ..



وعندك واحد شاي على بوسطة ... مع واحد بندق ... وشيشة حيمي .... آيووووووووووووووووووووووا جاااااااااااااااااااااي .

إبن مصر
تاريخ المشاركة 24 March 2005 - 02:50 PM
بسم الله ..
يا هادى!!!!!!!!!!!!!!!!


سكوب: ايوووه جاى وعندك احلى قهوه مضبوط لاحلة مدام سلوى .. وعندك احلى شاى لاستاذنا الكبير كبير كبير قوى الافوكاتو.....
سى السيد : مش عارف ليه حاسس ان كان عندك رغبه دفينه تبقى قهوجى يا سكوب وما صدقت حققتها..
الافوكاتو : تسلم ايديك يا سكوب والنبى لو الواد بتاع الجرانين عدا قدامك خليه يجيبلى الجرانين الى معاه.
عصام : كلها يا استاذنا هاتقراها كلها .. يااااااااااااااه ده هايفرح قوى ... اصـــ....
الافوكاتو بهدوء وهو يرتشف من كوب الشاى : يا عصام قصدى يجيب جرنان واحد من كل الى معاه... لا حول ولا قوه الا بالله ربنا يسامحك يا سى السيد من ساعه ما عصام ما جرب الدوا بتاعك وهوا..... استغفر الله العظيم..
سى السيد وهو يخبى وشه فى ورقه جرنان قديمه: وانا مالى هوا انا كنت عارف انه هايشرب الازازه كلها..
عصام: هوا في ايه هوا انا خلاص بجد اتعتهت.......!!!!!!!!!
الافوكاتو: ما تزعلش امال انا بضحك معاك..
عصام : اه كده ماشى لحسن كنت هاصدق..امال عمنا الكبير اخناتون فين؟؟
سكوب: انت عارف انه بيجى عندنا سرقه ما هو ممنوع من الانفعال ....
اييوه جاى وعندك احلى شيشه معسل لهشام ....مرحب يا كنج..
( سكوب يحدث نفسه : الواد ابن مصر وحشنى وموغوشنى عليه )
مدام سلوى وهو تصرخ :
الحقوا الحقوا ابن مصر على اول الحاره والبوليس ماسكه وسايب العيال الصغيره تحدفوه بالطوب .......
سكوب : اييييييييه .....
ويجرى مسرعا هو وباقى الرجال الى الخارج ...والافوكاتو يسرع باتجاه الضباط
الافوكاتو: صباح الخيرانا المستشار الكتور محمود الافوكاتو يا حضره الضابط ممكن اعرف انتم ماسكينه ليه؟؟
الضابط: اهلا اهلا يا سياده المستشار انت تعرف الراجل المجنون ده معقوله برضه..
الافوكاتو: لو سمحت ارجوك بلاش سخريه من موكلى ولاحظ ان كل الى فى الحاره عاملى توكيل عنه .. توكيل بجد مش مضروب .. فارجوك فهمنى..
الضابط : انا اسف مش قصدى بس .. لما تعرف الى عمله هاتصدقنى بس ما دام انتم ممكن تضمنوه ما فيش داعى للشوشره وممكن تاخدوه معاكم ..
سكوب وهو يمسح الدماء عن وجه ابن مصر : ايه فى ايه يا اخويا ايه الى حصل .....
ابن مصر وهو ينظر اليهم جميعا ويبتسم: ولا حاجه انا هاقولكم.....
امبارح كنت بقرا الجرنان ولاقيت الدنيا كلها يتسقف وتظغرط عشان الريس هايعدل الدستور ..والماده 76 بالتحديد.. وكانهم يعنى عارفين باقى المواد وزمان كان استاذنا الافوكاتو حكالنا عن اجراءات اصدار قوانين جديده ومواد جديده..
بصيت للتاريخ ولاقيت فاضل 6 شهور.. على الاستفاء الى فجأه بقى انتخابات..... قلت لو هانلحق نكتب القانون ويناقشوه ويعتمدوه فى مجلس الشعب ومجلس الشورى وبما انه من المواد الى تمس الحكم فلابد من الاستفتاء عليه .. كل ده فى 6 شهور قلت الحق انا دلوقتى وارشح نفسى ...
سى السيد : ترشح ايييييييه... نفسك .. كك قطع نفسك.. ترشح نفسك لايه انت اتجننت انت مش خايف على عيالك..
ابن مصر : الله يا سى السيد هو انا مكتوب عليا ان حياتى كلها تبقى خوف .. من الجوع ومن الشغل ومن المدارس ومن البوليس ومن بكره ومن امبارح هو احنا مفطومين على الخوف يا جدع .. لا مش طبيعى ان حياتنا كلها تبقى خوف........
انا من حقى ارشح نفسى لرياسه الحى....
سكوب : ايه رياسه الحى؟؟؟؟؟!!!!!!!!
الافوكاتو : حى ايه يا ابنى انت اتجننت ؟؟
ابن مصر : ما هو ده الى هو قالوه لما رحت اطالب بهذا الحق.... انا قولت اخيرا هايعملوا حاجه صح واذا كان من حقنا ننتخب رئيس الدوله فمن باب اولى ننتخب رئيس الحى والعمده والمحافظ على الاقل يتمرنوا فينا على الوظيفه الكبيره ...
سكوب : تصدق بالله كلامك معقول ما يطلعش الا من مجنون ..وبعدين ..
ابن مصر : ولا قبلين صممت على كلامى فى رياسه الحى .. كلموا البوليس وكان وقت خروج العيال من المدرسه الى جنب الحى قام ضابط مفترى قالهم انى مجنون وحصل الى انتم شوفتوه..
سكوب ممكن فنجان قهوه .. على ما احكي لكم عن برنامجى الانتخابى للنهوض بالحى.....؟؟؟
الافوكاتو : سى السيد انت متاكد ان ابن مصر ما شربش هوا كمان من الدوة بتاعك
وينفجر الجميع فى الضحك

