رجالة في المطبخ

~Heba~
تاريخ المشاركة 22 February 2008 - 06:29 PM
Quote
شفتي بقي العملية سهلة ازاي .... فهمتيها يا هبة ؟
هبة : ايوه يا أونكل ربنا يخليك
سكوب : محتاجة حاجة تاني ؟
هبة ك لآ متشكرة .. ربنا يخليك .. ثم استدارت و صاحت في عم فرج البواب ...
هبة : عم فرج .. يا عم فرج .. و حياتك لو روحت الفرن ابقي اشتريلي معاك 5 ترغفة ....
نسيت اقولكم انهاردة اول مرة فى حياتى اقف فى طابور عيش و اكتشفت حاجة ان كل اللى واقفين معايا خدامين فى بيوت او بوابين...زى عم فرج كده واخد بالك يا اونكل المهم جيه واحد بيه بعربيته و ركنها جمب الفرن و هما دقيقتين شاور لبتاع الفرن اداه فلوس و بعد شويه بسيطة اخد عيشه و الحكايه اتكررت مع 3 بهوات او نقول بشواااااااااااات....ربنا يهدى الجميع و يوفقهم للخير و اولهم سيادة الرئيس

إيزيس
تاريخ المشاركة 22 February 2008 - 09:13 PM
ربنا يهدى الجميع و يوفقهم للخير و اولهم سيادة الرئيس

معلش يا جماعة ده البنت داخت البصلة جت في راسها لخبطتها شوية

هبة...........شششششششششششششششششششششش كملي الكورس يا ماما من غير عيش خالص أحسن


إيه يا هبة إنتو أربعة يا ماما كل واحدة تقف يوم تشتري عيش ليومين ........... يعني يصبح الطابور على كل واحدة في الأسبوع 1.7 و لعلمك هتتعلمي في طابور

العيش خبرات لا تقدر بالبتنجان " ما الدنيا إلا مخبز كبير"

إيزيس
تاريخ المشاركة 22 February 2008 - 09:30 PM
انا معايا دكتوراه فى الخبيز انما حضرتك يدوب بكالريوس

شفت دي يا سكوب... جامدة !!

والمنديل الأزرق والماجور وبهدلت الدنيا دقيق وبصل

إدلعدي هبة كبستك تقريبا :sad:

سي السيد ........ما هو أصل كلمة إدلعدي
1- البنت المدلعة
2- البنت الدلعة (ناقصة ملح )
3- كل ما سبق

se_ Elsyed
تاريخ المشاركة 24 February 2008 - 08:29 AM
قرنفل, on Feb 23 2008, 04:35 PM, said:
سي السيد


سي السيد


رد علي يا سي السيد

والله يا قرنفلة أنا طول عمري بأسمعها كده ... بس أعتقد لو رجعنا إلى المراجع اللغوية ( أكسفورد والمورد والبعلبكي والحاجات دي ) ممكن تمشي الدلوعة ....

هذا والله اعلم

عايز أكتب عن مغامراتي السودا في بداية حياتي المطبخية العزابية .... بس يارب ألاقي وقت

تاريخ المشاركة 05 March 2008 - 02:23 PM
أحمد : ما تبص بصة با سي السيد علي الريس ابو محمد اذا كان رد علي بدرية في موضوع الساور سوب ده
سي السيد : صاور صوب ده يطلع ايه ؟
أحمد : علي حسب ثقافتي الأنجليزية ... ساور سوب .. يعني عايزين يصوروا صابونة ... و الله أعلم
سي السيد : صابونة ... طب مش لما تيجي الميه الأول .. انا نفسي اتقطع من ملو الجراكن ...
أحمد : يا آخي الواحد نفسه غمت عليه ... و نفسي في حاجة حلوة .. مش عارف هافف عليا طبق قمر الدين ....
سي السيد : أنت بتتوحم ... بس يا أخي خليت ريقي يجري انا كمان .. فينك يا سكوب .. هو اللي تخصص حلويات
أحمد : حلويات .. انت بتقول علي قشر البرتقان ده حلويات ...
سي السيد : يا سلام يا أخويا .. ايش حال انك خلصت عالصينية كلها .. انا بتكلم عن قمر الدين... هو مش مره عمل حاجة زيه بس بالجزر ..
أحمد : آه تصدق ... طب ما تتصل ببيتهم في شبرا .. ما هو هناك بيزور أهله دلوقتي ...
سي السيد يمسك التليفون و يتصل برقم
أم سكوب : آلوو
سي السيد : السلامو عليكم
أم سكوب : و عليكم السلام يا بني ...
سي السيد :أنا سي السيد .. إزيك يا حاجة
أحمد يشير بأيده و يهمس : حاجة ايه يا ابني ؟؟؟؟!!!
سي السيد يتدارك نفسه في تلعثم : يا مقدسة يا مقدسة ... إزيك يا مقدسة
أم سكوب : من بقك لباب السما يا ابني ... انا و انتم و كل الحبايب نروح نحج و نقدس في القدس ان شاء الله ... خير يا ابني
سي السيد : كنت عايز سكوب في لقمة ... ( ثم مصححآ ) في كلمة
أم سكوب : لأ ده نزل من عشر دقايق ... محتاج حاجة يا ابني ..
سي السيد : بصراحة اصله مرة عمل حلو بالجزر و كنت عايز الوصفة منه اهه نعملها النهارده ...
أم سكوب : آه ... قمر الدين ( قالتها ضاحكة ) ... عارف يا سي السيد فكرتني بايام زمان أيام رمضان لما كانوا الولاد نفسهم ياكلوا قمر الدين و ابو سكوب ما كانش معاه يكفي ... فكنت بتصرف و اعملهم الحلو ده بالجزر ... تحب اديك الوصفة
سي السيد : يبقي كتر خيرك يا حا.... يا طانط ...
أم سكوب : شوف يا ابني ... انتوا تجيبوا كيلو جزر ... و تعصروا مقدار كوباية عصير برتقان بلدي .. علي عصير لمونة متوسطة ... و 3 معالق نشا ... و ييجي 5 معالق سكر كبيرة .. و شعرة فانيليا ..
و بعدين تقشر الجزر و تقطعه ترنشات .. و بعدين اسلقه ...
لما يتسلق كويس صفيه و خلي شوية ميه سليق علي جنب ... و ضيف عليه عصير البرتقان و اللمون ... و السكر و النشا اضربهم في الخلاط .. و بعدين شيل الكلام ده من الخلاط و حطهم في الحلة مرة تانية و ضيف شوية مية سليق و تحطهم عالنار ... و افضل قلب باستمرار عشان النشا ما يكلكعش .... لما تلاقيه بقي متماسك كده حط شوية الفانيليا و قلب مرة اخيرة ...
و بعدين صبوهم في اطباق صغيرة و سيبوها تبرد و لو عايزين زوقوه بشوية زبيب او جوز هند .... و بالهنا و الشفا ...
سي السيد : الله يهنيكي يا طانط .. ربنا يخليكي
أم سكوب : سلملي علي مراتك يا سي السيد .. و اوعي تخليها تشيل اي حاجة تقيلة ... انا نادرة شمعة لسانت تيريز لما تقوم بالسلامة ...
سي السيد : ربنا يخليكي يا طانط ... اسيبك بقي عشان اعمل قمر الدين ده ... سلميلي علي عمي كتير ...
أم سكوب : الله يسلمك يا بني
سي السيد : محتاجة حاجة يا أمي
أم سكوب : آه وحياتك يا سي السيد .. لما ييجي سكوب ابقي قوله انه نسي الجزمة جوا أوضته ...
سي اليسد : نسي جزمته ... و راجع حافي ؟؟
أم سكوب : الله أعلم ...

