قهوة المحاورات

Salwa
تاريخ المشاركة 24 April 2005 - 05:58 PM
سلوى : ...... مساء الخير ياجماعة .

عادل ابو زيد : ..... مساء النور يامدام سلوى ....مالك ؟؟ سرحانة فى ايه ؟؟

سلوى : .....من صباحة ربنا وانا عاملة زى ام العروسة يعنى فاضية ومشبوكة ...مش عارفة ليه

افتكرت المقولة المشهورة اللى اطلقها ..heraclito ..لن نستطيع السباحة فى نفس النهر مرتين .

ومع ان ده كلام قديم من ايام اليونانيين القدماء لكنه منطبق علينا اليومين دول ...

ابن مصر : .....ماهو كمان قالك يامدام سلوى ...لا انت حاتبقى انت ولا النهر حايبقى النهر ..

سى السيد :....والا يمكن من مياه النهر الساقعة ...ماهى على طول بتتغير ..وهو فيه حد مجنون

يرمى نفسه مرتين ؟؟ ..طيب ماهو تانى مرة حايحس بنفس الغلب الأولانى ...انما ايه مناسبة الحديث ده ؟؟؟

سلوى :....ابدا ...مجموعة رؤساء الأحزاب..والحركات التانية اللى عمالين يوعدونا انهم حايصلحوا الأخطاء اللى فاتت وعمالين يقنعونا بضرورة تصديقهم هم المرة دى ...وكل مرة نكتشف انهم ..

اخناتون :...متكمليش ..متكمليش يامدام ...

لفوا لفوا وخبزوا عند عبد الله ...

سكوب :.....انهاردة حصل لى فصل ظريف قوى ...كنت املأ شهادة منشأ certificado de

origen ....وجيت عند حتة بلد المنشأ و تنحت لها كدة وكأنى فى عالم تانى وجت لى هستيريا

الضحك ..

سقراط :...ليه ياعمنا مانت كنت بعقلك ...

سكوب :....ابدا ابدا ....بس شر البلية ما يضحك ...اصلى افتكرت حاجة و....

سلوى :....ايه ياعم سكوب ؟؟؟.......بمناسبة شهادة المنشأ ؟؟؟...الا صحيح لو انا مت وطلبت

اتدفن فى مصر ...وشحنونى ؟؟؟ ...لازم يحطوا علية تيكيت ؟؟؟ ..بلد المنشأ يعنى ؟؟

حرفوش :...وربى... انتم عالم تقهر ..يعنى بتلخبطونا ؟؟ طيب نضحك والا نبكى ؟؟؟

عصام :....اصل مدام سلوى خايفة يكتبوا عليها ....تايوانى والا حاجة ؟؟..يعنى مش عاوزة غش (( انسانى )) ...

هشام عبد الوهاب :...آهو انتم كدة ...كل حاجة بتاخدوها بتهريج ..مع ان ده موضوع حيوى ومهم جدا جدا ..

سى السيد :....حيوى ؟؟ ..انت اكلت ايه انهاردة ياهشام ؟؟؟

هشام عبد الوهاب :...صحيح ...من حق كل انسان يعرف مصيره حتى بعد موته ...واللى حكت لنا عليه مدام سلوى قبل كدة ..واللى اتعمل مع مواطنين مصريين قبل كدة ...يخلينا نفكر بدون تهريج فى كل ده ؟؟

عادل ابو زيد :...انا شخصيا مش بشك فى حد ...وكل الناس بريئة حتى تثبت ادانتها .
يعنى حتى السفارة حاتعاكس اهل الأموات ؟؟ ده شئ غير حقيقى ولا اصدقه ..اين الاثبات ؟؟

احمد سعد :.....هو ايه الظلم ده ؟؟؟ اعترفوا ان كل شئ تمام ...انتم بس شايفين عيوب ؟؟؟

ثم ؟؟ قولوا لنا اسماء ؟؟ ...ايه يعنى لما يعطوهم التصريح بعد ستة ايام ؟؟؟

ده ربنا خلق الدنيا فى ستة ايام ؟؟ هو فيه كدة ؟؟؟ انتوا ناس ما بتقدروش ...

اخناتون :....ياعم هات لنا القهوة ...

سلوى :....هات لنا اسبرين معاك ...

Salwa
تاريخ المشاركة 04 June 2005 - 10:10 PM
سلوى : ..مساء الخير ياجماعة .

مصرى :..مساء النور يامدام سلوى ..هى ايه حكايتكم ؟؟؟ هو محدش بييجى والا ايه ؟؟ هو انتم خايفين ؟؟؟ تلاقيكم خايفين من يوم الأربعاء اياه ؟؟؟

سى السيد : ياعمنا احنا هنا بعيد عن النقابات ...

سكوب : ..بتقول النفايات ؟؟؟...نفايات ايه بقى ؟؟؟ النفايات الذرية ؟؟ والا ...

ابن مصر : ...اسكت ياسى السيد اسكت ...خليه كدة فاكرها نفايات آهى ارحم من النقابات ...

سقراط :...صح كدة ...دى النقابات بقت شبهة ياجدع ...ربنا ينتقم منهم ..وجعوا دماغى وقلبى ..هاتولى القهوة خلينا نشربها ونمشى ....آهو نشربها والسلام ...

سكوب : ..ايه ياعم انت ....هى شربة ؟؟؟...انت بتسمعنى يعنى ؟؟؟ مش عاجبك البن ؟
سقراط :..لا وانت الصادق ..........مش عاجبنى الفناجين ....هه بقى .

اخناتون : ..ليه بس هو حصل حاجة كفى الله الشر ؟؟؟ ...حصل لك تلوث والا حاجة من الفناجين ؟ اصل بعد حادثة البنت اللى ساكنة قرب مطروح اللى ماتت متسممة بسبب انها ياعينى اكلت خوخة .........(( خوخة خوخة خوخة ))..

الافوكاتو :..ياعمنا ..انت حاتغنى ؟؟ ما تكمل لنا حكاية الخوخة دى ؟؟ بجد ماتت؟؟

اخناتون :..اسكت ياافوكاتو ياخويا اسكت .....بكل بجاحة الوزير بيقول تلاقيها ماتت متسممة من اكلة سمك لأن الفواكه المرشوشة ما بتموتش ...
حايجننونى ياخويا ...اعمل ايه ؟؟؟...فضحتهم ومفيش فايدة ...آل ...وانت مايل وايه يعدلك ؟؟؟..طيب ماشى ...الاسماك من عند الترعة مسممة علشان مياه المجارى والبلاوى المتلتلة التانية لكن فيه فاكهة مرشوشة بالمبيدات ...والمبيدات السرطانية بتاعتهم ....ومتموتش ؟؟؟

سقراط : ..اصلى آخر مرة كنت هنا جالى برد والدكتور قاللى اتعديت وشربت مطرح حد مريض ...وانا مبشربش مطرح حد ...تبقى الفناجين مبتتغسلش كويس ؟

سكوب :...لأ بقى ....ده انت جاى ناويه انهاردة ....وانا ...

سلوى : ...على فكرة ياجماعة ...انهاردة ابنى قاللى حاجة ظريفة قوى قوى ...

قاللى ان فيه نوع من انواع الفخار اللى بتتعمل منه الفناجين (( طبعا متقولوش ان الفناجين بتاعة القهوة فناجين صينى اصلية ))...دى مخلوطة طبعا ..
مهما اتغسلت برضه بيبقى فيها آثار عالقة ...من اى نوع من الجراثيم ...الا اذا كان القهوجى من وقت للتانى بيضعها فى الكلور ...
وسالت ابنى ..طيب ايه الحل ؟؟ نبطل نشرب قهوة ؟؟؟...قاللى لالالالالا..حقولك خدعة حلوة ...
كل الناس بتستعمل ايدها اليمين ؟؟ صح ...فبالتالى بتمسك الفنجان من ودن الفنجان ..كلهم بيشربوا من نفس المكان ...حتى لو اتغسل الفنجان ..
قليل بقى لو لقينا واحد (( اشول )) ..
آهو الأشول ده صعب انه ياخد عدوى ....لأنه بيشرب من الناحية التانية من الفنجان ..

سكوب :...ابسط ياعم ....بس اوعى تدلق القهوة ..

جى جى :...دلق القهوة خير ....انا بقى هات لى ليمون ..وشفاطة ..مش عاوزة اشرب مباشرة من الكوباية ...

مصرى :...مساء الفل....

سقراط المصري
تاريخ المشاركة 05 June 2005 - 12:28 AM

قصه :صغيره سريعه لطيفه بنت ناس.

اشكرا على تذكري ضمن شخصيات القصه.

في الغالب لما بقرأ قصه او موضوع بحب اقوم بلعبه ظريفه
وهي اني اقرأ اول جمله مع اخر جمله مع بعض.
Quote
سلوى : ..مساء الخير ياجماعة .
مصرى :...مساء الفل....

نهاره فل ان شاء الله :blink:
سقراط

الأفوكاتو
تاريخ المشاركة 05 June 2005 - 10:30 PM
أصدقائى الأعزاء,

تحياتى لكل من زار قهوة المحاورات,

و رغم أنى لا أطلع كثيرا على المنتديات أثناء طوافى, فإنى لم أستطع مقاومة إغراء الإطلاع على جمهور القهوة.

أشكر الأخت سلوى, و الأخ سقراط,و الأخ فتحى إسماعيل, و الصديق القديم مصرى, و جميع من كتبوا حديثا فى هذا الركن المصرى الصميم.