الأفوكاتو
تاريخ المشاركة 25 March 2005 - 02:38 AM
سكوب: صباح الخير يا أفوكاتو أفندى, الحارة كلها بتشكرك على تخليص إبن مصر من أيدين العساكر إمبارح, و علشان كده, القهوة النهاردة على حساب المحل.

الأفوكاتو: يا سكوب يا حبيبى, الراجل ده إبن مصر, و إحنا كلنا أولاد مصر, يبقى إحنا كلنا أخوات. و لما أساعد أخويا لا أستحق شكر, و إن لم أساعده, أبقى أستحق اللعنة,

علشكان كده , مش حاقبل عزومة القهوة,لاتى ماخدش أتعاب من إخواتى, و أصدقائى.

سكوب: طيب أجيب لك قرصين من بتوع سى السيد؟ و الا عصير الخروب اللى بيحبه عصام؟

الأفوكاتو: لأ, و كفايا عليا إنى أقعد مع الشلة, و يا حبذا لو أسمع وصلة موسيقية من ملك الموسيقى هشام, أو من ملك الكمنجة, إذا جه و معاه كمنجته.

سكوب: أى طلبات تانية ؟

الأفوكاتو: الموسيقى تحلى مع الغناء, و صوت جميع زباين القهوة لا مؤاخذة لا يصلح للغناء, ما ينفعش غير صوت حريمى,

يا سلام لو الست سلوى تغنينا غنوة من أغانى أم كلثوم, على تقاسيم بياتى, أو حجار كار كور, من الملكين, هشام و الكمنجة. كان نفسى أيضا أن تكون " فيروز" معانا, و ترفع نسبة الجنس اللطيف فى القهوة, لكن يظهر إنها مشغولة شوية.و سمعت إن شعنونة قالت إن نفسها تزور القهوة, بس مابتحبش ريحة دخان الشيشة لأنه غير صحى,