إيزيس
تاريخ المشاركة 09 March 2008 - 11:01 PM
مشهد خارجي ليل


مصر


شبرا


بيت أم سكوب


قرنفل بعد ما خلصت على القمر الدين اللي عملته أم سكوب ( صورة أنا عارفة إنها مدكنة طبق في آخر رف في التلاجة ورا كيس العيش و ساكتة )


-طيب يت تانت ميرسي جدا على القمر الدين هايل تسلم إيدك


- مستعجلة ليه يا حبيتي الشاي على النار

قرنفل تفكر لثواني ثم تقرر بسرعة أن لا تفوت فرصة الشاي


- أوكيه يا تانت بس سكر خفيف و حياتك


أم سكوب تغير اتجاهها بسرعة إلى باب المطبخ بعد أن كانت تتجه لباب الشقة لتوديع قرنفل

- اتفضلي الشاي يا قرنفل يا بنتي إلا انتي بتشوفي سكوب

- آه يا تانت كل يوم باشوفه

تنظر أم سكوب إلى قرنفل مستنكرة

- قصدي باقابله

أم سكوب مستنكرة و مستنفرة و متنمرة

- قصدي بنتقابل في المحاورات ع النت يعني

-آآآآآه

- انتي عايزة منه حاجة يا تانت

- لأ يا بنتي سلامتك بس ده نسي الجزمة بتاعته جوه و أنا قلت لسي السيد يبلغه

- أنا هاقوله يرجع ياخدها يمكن سي السيد نسي يقوله

- أستأذن بأه ياتانت

- و ترد أم سكوب بسرعة طيب مع السلامة يا بنتي أهو انتي عرفتي البيت إبقي هاتي البيه و الولاد و تعالو

- إن شاء الله يا تانت أكيد هنيجي


- قرنفل و حياتك يا بنتي تقولي له أمك بتقولك ما تجيبش سيرة المحشي مابقيتش أقدر أعمله يا بنتي و الله

:roseop:



إلى المحاور الحافي سكوب................. إلى المحاورالحافي سكوب


إرجع شبرا



خد جزمتك




صورة

إيزيس
تاريخ المشاركة 10 March 2008 - 06:20 AM
- رد عليكي يا قرنفل

-لا ياتانت لسه أصله عامل حفلي للطلاينه أصحابه النهاردة يمكن مشغول

-وهيحضرالحفلة حافي جاتك إيه يا سكوب طول عمرك مناكف و تاعبني معاك


إلى المحاور الحافي سكوب................. إلى المحاورالحافي سكوب



إرجع شبرا



خد جزمتك

إيزيس
تاريخ المشاركة 10 March 2008 - 07:13 AM
:roseop:


ألو أيوة يا تانت صباح الفل


أهلا يا قرنفل صباح النور

أزيك ياتانت عاملة إيه

الحمد لله نشكر ربنا

باقوللك يا اتنت حضرتك أكلتي طبق القمر الدين اللي كان في آخر رف في التلاجة ورا كيس العيش

:roseop: :happy: لأ يا حبيتي ما أكلتوش لسة


أصل أبو العيال كان عايز يتعرف عليكي



أهلا و سهلا يتفضل أي وقت ......هو سكوب لسه ماردش عليكي

لأ لسه ...باقول لحضرتك إيه إنت هتتغدي إيه النهاردة

نعم :blink:

يعني كنت آجي أساعدك في المطبخ

آآآآآه تعالي
:roseop:

إلى المحاور الحافي سكوب................. إلى المحاورالحافي سكوب



إرجع شبرا



خد جزمتك

تاريخ المشاركة 25 June 2008 - 10:39 PM
مهداة الي قرنفلة التي تحب أبلة فضيلة و الآيس كريم و تكره اسرائيل
:roseop:



سي السيد : حرررررر ..... ناااااار ... أفففف
أبن مصر : فيه اعلان عن مروحة توشيبا 3 سرعات مزودة بلمبة مستخدمة للبيع لدواعي السفر.... لو اشتركنا احنا التلاتة ممكن ندفع المقدم و الباقي نقسطه علي 3 سنين ...
سي السيد : طب مش لما ييجي التالت الأول
أبن مصر : تلاقيه لسه بيدور علي جزمته ...

في تلك اللحظة يدخل سكوب و ملامح الألم واضحة علي وجهه..و كان يمشي محركآ قدميه ببطء شديد ...