تحياتى لكم لحين عودتى.

soooo
تاريخ المشاركة 07 June 2005 - 02:47 AM
سوووو : مساء الفل عليكم
سي السيد : مساء الـ .. مييييين .. سووو يا سووو حبيبي حبسوه
سوووو : اعمل ايه بقى يا سي السيد .. لقيت نفسي كل مره بابقى قاعد على جنب وخايف اقعد معاكم تكرفوني وللا حاجه
سكوب : - وهو بيميل على مدام سلوى - مين ده يا مدام سلوى ؟
سلوى : ده واحد كان نزل كام موضوع هنا .. وبعدين اختفى
سي السيد : اقعد يا سوووو .. واقف ليه كده ومكسوف
سوووو : ولا مكسوف ولا حاجه .. بس بعيد عنكم يا جماعة عندي صداع غريب
سكوب : الف سلامه عليك .. انت بس اشربلك فنجان قهوة هاتلاقي نفسك فل الفل
سلوى : انت كنت مختفي فين طول الفتره اللي فاتت ؟
سوووو : مافيش يا مدام سلوى .. مشغول هنا وهناك .. زي ما بيقولو كده باجري جري الوحوش
سقراط : بس اوعى نفسك يتقطع من كتر الجري
عادل ابو زيد : مافيش دليل واحد يثبت ان الجري بيقطع النفس .. لازم نتحرى المصداقية في الحوار ونجيب دليل
الافوكاتو : انتو ماتتصوروش انا بافرح قد ايه لما الاقي القهوة كل يوم بتزيد واحد
سي السيد : قوللي بقى يا سوووو .. انت كنت مكسوف ليه تقعد معانا
سوووو : الحكايه مش كسوف ولا حاجه يا باشا
عادل ابو زيد : لعلمك .. الباشاوية انتهت من زمان .. ولو لسه شايفها موجوده .. هات الدليل والاثبات على ده
سلوى : انتو عارفين .. انا قريت في كتاب للفيلسوف الاغريقي (زكيوس وحوحوس) ان الالقاب دي كانت موجوده قبل ما يتم اكتشاف الاتوبيسات
جي جي : هي الاتوبيسات اكتشفت سنة كام ؟
اخناتون : اختلفت مصادر التوثيق التاريخي للاكتشاف ده .. لكن كل المؤرخين اجمعو على انها من زمان قوي
سي السيد : عاجبك كده يا عم سوووو .. اديك دخلت بالقعده لحوار الاتوبيسات من اول يوم قعده معانا .. امال كمان يومين ايه اللي هايحصل
سوووو : هو انا قلت حاجه من اول الموضوع !!!؟؟
سي لافي : هو فعلا ما قالش حاجه .. دي مجرد استنتاجات تاريخيه
عادل ابو زيد : لازم نتحرى المصداقية في التاريخ .. فين الدليل
سقراط : طب بقلكم ايه .. مانسيب التاريخ والاتوبيسات ونتكلم في اللي هايحصل دلوقتي في البلد ؟؟
سوووو : ولا حاجه
الافوكاتو : ولا حاجه ؟؟ ده ايه النزعة التشاؤميه دي ؟؟
سكوب : مش حضرتك برضه يا افوكاتو اللي بتقول انك بتبقى مبسوط لما حد يقعد معانا في القهوة .. اهه .. طلع جايلنا متشاؤم عشان يحبطنا
سوووو : يا جماعه انا مش متشاؤم ولا باحبط حد .. بالعكس .. بس حصل معايا موقف النهارده خلاني اقول كده
ابن مصر : موقف ايه كفى الله الشر
سوووو : كنت راكب تاكس وراجع من الشغل .. لقيت سواق التاكسي زعلان قوي عشان العلاوة اللي في الجرايد
سي السيد : علاوة !!! وهو زعلان !! تيجي ازاي دي ؟؟
سي لافي : هي العلاوة كام ؟
جي جي : انا قريت انها 20% بدون حد اقصى .. وبحد ادنى 30 جنيه
سوووو : انا كنت فاكر زيكم كده .. لحاد مالقيت في استثنائات من العلاوة دي
سكوب : استثناءات ازاي ولا مؤاخذه ؟
سوووو : يعني الهيئات القضائيه والهيئات التابعة لوزارة الاعلام ووزارة الخارجية
اخناتون : والنبي ايه .. امال معموله لمين ؟؟
سوووو : معمولة للباقي .. وده في حد ذاته غريب .. يعني العلاوة دي معموله لمجموعة افراد او لمجموعة هيئات .. نسبة مرتباتهم تكاد تكون مش كتير عشان تكون العلاوة عليها كتيره .. او حتى يكون ليها تاثير على ارتفاع الاسعار .. اي نعم فيها مديرين مرتباتهم حاجه هلوما .. انما نسبة العمال اكتر
سلوى : ماهو معظم العاملين في الهيئات التعليميه العليا من الدكاتره بتكون مرتباتهم مرتفعه شويه
سوووو : انا معاكي في ده .. وغير طبعا الملازم اللي بيبوعها اوقات الامتحانات واللي بيجبرو الطلبة انها تشتريها .. بس هي الهيئات دي .. مافيهاش فراشين .. مافيهاش عمال مرتباتهم ماتحصلش 100 جنيه .. يعني لو خدو العلاوة دي هاتفرق معاهم .. اهو على الاقل يجيو بيها نص كيلو لحمه ويشموه طول الشهر
سقراط : بس انا سمعت ان العلاوة دي مافيهاش استثنائات غير المحالين للمعاش
ابن مصر : يعني دول شويه وللا مالهمش نصيب ياكلو من فتة الاستفتا
سكوب : يعني ايه .. الجماعه بتوع المعاشات اللي عمالين يسحبو في مشاريب .. مش ناويين يدفعو الشهر ده كمان !!!!
عادل ابو زيد : انا مش فاهم .. انت ايه اثباتك يا سوووو على كلامك ده ؟
سوووو : اثباتي ان سواق التاكس .. واللي شغال فراش في وزارة الخارجية .. اتخانق معايا تحت البيت بعد ما وصلني .. عشان عايز نص جنيه زياده
سلوى : نص جنيه !!!!!
سوووو : وعهد الله زي ما باقولكم كده
سلوى : لااااا .. هاتلي اسبرين
سوووو : وانا هاتلي حد يحاسبلي عالشاي .. ابو نص جنيه


ملحوظه :
اوعى حد يكون زعل منني ولا حاجه اني دخلت معاكم في الموضوع ده او اني اتكلمت بطريقه ممكن تضايقه
وشكرااااان

سقراط المصري
تاريخ المشاركة 07 June 2005 - 03:08 AM
منور يا سوووووو
طيب والله انا اللي هحاسب على الشاي المره دي :wub: :wub: :wub:
حلوه
تحياتي
سقراط

تاريخ المشاركة 08 June 2005 - 07:30 PM
سكوب : بصوا بقي و من الآخر كده .. بما ان الواد متولي صبي القهوة غايب بقاله فترة طويلة .. و في الأول علشان الناس الحلوة ما تروحش قهاوي تاني .. استقلت من شغلي كرئيس مجلس ادارة بنك فيريرو روشيه الأنتنرناشيونال .. و لبست المريلة و ممشي المشاريب عالنوتة .. وده يقول علي حسابي و ده يقول علي حسابي.. و ماشفناش مليم أحمر من تحت راس الشغلانة المهببة دي ...
فمن دلوقتي و زي ما قال المعلم كفاية في الجنينة شعارنا حيكون :

الأستمرار من أجل الأستحمار


و القهوة من دلوقتي بقت بتاعتي لحد ما تدفعوا اللي عليكم ... و نشوفلنا واحد محامي لسانه عسل يكتبلنا اعلانات بكده في كل الحواري ... و اسمي من دلوقتي يا غجر المعلم سكوب.. فتوة الحارة الأوحد ...
و اللي حيعترض حيتلب بشومة ...
و اللي حتعترض عندي اللي يسرق غسيلها من عالحبل ...
و اشد سكينة الكهربا و اقطع عليكم أي نور .. لحد ما تقولوا كفاية ....
و كله بالقانون ...



اخناتون : ايه ده .. هو ده سكوب بتاع زمان اللي نعرفه ... سبحان الله ايه اللي حصل في الدنيا يا جدعان ... مالك يا جدع ... ما انت كنت طيب و بتتكلم كلام حلو زمان.... إخص عليك يا زمن البني آدم بيتغير فيه علشان المصلحة ...
الأفوكاتو : قوموا بينا من هنا يا جماعة ... ابقي ورينا لما تبقي لوحدك من غير ما حد يرد عليك حتعمل ايه ... يا ..... معلم.

الأفوكاتو
تاريخ المشاركة 13 June 2005 - 12:10 AM
الأفوكاتو:

الرسالة وصلت يا" معلم".

تاريخ المشاركة 17 June 2005 - 10:02 PM
و فجأة أنفجر عصام و سي السيد و ابن مصر و سكوب في الضحك .. ضحكات مجلجلة و هم يتبادلوا نظراتهم المعهودة .. تلك النظرات التي تجدها فقط في عيون الأطفال الأشقياء عندما ينتهون من عمل مصيبة ...

سكوب : ايدك يا اسطي علي العشرة جنيه .. آديني كسبت الرهان ...
سي السيد : لأ يا خواجا .. دول لسه قاعدين و ما سابوش القهوة ...
سكوب : احنا حنحمرق ... رد فعلهم و قرارهم كان اللي راهنتك عليه ... ايدك عالعشرة جنيه ...
سي السيد : حر نار في جتتك ... بس دول يتدفع بيهم تمن المشاريب للكل...