سكوب: و الله فكرة كويسة, و تجيب زباين كتيرة للقهوة, لكن حاسب عندك يا أفوكاتو, إنت مش قلت إنك حتكمل حكايتك لما رجعت مصر من كام سنة فاتت؟

الأفوكاتو: صحيح و الله أنا نسيت, بس مش فاضى دلوقت, أصلى رايح القسم علشان أضمن واحد صحبى , أصله لما سمع إن إبن مصر رشح نفسه للمجلس المحلى, لعبت فى دماغه أنه يرشح نفسه لرئاسة الجمهورية, و أول ما فتح بقه, جه البوكس, و لموه هو وإتنين صحابه, بتهمة المؤامرة على " إختلاس" الحكم.

سكوب: طيب حتطلعه إزاى؟

الأفوكاتو: بسيطة, حأقول أنه لما سمع بتصريحات الحكومة الخاصة بفتح باب الترشيح لأى مواطن, "إتجنن من الفرح" و بناءا عليه..... ليس على المجنون حرج.

سكوب: لكن حتثبت إزاى إنه مجنون؟

الأفوكاتو: أنا مش محتاج أثبت حاجة, هما اللى عليهم يثبتوا أنه "عاقل", و طبعا واحد من أهل حتتنا يرشح نفسه للرئاسة , مش ممكن يكون " عاقل".

سكوب: يا سلام, و الله فكرة كويسة, .. أهلا يا إخناتون باشا, تعلى شوف الإفكار المجانينى اللى الأفوكاتو بيستعملها علشان يحل المشاكل.

إخناتون: مهو كلام معقول, قديما قالوا: "إستعمل لص, لإصطياد لص "
و الأفوكاتو بيطبق نفس النظرية, بيتعامل مع المجانين, بالجنان,, ها ها .

الأفوكاتو: طيب أسيبكم بقى علشان أروح أطلع صاحبى المجنون من الحبس,

سكوب, و إخناتون: مع السلامة يابو حنفى, و متنساش تقولنا بقية الحكاية اللى مكملتش.

الأفوكاتو: وهو فى حكاية بتكمل؟

Salwa
تاريخ المشاركة 26 March 2005 - 09:10 PM
يامساء الخير ياجماعة الخير ...
الأفوكاتو : كدة برضه آجى الصبح ملاقيش حد فيكم ؟؟
ابن مصر : انا انسونى اليومين دول حتى اجازاتى لغيتها وكل الشغل على دماغى وانهاردة قررت ازوغ بعد الظهر وصدقنى لما اقولك انى مش حاسس بنفسى ومابشوفش العيال الا وهم نايمين .
سكوب : ياجامد ..حاتحل مشكلة الشرق الاوسط ياخى ؟؟ ياعم روح انت مياس ؟؟
ابن مصر : ايه مياس دى ؟؟؟...دى شتمة دى يامدام سلوى ؟؟؟
انتى اسكندرانية وتعرفى السمك المياس ...هى زيه كدة برضه ؟؟
سى السيد : ياعم سيبنا فى حالنا .....دى واحدة مياس والتانية عليها شدة ..
اخناتون : والله انتوا اللى عاوزين الشدة فى التعامل معكم ( ودى بقى تحتها كسرة بس مش كسرة خبز من خبز الحكومة اللى بلون الهباب منه لله غراب الخراب ) ...انتوا مش حاتبطلوا هزار ..آهو ده اللى جايبنا ورا ...حدش فيكم جاب سيرة على اللى قاله محمد حسنين هيكل امبارح ؟؟؟
عصام : ياعمنا الراجل ده كبر وخرف طب شفت الاردنيين بيقولوا عليه ايه ؟؟
اخناتون : لا بقى ...انت تقعد عوج وتتكلم عدل .......الراجل ده واعى ومثقف وفاهم اصول اللعبة ...طيب شفت حكاويه على الحريرى ؟؟
سلوى : قصدك يعنى على حكاية اليخت ؟؟؟ لما قدم لهيكل رئيس المخابرات والا هو كان ايامها سفير فى باريس ؟؟ لما قال آهو ده حايبقى رئيس جمهورية لبنان المقبل ؟؟؟ اصلى كنت بسمع بس مشوفتش التلفزيون كنت بحضر العشاء وسمعت الحديث طشاش .
سكوب : هاهاهأو ...هو السمع بس اللى طشاش ؟؟؟ انا بقى لما بيتكلموا كلهم بحس ان حتى الفهم عندى بقى طشاش ..
طيب يقولك ده رجل اعمال ناجح وبعدين يلقح كلام من تحت لتحت مانا عارفه هيكل ده ويقولك والله جدع ماهو عمل ثروة فى عشر سنين ...يعنى تحسى ان فيه حاجة عاوز يقولها وبرضه ساكت ..لكن انا معجبنيش فى كل اللى قاله الا حكاية الفجوة ..
سى السيد : انت ياجدع انت بتسمع بالطليانى ....؟؟ انت تقصد الثغرة ...
سكوب : ثغرة مين ياعم ؟؟؟؟ هو جاب سيرة ل73 ؟؟ هو كان بيشرح ....عارف حشرحها لك بطريقتك ...
سى السيد : تعرف لو جبت سيرة الحلاقة حسيبكم وامشى ؟؟؟
انا انهاردة مزاجى مش ولابد وبعدين حقول لكم ليه ؟؟
سلوى : روق دمك هى مش مستاهلة ... نشرب القهوة وبعدين نتكلم .........