صورة

سكوب : السلام عليكم
أحمد - أهلآ يا خواجا .. خير قلقتنا عليك ...
سكوب - لأ خير .. كنت بدور علي قرنفلة ... أصل ماما كانت بعتتلي أمانة معاها
سي السيد : الجزمة ؟؟
سكوب : دي ايه البلد اللي ما يستخباش فيها حاجة دي .. و انتم عرفتم منين
أحمد : يعني سعادتك داخل علينا حافي .. محتاجة فكاكة يعني ... بالأضافة الي ان الوالدة شخصيآ أتصلت .. و قرنفلة ملت البلد اعلانات..
سكوب : طيب طيب ... قرنفلة .. ما حدش شافها
سي السيد : لأ معلهش .. استعوض ربنا في الجزمة و مشي حالك ببانص و لا شبشب زنوبة لحد ما تُفرج
سكوب : ليه.. هي هاجرت ؟؟
أحمد: والله هي قالت حاجة عن شعبان عبد الرحيم و أختفت
سكوب : شعبان عبد الرحيم يعني ايه ..
أحمد : يعني نظام انا بكره اسرائيل و بحب ابلة فضيلة و الآيس كريم .. و طلعت الجبل تعتكف
سكوب : بجد ؟؟ يا خسارة ... الواحد كان ابتدي ما يستغناش عنها .. لدرجة اني كنت جايبلها وصفة الجرانيتة اللي بتحبها
سي السيد : و ديه تطلع ايه ؟؟
أحمد : الجرانيتة هي نوع من الأحجار الناعمة و بيجيبوها من اسوان ... الجرانيت كانوا بيعملوا بيه المعابد و الجرانيته كانوا بيعملوا بيها المسلات .. :phar:
سكوب : دي ايه الثقافة دي ... زاهي حواس يا ناس ... الجرانيته يا دكاترة حاجة كده زي الجولاتي ... الجلاس ... الآيس كريم
سي السيد : آآآآآه .. الدندورمة
سكوب : دندرمة !!!! أه ... هي كده ... الدندورمة...
أحمد : جات في وقتها يا سكوب .. الواحد مفرفر من الحر و مافيش غير الحاجات دي اللي ممكن ترطب شوية ... ها.. بتتعمل ازاي ؟؟
سكوب : آسف .. الوصفة دي مخصوص عشان قورنفلة.. و مش حقولها الا لما ترجع
أحمد : اطلع بالوصفة يا سي زفت قبل ما ليلتك تبقي كوبيا ...
سكوب : و لو ... دي اقل حاجة في سبيل قرنفلة ... دي علشان توصل أمانة مستحملة ريحة الجزمة حتي في اجازتها يا جماعة ...
سي السيد ( حاملآ في يده قلة مياه ) : أنت جربت القلة دي فوق نافوخك قبل كده ...
سكوب : انتم كده .. تعاملتكم كلها دموية و مافيهاش ديبلوماسيات و مفاوضات و ...
احمد و سي السيد : wst:: سكووووووب :sad:
سكوب : أنتم تجيبوا ميزان .. و توزنوا 800 جرام ميه ... 500 جرام سكر ... و 300 جرام لمون
سي السيد : و بعدين ؟
سكوب : و بس
سي السيد : هو ايه اللي و بس ... احنا حنعمل ليمونادة
سكوب : بالظبط ... هي حاجة زي الليمونادة
أحمد : يا ابني ارحمني ... يعني حنشربها و لا نلحسها
سكوب : يا أحمد الموضوع في منتهي البساطة : انت تولع عالكسرولة .. و تضيف الميه و السكر و الليمون و تفضل تقلب فيهم لحد ما السكر يسيح ... و بعدين تحط الكل في برطمان و تسيبه لحد ما يبرد .. و بعدين تحطه في الفريزر .... و لما يبتدي يتجمد تقلبه مرة أخيرة ... و تسيبه مرة تانية في الفريزر ... و بس
لما تعوز تاكله بقي .. تطلعه 3 دقايق قبل الأكل .. و بمعلقة تفضل تكشط جرانيت الليمون اللي اتعملت دي من عالوش .. و تحط في الكوباية و بالهنا و الشفا ... ده مش جولاتي .. لكن حاجة زيه كده .. صحيه و بسيطة و رخيصة ...
سي السيد : و اللي ما يحبش الليمون
سكوب : نو بروبليم .... بدل ال 300 جرام ليمون يحط الفاكهة اللي بيحبها.. فراولة .. مانجة .. خوخ ... جوافة .. يضربها في الخلاط الأول لحد ما تبقي سايلة .. و بعدين نفس الطريقة .. بس لو الفاكهة كانت طعمها حلو مسكر .. بدل 500 جرام سكر نحط 400 بس ..
أحمد : انت متأكد انها كويسة يعني
سكوب : يا أحمد انا الفريزر عندي كل صيف تلاقي فيه نوعين تلاتة من دول دايمآ .. و مااحلاها كوباية منهم في السهرة ..
أحمد : عالبركة .. انزل اشتريلنا بقي 600 جرام فاكهة مشكلة
سكوب : طب سلفني الجزمة بتاعتك لحد ما قرنفلة ترجع بالسلامة ان شاء الله ...

:roseop:

اريخ المشاركة 11 November 2008 - 11:34 PM
عصام : فيه أخبار عن أحمد ؟؟؟
سي السيد : لسه معتكف في الجبل بيعد النجوم ... كله من تحت راسك يا سكوب
سكوب : من تحت راسي ؟؟ ليه يا اخويا ...
سي السيد : من ساعة ما فتحت الموضوع المنيل ده و احنا جاتلنا انيميا مركبة ... لحد ما الجدع تصوف و طلع الجبل ...
سكوب : بقي انا اللي جبتلكم انيميا ... و عهد الله انتم زي القطط .. تاكلوا و تنسوا .. انا مش لسه طابخلكم لوبيا بعين واحدة مافيش اسبوعين ... لأ و انا اللي كنت ناوي اغديكم غدوة من اللي هي النهارده ...
عصام : ايه ده ... حتطبخ بجد يا سكوب ؟؟ .. يعني العملية حيبقي فيها غموس النهارده !!
سكوب : طبعآ يا عص .... ملك المطبخ حينزل النهارده الملعب بكل قوته .. و حعملكم اكله من بتوع زمان
سي السيد : من بتوع زمان .. علي اساس يعني حناكل بولوبيف انتهت صلاحيته يعني .
سكوب : فاكر يا سي السيد مسرحية مطار الحب .. لما المضيفة الطليانية كانت بتقول لعبمنعم مدبولي : انتي اتكلمتي اتكلمتي .. انا موش هرد آليك .. آهه انت برضه اتكلمتي اتكلمتي و أنا موش حآآباراك ..
سي السيد : تآآبرني ... ماشي يا خواجه .. خليك ورا الكداب .. حنطفح ايه النهارده