تبادل الأفوكاتو و أخناتون النظرات ... ثم تبادلوا هم أيضآ الأبتسامات الهادئة .. بينما انضمت سلوي لهم قائلة : كده يعملوها فيكم ...
الأفوكاتو: اصل سكوب كان جد خالص ... لدرجة اني صدقت اللي بيقوله فعلآ ...
سكوب : حقك عليا يا متر ... اصلها الموضة دلوقتي .. و الواحد طهق من عيشته .. و ضربت في دماغنا نعملها علشان نشوف رد فعلكم ...
أخناتون : انا برضه ما كنتش مصدق وداني ... الله يضحك عليكم مخاليقه يا بُعادَ..
عصام : سماح بقي يا كبيرنا ... نزل هنا واحد ينسون و واحد عناب يا ابني علي حساب سكوب ...

أبن مصر ( موجها كلامه لمحمد و فايولين كينج ) : بالحق يا محمد .. المرة اللي فاتت كنت سمعتك بتتكلم عن فكرة جهنمية .. و المحاكم و القضايا و البلاوي ديه .. ما تشركنا في افكارك يا باشا ...
فايولين كينج : يا عم انت حتسمع كلام بيسوبيسو ... ده خلاص لسع ...
محمد : بيسوبيسو .... بيسوبيسو دي تطلع ايه يا بتاع الربابة انت ؟
فايولين كينج : الوااااد الصغنن اللي عمال يعمل بيسوبيسو اللي انت معلق صورته في البلكونة بتاعتك بقالك فترة ...
محمد : مييييييين .. شحاتة ... الواد شحاتة عملته بيسوبيسو .. ماشي... طب احكم انت يا ابن مصر اذا كانت الفكرة اللي في دماغي تتاقل بالدهب و الا لأ ؟
ابن مصر : يا عمنا انت قلت حاجة لغاية دلوقتي...

محمد : واحدة واحدة ... امشوا معايا واحدة واحدة ... كلكم عارفين اني وارث فرن بلدي ...
فايولين كينج : و ايه العلاقة بين الفرن و المحاكم والقضايا ؟
محمد : هما مش بيخصخصوا كل حاجة دلوقتي .... خلاص انا حقفل الفرن و اقلبه محكمة ...
فايولين كينج : حتعمل ايه ؟ .. الفرن حتقلبه محكمة؟ .. و حتسميها ايه انشاءالله ؟.. محكمة الأمانة لصاحبها محمد بيسو ...
محمد : يا جدع انت افهم .. العملية ديه كبيرة قوي و مكاسبها بالهبل .. و سوقها عمره ما بينتهي .... احسبوها في مخكم ... فيه كام مليون قضية متأجلة في مصر .. علي بال ما تخلص واحدة منهم تكون وصلت للجيل التالت اللي مش عارفين حتي أصلها ايه ... انا بقي افتح محكمة خاصة برسوم ... و الناس تيجي تعرض قضاياهم عندي .. و المجرمين حيدوروا علي مصلحتهم حتي لو دفعوا زيادة ... مثلآ ...مثلآ ... عقوبة السرقة ايه ؟
فايولين كينج : مش اقل من تلات سنين حبس ...
محمد : عندي أنا اخلصهالك قي سنتين بس ....
فايولين كينج : يا حلاوة .. و الناس تتشجع انها ترتكب جرايم ...
محمد : صح .. و الأقتصاد يتحرك .. المخدرات عقوبتها ايه ؟
فايولين كينج : تأبيدة ...
محمد : عندي انا تاخد 8 سنين .. تقضي منهم خمسة و بعدين اطلعك في الخباثة ...
فايولين كينج : الفكرة مش بطالة ...
محمد : المادة 41 من قانون العقوبات اخلصهالك علي 37ونص ... و الله ما حكسب فيها مليم .. لكن برضه انا بربي زباين ... و الواحد لازم يضحي في الأول ...
فايولين : بس أنا رأيي انه مشروع فيه مخاطرة كبيرة ...
محمد : ليه ؟
فايولين كينج : هو ايه اللي ليه ؟ .. انت مش شايف ايه اللي بيحصل في البلد ... اي جريمة بقت قانونية و شيء عادي .... تسرق .. عادي .. ترتشي .. عادي ... تضرب تعتدي ... عادي ... تعمل اللي بدالك كفاية يكون ليك معرفة .. و القانون ما يعرفلكش سكة ... يعني اللي معاه فلوس فوق القانون بتاعك .. اما اللي حيحتاجلك فبني آدم فقير معهوش حق المحكمة الخصوصية بتاعتك .. ايه رأيك بقي ؟...
محمد : ما انا حطلب معونة من مجلس الشعب ... انا بقدم خدمة للحكومة و للمواطن ...ايه هما لا يرحموا و لا يسيبوا رحمة ربنا تنزل ... زي ما بيدعموا العيش و الدوا ... يدعموا القضايا ... المواطن يدفع النص و الحكومة النص ... و بعدين علشان العملية ما تفنيخش مني .. انا جوا المحكمة حفتح سوبر ماركت .... و بكده الواحد ما يضيعش وقت .. يعني الراجل من دول يكون جوا بتتعرض قضيته ... مراته بدل اللطعة تخش السوبرماركت تشتري اللي محتاجاه ... او الراجل اللي جاي مع مراته السوبر ماركت علشان يشتروا حاجاتهم .. يشوف المحكمة نضيفة يقوم ينقل قضيته عندي ... ايه رأيك ؟ ...

الأفوكاتو : قوم بينا بجد يا أخناتون .. المرة دي مش هزار ... ديه عالم لسعت بجد ... الله يخرب بيتك ياللي في بالي ....

الأفوكاتو
تاريخ المشاركة 18 June 2005 - 09:29 AM
الأفوكاتو:

آسف يا جماعة, أنا غبت شوية لأنى , ومازلت, فى حالة توهان, كل يوم أصحى ألاقى نفسى فى مكان مختلف, و ساعات أسأل نفسى:

أنا فين النهارده؟.

سكوب:

إنت النهارده هنا فى القهوة يا أفوكاتو, صحى النوم.

الأفوكاتو:

إللى جابنى القهوة النهاردة إنى إطمنت على حبيبى إخناتون بعد ما ربنا أكرمه, و استرد صحته, جيت أطمئن عليه شخصيا,

محمد:

فيك الخير يا أفوكاتو.

ألله يكرمك يا أبو حميد, أنا شايف إن نجمك ساطع, و ربنا يزيدك من نعيمه, بس حاسب من سكوب, إللى اليومين عمال يلعب معايا و معا إخناتون لعبة ذكية, ماتجيش من غير راجل ذكى.

إخناتون:

سعدنا بتوقفك بالقهوة, وحشتنا تعليقاتك , و عبقال ما تنتهى رحلتك, و تستقر جنب تونى بلير, دلدول بوش الأول, و يا رب يسقطوا واحد ورا التانى, زى ما منافقى مصر بدأوا فى السقوط مثل سقوط أوراق الشجر فى الخريف.

سكوب:

إنت فاهمنى غلط يا أفوكاتو, أنا مش بالعب لعبة ذكية, أنا بدأت برنامج قريت عنه فى أمريكا عن تنشيط الأعمال و البيزينس بالوسائل السكولوجية, و ده برنامح بتستعمله " كوندوليسا رايس" علشان تثبت للعالم أنها من أنشط وزراء خارجية أمريكا, و ده نفس البرنامج إللى إستورده حكام مصر, علشان يلمعوا فى صورة العائلة المباركة, بس الفرق هو إنى أستعمل البرنامج بذكاء, فى حين إنهم بيستعملوه بغباء لا يخفى على رجل الشارع المصرى.

إخناتون:

أنا كنت متأكد إن سكوب بيجرب حاجة, لكن ما توقعتش إنه بيجرب الهباب ده, إللى إستعملته أمريكا على جنودها فى حرب فيتنام, و أظن كان يتركب من مواد تسبب الهلوسة.

سى السيد:

و الله عفارم عليك يا إخناتونا, إللى إحنا شايفينه دلوقت هوه هلوسة فى هلوسة, بس هلوسة سكوف أخف على قلبنا من هلوسة "كوندا" و هلوسة الأسرة الحاكمة.

سكوب:

فضوا القهوة بسرعة, الأمن المركزى جاى, كله يهرب بهدومه.


الجميع يهربون من القهوة..... سكوب يضحك بصوت عالى..... و يقول:


ضحكت عليكم.... ضحكت عليكم مرة تانية.

مدام سلوى, تاتى من بعيد:

يا خسارة, يظهر إن جميع رواد القهوة لمسهم عفريت.. أشتوت.. أشتوت,

بخروا القهوة يا جماعة.