الأفوكاتو
تاريخ المشاركة 27 March 2005 - 03:11 PM
المكان: قهوة المحاورات

الأفوكاتو: هى االحارة مالها هادية و ساكتة كده ليه؟

زبون: أصل أهل الحى فى محزنة.

الأفوكاتو: خير إنشالله, أيه إللى حصل؟

الزبون: الله, أنت مش من هنا , و اللا إيه؟

الأفوكاتو: أنا ممكن أكون من هنا, وممكن أكون مش من هنا, و ده يتوقف على إيه اللى بيحصل.

الزبون: إنت حتتفلسف عليه و إلا إيه؟ مش كفاية إللى حصل؟

الأفوكاتو: أنا بقالى عشر دقايق عمال أسألك إيه اللى حصل, و كل إللى خدته منك الرد على سؤالى بسؤال, ممكن نوقف الحلقة المفرغة دى و ترد على سؤالى؟

الزبون: الحلقة ال إيه؟ , والمفرغة ال أيه؟ يطلعوا إيه دول؟

أصدك "الحلة و المغرفة" , لا يسيدى , الحكاية مافيهاش لا حلة ولا مغرفة, الحكاية فيها رغيف عيش.

الأفوكاتو: رغيف عيش مسكت الحارة كلها؟ ده لازم رغيف سوبر مان؟

الزبون: تصدق بالله, إصطباحى النهارده مش كويس, الواد يموت, و بعدين واحد جاى يكلمنى باللوندى, أيه بقى السوبر مان ده, إحنا نعرف البلموت, لكن لسه ما دقناش السوبر بتاعك ده.

الأفوكاتو: ما علينا, بالهداوة كده, إحكيلى أيه اللى حصل.

الزبون: أهو ده الكلام الموزون, و علشان نوزن الدماغ, ممكن نشرب واحد شاى علشان نروق دماغنا؟

ياسيدى ده أمر بسيط, يا سكوب... يا سكوب...

سكوب : أهلا بالأفوكاتو, إنت إتأخرت, لكنهم كلهم راحوا الجنازة.

الأفوكاتو: جنازة؟ جنازة مين؟ و مين اللى راحوا؟

سكوب؟ كل حبايبنا فى المحاورات, الحقبقة أول ما سمعوا, كلهم راحوا يشيعوا الجنازة, و كلهم حيحضروا العزاء اللية.