يتجه سكوب بكل فخر الي المائدة و يزيح جريدة بصورة مسرحية و تحت الجريدة يظهر كيس رز و كام حزمة ملوخية

عصام بفرح طاغي : رز و ملوخية يا سكوب .... رز و ملوخية يا حبيبي
سكوب : اومال ايه يا عص .. انا عارف انك بتعز الملوخية قوي و ياما حكيتلنا عن ذكرياتك معاها .. فعلشان كده نويت اعملها النهارده
سي السيد : استرها معانا يا رب .... يعني جناب سعادتك عايز تفهمنا انك بتعرف تعمل الرز .. و كمان الملوخية
سكوب : يا سلام ؟؟؟ هي كيميا ؟؟؟ الموضوع مش محتاج فكاكة ... بس اتلحلح سعادتك و ابتدي نقي الرز .. و انت يا عصام اعصرلنا كام قوطاية علشان التقلية .. لحد ما اخرط انا الملوخية ...

و تحول المكان الي ورشة عمل مطبخية ... سي السيد يمقمق عينيه في تنظيف الأرز ساببآ و لاعنآ وزارة التموين التي تضيف طين و حصي أكثر من حبات الرز نفسها .... عصام بمريلة المطبخ باذلآ كل قوته في تفعيص الطماطم .. سكوب بمنديل كاروهات بتاع شكري سرحان في فيلم البوسطجي جالسآ علي طبلية منهمكآ في تخريط الملوخية بكل ذمة .... بينما صوت شادية يتصاعد من الراديو الترانزيستور و هي تغني مصر اليوم في عيد ....

انتهت مرحلة التحضير ... و تطلع سي السيد و عصام الي سكوب منتظرين الخطوة التالية ....

أبو محمد
تاريخ المشاركة 12 November 2008 - 02:08 AM
ملوخية يا سكوب ؟؟؟ wst::

يا مسهل wst::

elshafey
تاريخ المشاركة 12 November 2008 - 02:09 AM
اول الموضوع دقة وريحة توم wst::
واخره ريحة رجلين wst::

ايه الكلام يا جماعة

لونا
تاريخ المشاركة 12 November 2008 - 09:11 AM
أنا عايزة أشكرك يا أونكل سكوب بقى لى كتير ما ضحكتش كدة

أنا طالعة على طول من المطبخ أهه!!!

a m ghazi
تاريخ المشاركة 12 November 2008 - 11:24 AM
ههههههههههههههههههه :roseop:
يعني شاديه كانت في الراديو بتقول مصر اليوم في عيد
الموقف ده لا يعبر عنه الا اغينه واحده



المصريين اهما حيويه وعزم وهمه :roseop:

بس يا ريت طريقه الملوخيه الناشفه
ضروررررررري جبتها ومش عارف اعمل معاها ايه :roseop:

تاريخ المشاركة 12 November 2008 - 09:16 PM
متشكرين يا جماعة علي تعاطفكم الطبيخي مع شلة الجعانين المتحدة ..... و ان كنت اشم ريحة عدم ثقة في قدراتي المطبخية من الريس ابو محمد بخصوص الملوخية تحديدآ ... يا ابو محمد الملوخية ايه غير شهقة و فص توم .... عالعموم خلونا نرجع للشباب أحسن عصافير بطنهم عمالة تنهق من امبارح ....


Quote
انتهت مرحلة التحضير ... و تطلع سي السيد و عصام الي سكوب منتظرين الخطوة التالية ....

عصام : بس يا سكوب الأكلة كده مش ناقصها حاجة
سكوب : ناقصها ايه ؟؟ التوم و الكوزبرة و استلفناهم من قرنفلة من قبل ما يجيلها عقد العمل ... الملح و الفلفل في النملية ... الحلة اللي حنطبخ فيها حتكون جاهزة اول ما سي السيد يخلص غسيل شراباته ...
عصام : مش القصد يا سكوب .. بس الأكلة كده اورديحي .... يعني أنا أتذكر ان الملوخية عايزالها شوربة ...مافيش هُبر ؟؟ ما فيش لحمة ... فراخ ... أنارب؟؟
سكوب : لأ طبعآ فيه .. ماهو سي السيد حينزل دلوقتي و يجيب ماجي
سي السيد : أجيب مين يا حيلة ؟؟؟
سكوب : ماجي
سي السيد : اتفو عليك و علي اللي يصاحبك بعد كده ... يا جدع اتكسف علي دمك .. ده انت متجوز واحدة بنت حلال مصفي .. و جونيور شنبه ابتدا يخط علي وشه ... تقوم تفكر في الحاجات دي
سكوب : حاجات ايه و نيلة ايه .. هو انا طلبت لبن العصفور .. انا ما طلبتش غير ماجي .. معكش فلوس انزل انا يا أخي بدال اللفة دي كلها و ام جونيو و شنب جونيور ...
عصام : انت حر يا سكوب تنيل اللي انت عاوزه بره .. لكن احنا اتفقنا دايمآ ان الحاجات دي ما تتعملش جوا البيت ابدآ
سي السيد : قوله يا عصام .. ابو عيون زايغة .. عايز تلعب بديلك .. العب بعيد عنا يا أخي ... استغفر الله العظيم
سكوب : ديل ايه و زلومة مين ؟؟ انتو شاربين حاجة ياللاه منك له ... مالكم ... انتوا بتتكلمو علي ايه ؟؟؟
سي السيد : ماجي يا فالنتينو عصرك .. ماجي مدرسة المعهد الألماني .. البت بتاعت الميني جيب و الديكولتيه و شلة نادي الجولف ..
سكوب : ييه .. ييه ... ييه ... ده انتوا مخكم راح بعيد خالص ... انا بتكلم عن ماجي بتاعت الشوربة ... المكعب ده بتاع اعلانات مرقة الدجاج ( بتعطيش الجيم ) ... بتاع الذ الذ الذ ....
عصام : طب مش توضح يا جدع .. خليت الواحد جتته تلبش
سي السيد : و انا كمان يا أخي قلت البجاحة و الفكاكة دي نزلت عليك امتي .... ماشي .. براءة يا سكوب ... انزل انت يا عصام اشتري مرقة الدجاج دي لحد ما اخلص غسيل الشرابات ...
عصام : هو كل مرة فيها دفع لازم تطلع بحجة ...
سكوب : انجز بقي يا عصام ... و ما تنساش و انت طالع تعدي علي ابلة فولانة و استلفلنا منها كوباية سمن
سي السيد : تاني .. نستلف منها تاني .. ده احنا مستلفين منها لغاية دلوقتي ييجي صفيحة بحالها ...
سكوب : مالكش دعوة .. الست طيبة و جوزها راجل سكرة .... و بعدين ما عصام صلحلهم الدِش الأسبوع اللي فات و ما خدش منهم مليم ...
عصام : انت كمان كنت عايزني اطلب منهم حق الخدمة ؟؟
سكوب : إفففففف ... مش حنخلص في يومنا الأغبر ده ...
عصام : نازل نازل ....