تاريخ المشاركة 22 June 2005 - 12:15 PM
سكوب : والله واحشنا اوي اوي يا متر .. ما ترجع بقي .. انت مازهقتش من الأجازة ...
عصام : انت بتكلم مين يا سكوب ... ما هو مشي ...
سكوب : بكلم نفسي ... بكلم نفسي يا خويا ... ايه حتي ديه ممنوعة كمان ...
عصام : اتكلم يا خويا براحتك .. حد منعك .. قهوة مجانين ... هو انا حلاقيها منك و الا من سي السيد ...
سي السيد : مالكش دعوة بيا يا عصام ... انا عفاريت الدنيا بتتنطط قدام عيني النهارده ... اللهي اشوف فيكم يوم يا غجر ...
أبن مصر : دول بقي مين اللي عايز تشوف فيهم يوم ...
سي السيد : بتوع الزفت ... المنتخب ... 2 صفر يا عالم .. و من ساحل عضم الجمل ...
ابن مصر : ما هي خلاص أتحلت... انا سمعت انهم حيجيبوا مدرب المانيا علشان نوصل لكاس العالم اللي بعد اللي جاي ...
سي السيد : و ده ناوي علي ايه انشاءالله ...
ابن مصر : ناوي يلف الأقاليم و النجوع .. و ينقي ولاد صغيرين يطوعهم و يبنيهم علي أصله .. من تغذية و تدريب .. و كل الحاجات ديه يعني ...
سي السيد : ايه ده .. مجنون ده و الا بيستعبط ... هو مش فاهم انه بكده احتمال نوصل لكاس العالم ....
ابن مصر : أحتمال ؟ ده قالها بعضمة لسانه ... حوصل بمصر لكاس العالم يعني حوصل بيها ...
سي السيد : هو فاكر نفسه مين ... ينط علينا بالبراشوت من اوربا .. و يشيل و يحط .. و انا حعمل و اسوي ... مين اللي طلب منه الكلام د ؟.. يعني لو احنا عايزين نوصل لكاس العالم كنا حنستناه سعادته ييجي ياخد بايدينا .. كأننا يا أخويا ما نعرفش نوصل لوحدينا ... يعني بعد 15 سنة من لعب مشرف في التصفيات و عمرنا ما وصلنا لكاس العالم ... ييجي البيه دلوقتي و عايزنا نعملها .. ليه .. علشان نلعب مع البرازيل ... الأرجنتين ... أيطاليا ؟ لو هما عايزين ييجوا هما عندنا نلاعبهم ...
ابن مصر ( بخجل ) : ما هو انت عارف ان ده شرف يا سي السيد .. و العالم ديه عمرنا ما حنشوفها بتلعب معانا لله في لله يعني ...
سي السيد ( بغضب ) : يعني عايزنا نعمل ايه .. نكسب التصفيات و نروح احنا نلاعبهم ؟
ابن مصر : هي مرة واحدة يا سي السيد .. نطلع مرة في كاس العالم .. نشوف معمولة ازاي .. و بعدين نبقي نرجع تاني ... يعني حاجة كده مشرفة ممكن بعديها نضمها للCV ... اهي ممكن تنفع في المستقبل ..
سي السيد : والله انت طيب يا ابن مصر .. انت يا ابني ما تتخيلش المصايب اللي ممكن تحصل لو طلعنا كاس العالم ...
ابن مصر : مصايب ... نوصل لكاس العالم و تبقي مصيبة ؟ انت بتخرف يالاه..
سي السيد : يا ابن مصر افهم .. لازم تعرف ان الشعب المصري متبرمج و مستسلم تمامآ ل "وضع الأمل" ...
ابن مصر : مين ديه اللي وضعت بت اسمها أمل ... و المصريين استسلموا ليها ...
سي السيد : يووووووووووه .. انا مش ناقصك يا خويا .. كفاية واحد بس في الشلة .. ما تبقوش اتنين ... افهمني يا ابن مصر .. الأمل .. كلنا عايشين بس في الأمل .. الأمل ان كله حيتغير للأحسن ... العيشة .. الصحة ... العدل .. الشغل ... الضمير ... و نفس الفكرة مع الكورة .. كل مرة نفضل نلعب و الناس يبقي عندها أمل اننا حنكسب و حنوصل لكاس العالم .. و علي الآخر خالص .. نخسر و نبتدي من جديد ... لو كسبنا مرة الناس حتاخد علي طعم المكسب و حتبص عالحاجات التانية ... فهمت ...
سكوب: انا ما فهمتش ....
سي السيد : حد كان سألك يا زفت ... انا بسأل أبن مصر ...
سكوب : طيب .. ابقوا افهموا براحتكم ... انا حروح اشتري المغات علشان أم أمل لما تبقي تقوم بالسلامة بقي ...
عصام : موت يا حمار...

الأفوكاتو
تاريخ المشاركة 14 July 2005 - 01:41 PM
الأفوكاتو:

أنا جيت القهوة علشان أمسى على الحبايب على الواقف, وإنشاء الله حاتشوفونى كل يوم.

Salwa
تاريخ المشاركة 21 August 2005 - 06:39 PM
سلوى : مساء الخير ياجماعة الخير .

هى ايه الحكاية ؟؟؟ هم الجماعة بطلوا ييجوا ليه ؟؟؟

سكوب : ابدا يامدام سلوى ....هى حالة زهق على نشاط كدة .

سقراط : افهم بقى ؟؟ يعنى ايه زهق على نشاط ؟؟؟ ياعمنا ماترسى لك على حل ؟؟ هو انت كل كلامك كدة بترجمه ترجمة فورية قبل ما تقوله ؟؟

سكوب : يعنى ايه ترجمة فورية ؟؟؟ بترجمه فى مخى يعنى ؟؟ لالا ياعم ...انا قصدى فيه فى الجو قوة قتل ثلاثية هى السبب فى الحال المايل اللى احنا فيه .

الأفوكاتو : حلوة ياسكوب .....
ياسقراط ياخويا هو قصده اننا كلنا زهقانين ومش طايقين حتى نفسنا ..ومع ذلك تلاقى ...الاعلام ...والحالة الاقتصادية ...والقرارات السياسية ..الثلاثة دول بيخلونا عندنا نشاط ...(( نشيط )) ..

سقراط : طيب ما طبعا النشاط لازم يبقى نشيط .

الأفوكاتو : هو فيه ايه انهاردة ياسقراط ؟؟؟ انا بقولك عندنا نشاط (( نشيط )) ...يعنى بنطلع شياط ...يعنى كلنا ولعنا ياباشا .....هو انت اتغديت ايه انهاردة ؟؟

سقراط : ابدا ...انا من ساعة الفطار مأكلتش حاجة ...وبصراحة مشغول ...عمال احسب اللى اتصرف على الدعاية الانتخابية ...والوعود ...وبقول مش كان مفروض يوفروا كل ده ويحققوا واحد على الف من الوعود دى ؟؟؟ وبصراحة كدة بفكر ...ومش ببطل تفكير ..ياترى اصدق ربع كلامهم وارجع مصر ؟؟؟ والا اعمل زى باقى الشلة ...؟؟ يعنى فيه صوت بيرن فى دماغى بيقوللى .....كما كنت .

سكوب : حلو ياعم ؟؟ يعنى انت كمان بتسمع اصوات زينا .؟؟؟ كما كنت يعنى خليك مكانك مش كدة برضه ؟؟

فيولينكنج : طيب يعنى انتوا مستنيين ايه ؟؟؟ شفتوا كم التنازلات ؟؟؟ شفتوا الفرح ؟؟؟

مهيب : فرح مين ياعم ؟؟؟ دى الناس وصل بيها الأمر انهم مصممين ان النسر مات ؟؟

سلوى : عليه العوض ومنه العوض ........
الشاى وحياتك الا مش حاسة بدماغى ....

سكوب : آهو انا بقى اللى جه عليه الدور واقول : حلوة !!!
دماغك يامدام حايوجعك قوى فى سبتمبر .....ده كل دى بروفات هاهاهاههاهاى ...

الأفوكاتو
تاريخ المشاركة 22 August 2005 - 01:08 AM
سلوى:

صباح الخير يا جماعة, أنا شايفة إن العدد زاد, لكن شكلكم مكشر ليه كده؟

سكورب:

صباح الخير يا ست الكل, الحر خنق الناس, و خلى أخلاقهم مولعة, علشان كده حأنزل كازوزة ساقعة علشان تهبط الحرارة شوية.

الأفوكاتو:

الكازوزة مش حتهبط الحرارة يا سكوب, مادام أسباب إرتفاع درجة الحرارة موجودة, إحنا عاوزين رحمة ربنا تنزل علينا, و تهبط الجو العام. و تزيل الغمة من القلوب.

سقراط:

أنا كنت فاكر إنى بس اللى يمكن يتفلسف, لكن يظهر الفلسفة بقت موضة.

عصام:

الحقيقة إن الجو متوتر , و لكن ده أمر طبيعى و خاصة إننا على وشك إنتخابات عارفين نتيجتها, زى ما يكون التلميذ عارف إنه حيسقط فى الإمتحان, لكن مش عارف حجم الفشل.

عادل أبو زيد:

الفشل قد يكون بداية للنجاح, فدعونا نتفاءل , فرُب ضارة نافعة.

سلوى:

كلام معقول, و مافيش قدامنا غير إننا نهدى نفسنا, و نترقب الأحداث, على الصعيد الداخلى,و الخارجى.

فيولينكنج:

الحقيقة فيه حاجات كثيرة جعلت الجو مولع, و ما يحدث على الساحة السياسية بيولعها أكثر.

الأفوكاتو:

فينك يا إخناتون تتحفنا ببعض حكم المرحوم جدك, و تخليه ينصحنا كيف نتعامل مع الغضب و الحسرة, ونتعامل مع بلاوينا بهدوء النفس, و تفتح العقل, و حلاوة اللسان, الذى هو بلسم النقاش.

سقراط:

ما فلنا يا أفوكاتو الفلسفة دى من إختصتصى, و خليك إنت فى "الكانون" بتاعك.

مهيب:

الكانون؟ إنت عندك مخزن يا أفوكاتو ؟ بتيع فيه إيه؟

الأفوكاتو:

ربما يقصد صديقى سقراط كلمة " قانون" و لكن فى الواقع " كانون" و تكتب بالإنجليزية:

Canon

معناها " دينى" , و أؤكد لأخى سقراط أنى لا أناقش الموضوعات الساخنة فى الجو الساخن, لأن النهاية تكون عادة عركة كلامية, الكل يخرج منها مبطوح, و ننتظر الشتاء إنشاء الله لكى نناقش الموضوعات الساخنة.