الأفوكاتو: أن بقالى ساعة هنا, و لغاية دلوقت مافهمتش حاجة, هو الناس هنا ما بتعرف تتكلم دوعرى, و يقولوا اللى عايزين يقولوه من غير مقدمات, و تواشيح, و لف و دوران؟

سكوب: الله يجبر بخاطرهم, مصرى, و عادل أبو زيد, و إبن مصر, و أحمد سعد, و سقراط, وسى السيد, و حتى حشيش جه, وراحوا الجنازة. ده حتى فيه ناس من اللى عزلوا من الحتة جم مخصوص علشان يقوموا بالواجب, منهم الدكتور رجب, و الكتور محبط, و ناس كتير.

الأفوكاتو:يا سكوب يا حبيبى ,ممكن نخش فى الموضوع؟

سكوب: بس إستنى لما أقولك أسامى إللى قاموا بالواجب, إخناتون كان هنا وكان تعبان شوية, و الدكتور رجب قاله يروح, و الست سلوى نشفت دماغها, و صممت تمشى فى الجنازة, و الدكتورة شعنونة مبطلتش عياط, وسى السيد و عصام كان باين عليهم الغضب, , و مخى متلخبط مش فاكر بقية الناس, لكن أنا مشفتش حاجة زى كده فى العشرين سنة اللى فاتو.

الأفوكاتو: أنا عارف إن صبرى طويل, لكن إنت و الزبون طولتوها أوى, و أنا مش حأسمع كلمة واحدة إلا لما أعرف إيه الحكاية.

سكوب: الحكاية بدأت برغيف,

الأفوكاتو: عارف الحتة ديى, و الزبون قال الكلام ده قبل منك , لاكن مشرحش.

سكوب: شوف يا إسيدى, بتقولى مطولش, و لما آجى أحكى الحكاية تقاطعنى؟ همه كل المسكفين كده؟

الأفوكاتو: آسف يا سكوب, الإثارة عملت فىّ كده, أنا حأخرس آهه, و إنت تتكلم.

سكوب: شوف يا سيدى, "حمدى أفندى" بعت إبنه "حسن" يشترى العيش من المخبز علشان الفطار, و إنت طبعا عارف حكاية المخبز, طابور طويل, و زحمة, و الكل عايز يخش فى الصف, و الصف يبقى خمسة, و الحارة تتسد, و عقبال ما الواحد يوصل للفرن, يكون ميعاد الغذاء مش الفطار.

ما علينا, الواد "على" إبن الست "فتوحه" كان واقف فى الصف, بص لقى "حسن " إبن " حمدى أفندى" بيزقه, و يقوله: أوعى ياله, أنا مستعجل.

بس "على" كان شايل من" حسن" إللى كان طول و عرض ماشاء الله, لأنه هزؤه كذا مرة فى طوابير العيش, علشان كده قال "لحسن": أنت لازم تقف فى الطابور زى كل الناس, و ألا إنت فوق راس أبوك ريشة؟

إتغاظ " حسن" راح خابط الواد" على " بونية وقعته الأرض,

قام "على" و الدم بينط فى عينيه, و راح ساحب مطوة قرن غزال, و دفنها فى صدر "حسن ".

وقع "حسن" على الأرض, ووقف" على " يبص بذهول, و راح طالع جرى.

الناس طلبت الإسعاف, لكن عقبال ما جت, كان " على " توفاه الله, ما فيش ساعة بعدها, و كان " حسن" فى السجن.

يأ افوكاتو , بيقولوا أكل العيش مر, لكن أنا مشفتش أمر من العيش ده.

حد يتصور إن إتنين من شباب الحتة يضيعوا مننا بسبب رغيف عبش؟

إلهى يا شيخ يحرق إللى كانوا السبب.

الأفوكاتو: و أنا أكرر الدعاء, و عن إذنك علشان ألحق الجنازة, و ألعن أبو سنسفيل إللى كانوا السبب.

se_ Elsyed
تاريخ المشاركة 27 March 2005 - 04:56 PM
عمنا الكبير الأفوكاتو ........... حفظه الله

تصدق بالله ...