Modest
تاريخ المشاركة 13 November 2008 - 08:34 AM
أبيه سكوب :blink:

أنا مدكّن قرشين و ممكن أشارك بأي حاجة بس أخد شفطة ملوخية ربنا يخليك :happy:

ممكن فورريرة أجيب لكم نص كيس ملح ، عود فجل ، رغيف عيش أعملُه ودن قطة أعبّي فيه الملوخية .. ممكن كمان اشهق بدالك و انت بتحط التوم بس أدوق الملوخية يا ناااااس :blink:

Emo
تاريخ المشاركة 13 November 2008 - 03:23 PM
سكربيون..
االله يسعدك موتني ضحك..


لابجد اسلوبك ممتع جدا..وشوقتني للحلبسة دي..



lo::

أبو محمد
تاريخ المشاركة 14 November 2008 - 12:53 AM
يا سلام عليك يا سكوب .. أنا مش بيضايقنى فيك إلا حاجة واحدة بس

دايما متلهوج كده وبتعمل الطبخة من دول قوام قوام ..

ياراجل الملوخية دى بالذات عاوزة التأنى عشان تتعمل بمزاج وريحتها تطلع على شبابيك الجيران تخلى الستات يغيروا وتبقى ريحة العمارة تقلية طول الأسبوع .. إنت مستعجل ليه كده ؟ طب وحياة الخضرة الشريفة دى على مهلك صورة يارب اعيش لغاية اما اشوفك بتغرفها

~Heba~
تاريخ المشاركة 14 November 2008 - 05:52 AM
أبو محمد, on Nov 14 2008, 12:53 AM, said:
يا سلام عليك يا سكوب .. أنا مش بيضايقنى فيك إلا حاجة واحدة بس

دايما متلهوج كده وبتعمل الطبخة من دول قوام قوام ..

ياراجل الملوخية دى بالذات عاوزة التأنى عشان تتعمل بمزاج وريحتها تطلع على شبابيك الجيران تخلى الستات يغيروا وتبقى ريحة العمارة تقلية طول الأسبوع .. إنت مستعجل ليه كده ؟ طب وحياة الخضرة الشريفة دى على مهلك صورة يارب اعيش لغاية اما اشوفك بتغرفها

ربنا يديك طولة العمر



المشاركات: 3333
ايه الرقم المميز ده..تبييييييييع :blink:

Scorpion
تاريخ المشاركة 16 November 2008 - 10:21 PM
حبيبي و صاحبي موديست باشا ... و أنا فديك الساعة لما تيجي و تغمس معانا .... انا بس كنت مكسوف اعزم عليك اكمني كنت فاكرك من الناس الهافلايف بتوع الفوا دي زوا آلا شومبينون ... بس بما انك طلعت من شباب الساحات الشعبية زينا كده ... يبقي نرتب دخولك معانا بمعلمة ... شوف .. انت الساعة اتنين و نص بالظبط .. و اول ما تشم ريحة الشياط ... تخبط عالباب و انت بتنهج و يا ريت تكون عرقان شوية .. فلما نفتحلك .... اتحجج بأي حجة .. نسيت مفاتيحك ... الزمالك كسب ... حماتك عملت كبسة عليكم .. اي حاجة ... و تأكد انك لسه راجع من الشغل علي لحم بطنك .. نقوم ايه بقي .. نعزم عليك تاكل معانا .. ما تخليناش نكررها و نلاقيك عالترابيزة لافف كيس المخدة حوالين رقبتك و ماسك الشوكة و السكينة في ايدك .... و الباقي سيبه عليا .... wub.gif

Quote
إقتباس(أبو محمد @ Nov 14 2008, 12:53 AM)
يا سلام عليك يا سكوب .. أنا مش بيضايقنى فيك إلا حاجة واحدة بس

دايما متلهوج كده وبتعمل الطبخة من دول قوام قوام ..

ياراجل الملوخية دى بالذات عاوزة التأنى عشان تتعمل بمزاج وريحتها تطلع على شبابيك الجيران تخلى الستات يغيروا وتبقى ريحة العمارة تقلية طول الأسبوع .. إنت مستعجل ليه كده ؟ طب وحياة الخضرة الشريفة دى على مهلك يارب اعيش لغاية اما اشوفك بتغرفها

يا ريس أصبر علي رزقك .. هي فين اللهوجة دي و احنا وصلنا لتالت حلقة اهه و لسه حتي الحلة اللي حنطبخ فيها ما فضيتش .. ان شاء الله ربنا حيدينا كلنا طولة العمر لما نشوف اللي حيطلع في الآخر ... و اللي علي فكرة بالرغم من القالب الكوميدي اللي اتحطت فيه .. لكنها كصة واكعية ....