سكورب:

عبال الإنتخابات ما تخلص, نكون دخلنا على الخريف, و تهدى نفوسنا, و نبطل تخريف,

روقوا دمكم , و اشربوا الكازوزة, ماهى النهارده ببلاش.

عصام:

إنت مرشح نفسك لإيه يا سكورب؟ إنت نازل رش زى صاحبنا إياه, بس رشه مستقبلى, و رشــــــك
" حالى", إنت عايز مننا إيه فى مقابل الكازوزة؟

سكوب:

و الله ما أنا عايز غير الكلمة الطيبة.

محمد:

و الله كلام معقول من الكل, ياريت كل المحاورات تتم فى القهوة.

عادل أبو زيد:

لا مانع من عرض هذا الإقتراح على جميع الأعضاء.

سكورب:

أهو كده الشغل, و ليك يا أخ محمد " قومسيون" لو الفكرة نجحت.

الأفوكاتو:

مازالت درجة الحرارة تؤثر على العقول رغم كازوزة سكورب.

حان وقت غلق القهوة.

سقراط المصري
تاريخ المشاركة 22 August 2005 - 02:50 AM
سلوى: صباح الخير يا استاذ

الأفوكاتو: صباح الفل يا مدام سلوى

سلوى: كنت عاوزاك في موضوع

الأفوكاتو: خير

سلوى: تفتكر نقدر نعملها

الأفوكاتو يصمت قليلاً ، ثم يرفع بصره بتمهل عن فنجان القهوه ويجيبها : فكرت في سؤالك كتير ووصلت ان مافيش حاجه تقدر تمنعنا ، نعم يا مدام سلوى احنا نقدر نعملها.

سلوى: ازاي، احنا عندنا امكانيات ان احنا نعملها

الأفوكاتو: مدام سلوي، طول مافيه ناس زيي وزيك زي عادل ابوزيد وابن مصر وعصام وابو حلاوه وسي السيد وسكوربيون..... وغيرهم كتير قوي قوي تأكدي ان احنا نقدر.

سلوى: طيب امتى

الأفوكاتو: ياخساره يا مدام ، ولا انا ولا انت ولا الناس دي كلها هتشوف اليوم ده

سلوى منزعجه: الله ، امال مين اللي هيشوفه ويكون هناك ساعتها

الأفوكاتو باسماً: احفادنا واحفاد الناس اللي قلت لك عليهم هما اللي هيكونوا هناك ساعتها

سلوى: انا شيفاك متفائل

الأفوكاتو: والتشاؤم هجني من وراه إيه، لازم اتفائل.

سلوى: على رأيك دوام الحال من المحال.

وعندما كانت سلوي تهم بالوقوف سألها الافوكاتوا: على فين

سلوى: رايحه اشتري ورد

الأفوكاتو: مع السلامه، ومخاطباً امشير قائلا بإبتسامه: احلى عصير ليمون من فضلك يا أمشير.






تحياتي
سقراط

تاريخ المشاركة 24 August 2005 - 09:53 PM
يدخل سي السيد القهوة بهيصة ترحيب كالعادة ...
- صباح الخير يا شباب ... صباح الخير يا عمدة ... صباح الفل يا أفوكاتنا ... صباح العسل يا مدام سلوي ...

مدام سلوي: يسعد صباحك يا سي السيد ... اخبارك ايه ؟
سي السيد : الحمدلله ... زفت كالعادة ....
أحمد : شدلك كرسي و تعال اقعد معانا ...
سي السيد : طب قول لعصام يشيل الهبابة الشيشة ديه من قصاده علشان نفسي مكتوم لوحده ... القهوة يا سكوب ....
سكوب : هو انا بقيت صبي القهوة دي بجد و الا ايه .... بقوللكم ايه .. انا زهقت .. و من النهاردة الخدمة سيلف سيرفيس... لحد ما ييجي متولي الله يخرب بيته ...
عصام ( مستغرقآ في قراءة جريدة ) : هما خمسة مليون دولار يعملوا كام جنيه ؟
سقراط : يعملوا فنطاس جنيهات ... سيبك من الدولارات و خليك معانا يا عص ... الواحد يخرج من بيته يشم شوية هوا ... يقوم يشم دخان .... و يتكعبل في الرصيف اللي مدشدش ... طب بذمتك يا سي السيد .. الرصيف الي قدام بيتنا ده .. بقاله كام سنة طاير و حجارته فوق بعضيها ؟ ان ما فيه بني آدم جه صلحه من بعد ما ركبوا مواسير الغاز ....
عصام : يا جدعان حد يدفع خمسة مليون دولار في لعيب كورة ...ليه ستيف اوستن ... صحيح يا بلد أقرع و نزهي ... الحاجات ديه ما تحصلش الا عندنا و بس ....
سي السيد : لأ يا حبيبي في السعودية دفعوا اتناشر مليون دولار ....
سقراط : علشان يصلحوا رصيف ؟؟ ... اما عالم مبذرة صحيح .... طب حديك مثل تاني ... عارف الرصيف اللي تحت بيت نسيبي .. هو كمان مدشدش و طاير من ايام مواسير الغاز ...
أحمد :الله ... هو مش نسيبك ساكن معاكم في نفس العمارة .... ما هو نفس الرصيف يا سقراط ... ايه العبارة ؟
سقراط : يا سلااام ... و ده يعني سبب علشان ما يصلحهوش ... عايز الحق .. الحق علينا احنا اللي قاعدين ما بنعملش حاجة غير اننا نتفرج عالتليفزيون ... ضرب .. هلس .. رقص ... و قلة أدب ... و عمالين نولول زي النسوان ... أهو ده اللي احنا فالحين فيه و بس ...
عصام : حمسة مليون دولار يعملوا كام ...
سقراط : يعملوا دشليون رصيف ....
احمد : هو مافيش غير الرصيف اللي معلق عليه النهارده ... مالك يا جدع ؟
أخناتون : ما تسيبه يفضفض يا سي السيد .... ( ثم ناظرآ الي الأفوكاتو ) .. هو انت دايمآ كده يا أفوكاتو دافس وشك في الجرنان ... ما هي هي نفس الأخبار دايمآ ...
الأفوكاتو : أهو الواحد يقرا شوية نفاق كل يوم يقوم يعرف الزومبة حتيجي منين ....
أخناتون : طب ايه اخبار البلد ؟
الأفوكاتو : و لا حاجة ....
أخناتون : و الريس ؟
الأفوكاتو : كل حاجة ....
أخناتون : طب فيه أخبار عن وحيد الأقصري ؟
الشلة تنظر بأستغراب الي أخناتون و في نفس واحد : مين ؟
أخناتون : مين ايه .. الأقصري .. طب فيه أخبار عن فوزي غزال ؟
سي السيد يتجشأ ... و آخرين يرفعون حواجبهم كعلامة استعجاب ...
أخناتون : ما ترد يا أفوكاتو .. كاتبين حاجة عن نعمان جمعة ... بقالي فترة طويلة ما سمعتهوش بيتكلم ...
أحمد: ما هو ساكن في مدينة نصر ...
أخناتون : و ايه العلاقة ؟
أحمد : ما هو بيفضل سهران طول الليل علشان يحوش ميه ... و الصبح لما بيصحي بيبقي نايم علي روحه .. فلما ييجي يعمل حديث أو لقاء صحفي ما حدش بيفهم منه حاجة ...
لحظة سكوت ...
عصام : علي كده بقاله سنين بيحوش في ميه .. علشام عمر ما حد فهمله حاجة ...
أخناتون : طب فيه أخبار عن المعارضة ؟
شريف : مين .. قصدك الكومبارس الأشتراكيين و الوحدويين و الشييوعيين و كاسترو و بتوع السيجار و الكلام ده .... أقوللك أنا يا عمدة ... بيحضروا نفسهم ..
أخناتون : آه .. يعني حياهجروا ..
شريف : لأ .. حيهاجروا ايه ... هما فهموا ان مشكلتهم انهم متشتتين في ميت حزب ... قاموا فكروا انهم يرتبوا نفسهم و يعملوا متحدث رسمي واحد بأسمهم يرشحوه ...
سي السيد : قشطة ... يعني في ناحية حنلاقي الريس و الناحية التانية حنلاقي البتاع ده المرشح الرسمي الأوحد .. فكرة جهنمية ...
أخناتون : و مين ده بقي اللي حيبقي المرشح الرسمي الأبعد ؟
الأفوكاتو : الأوحد يا عمدة ... الحقيقة ما حدش لسه عارف .. بس انا قريت انهم حيعملوا أجتماع علشان ينتخبوه ...
أخناتون : يا سلام علي الديموقراطية ... و مين بقي اللي حيكون في الأجتماع ده ؟
الأفوكاتو : ما حدش لسه عارف ... بس انا قريت انهم حيعملوا مؤتمر علشان يقرروا مين فيهم اللي حيحضر الأجتماع ...
أخناتون : للدرجة دي ؟ مؤتمر ؟ و مين اللي حيشترك في المؤتمر ده ؟
الأفوكاتو : ما حدش لسه عارف .. بس انا قريت انهم حيعملوا لجنة تقرر اسلوب المؤتمر ...
أخناتون : ديه ايه الحلاوة دي ... نظام هرمي ... و مين أعضاء اللجنة دي ؟
الأفوكاتو : ما حدش لسه عارف .. حيعملوا استفتاء
أخناتون : والله شوقتني يا أفوكاتو للقصة دي .. شكلها زي مسلسل لهتشكوك ... و مين اللي حيعمل الأستفتاء ده ؟
الأفوكاتو : المرشح الرسمي بتاعهم ...
أخناتون : روعة .. يعني نظام هرمي دائري ...
الأفوكاتو : بالظبط يا عمدة . يعني المرشح الرسمي يقول حاجة .... و يقوم يجري بأقصي سرعة يلف الناصية و يسمع هو قال ايه الناحية التانية ...
أخناتون : بجد فكرة زي العسل فكرة المرشح الرسمي الأوحد ديه.. و بكده يبطلوا يتخانقوا مع بعض ايمن نور ضد ابراهيم ترك .. الأقصري ضد شلتوت ...الصباحي ضد قناوي .. و نعمان جمعة بيتخانق مع نفسه علشان ما حدش بيفهمله كلمة ...
الأفوكاتو : و الله عندك حق يا عمدة .. انا كمان نفسي مرة افهمله كلمة .. آخر مرة في التليفزيون حطوا الترجمة زي ما بيعملوا في الأفلام الأجنبية و برضه ما فهمتش حاجة ...
عصام : علي العموم ... احسن حاجة تتعمل لما بيذيعوا الحملات الأنتخابية في التليفزيون ... حولوا القناة علي افلام الكارتون .. حتلاقوها هي هي نفس الحكاية بس بطريقة اوضح ....