انا موت على نفسي من الضحك وانا بأعيش مع المشاهد بتاعتك ...

ومش عارف ليه إفتكرت جميل راتب اللي ثقافته فرنسية وهو بيحاول يلعب دور معلم ولابس جلابيه ... بس برضوا بيتكلم فرنساوي ...

إنت بس إبقى قولي عايز تقول إيه باللغة الفرانكوشعبية وانا أبقى أترجمها إلى اللغة الحوارتية ... حتى ممكن نعمل شريط ترجمة تحت الموضوع ..

Quote
إصطباحى النهارده مش كويس

Quote
يشترى العيش من المخبز علشان الفطار

Quote
إبن الست "فتوحه "

Quote
قام "على" و الدم بينط فى عينيه, و راح ساحب مطوة قرن غزال, و دفنها فى صدر "حسن ".

سكر يا ناس ... هو .. هو جميل راتب بعينه

الأفوكاتو
تاريخ المشاركة 27 March 2005 - 06:20 PM
عزيزى سى السيد,

هل نسيت الجملة التى رددت فيها على الزبون , وقال , و قلت :

الزبون: الله, أنت مش من هنا , و اللا إيه؟

الأفوكاتو: أنا ممكن أكون من هنا, وممكن أكون مش من هنا, و ده يتوقف على إيه اللى بيحصل.

واضح إنى كنت لا من هنا, و لا من هناك.

و للعلم, أنا تعلمت الكلام العامى من المنتدى, حيث أن كل كتاباتى, و قراءاتى, قبل الإنضمام للمنتديات, كانت باللغة العربية الفصحى.

و نظرا لأنى متغيب عن الوطن لمدة تزيد على 35 عاما, فلا شك أن لغتى نحويا هى أفضل كثيرا ممن لم يتركوا مصر يوما واحد,أما من ناحية اللغة العامية, فإيدك و الأرض, و أحتاج إلى درس خصوصى من سى السيد.

جمال راتب من إنجلترا و بيتكلم عامى مكسر.

سقراط المصري
تاريخ المشاركة 27 March 2005 - 11:05 PM

رحمك الله يا افوكاتو

فعلاً مداخلتك جميله وحسيت فيها بنفس كلام سي السيد
Quote
سكر يا ناس ... هو .. هو جميل راتب بعينه

وعشان الناس السكر اللي قاعده معانا هنترجم الكلام......ياهادي
1-إصطباحى النهارده مش كويس = بقولك إيه انا دماغ امي النهارده مخرومه ولسه مااصطبحتش على الصبح .

2- يشترى العيش من المخبز علشان الفطار= غار راح يجيب العيش عشان يطفح

3- إبن الست "فتوحه " = الواد علي ابن قتوحه البياعه

4-قام "على" و الدم بينط فى عينيه, و راح ساحب مطوة قرن غزال, و دفنها فى صدر "حسن ".=

علي بقي ، الشيطان ولمواخذه ، ما علينا ، اما جاي هب ومكعمه مطوه ، بس ايه ، الضربه جات صح في الجون ، في صدره



تحياتي
سقراط ........صايع بحر هههههههههههه lo::

الأفوكاتو
تاريخ المشاركة 28 March 2005 - 01:47 AM
و معى سى السيد, و سى سقراط, سوف أصبح لهلوبة فى اللغة العامية, التى يتحدث بها أغلب الشعب المطحون,