Quote
المشاركات: 3333
ايه الرقم المميز ده..تبييييييييع
ياآنسة هبة الرقم مميز من كتر الناس اللي واكلها الفضول من اللي بيهببه الرجالة في المطبخ ... نفس الفضول اللي بييجي للناس عشان يعرفوا الستات بتسوق عربيات ازاي .... wst::

هي هي .... آه images-66-150x150.jpg

الفاضلة Emo ...
اشكرك بصدق علي اطرائك المبالغ فيه .. و اتمني ان تعجبك طبخاتنا و ان كنت انصحك بالا تقومي بتقليدها بدون وجود سيارة اطفاء و سيارة اسعاف بالجوار ... تحياتي


نرجع بقي للطبخة ...

تاريخ المشاركة 16 November 2008 - 10:42 PM
سي السيد أمام حلة مليئة بالشرابات يغني و هو يغسلهم :
عدت يا يوم مولدي .. عدت يا ايها الشقي .. انا وهمون ... انا وهمون.... أنا سراااااااب ...
و يندمج في المقطع الأخير بصورة اوبرالية

تدخل فردة شبشب طائرة الي الغرفة مصحوبة بصوت غاضب من شباك مجاور : يا بني اتهد بقي .. حرام عليكو اللي بتعملوه فينا .. احنا حنلاقيها من الورشة اللي تحت .. و الا من الراديو... و لا منكم... الرحمة يا رب

سكوب : ما تكتم يا سي السيد ... خليت اللي يسوي و اللي ما يسواش يتنطط علينا
سي السيد : ما حدش عارف قيمتك يا سي السيد ... عيد ميلاد ايه المهبب ده .. و لا عارفين نغني و لا عارفين ناكل لقمة .. و الشرابات مش عايزة تتنيل تخلص... هو سي زفت راح يجيب الهبابة ماجي دي منين ...
عصام الذي يدخل في نفس اللحظة : سي زفت تبقي تقولها لما تبص في المراية .... مش كفاية نازل 5 ادوار و طالع زيهم ... و ووقفت بدال ابلة فولانة علي طابور العيش عشان استلف منها السمنة ...
سكوب : معلهش يا عصام .. الجدع لسه واخدله ضربة حرة مباشرة في كرامته الفنية ... من ناس ما بتقدرش الفن ...
عصام : طيب يا ابو فن .. آدي الماجي و آدي السمنة ... انجز بقي علشان انا جعت قوي
سكوب : خلصت غسيل الشرابات يا سي السيد ... محتاج الحلة عشان الشوربة
سي السيد : استني لما اشطفها كويس..
عصام : تشطفها !! ياابني انت لازم تغسلها بثاني اوكسيد الفنيك الأول .. و بعدين ما تاخد التانية يا جدع بدل القرف ده ...
سكوب : اومال الرز حنعمله فين ؟؟ يا ابني خليها علي الله .. يعني حتكون انيل من قروانة الجيش اللي يا ما طفحنا فيها... و النبي يا ابو السيد بعد ما تشطفها املاها مية و حطها عالنار خلينا نعمل الشوربة...فين الرز اللي نقيته ؟
سي السيد : عندك عالشوفونيرة جنب بيجامة عصام
سكوب : يا عصام ميت مرة قلنا نحط الحاجات في مكانها .. ابقي حط بيجامتك تحت السرير..
يفرغ سكوب الرز في الحلة و يقوم بغسله جيدآ و يتركه منقوعآ في المياه... ثم أخذ يفكر قليلآ ... و لكنه توقف عن التفكير وتناول الموبايل و طلب رقمآ ...
سكوب : ازيك يا ماما ؟؟
ينظر عصام الي سي السيد متسائلآ
سكوب : لأ .. كنت عايز اطمن عليكي و علي بابا .. كله كويس
- .............................
سكوب : طب وحياتك يا ماما .. استفسار كده عالماشي ... هو الرز بيتعمل ازاي ؟؟
عصام : قشطة
-................................................................................
................................................................................
.
يومأ سكوب برأسه علامة الفهم ....
سكوب : فهمت يا ماما ... انا كنت عارف .. بس حبيت أتأكد
- ................................
سكوب : طبعآ طبعآ ... الميه .. حآخد بالي منها
- ..........................................................
سكوب : لأ يا ستي أنا .. ربنا يخليكي ليا .... سلميلي علي بابا
و يغلق الهاتف
سي السي : ايه يا عم الشيييف ... فيه مشاكل مع الرز و لا حاجة
سكوب : ابدآ يا أخي .. مجرد استفسار .. ما تبقوش شكاكين كده ... قوللي ميه الشوربة غليت
عصام : ما هي عمالة تبقبق بقالها نص ساعة
سكوب : طب ارمي فيها الماجي بس خليها تغلي غلوة واحدة و بعدين أرفعها





Quote
هل سينجح أصدقائنا في تجهيز هذ الأكلة المعقدة ؟؟؟ هل سيشيط الرز ؟؟ هل ستنجح الشهقة؟؟؟ و السؤال الأهم ... هل ستضيف الشرابات نكهة مميزة إلي الملوخية ؟؟؟ تلك الأسئلة و جميع الأسئلة الأخري التي تدور في رؤوس الجماهير الغافرة سنجد اجابتها في الحلقة القادمة ...

:ninja:

تاريخ المشاركة 04 December 2008 - 09:33 PM
عصام : أرفعها فين ؟
سكوب : يا عصام ارفع الشوربة يعني شيلها من عالنار .. ده ايه الهم ده
عصام : آدينا رفعناها ... اعمل ايه بقي ...
سكوب : ناولني يا سي السيد الكوزبرة و التوم ...
سي السيد : انت اعمي ياللاه .. ما هم جنبك
سكوب : طب ما تزقش ... و بحركة تمثيلية اضاف التوم و الكوزبرة هاززآ كفه عدة مرات
سي السيد : تقولش ابلة نظيرة يا خي
سكوب : خليك في حالك .. ده فن يا جهلة ... ناولني بقي الملوخية يا عصام
ثم افرع سكوب الملوخية في حلة الشوربة و قام بتقليبها عدة مرات .... ثم قال لعصام .. خد بالك انت بقي من الحلة و ما تخليهاش تغلي لحد ما نعمل التقلية
سي السيد ناكشآ شعره : آن أن أأأأأأن تِش ... جات لحظة الحقيقة المطلقة .. لحظة التقلية المشطشطة ..
سكوب : يا يوسف بك وهبي دي طبخة ملوخية مش فيلم مصرع ملوخية ... فين سمنة ابلة فولانة ؟؟
عصام : ده انت خنقة يا جدع .. كل شوية فين .. فين .. فين .. هو احنا عايشين في قصر .. ما كل حاجة متنيلة قدامك اهه
سكوب : هش هش .. شوية احترام لفنان المطبخ الأوحد ... انت نسيت انا مين يا عصام ... انا
و ردد عصام و سي السيد نفس الجملة بينما سكوب يقولها للمرة الألف :

مايسترو الحلل و الصواني سكوب سحاب الأول بل الندي طرطوره ....