Salwa
تاريخ المشاركة 13 November 2005 - 03:52 PM
الأفوكاتو : نهاركم سعيد ..
سقراط المصرى : ومالك كدة يامتر بتقولها من غير نفس ؟؟ لو عاوز تقول نهاركم يعلم بيه ربنا قول ومتتكسفش ..

سى السيد : جرى ايه ياسقراط ؟؟ ما تشيلنا من دماغك ياجدع ...انت قاعد على الواحدة
لاعاجبك اللى يقول نهار سعيد ولا عاجبك اللى يقول الحياة بقى لونها رصاصى !!

مصر عشقى : ياجماعة انا عارف سبب التوتر ده ايه ....استاذنا الأفوكاتو قلقان على صحة عمنا اخناتون وفى نفس الوقت مش عاجبه المهازل اللى شايفها ...وسقراط غاوى تريقة وكان لسة بيغنى ( جعلونى مهمشا ) ..


سكوب : آه....علشان كدة شد مع سى السيد ؟...فهمت فهمت ...اتاريه بيقول له قصدك تغير من الاسم بتاع فيلم فريد شوقى ..

احمد محمود : in this world there are two tragedies .one is not getting what one wants , and the other is getting it.

سكوب : ماشى ياخواجة ...يعنى فى الحالتين عايشين تراجيدى لاعاجبك تحصل على اللى نفسك فيه ولا عاجبك متحصلش ....

سى السيد : بصراحة انت متحصلش .

احمد محمود : مش من كذا...عشرة....سنة .........عملوا البدع علشان يبقوا احرار ؟؟

فيولينكنج : مش فاهم ؟؟ انتوا بتتكلموا بالألغاز ؟؟ هو فيه ايه ؟؟ انتوا فيه بينكم اتفاق انا معرفهوش ؟؟ ما تنورينا يامحكمة ؟؟

الأفوكاتو : المحكمة خلاص ......قررت انهاردة تمتنع عن (( التنوير ))...اصل القضاة طلعوا موظفين فى الدولة ..

سلوى : هو مفيش فايدة ؟؟ من ساعة ما مشيت وانتم قاعدين تاكلوا فى نفسكم ؟؟ هو مفيش فايدة ......ياجماعة بقاء الحال من المحال ..

هى لسة بتمطر ؟؟
هى حاتفضل تمطر لحد امتى ؟؟

بنت مصرية : لالا يامدام سلوى ....بصى بعيد ....آهى الشمس بدأت تطلع ...

تاريخ المشاركة 13 November 2005 - 06:05 PM
عصام : طب لحد ما الشمس تطلع .. و مية المطر تنشف ... ما تحكيلنا حكاية من حكاياتك بتاعت زمان يا مدام سلوي ... و آديكي تتمرني فينا لغاية ما يوصل الحفيد ....

تتصاعد صيحات التأييد من جميع من في القهوة .... و يرتسم علي وجه مدام سلوي ابتسامة عريضة غامضة .. لا نستطيع ان نحدد هل كانت لفكرة الحفيد .. ام لجميع هؤلاء الأطفال الكبار الذين يحيطون بها في تلك الحظة يتطلعون الي حدوتة ترجعهم الي أيام الطفولة ...

مدام سلوي : حاضر .....

و تتسع الأبتسامات علي وجوهنا و رويدآ رويدآ .. يخيم السكون علي القهوة ... و تتوقف الأيدي عن تحريك الطوابي .. او رمي الزهر .. و ننتظر جميعآ الحدوتة ... و بهدؤ ترتشف مدام سلوي كوب الشاي بالنعناع و تبدأ في السرد ...

- كان يا مكان .. يا سعد يا اكرام .. و ما يحلي الكلام .. الا بالصلاة عالنبي ...

( في اللحظة دي أنا متأكد انكم كلكم صليتم علي النبي :sad: )

كان فيه نملة عايشة في بلد صغيرة ... مش موجوة حتي عالخريطة ... كل يوم الصبح بدري .... تقوم من النجمة علشان تروح شغلها ... توصل المكتب قبل ميعادها و تبتدي تشتغل بكل ضمير .. و بكل سعادة ... و في المكتب ده عاشت سنين كتيرة من عمرها .. تشتغل و هي بتدندن أغنية حب قديمة ...
كانت بتنتج .. و بتنجز ... من غير ما يكون عليها أي رقابة ...
الدبور في مكتبه المكيف بالمدينة ... في يوم و هو بيقرا التقارير ... لاحظ ان المكتب ده بيشتغل من غير اي رقابة ... و بما أن الأمر مستحيل بالنسبة له .. خلق وظيفة المراقب علي مكتب البلد الصغير اللي بتشتغل فيه النملة بضمير ... و بتنجز .. و بتنتج .. و هي بتدندن بأغنية حب قديمة ... و للوظيفة الجديدة .. عين الصرصار ابو شنب نسيبه .. و من مسوغات تعيينه كان هناك بند أنه من أهل الثقة ... ما هو نسيبه ...
أول أجراء عمله الصرصار ابو شنب انه حدد مواعيد الدخول و الخروج من المكتب .. و ركب الساعة علي البوابة .. و اشتري جهاز يسجل دخول و خروج الموظفين ... اللي كانوا موظف واحد بس .. النملة ... و بعدين ابتدا يحضر نماذج التقارير اللي حيبعتها حول تقييمه لشغلها ...
لكن بما أن التقارير دي لازم تتكتب عالماكينة و ده مش من تخصصه ... فكان لازم يتم تعيين سكرتيرة تقوم بالمهمة دي ... و حيلاقي مين احسن من مدموازيل عنكبوتة جارته اللي بيرسم عليها بقاله سنين ... و حيلاقي مين من أهل الثقة احسن منها ... و تم عمل المسابقة و نشرها و اجراء الأختبار في بلاعته الخاصة .. و تم تعيين المحروسة في نفس اليوم .... و أبتدأت مدموازيل عنكبوتة تقوم بدورها في كتابة التقارير اللي بيمليها أستاذ صرصار ابو شنب .. و تنظم أرشيف تجمع فيه التقارير دي ... و ده كان بعد مواعيد الشغل لزوم الأفتر تايم ... بالأضافة الي الرد علي التليفون .. و ديه كانت شغلانة اضافية بتاخد عليها حوافز ...

كل ده .. و النملة ... زي ماهي ... تيجي قبل ميعادها .. تشتغل و تنجز .. و تنتج .. بس أغنية الحب اتحولت لمجرد دندنة و بس ...

الدبور في مكتبه المكيف بعد عودته من أمريكا .. علشان كان بيحضر مؤتمر حول علم الأدارة ... ما بقتش التقارير اللي بيبعتها الصرصار ابو شنب تكفيه ... هو مستر فوكس اللي بيدير شركة تحويل الدم الي بنزين أحسن منه في ايه .... و عليه بعت للصرصار فاكس يطلب منه تعديل نظام التقارير ليصبح نماذج جرافيكس ... دراسة الأسواق ... و تحليل اسعار البورصة... الخ ... الخ ...
قدام الطلب ده .. كان لازم يتم شراء كومبيوتر و برينتر بالألوان ... و بما أن الكومبيوتر مش من تخصص الأستاذ صرصار أبو شنب و لا مدموازيل عنكبوتة .. فكان لازم يتم تعيين موظف يتقن استخدام الكومبيوتر و وويندوز أكسل و كل ما يمت للجرافيكس بصلة ... فتم تعيين مدام دبانة ... بنت خالة الأستاذ دبور شخصيآ ...

و النملة السعيدة اللي بتنتج ؟؟ ... النملة ما بقتش سعيدة و لا تغني و لا تدندن ... و شوية شوية ابتدت تشتكي من كتر الأوراق و النماذج اللي لازم تملاها كل يوم ...