منتظر بعض الدروس فى شكل مداخلات فى القعدة, حتى أتمكن من هذا الفن الفلكولور

Salwa
تاريخ المشاركة 28 March 2005 - 01:22 PM
سلوى : صباح الخيرات ..
سى السيد : وعندك اربعة صباح... خير وفل ونور وسعيد ..4 ياحاجة سلوى ...4 وبرضه ملناش بخت ..بس على الأقل خليناهم
يعرفوا اننا عارفين بس ...(( بنستخسر نقول ))..
سقراط : ياعم هم فاقوا بس لما لقوا نفسهم مغلوبين واحد صفر ..
الأفوكاتو : طيب ماهو ده مؤشر حلو ومعنى هذا انهم رفضوا الهزيمة ..
ابن مصر : ياعمنا حاتبدأ تانى تتكلم لنا بالنحوى ؟؟ ما قلنا لك دى ناس تخاف ما تختشيش ...هم مش مارضيوش بالهزيمة ؟؟ هم خافوا لا الجمهور يضربهم بعد كدة ...
عادل ابو زيد : لالالا.... يجب ان نعطى كل ذى حق حقه .
ده كان استهلال لابد منه ..
الولاد لعبوا كويس ياجماعة وانا متفاءل..كل شئ حايتصلح شوية شوية ..بس اصبروا .
عصام : مبروك يامدام سلوى ...برضه انتم كسبتوا تلاتة صفر ..
سى السيد : قصدك على الصين ؟؟؟
سكوب : وسع انت وهو ....عرفتوا آخر الأخبار ؟؟
ابن مصر : خير يارويتر .
سكوب : هاتولى افطر الأول الا انا على لحم بطنى من امبارح
هاتولى حاجة طازة وانا اقول لكم اخبار طازة بنار الفرن ..
سقراط : استخار واختار فشة او ممبار ؟؟
سكوب : انت حاتغنى لى ؟؟ والا حاتغنى علية ؟؟ بقولك انا عاوز افطر الأول ...صحيح الشبعان مش حاسس بالجعان ..الله يلعن المظاهرات وسنينها ...انا كان مالى ومال محمد جرمون ؟ طيب وهو انا مالى اطلع فى المظاهرة دى ؟؟ .بس علشان تشوفوا ان الصديق بيبان بس وقت الشدة .....فين الفطار ياجدع انت ؟؟
محمد جرمون : هات له اتنين فلافل وواحد فول وواحد شاى كشرى ..والحساب عندى ...احنا كمان جدعان يعنى .
سكوب : آه ياخويا ....انت بتغامر بشوية فلوس وانا كنت بغامر برقبتى ..
سلوى : القهوة ياجماعة ....ما تخلصوا بقى فطاركم وتحكوا لنا .
سى السيد : معلهش يامدام سلوى ...دى ناس معقدة ...نظام ذل يعنى ..

se_ Elsyed
تاريخ المشاركة 28 March 2005 - 01:42 PM
معليش يا سقراط عشان ده تراث ولغة شعب يابا .. فيجب أن نتوخى الحيطة والحذر في المصطلحات

Quote
الواد علي ابن قتوحه البياعه

بياعة إيه بالظبط ؟ ده اول سؤال ممكن ان يتبادر إلى أذهان السادة القُراء

إسمه الواد علي إبن فتوحة بياعة المحشي اللي على أول الشارع ...

وبعدين أشاساً أشاساً انا عمري ما سمعت عن واحده إسمها فتوحه !!!!!!!.... يالله ما علينا .
Quote
اما جاي هب ومكعمه مطوه ، بس ايه ، الضربه جات صح في الجون ، في صدره

معليش سقراط مازال متأثراً بماتش مصر وليبيا بتاع إمبارح ..

يابني إسمها الضربة جت ملو في صدره ...

Quote
منتظر بعض الدروس فى شكل مداخلات فى القعدة, حتى أتمكن من هذا الفن الفلكولورى.

يا متر محمود إحنا تحت امرك ..

أصبر علي شويه ( قد سنتين تلاتة ) لو مش مستعجل لحد ما أخلص الكتاب اللي بألفه عن هذا الموضوع وهاسمية " الدرر السنية في المصطلحات العامية " وهابعت لك إهداء لأول نسخة هانزلها في السوق - بس إبقى حاسب إنت الدي إتش إل -

صباخ الخير يا مدام سلوى ... معليش سقراط إستفزني وماخدتش بالي إن حضرتك قاعدة بتشربي قهوتك ومخبية وشك ورا الجرنان وبتقري صفحة الرياضة كمان ..