اضاف سكوب السمنة الي الطاسة ثم اضاف اليها بقية التوم ... و بعين الصقر اخذ يلاحظ تحول لون التوم الي اصفر خفيف ..ثم الي ذهبي .. و ما ان بدأ في الأحمرار حتي رفعه بسرعة .. فتلك هي درجة التحمير الصحيحة للثوم .... ثم قال لعصام :
حط حلة الملوخية علي الترابيزة هنا يا عص ... شوفوا يا شباب دي أهم لحظة في الطبخة .. لحظة الشهقة .. عايزكم تعملوا زفيييير طويل و تفضوا الرئة من كل الهوا اللي فيها ... و اول ما ادلق اللي في الطاسة علي الملوخية .. لازم نشهق كلنا بتركيز و ذمة و في نفس اللحظة ... ماشي ؟؟؟
سي السيد : يا ابني انت معيشنا دور نونا المجنونة بتاعت بطوط و اصحابها السحرة لما كانوا بيعملوا وصفة سرقة قرش عم دهب .. مش ناقص غير اننا نحط اجنحة وطاويط و منقار بطة عانس ... ايه الوهم ده
سكوب : و بعدييييين بقي .. حتبوظولي الطبخة .. انتو اعملوا اللي انا بقوللكم عليه و بس .. عايزين الملوخية و الا لأ
عصام : عايزينها يا سيدي عايزينها .. خليك ورا الكداب يا سي السيد لما نشوف آخرتها ...
و التف الجميع حول حلة الملوخية ... و بدأ سكوب العد التصاعدي
واحد
اتنين
اشهقوا
و في نفس الوقت شهق الجميع و تصاعد صوت واحدآ شبيهآ بهذا المؤثر الصوتي شهقة الملوخية
- صحة و عافية .. قالها عصام ساخرآ ... بس انت نسيت تحط الطماطم يا شيف
سكوب : طماطم ايه .. ايه اللي دخل الطماطم في الملوخية ؟
عصام : اومال اللي خلتني اعصرهم دول كانوا عشان ايه
سكوب : آآه دول .. ده بس عشان ارفع من روحك المعنوية و اخليك تعيش في جو الطبيخ و كدهه يعني .. حطهم بقي في التلاجة ممكن يبقوا ينفعونا في طبخة تانية ...
عصام :طبخة تانية ؟؟ روح معنوية ؟؟؟ ماشي ... ماشي ياسكوب .. ادعي انت بس ربنا ان الطبخة دي تنفع معاك .... و الا
سكوب : ايه ده .. انت بتهددني يا عص
عصام : و الا اهددك و الا حاجة يا سكوب ... خلينا في الملوخية .... نعمل ايه دلوقتي ؟
سكوب : قلب انت الملوخية و سيبها شوية عالنار بس ما تخليهاش تغلي ...

نخش بقي عالرز

se_ Elsyed
تاريخ المشاركة 05 December 2008 - 12:30 AM
متابع بكل شغت قصدي شغف

سكوبي ... ادخلي بقى على اكل العيد والفته بقى ولحمه الراس والبومبار ويااااااااااااااااااااااااااااااااااااه .... مرقه ولحمه للصباح الباكر

تاريخ المشاركة 09 December 2008 - 02:48 PM
سكوب : بقالنا اسبوع علشان نعمل حلة ملوخية أورديحي و شوية رز .. و البيه يقوللك بومبار و فتة و لحمة راس ... والنبي اتلهي يا سي السيد و خلينا نكفي علي خيبتنا ماجور ... فينك يا ام جونيور تشوفي جوزك متشحتت ازاي من غيرك ... ( و يسرح )
عصام : الملوخية غليت يا شيف
سكوب ( و هو مازال يسرح حالمآ ) : بقت بكام ؟؟
عصام : هو إيه االي بقت بكام .... بقول لك غليت .. غليت .. يعني عمالة تبقبق
سكوب ( مازال يسرح ) طب ادلق عليها الرز ....
سي السيد : يا ابني رز ايه .. هو احنا لسه عملناه من اساسه .. يا سكوب .. ما تفوق ...
سكوب يتلفت حوله : هو فيه ايه ... بتقول ايه يا سي السيد ؟؟
سي السيد : بقوللك الرز ... حنهبب الرز امتي ؟
سكوب : فين حلة الرز .. اهه .. ثم يكلم نفسه ( هي ماما قالتلي احط كام معلقة .. يالللا بالبركة ) و يضيف ملعقتين سمن ...
عصام : خِف عالسمنة يا سكوب .. فولانة مسافرة و مافيش حد حيسلفنا لحد ما حترجع
سكوب : طيب طيب.. ثم يضيف الرز المغسول و الماء .. و يقيس بأصابعه سطح الرز
سي السيد : أجبلك مقياس النيل بتاع الفراعنة ؟؟ بتنيل ايه بصوابعك ؟؟
سكوب : ماما ما وصتنيش علي حاجة قد موضوع الميه ده ... الأول صباعين ميه فوق الرز .. و بعدين قالتلي أوعي يا سكوب الرز يحتاج ميه و ينشف ...
و أنتظر قليلآ و ما ان بدأ الماء في التبخر حتي اضاف كوباية ميه تانية .. ثم وطي النار .. و وضع الغطا علي الحلة ... و انتظر ... و كل فترة يرفع الغطا و يطمأن علي مستوي الميه ... و ما ان يتشربها الرز .. حتي يضيف كوباية أخري ... و هكذا ... حتي وصلت مرحلة لم يعد الرز يفعل أي شيء فلقد وصل الي المرحلة التي يطلق عليها كيميائيآ مرحلة التشبع ... و انقسمت الحلة الي جزئين .. النصف السفلي به الرز .. و النصف علوي به ماء ... و هنا كسا القلق وجهه
عصام بريبة : فيه حاجة يا سكوب ؟؟
سكوب : لأ لأ .. كله تمام .. اخبار الملوخية ايه ....
عصام يرفع غطا الحلة و يدقق قليلآ ثم يقول : مش عارف .. بس اكيد دي مش ملوخية
يقترب سكوب و سي السيد من الحلة : و في داخلها عملية غليان متصاعد من مكوناتها التي انقسمت بدورها الي جزئين .. عجينة ملوخية في القاع .. و مياه مشربة بالماجي و الطشة علي السطح
يصيح سكوب غاضبآ : ايه ده يا عصام .. انا مش قلتلك ما تخليهاش تغلي .. أهه الملوخية سقطت
عصام : يا نهار اسود ... يعني ليها ملحق و الا نِسُك علي الغدا النهارده .. انا مش قلتلك من ييجي تلت ساعة ان الملوخية غليت يا بني آدم انت .. ما قلتليش ليه اشيلها ...
يرفع سكوب الحلة بتوتر .. و يبدأ في التقليب .. و لكن ما ان تهدأ المكونات .. حتي تنفصل مرة أخري .. و تقبع عجينة الملوخية في القاع و الشوربة الصناعية علي السطح ... يتركها سكوب و يتوجه الي حلة الرز .. و هناك الأمر لا يختلف كثيرآ .. الفرق ان الرز في القاع تحول الي كتلة واحدة لا يجدي معه التقليب ... فأفرغ سكوب المياه .. ثم قلب الحلة فوق طبق واسع فنزل الرز كتلة واحدة ...
يتوتر الجميع و تعلو مسحة من الحزن وجوههم و بالأخص عصام الذي كان يمني نفسه بالملوخية أخيرآ ....