و الدبور .. مفتون باللي شافه في أمريكا ... قرر أنه يعين مراقب عام علي المنطقة كلها ... و أختار للوظيفة دي جراد باشا ... زميله في نادي الجولف لأنه بقاله فترة خالي شغل بحكم اجباره علي المعاش المبكر لمسائل مالية ... و أول حاجة عملها جراد باشا .. أنه اشتراله شقة فخمة في الشارع الرئيسي .. و حولها لمكتب و اشتري كرسي جلد هزاز من اللي كان بيحلم بيه طول عمره ...و مكتب عريض مليان تليفونات .. و كومبيوتر له خط دي اس ال لزوم متابعة التطور ...و فرش موكيت و حط اجهزة التكييف في كل اوضة ... و طبعآ كان لازم يعين سكرتيرة و مين أحسن من خنفسة سكرتيرته القديمة .. و كان أول مهمة يعملها من واقع منصبه الجديد .. انه حضر الخطة الأستراتيجية الجديدة و البادجت المناسب اللي مش لازم تخرج عنه .. النملة المنتجة المنجزة ... اللي مش سعيدة ...

لكن ما تعرفش ليه ... بعد كام شهر .. الدبور في مكتبه المكيف و هو بيراجع الميزانية ... لقي المنطقة اللي بتشتغل فيها النملة بتحقق خسارة مهولة .. بعد ما كانت المنطقة الوحيدة اللي كان فيها هامش ربح معقول ... علي طول رفع التليفون و أتصل بمدام بومة خبيرة الأقتصاد بالمؤسسة علشان يطلب مشورتها ...
بعد اكتر من شهر قضتها مدام بومة و جميع طاقم مكتبها في تحليل سبب المشكلة .. حضروا تقرير من تلتماية و عشرين صفحة .. كلف المؤسسة حوالي 32 الف جنيه ... ( بواقع ميت جنيه الصفحة ) .. و كانت نتيجته النهائية انه : " فيه موظفين كتير في المكتب ده "...

الدبور لما أستلم التقرير ده .. أكتشف الخطأ الفظيع اللي وقع فيه .. و أخد قرار فوري بطرد ...

النملة....

و سكتت مدام سلوي .. و هي تنظر في عيون الجميع .. بينما هز الجميع رؤوسهم و علي شفاهم أبتسامة ساخرة ... و هناك في الركن حيث تجلس دائمآ الشلة ... نظر الأصدقاء الثلاثة الي سكوب متسائلين في نفس واحد : فهمت معناها يا سكوب ؟؟؟
و في خجل واضح أجابهم : بصراحة .... لأ ...
و زفر سي السيد زفرة طويلة .. و هو يضع يده علي كتف سكوب .. و بصبر و ببطء شديد تكلم سي السيد و هو ينظر في عين سكوب مباشرة :
- عادي يا سكوب يا حبيبي .. عادي ... مش اول و لا آخر مرة .. اومال أحنا أصحاب ازاي .. انا حفهمك الحكمة في الحدوتة دي ...
أولآ ... أوعي تطلع أبدآ نملة شغالة و منتجة و سعيدة.. من الأفضل دايمآ انك تكون غير منتج و ما بتفهمش في أي حاجة ... اللي زي دول عمرهم ما بيحتاجوا حد يراقبهم ... كل الناس عارفة كده ...
ثانيآ .... لو الموضوع اقوي منك و من مبادئك .. و لازم تشتغل و تنتج ... أوعي تبين أبدآ انك سعيد و راضي ... عمرهم ما يسامحوك علي كده .. من وقت للتاني أخترع مصيبة أو كارثة ... الحاجات دي ساعات بتنفع ...
ثالثآ ... لو مش قادر ... و رغم الكلام د كله حتشتغل بكل قوتك و حتنتج و حتكون سعيد .. يبقي أحسن حاجة اشتغل لحسابك في أي حاجة .. علي الأقل مش حتلاقي دبابير و صراصير و خنافس و جراد و عناكب عمالين يسترزقوا علي حسك .... فهمت دلوقتي ؟؟؟ ...

سكوب في ارتباك شديد : ل .. لأ ...

لحظة صمت ... أعقبها مشاهدة سكوب و هو يطير مقذوفآ من باب القهوة ....

se_ Elsyed
تاريخ المشاركة 13 November 2005 - 06:22 PM
Quote
في المكتب ده عاشت سنين كتيرة من عمرها

وهو في نمل بيشتغل على المكاتب ياخويا ؟

مش عارف ليه حاسس إن سكوب بيسرح بيه زي صاج قرص محشية عجوة ... بيفكرني الواد عُمر إبني وحكايات الديناصورات اللي بتعمل مغامرات .

أحسنت يا سكوب يا شديد يا جامد ... بجد

إبن مصر
تاريخ المشاركة 16 November 2005 - 11:48 AM
روح يا شيخ...
ربنا يسامحك .......
للاسف نحن وانا اقصد مجموعه معينه فى بالى يعرفون انفسهم بعضهم اعضاء هنا وبعضهم اكتفوا بالقراءه فقط..لن نستطيع الا ان نكون هذه النمله فلم نتربى الا على العمل بضمير وتحت ضغط والنتيجه .
كلنا هذه النمله وفى النهايه فعلا صدقت بيرموا النمله .......
وواحد صاحبنا مش بعيد لسه عاملين عليه دبابير ولكن يمهل ولا يهمل....
مش كده برضه يا صاحبى!!!!!!!!!!!!!!!!!

عصام
تاريخ المشاركة 16 November 2005 - 12:33 PM
أحمد محمود, on Nov 16 2005, 10:48 AM, said:
وواحد صاحبنا مش بعيد لسه عاملين عليه دبابير ولكن يمهل ولا يهمل....
مش كده برضه يا صاحبى!!!!!!!!!!!!!!!!!
<{POST_SNAPBACK}>


.. .. مين هه؟

مين؟ .. مين؟


كلمة صغننة بمناسبة حكاية النملة ..

مش شرط إن كل شيء يبدو فى مظهره شر يحصل للإنسان إنه يكون كذلك .. أبدا ..

فلا يعلم الغيب إلا الله ..

وبفرض إن ربنا قاسم لك حاجة أحسن فى مكان آخر ..

ما هو لازم تسيب المكان اللى اتربيت فيه .. واللى بنيته على اكتافك .. واللى بتشم فى كراسيه وكنبه رائحة تعبك كلما جلست عليها بعد قضاء الليل عليها لسنوات .. ودا شيء أكيد هايأثر فى أى إنسان مهما كان صلب .. وأكيد برضه هايسيب بصماته على حياته كلها فيما بعد ..

لكن فى النهاية برضه .. إنت لن تعلم إن المقصود كان خير إلا عندما تحصد ذلك الخير يوما ما .. وقتها ستتذكر بالتأكيد .. وقد تسقط ساجدا لله على ذلك .. وصدقنى ..سوف تبتسم ابتسامة أنت الوحيد الذى يعلم مغزاها ..


بس ما قولتليش بقى يا صاحبى ... مين هه؟

الأفوكاتو
تاريخ المشاركة 16 November 2005 - 01:56 PM
ستظل القهوة منبرا للرأى الحر, و أحيى كل من شارك فى شرب قهوتها, و جنزبيلها.

تحياتى لسكوب, و للرواد, و لجميع من شاركوا و مروا مر الكرام.

تاريخ المشاركة 05 November 2006 - 11:47 PM
عصام : ايه ده .. سكوب ...انت رجعت يا منيل ...
سكوب : هو انا كنت مشيت عشان ارجع .. ما انا علي طول متنيل قاعد معاكم ... بس الواحد مالوش نفس حتي يعيش ...
عصام : و ايه اللي جد يا خويا ..
سكوب : العمدة يا عصام ... العمدة شخصيآ وصل لحد هنا بس لقي الباب مِتْسَكَر .. راح لبني مقالة هنا... قومت واخد ديلي في سناني و فوريرة قبل ما ييجي تاني و يلاقيها برضه مقفولة... انما قوللي يا عص.. ايه الأخبار ...
عصام : زي ما هي.. ناس بتروح و ناس بتيجي و ناس قاعدة ...
سكوب : فيه ناس جديدة ؟؟
عصام : علي بال ما تاخد الشاي بتاعك ... بص بصة و انت حتشوف بنفسك ...
سكوب يدير نظره في ارجاء المكان و فجأة يتنح ...
سكوب : هوباااااااااا مين دي يالاه ؟
عصام : مين .. فين ؟
سكوب : اللي عمالة تتكلم مع فولانة ....
عصام : آه ... دي ياسمين أحمد من المنصورة.. بت مخها يوزن بلد ... اسكت و اسمع

( ما يلي هو ما كتبته ياسمين بقلمها بتصرف )

- طب بذمتك يا فولانة مصر تحبيها أبيض و أسود و الا ألوان ؟
فولانة : حنبتدي الألغاز ؟
ياسمين : لأ بجد .. حشرحلك .. لما نص القهوة هنا بيتكلموا و بيسألوا عن الأخلاق ... أخلاق مين ؟ أخلاق الشارع؟ طب ازاي تركب الأخلاق مع الزحمة و الكلاكسات و بياع الفول و الأوتوبيسات و الميكروباصات .. و بيسألوا عن الأخلاق .. طب نبتدي منين و الا منين ...
نبتدي من الشارع نفسه ؟ طب انا حسألكم كلكم سؤال واحد ( موجهة حديثها الي من في القهوة ) كام واحد فينا بيلمع جزمته الصبح ؟ لو فينا واحد والله يتحسد .. لأن تلميعها بقي زي عدمه مالوش لازمة .. البنات خلاص شالوا الشرط ده من الشروط اللي يتطلب عدم الألتزام بيها أحكام عرفية ضد اي عريس بيتقدم ...
فولانة : ده لو فيه لسه ناس نفسها مفتوحة و بتتقدم ...
ياسمين : طب حاول بقي يا شاطر تعدي الشارع ... طبعآ لا يمكن ..
فولانة : مش بس لا يمكن .. ده مستحيل كمان .. أحنا بالنسبة لسواقين الميكروباصات عبارة عن كائنات هلامية مريخية غير مرئية .. و ما تستهلش غير أن تكون تحت كاوتش العربية ... و لو حصل ... يبقي أنت اللي عينك مش في راسك يا سعادة البيه االي فاكر ان تعدية الشارع حاجة سهلة .. مش محتاجة ختم وزارة الميكروباصات.. و توقيع عدد 2 سواقين محترفين من بتوع الحركات اياها ...