يدق الباب
سي السيد : هو احنا ناقصين ... و عهد الله لو كان المعلم حنفي عايز الأيجار حلبسه حلة الملوخية ...
يفتح الباب .. و هناك يجد موديست مبتسمآ ابتسامة واسعة
سي السيد : كِملت ... ازيك يا مووود ... خير ؟؟
موديست بلجلجة و في نفس الوقت ينظر جهة المطبخ بفضول : لأ يا شباب .. اص .. اصل .. آه .. أصل حماتي راحت تلعب مع الزمالك فالمفاتيح طارت ... و انا لسه راجع من الشغل .. فقلت آجيي استني معاكم شوية .. و كده يعني
سي السيد : اتفضل يا عسل .. ده حتي باين ان حماتك بتحبك فعلآ ...
موديست : ليه .. اوعوا تكونوا بتتغدوا و الا حاجة .. انا حقعد استني الولاد شوية و اول ما يرجعوا حاقوم علي طول ..
و توجه مباشرة الي مائدة الطعام و لف الفوطة حول رقبته .. و امسك بملعقة ..
عصام : يا سلام .. و دي تيجي... ده حتي سكوب تفوق علي نفسه النهارده ...
و ابتدوا في وضع الغدا علي المائدة ...
موديست ناظرآ الي الأطباق : هو الغدا ايه النهارده
سكوب : ملوخية و رز
موديست : طب ايه اللي جاب صينية الكيك البيضا دي هنا
سي السيد : دي مش كيكة يا مود .. ده الرز .. اغرفلك كام معلقة
عصام : تقصد خدلك خرطة .. ما هو ما ينفعش تتغرف
موديست : و علي كده .. اللي في الحلة ام قاع أخضر دي المفروض يكون الملوخية ...
سي السيد : اسم الله عليك ...
و بهدؤ شديد يضع موديست الملعقة علي المائدة .. و ينزع الفوطة من رقبته ... و يتجه الي الباب قائلآ :
طب يا جماعة .. دايمآ عامر ... انا افتكرت ان المفاتيح كنت سايبهم عند عبده المكوجي ... متشكرين عالعزومة أوي
سكوب : خدني في سكتك يا مووود ... انا نسيت ان عندي معاد مع عم لمعي عالقهوة النهارده ...

و لكن في طريقهما الي الخروج وقف سي السيد و عصام و الشرر يتطاير من وجوههم....
سي السيد : علي فييييييييين ..... دي تيجي ... اومال الطبيخ ده مين اللي حياكله ...
سكوب : حطه في التلاجة يا سي السيد .. و بالليل نبقي نتعشي بيه .. ده حتي الطبيخ البايت بيبقاله طعم احلي ...
يرفعه سي السيد من قفاه و يهبده علي المائدة .. بينما موديست ينظر الي عصام ثم يرفع يداه مهدئآ ... و يتجه مرة أخري مكانه ...

يقسم عصام الرز الي نصفين .. و يضعهما في اطباق موديست و سكوب ... بينما "يدلق" سي السيد السائل الأخضر الموجود في الحلة الأخري مباشرة في اطباقهما ... ثم يهز رأسه باسمآ .. قائلآ : بالهنا و الشفا

سكوب : هو بس يمكن الشرابات اللي عملت كده في الملوخية يا جماعة
موديست في رعب شديد : شرابات ؟؟
عصام و سي السيد صائحين بغضب : إطفحو

و ابتدأ اصدقائنا في الأكل ....

عصام
تاريخ المشاركة 20 December 2008 - 06:57 PM
أنا ازاى ما شفتش الموضوع دا قبل كدا :winner:


الظاهر .. إن

النضارة اللى حيلتى باظت ... باااااااااااااااااااااااااااظت

التضارة اللى حيلتى باظت .... بااااااااااااااااااااااااااااااظت

النضارة اللى حيلتى باظت ....... باااااااااااااااااظت

بااااااااااااااااااااااااظت


Quote
وأهل البلد شايلين المشاعل وماشيين ورايا وشادية بتغنى يا عينى ع الولد