سكوب : ايه الحلاوة دي .. مين دول يا عص... طلعوا أمتي ؟
عصام ( بقرف ) : شششششششششش .. خليني اسمع

ياسمين : طب ندخل جوه شوية ..
فولانة : جوا فين ؟
ياسمين : جوا ميكروباص من دول.. مش حقوللك جوه اتوبيس ... هتلاقي ايه ؟!
فولانة باحراج : والله ماعرفش يا أختي ... انا جوزي عنده فيات قردة 2 باب مريحاني في مشاويري ..
زوهيري : اقوللك انا حتلاقي ايه يا مدام خربوطلي ... مش حتلاقي حاجة .. لأن مجال رؤيتك حيكون منغلق و منحصر في سعادة قفا من أسعده الحظ و ووقف قدامك ... مش بس كده لأ .. ده باشمهندس التخطيط البشري العمراني بتاع الميكروباص له وجهة نظر مختلفة .. اللي هي ايه ؟
سكوب : معرفش
زوهيري : انا مابسألكش أنت .. دي ايه الغلاسة دي ... انا بتكلم توتالة يا بني آدم .. وجهة نظر الباشمهندس أن بما أن فيه فتحة بين قفاك و قفا اللي وراك ... و بما أن قفاكم في قفا بعض ... فأنتم مش حتتضايقوا لو حشر قفا تالت بينكم ... و لو فرض يعني و أنكم اتضايقتم .. حنحطلكم السيخ المحمي في صرصور ودنكم و نجيبلكم ابو رجل مسلوخة ...
فولانة : علشان كده طلعت الأفيهات علينا .. بما أننا الشعب الوحيد اللي بيقدر حق قفاه حق تقدير .. من حيث الختم عليه ...
ياسمين : هو بس من ناحية الختم .. طب خدي عندك ... ايه رأيك في القفا من حيث التفرقة بين اللي عدي تحت ايد واحد من اياهم اللي علي أكتافهم شايلين طيور جارحة و نجوم اللهم احفظنا و معاه واسطة... و لا اللي عدي و هو علي فيض الكريم ؟
فولانة : طبعآ العلامة حتكون علي قفا اللي علي فيض الكريم ... و انتهاء بوريني عرض قفاك كناية عن مدي حبنا و ترحابنا بالزيارة ...

سكوب : يا عص ابوس ايدك عرفني بيهم
عصام : ياد اتهد بقي .. ما انت كنت متنيل قاعد في بيتكم .. ده ايه الهم ده ...

فولانة : سيبك من الميكرباصات .. حاولتي تدفعي فاتورة تليفون قبل كده ؟ جهاز الكومبيوتر عطلان ..و طبعآ لأننا دولة متحضرة و متقدمة و الأجهزة عندنا في مقام الصواريخ .. فالمصلحة الحكومية كلها مافيهاش غير جهاز واحد .. و مهنج ..
سكوب : م ..ايه ؟
عصام : مهنج يا سكوب .. مهنج ..من هنج يهنج فهو مهنج ...يعني مالوش مزاج بشتغل ... كملي يا خربطوللي هانم سيبك منه ....
فولانة : الله ينور عليك يا عصام ... مالوش مزاج يشتغل ... ساعة ... بس ساعات بيبقي عنده مزاج يشتغل عشر ساعات لما تبتدي اسطوانة انا تعبانة و رجلي بتوجعني و عندي السكر ... و كده لحد ما الحاجة توصل لأول الصف .. و لما الجهاز تعطف و تكرم علينا و اشتغل ... تلاقيها بتدفع للحبايب و القرايب و النسايب ساعة الا ربع .. لوحدها ...ما أحنا شعب طيب و الخير بيجري في عروقنا ... و مفيش داعي احكي عن طابور العيش لأن حكايته طويلة و مملة .. و لا عن المصالح الحكومية اللي من كتر ما الشغل في البلد خلصان و ميت فل و عشرة يا بيه و صباحك قشطة ...الموظفين مش لاقيين شغل يعملوه غير قراية الجرايد و المجلات و اسرار الطبيخ و كيف تسعدين زوجك ...
اخلاق !!! بلا نيلة.

اريخ المشاركة 06 November 2006 - 12:01 PM
ياسمين : طب ايه رأيك في الموضة الجديدة اللي أنتشرت بطريقة غير طبيعية ... تبقي واقف في حالك لا بيك و لاعليك .. يقرب منك واحد غلبان و يقوللك انه من الحتة الفلانية و ابنه عيان و حكاية طويلة عريضة تنتهي بأنك تطلعله جنيه .. و بدل ما تسمع زي الأفلام "يردهالك في صحتك و عافيتك و لا يحرمكش من حاجة أبدآ و يفتحلك الأبواب المقفولة" ... و تمشي منتعش كده و تحس انك عملت عمل خير ... لأ ... تلاقيه بيبصلك من فوق لتحت و يقوللك هو الجنيه ينفع بأيه في الزمن ده يا بيه .. حسبي الله و نعم الوكيل ... في حضرتك طبعآ...
فولانة : انا نفس القصة اتكررت معايا كذا مرة .. و ساعات الموضوع بيبقي رسمي شوية .. يعني روشتة .. فاتورة أجزخانه .. اشعة و تحاليل .. و الواحد مش فاهم حاجة.. و طبعآ الكل بيحلف أن الموقف ده اول مرة يتعرضوا ليه ... طب سيبك من ده ... حاولت توقف تاكسي ؟ طبعآ أكيد .. لكن قبل ما تركب لازم تستشير رأي سعادة فضيلة الأستاذ سواق التاكسي المبجل المحترم في رأيه بخصوص المكان اللي انت عايز تروحه ...و يبقي حماتك بتحب و امك دعيالك.. واهل بلدك راضيين عنك اذا كان المكان ملائم لمزاج سعادته ... ده بقي غير الأجرة ...أصل انت مش واخد بالك انك قاعد علي كرسي لوحدك مفيش حد علي رجلك .. لو نفكرك بالميكروباص... يعني احمد ربنا و بوس ايدك وش و ضهر .. تسيب التاكسي و ترجع البيت تلاقي البت بتقول ان المدرس بيقول انها محتاجة دروس خصوصية .. يقطع الدروس الخصوصية و سنينها ... مسخت حلاوة الدنيا و معناها جوه كل بيت ماديآ و نفسيآ وجسديآ و معنويآ ...
زوهيري:حد جنبه مقلب زبالة .. مقالب الزبالة يا ناس اللي في الشارع حرمتنا من الرؤية .. أجمل بقاع الأرض ملوثة ... يعني هو فيه أكتر من الأرض اللي فيها اطول نهر في العالم و مش عارفين نشرب كوباية ميه واحدة صحية ... و لا أرتفاع الأسعار اللي مش ملاحقين عليه .. عارفة يا ياسمين انا فهمت سؤالك بتاع الأبيض و الأسود و الألوان .. انا نفسي في مصر بتاعت زمان ... ايام الناس اللي بتحب بعضها .. و الجيران اللي بيسألوا علي بعض.. و حضرة الشاويش.. و الشوارع النضيفة .. من الآخر زي ما قولتي مصر ابيض و اسود كانت احلي مليون مرة من مصر الوان ..

تبتعد ياسمين و هي تهمهم : كده و لا كده احنا شعب بتاع افيهات .. و بنضحك غصب عن اي حاجة... و بنحبك والله يا مصر .. و بعتذرلك يا أرضي لأني سبب تعاستك .. انا اللي بدمرك كل يوم .. و بشخبط بقلمي علي حيطانك .. سامحيني يا حتة مني لأني حتة منك .. سامحيني بالنيابة عن شبابنا كله ...

سكوب : مين ديه يا عصااااام
عصام : ييييييييييه اف ... انا مِرَوَّح ...

MZohairy
تاريخ المشاركة 06 November 2006 - 12:49 PM
Scorpion, on Nov 6 2006, 12:01 PM, said:
زوهيري:حد جنبه مقلب زبالة .. مقالب الزبالة يا ناس اللي في الشارع حرمتنا من الرؤية .. أجمل بقاع الأرض ملوثة ... يعني هو فيه أكتر من الأرض اللي فيها اطول نهر في العالم و مش عارفين نشرب كوباية ميه واحدة صحية ... و لا أرتفاع الأسعار اللي مش ملاحقين عليه .. عارفة يا ياسمين انا فهمت سؤالك بتاع الأبيض و الأسود و الألوان .. انا نفسي في مصر بتاعت زمان ... ايام الناس اللي بتحب بعضها .. و الجيران اللي بيسألوا علي بعض.. و حضرة الشاويش.. و الشوارع النضيفة .. من الآخر زي ما قولتي مصر ابيض و اسود كانت احلي مليون مرة من مصر الوان ..


:wub:

حسستني اني انا الصباحي الراجل العجوز اوي ده اللي كان مرشح نفسه في انتخابات الرياسه و في الآخر رشح مبارك :excl: